O LUKAS 23
23
O Yesus o Pilatus aihimangoka
(Mat. 27:1-2, 11-14; Mark. 15:1-5; Yoh. 18:28-38)
1Mata-mata o juru hakimi yohima-himanga gënanga imaoko daha iwiao o Yesus o Pilatusika. 2Genangoka önanga yomuläenge iwikalaki Unanga. Onanga yato, ”Ngomi miwimäke o nyawa nënanga wäao o kawaha o ngëkomo ihowo-howonika. Unanga wahigaro o nyawa hupaya uha yofangu o soungu ma Kaisarika, hababu wato ünanga ganga o Kristus, o koano moi.”
3De o Pilatus wïleha o Yesusika, ”Igoungu Ngona o Yahudioka manga koano?”
O Yesus wohaluhu, ”Hokogënanga anidemo.”
4O Pilatus wätemo o imam-imam manga häekika, deʼ o nyawa yowöe-wöe gënanga, ”O nyawa nënanga Ai howono kamoiö de tamäkeua la yakunu hïhukumu Unanga.”
5Mä onanga iholoi yogegotoli, ”De aidodötoko Unanga wahigaro o Yudea madaeraoka manyawa la yolawani; madodihiraka o Galilea madaeraoka, deʼ o örahanënanga yadonoli nenangino.”
O Yesus o Herodes aihimangoka
6Maöraha o Pilatus woihene gënanga, ünanga woleha, ”Mode o nyawa nënanga o Galilea manyawa?” 7Iwihi ngahuoka o Yesus aiahali o Herodes wakokuaha madaeraino, o Pilatus wihidingoto o Yesus o Herodesika, kiaka o öraha gënanga unangö o Yerusalem mabereraka. 8O Herodes duru wosanangi wïmäke o Yesus, karana madekanoka ünanga woihene mangale o Yesus deʼ woigo wïmäke. Unanga wönganono yakunu wahakihi o Yesus wodiai ihëra-hëranga. 9Hababu gënanga o Herodes wïleleha o loleha mangöe Unangika, mä o Yesus mata-mata wöbaluhua. 10O imam-imam mangahäeke deʼ o agama maguru-guru onangö yohimangika genangoka deʼ iwikalaki o Yesus kahagiria. 11O Herodes deʼ aitentara imahigogule deʼ iwihikauku o Yesus, daha iwihinöa o gikiri yoago-agomo manga pakeanga, ipaha Unanga iwihidingotoli o Pilatusika. 12O wange genangö o Herodes deʼ o Pilatus imahobatokali, mahira imahaturü.
O Yesus aihukumanga yaputuhu iwihohonenge
(Mat. 27:15-26; Mark. 15:6-15; Yoh. 18:39–19:16)
13O Pilatus wätoomu o imam-imam mangahäeke, o tutuda-tutuda, deʼ o kawaha, 14daha wätemo onangika, ”Ngini niwiao o nyawa ne Unanga ngohino deʼ niahetongo Unanga wäao o nyawa o dorouika. O örahanënanga niahimangoka ngohi titailakoka Unanga, mä ngohi hakali-kali tamäkeua kao dorou moiö de kiaka ngini niwikokalakioka. 15Hokogenangoli o Herodes aidamäke, hababu unangö o Yesus gënanga wihidingotokali ngomino. O nyawa ne Unanga kaokia naga moiö de kowodiaiua ipatutu hïhukumu de o hohonenge mahukumanga. 16Karana gënanga ngohi aha tïgohara Unanga ipaha tïlapahi.”
[17O Paskah marameanga higeto-getongo, o Pilatus kokiani wälapahi o bui manyawa imatëngo mangale o kawaha.] 18O nyawa mata-mata imatotoomuino genangokadau yopöaka, ”Unanga niwitoma! O Barabas niwilapahi mangale ngomi!” (19O Barabas iwi bui karana o huru-hara idädadi o bereraka deʼ karana o doma.)
20O Pilatus womau wïlapahi o Yesus, hababu gënanga ünanga wätemo wohigali mamoioli o nyawa yowöe-wöeika gënanga. 21Mä onanga yopöaka, ”Unanga niwisalib! Unanga niwisalib!”
22Daha wohigali mahangeoka o Pilatus wopöaka onangika, ”Mä okia Aihowono? Kao howono moiö de ipatutu hïhukumu de o honenge mahukumanga ngohi kota mäkeua. Ngohi aha tïgöhara Unanga, daha tïlapahi.”
23Mä onanga gila-gila yopöaka genangö manga kuata o Yesus kokiani iwisalib. Deʼ mabaha mangaböaka gënanga ihasili. 24Daha o Pilatus wïgelenga o honenge mahukumanga o Yesusuku imoteke de o nyawa mangangöe gënanga manga gogahoko, 25deʼ wïlapahi o Barabas kiaka önanga yogahoko, enagënanga o nyawa iwi bui-bui karana o huru-hara deʼ o doma. Ipaha o Yesus wihilapahi onangika la iwidiai imoteke toönanga manga mau.
O Yesus iwi salib
(Mat. 27:32-44; Mark. 15:21-32; Yoh. 19:17-27)
26O Yesusö önanga iwiao. O ngëkomo mahoanoka, önanga imakamäke de o nyawa womatëngo airomanga o Simon, aiahali o Kirene mabereraino, womau wowohama o kotaika. Onanga iwitagoko ünanga, daha ünanga iwipakisa wamoku o salib magota gënanga o Yesus aiporetino.
27Mangangöe o nyawa imädagi yanïki o Yesus aiporetino – manga hidogoronaka nagaö yamuruono naga o ngongoheka. O ngongoheka gënanga iwïgari deʼ iwïdodora o Yesus. 28Mä o Yesus womälega onangika deʼ wätemo, ”O Yerusalem mangongoheka! Uha Ngohi nihïgari. Nio gari niadiri mahirete deʼ niangoha-ngohaka. 29Hababu maöraha aha iböa o nyawa aha yotemo, ’Duru youtumu o ngongoheka komaiwa o ngohaka ihiao-ao, kiaka komaiwa de manga ngohaka deʼ komaiwa o ngohaka magil̄au yahuhu!ʼ 30#Hos. 10:8; Him. 6:16 O öraha gënanga o nyawa aha yatemo o l̄okuika, ’Nimï tapal̄u ngomi!ʼ Deʼ o dodoporonika, ’Nimï pohuku ngomi!ʼ 31Hababu nako o gota mangangoika o nyawa yodiaioka hoko nënanga, okiali aha önanga yodiai de o gota itotoolengokaika!”
32Nagaoli o nyawa yahinoto mahomoa – yahinotö o nyawa madorou – önanga yäao la yähukumu yähohonenge kamamoi de o Yesus. 33Maöraha yadono o ngï yaheto-hetongo ”O häeke makabelanga”, önanga iwisalib o Yesus deʼ yahinoto o nyawa madorou gënanga – womatëngo o Yesus ainirakoka deʼ womatengoli Ai higiloka. 34#Mzm. 22:19 De o Yesus wohubayanga, ”Ama, önanga nahi apongo! Onanga ihi orikua okia önanga yodiai.”
O Yesus aipakeanga genangoka önanga imäkokeregu imoteke o undi. 35#Mzm. 22:8 Mangangöe o nyawa imaokoino genangoka de imädomina, o Yahudioka mangatutuda iwihohedu deʼ yotemo, ”Unanga wahihalamatoka o nyawa mahomoa; abeika o örahanënanga wohihalamati Aidiri mahirete, nako Unanga igou-goungu ma Koano Wohihohalamati ma Jou Madutu aingongiriki!”
36 #
Mzm. 69:22
O tentara-tentaraoka ma iwihohedu Unanga. Onanga yaino deʼ iwihidöaka o angguru magogiohiki Unangika 37inoli yato, ”Nako Ngona o Yahudioka manga koano, nohihalamati Ani diri!”
38O Yesus aisalib magota mal̄okuil̄e ihitulihi o demo-demo nënanga: ”Nënanga o Yahudi ma Nyawa manga Koano.”
39Manyawa madorouoka womatëngo iwisosalib genangoka wihikauku o Yesus. Unanga wotemo, ”Koigoungua Ngona ma Koano Wohihohalamati? Aa, nohihalamati Anidiri deʼ ngomi!”
40Mä manyawa madorouoka womatengoli witaaere aidodiawo gënanga, wato, ”Mode ngona nimodongua ma Jou Madutu? Ngona kamamoi inihukumu inihohonenge hokä Unanga. 41Duga-duga nanga hukumanga inähinoto igoungu imadäene de tongone nanga manarama. Mä Unanga hakali-kali kowahowonua!” 42Daha ünanga wotemo, ”Yesus nohihininga ngohi, nako Ngona noböa hokä o Koano!”
43”Nongaku,” o Yesus wïtemo unangika, ”O wange nënanga aha ngona dede Ngohi o Firdausoka.”
O Yesus wohonenge
(Mat. 27:45-56; Mark. 15:33-41; Yoh. 19:28-30)
44Mudukua o takoro ngimoi de hinoto o wange ikorona, o wange malako itararonua, deʼ o berera mata-mataika idadi ihuhutu duru hiädono o takoro hange bimaoa. 45#Kel. 26:31-33 O guba yanü nuneuku ma Jou ai Tau magoronaka, ikakihi ibelaka hinotoka. 46#Mzm. 31:6 Daha o Yesus wopöaka de Ai ilingi makuatil̄e, ”Ama! Anigiama mahoatika Ahi diri tohilapahi!” Wotemo hoko gënanga ipaha, Unanga wohonenge.
47Maöraha o tentaraoka madoomu manga baluhu wamäke okia i dädadioka, ünanga wihigiriri ma Jou Madutu. Daha ünanga wotemo, ”Igoungu, Unanga wahowonua!”
48O nyawa manga ngöe yaino-ino yototomina genangino, yamäke okia naga idädadi. Onanga mata-mata yolio de manga hininga duru imatoduba. 49#Luk. 8:2-3 Deʼ mata-mata imakokanäko de o Yesus, de o ngongoheka iwinöninïki Unanga o Galilea de yaino, imaokoino magurutika, deʼ yamäke mata-mata gënanga.
O Yesus iwilungunu
(Mat. 27:57-61; Mark. 15:42-47; Yoh. 19:38-42)
50-51Naga womatëngo airomanga o Yusuf, aiahali o Arimatea mabereraino o Yudea madaeraoka. Unanga o nyawa maoa de o nyawa iwihoromati, deʼ wödodamä maöraha ma Jou Madutu womuläenge wopareta hokä o Koano. Ngarokö ünanga o Agama ma Juru Hakimi magegetongo, mä unanga wohimotekua o Juru Hakimi manga manarama madodagi de manga putuhu gënanga. 52O Yusuf nënanga woiki wïhimanga o Pilatus deʼ wogahoko hupaya o Yesus aimayeti ihidöaka unangika. 53Ipaha ünanga o saliboka de wohiguti o Yesus aimayeti, daha wahawoino de o mayeti mahahawo o hutara. Iböto gënanga ünanga wakelenga o lungunuku, kiaka o lungunu gënanga o doporono i hohelewo magoronaka – o lungunu gënanga komaiwahi yapäke. 54O wange gënanga o Jumati mawange; deʼ o Yahudioka manga Puji mawange ngade imuläenge.
55O ngongoheka yaino-ino de o Yesus o Galileaino iwinïki o Yusuf deʼ yamäke o lungunu gënanga. Onangö yamäke sarakia o Yesus iwikelenga o lungunu magoronaka. 56#Kel. 20:10; Ul. 5:14 Ipaha önanga yolio daha yoturunga o rampa-rampa deʼ o minya mabou-bounu la o Yesus aimayeti yaminya.
O Yahudioka manga Puji mawangeoka, önanga imatogumu yomanarama mangale yamoteke o agama matita.
Currently Selected:
O LUKAS 23: TLB
Highlight
Share
Copy
Want to have your highlights saved across all your devices? Sign up or sign in
