Juan 4
4
Samaria warmiwan Jesús parlanqan
1Juan bautizanqanpita mas atskaq runakunata Jesús bautizaykanqanta y discïpulunkuna mas atskaq kayanqantam fariseukuna musyayarqan. 2(Jesúsqa manam kikintsu bautizarqan, sinöqa discïpulunkunallam.) 3Fariseukuna tsaynö parlayanqanta musyarmi Judeapita Galileaman Jesús kutirqan.
4Galileaman chäyänanpämi Samariaparä päsayänan karqan. 5Tsaynö aywarmi Sicar markaman chäyarqan. Tsay markaqa Jacob tsurin Joséta qaranqan chakrapa lädunchömi kaykan.#Gén. 33.19; Jos. 24.32. 6Tsaychömi Jacob uchkutsinqan pözu kaykan. Pullan junaqnöna kaykaptinmi tsay pözuman chaykur ajyashqa Jesús jamaskirqan. 7Tsayman Samaria warmi yakukuq chaykuptinmi Jesús nirqan: <<Yakuta qaraykallämay>>.
8(Jesús jamanqanyaqmi discïpulunkuna mikuy rantiq markapa aywayarqan.)
9Tsay warminam nirqan: <<Israel runa kaykarqa ¿imanirtä Samaria warmi kaykaptï yakuta mañakamanki?>>
Samaria runakunawan Israel runakuna chikinakuyaptinmi tsaynö nirqan.
10Jesúsnam nirqan: <<Tayta Diospita imata chaskinaykipä kanqanta musyar y noqa pï kanqätapis musyarqa qammi yakuta mañakamankiman. Mañakamaptikiqa kawatsikuq yakutam qaräman>>.#Isa. 44.3; Jer. 2.13; 17.13; Juan 7.37-39.
11Tsay warminam nirqan: <<Taytay, kay pözuqa jondum. Jipinaykipä imaykipis mana kaykaptinqa ¿maypitatä tsay kawatsikuq yakuta jipimunkiman? 12Unay castantsik Jacobmi kay pözuta uchkutsirqan. Kay pözupitam ashmankunapis, tsurinkunapis y kikinpis upuyarqan. Tsay yakupita mas alli kaq yakuta qaramänaykipä manam paypita mas poderyuqtsu kanki>>.
13Jesúsnam nirqan: <<Kay pözupita yakuta upuq kaqqa yapaypis yakunanqam. 14Peru noqa qaranqä yakuta upuq kaqmi sïqa imaypis yakunanqanatsu. Tsay qaranqä yaku shonqunchö pukyunö kaptinmi imayyaqpis kawanqa>>.
15Warminam nirqan: <<Taytay, imaypis mana yakunänäpä ni kay pözuman manana kutimunäpä tsay yakuta qaraykallämay>>.
16Jesúsnam nirqan: <<Ayway runaykita qayamuy>>.
17Niptinmi warmi nirqan: <<Taytay, manam runä kantsu>>.
Tsaynö niptinmi Jesús nirqan: <<Rasun kaqtam nimarquyki. 18Qamqa pitsqa runawanmi täyarquyki. Kanan taykanqayki runapis manam runaykitsu. Tsaymi runayki mana kanqanta nimarqa rasun kaqta nimarquyki>>.
19Warminam nirqan: <<Taytay, Diospa profëtanmi kanki, ëllu. 20Noqakunapa unay castäkunaqa taqay jirkachömi Tayta Diosta adorayaq. Peru qamkunaqa Jerusalénchörä adoranantsikpä kanqantam niyanki>>.
21Jesúsnam nirqan: <<Rasunpam nï: Taqay jirkaman ni Jerusalénmanpis mana aywaypa Tayta Diosta adorayänaykipä tiempu chaykämunnam. 22Qamkunaqa Diosta adorarpis willakuyninta manam musyayankitsu. Salvakuq runa Israelpita kaptinmi noqakunaqa willakuyninta musyayä.
23<<Tiempu chämushqanam Tayta Diosta rasunpa adoraqkuna Espíritu Santu munanqannö llapan shonqunkunawan adorayänanpä. Tsaynö adoranantsiktam Tayta Dios munan. 24Tayta Diosqa Espïritum. Tsaymi payta adoraqkunaqa Espíritu Santu yanapaptin llapan shonqunwan adorayänan>>.
25Tsay warminam nirqan: <<Taytay, Cristo shamunanpä kanqanta musyämi. Pay shamurnam tsaykunata tantiyatsimäshun>>.
26Jesúsnam nirqan: <<Tsay shamunanpä kaqqa noqam kä>>.
27Discïpulunkuna kutiykur warmiwan parlaykaqta tariskirmi pasaypa espantakuyarqan. Peru manam mayqanpis tapuyarqantsu imata parlayanqanta o imata tapunqantapis.
28Warminam uyllunta dëjaskir markaman aywar runakunata willarqan: 29<<Juk runam pözu kaqchö kaykan. Paymi nimashqa imanö kanqätapis. Aku rikaq aywashun. ¿Manatsurä Tayta Dios mandamunqan Cristo?>>
30Tsaynö niptinnam Jesús kaykanqan kaqman runakuna aywayarqan. 31Manarä chäyaptinmi discïpulunkuna Jesústa niyarqan: <<Rabí, imallatapis mikuskishunrä>>.
32Jesúsnam nirqan: <<Noqapa mikuynïqa mana reqiyanqayki mikuymi>>.
33Tsaymi discïpulunkuna kikinkunapura niyarqan: <<¿Pirä mikuynin apamushqa?>>
34Tsaynö yarpäyanqanta tantiyarmi Jesús nirqan: <<Noqapa mikuynïqa mandamaqnï nimanqanta cumplinqäyaq ruranqämi. 35Musyayankim runakuna niyanqanta: <Murunqantsikpita chusku killatarämi cosechantsik>. Tsaynö niyaptinpis noqam nï: Rikayay. Chakrakunachö mikuykuna poqushqanam. Qorinantsikpä listunam.#4.35 Poqushqa mikuykunataqa Jesús iwalatsirqan payman criyikuyänanpä listu kaykaq runakunamanmi. 36Tsay cosëchachö aruqkunam runakuna mana ushakaq kawayta tariyänanpä aruyanqa. Tsaynö aruyanqanpitam Tayta Dios päganqa. Tsaymi murukuqpis y cosëcha qoriqpis kushikuyanqa.#4.36 Muruqkuna y cosëcha qoriqkunaqa Diospa willakuyninta willakuqkunam kayan. Murukuqkuna willakuptinqa manam criyiyanrätsu. Cosëcha qoriqkuna willakuyaptinnam criyiyan.
37<< <Juk murunqantaqa juknam cosechan> niyanqanqa rasunpam kaykan. 38Tsaynöllam qamkunatapis mandarqü juk murunqanta cosechayänaykipä. Tsaymi wakinkuna ñakar muruyanqanta qamkunana qoriyämunki>>.
39<<Imanö kanqätapis Jesúsmi nimashqa>> nir tsay warmi willakuptinmi atskaq Samaria runakuna Jesúsman criyiyarqan. 40Tsaymi Jesús kaqman chaykur paykunawan quëdananpä rugayarqan. Tsaynö rugayaptinmi paykunawan ishkay junaq quëdarqan. 41Tsaychö willaptinmi mas atskaq runakuna Jesúsman criyiyarqan. 42Tsay warmitam niyarqan: <<Manam qam niyämanqallaykipitatsu criyiyä, sinöqa kikïkuna wiyarmi llapan runakunata salvananpä Cristo rasunpa kanqanta musyayä>>.
Autoridäpa tsurinta Jesús allïtsinqan
Mateo 8.5-13; Lucas 7.1-10
43Ishkay junaq päsaskiptinnam Galileaman Jesús kutirqan. 44Jesús ninqannöllam Tayta Diospa profëtanta markanchöqa chaskiyantsu.#Mat. 13.57; Mar. 6.4; Luc. 4.24. 45Tsaynö kaptinpis marka mayinkuna Pascua fiestapä Jerusalénman aywar milagrukunata ruranqanta rikashqa karmi#Juan 2.23-24. payta chaskiyarqan.
46Galileachö kaykarnam Caná markaman Jesús yapay kutirqan. Tsaychömi yakuta vïnuman puntata tikratsirqan.#Juan 2.1-11. Capernaúm markachönam reyta yanapaq juk autoridäpa tsurin qeshyaykarqan. 47Judeapita Galileaman Jesús chanqanta musyaskirmi tsay autoridä rugakuq aywarqan. Chaykurmi wayinman aywaykur antsa qeshyaq tsurinta allïtsinanpä rugakurqan. 48Jesúsnam nirqan: <<Milagru ruranqäta mana rikarqa qamkuna manam criyiyankitsu>>.
49Tsay autoridänam nirqan: <<Taytay, tsurï manarä wanunqanyaq ras aywaykulläshun>>.
50Jesúsnam nirqan: <<Wayikipa kutikuy. Tsuriki allishqanam>>.
Jesús ninqanta criyirmi kutikurqan. 51Capernaúmman chaykaptinnam sirviqninkuna taripaykur niyarqan: <<¡Taytay, tsuriki allishqanam!>>
52Tsaynö niyaptinmi sirviqninkunata tapurqan imay höra allinqantapis. Tsaymi niyarqan: <<Qanyan tardi la ünam achachaynin alliskirqan>>.
53Tsaynö willayaptinmi tsay runa tantiyarqan Jesús tsay höra <<tsuriki allishqanam>> ninqanta. Tsaymi wayinchö kaqkunawan Jesúsman criyikuyarqan.
54Judeapita Galileaman kutir tsay wamrata allïtsinqanwanqa ishkay kutinam Galileachö milagruta Jesús rurarqan.
Currently Selected:
Juan 4: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
