Luka 17
17
1Ma ya volera avegidzwi veve, Ubwiyangu bwelikigitala si bu nyala kuvula kuudza, navutswa ubudamano bu veye ku uyu wa bu leta 2Nu bulahi ku uyu na a vikwa lugina mu ligoti lilye, na a tebwa mu inyanza, kuvita ni yikigitalidza mulala ku yava avakekeke. 3Mwelinde mwinye avene: amwavo wowo ni yona ku ive, u mu gaye; naye ni yeganira, u mu samehe. 4Kandi na a kwona hali katanu na kaviri ku lidiku lilala, kandi ni yirana hali katanu nakaviri, na a vola, Nzeganiye; u mu samehe.
5Avatumwa va volera Mwami, U ku mede lisuuvira lyetu. 6Mwami ya va volera, Ni mu veye nelisuuvira li leng'ana nolugutsa lwelisatsi, nkano mu volera mukuyu yigu, Kunyuka hano u simikwe mu inyanza; nagwo nkano gwa ka mu hulira. 7Navutswa u li ha ku mwinye, u veye nomutugwa u lima neligembe lyetsing'ombe, kinga waya magondi, a la nyala kumuvolera lwa yinuka, Ha mba, nonoho wikale u lie? 8Navutswa a la mu volera, U nombere vyokulia, ndie, kandi webohe u mbereridze, nduke kulia nokunwa; lwanyima ive kandi u la lia kandi u la nwa? 9A volera mutugwa uyo, yee ndiyo, kigira ya kola kuli ya volerwa? 10Kandi mwinye ndiyo, lwa mu li mala kukola vindu vyosi vya mu volerwa, mu vole, Kwinye ku veye avatugwa ava ta kola vyambeti; kigira ku koli vutswa vya ku dukira kukola.
11Lwa va li ku inzira yokutsia Yerusalemi, ya vitira hagati ha Samaria ne Galilaya. 12Lwa yenya kwingira mu kadala kalala, ya vugana na vandu likumi avagere, va singira ihale: 13ni va hanzuka, ni va vola, Yesu, Mwami, u ku vererere. 14Lwa ya va lola ya va volera, Mu tsie kwemannya ku vasalisi. Kuna ngwa lwa va li ku inzira va takaswa. 15Mulala kuvo, lwa ya lola na a takaseywi, yirana, ni yidzominya Nyasaye nomwoyo munene; 16yadza na a gwa mammama ha virenge vivye, na a mu santidza: kandi ya li Musamaria. 17Yesu ya tivula na a vola, Si va takaseywi vosi likumi? Navutswa avatanu na vane va veye ha li ki? 18Si ha veye navandi virana kuha Nyasaye ubukumi, navutswa mugeni uyu? 19Kandi ya mu volera, Vuka, u tsie: lisuuvira lilyo li ku honnyi.
20Vafarisayo, lwa va mu teva inyinga yobwami bwa Nyasaye bu la duka, ya va tivulira na a vola, Ubwami bwa Nyasaye si budza nobuloleki: 21kandi si va li vola, Henza hano kinga, Ira kigira ubwami bwa Nyasaye bu veye hagati henyu.
22Kandi ya volera avegidzwi veve, Amadiku ga ladza lwa mu lenya kulola lidiku lilala ku madiku go Mwana wa Adamu, si mu li li lola. 23Kandi va la mu volera, Henza, ira Henza, hano mu ta twula ha mu veye, kandi mu ta londa: 24kigira kuli luheni lu hema ha luvega lulala hasi heligulu, ma lu tsia kuduka ha luvega lundi hasi heligulu; ni ndiyo Mwanz wa Adamu a li va ku lidiku lilye lyokuudza. 25Navutswa agembiri ga mu dukira kugwi rwa vindu vinyingi, nokwambakanwa nelikula yili. 26Kuli mu madiku ga Nuhu, kandi ga la va ndiyo mu madiku go Mwana wa Adamu. 27Va lia, ni va nwa, ni va kwa ni va sererwa, kuduka ku lidiku lya Nuhu yingira mu bwato, namadzi manene gadza ni ga va hila vosi. 28Kandi kuli mu madiku ga Loti; va lia, ni va nwa, ni va gula, ni va gamannya, ni va taga, ni vombaka; 29navutswa ku lidiku lya Loti ya twula mu Sodoma ya kupa imbula yo muliru neyekibiridi ya twula migulu, na ya mala vosi. 30Kandi ga la va ndiyo mu madiku go Mwana wa Adamu lwa a li lolekidzwa. 31Ku lidiku yilyo, u li va ku inyumba igulu nevindu vivye vi veye mu inyumba, a tika mba kuvivugula: kanoi uyu u li va mu mulimi a tirana. 32Mwidzulitse mka Loti. 33Kuvo vosi wenya kuhonnya liva mwoyo lilye a la li gotidza: navutswa u li li gotidza a la li honnya. 34Inze mmu volera, Ku budiku yibwo vaviri va la va ku kitali kilala; mulala a la vugulwa, nowundi a la lekwa. 35Vaviri va la sia halala; mulala a la vugulwa, nowundi a la lekwa. 36Vaviri va la va mmulimi, mulala a la vugulwa, na wundi a la lekwa. 37Navo va tivula ni va mu volera, Ha li ha, Mwami? Kandi ya va volera, homubiri gu veye tsisote tsi la vuganira ho.
Currently Selected:
Luka 17: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967
