Luka 20

1Ku lilala ku madiku zana, lwa yegidza avandu mu litempeli, ni yilwadza ivangeli, vadza kuye avasalisi vanene navang'odi halala navakulundu; 2ni va vola, ni va mu volera, U ku volere: U kola vindu yivi netsingulu ki? Kinga ibwaha wa ku ha tsingulu yitsi? 3Naye ya tivula na a va volera, Inze kandi nda mu teva likuva lilala; na mwinye mu mbolere: 4Libatidza lya Yohana, lya twula migulu naho ku vandu? 5Navo va volerana avene, ni va vola, Ni ku vola, Migulu; a la vola, Kigira ki mwinye mwa vula kumu suuvira? 6Navutswa ni ku vola, Ku vandu; avandu vosi va la ku lasa magina: kigira va bugirira Yohana ya li muprofeti. 7Kunangwa va tivula, Si ku nyala kuvola ha ya twula. 8Yesu ya va volera, Kandi inze si mmu volera tsingulu tsya nkolera vindu yivi.

9Kandi ya tanga kuvolera avandu, na a kupa lugano yilu: Mundu ya simika kizabibu, na a ha ava mu limira, na a tsia mu kivala kindi tsinyinga tsinyingi. 10Kandi ku muhiga, ya tuma mutugwa va mu he ku makuyu gekizabibu: navutswa avalimi va mu kuya, ni va mu kunga vutswa. 11Kandi ya tuma wundi mutugwa: uyu kandi va kuya ni va mu kupidza kivi ligali, ni va mu kunga vutswa. 12Kandi ya tuma wa kola vavaka: uyu kandi va mwata tsing'oma, ni va mu ta kyova. 13Mwami wekizabibu ya vola, Nda kola ndi? Nda tuma mwana wange wa nyanza; mbula va la mu tia. 14Navutswa avalimi lwa va mu lola, va volerana avene, ni va vola Uyu a la lia miyandu; ku mwiite, miyandu gyi duke kuva gyetu. 15Va mu twulidza mu kizabibu ni va mwiita. Kigira yaga mwami wekizabibu a la va kola ndi? 16A ladza kwiita avalimi yava, kandi a la ha avandi mulimi. Navo lwa va ga hulira, va vola, Yaga ga ta va. 17Navutswa ya va henza na a vola, Ni kindu ki yaga ga ng'odeywi:

Ligina lyavombaki vambakana,

Yili lya lombwa kuva mutwe gwolwiga?

18Ku vosi u li gwa ku ligina yilyo a la vunika; navutswa wa li la gwira, li la mu duvulannya kuli lugukyi.

19Kandi avang'odi navasalisi vanene venya kumugumira isaa zana; navutswa va tia avandu: kigira va manya ya kupa lugano yilu kuvo. 20Ma va mu linda, ni va tuma avaluti, avekola kuva avalungi, va duke kuvugula amakuva gege, va duke kumuzama ku serikale noku tsingulu tsyogovuna. 21Ni va mu teva ni va vola, Mwegidzi, ku manya ive u vola nokwegidza bulungi, kandi si u bugirira ligondo lyomundu, navutswa ligali wegidza inzira ya Nyasaye. 22Nu bulahi kwinye ku he Kaisari ubushutu naho mba? 23Navutswa ya lola ubugadi bwavo, na a va volera, 24Mu mmannye ishilling. I veye nekiiwananyi namang'oda vya bwaha? Navo va mu volera, Vya Kaisari. 25Kandi ya vola, Mu he Kaisari vindu vya Kaisari, kandi mu he Nyasaye vindu vya Nyasaye. 26Navo si va nyala kugumira livola yili imbiri wavandu: ni va genya litivula lilye, ni va kiring'ana.

27Avalala ku Vasadukayo ava vola si ha veye nelisimuguka; vadza kuye; 28ni va mu teva, ni va vola, Mwegidzi, Musa ya ku ng'odira, amwavo womundu na a kudza na a veye nomukali, na a kikiri kwivula, amwavo wewe yirannye mukali, yivu lire amwavo wewe avana. 29Ha li avamwavo vatanu na vaviri vomu ndu mulala: wambiri ya leta mukali, ma na a kudza na a kikiri kwivula; 30kandi wa kaviri ya mu hila: 31kandi wa kavaka ya mu hila; ga li ndiyo ku vosi vatanu na vaviri, va kudza bugira avana. 32Lwanyima kandi mukali mwene ya kudza. 33Kunangwa mu lisimuguka, a la va mukali wa u li ha? Kigira ya li mukali wa vatanu na vaviri. 34Yesu ya va volera, Avana venyinga yiyi va kwedza ni va sererwa: 35navutswa yavo ava volangwa kudukana kunyola inyinga yeyo nelisimuguka mu vakudzi si va kwedza, kandi si va sererwa: 36kigira si va nyala kukudza kandi: kigira va leng'ana netsingelosi: kandi va veye avana va Nyasaye, va veye avana velisimuguka. 37Navutswa avakudzi va simugukidzwa kali Musa ya vuula mu makuva gakasala, lwa ya langa Mwami, Nyasaye wa Abrahamu, Nyasaye wa Isaka, Nyasaye wa Yakobo. 38Navutswa si a li Nyasaye wavakudzi, navutswa wava veye mwoyo: kigira vosi va veye mwoyo kuye. 39Avalala ku vang'odi va tivula ni va vola, Mwegidzi, u voye bulahi. 40Kigira si va lema mwoyo kandi kumuteva kali hakuzu.

41Kandi ya va volera, Va vola ndi Kristo a veye mwana wa Daudi? 42Kigira Daudi mwene a vola mu kitabu kya Zaburi,

Mwami ya volera Mwami wange,

Wikale ku mukono gwange mulungi,

43Nduhe nduke kukola avasigu vovo va ve kisako kyevirenge vivyo.

44Ku yaga Daudi a mu langa Mwami, kunangwa a veye ndi mwana wewe?

45Kandi ha vandu vosi va hulira, ya volera ho avegidzwi veve, 46Mu gelihe ku vang'odi, ava yanza kugendera tsingubo tsintambi, kandi ava yanza kuchelidzwa mu vitu, nevisako vinene mu masomero, na ha bunene mu lilia; 47ava lia tsinyumba tsyavakunzakali, kandi va saala namakuva manyingi ku bugadi. Yava va la nyola likalagirwa linene.

Currently Selected:

Luka 20: MBE

Highlight

Copy