KEJADIAN 35
35
Yakob no hataholin-nala leu leo Betel leu
1 #
Kej. 28:11-17
Nai faik esa boema, Manetualain nafa'da Yakob nae, “Au nde Manetualain fo natu'du aoinan-na neu o nai lelek o malai meme o ka'am Esau mai. La'o lai-lai leo Betel muu leona. Leo meme ndia, ma mapadedeik-ma mei tunu-hotuk esa ba'eneu Au.”
2-3Boema Yakob nafa'da teidale-bobongin-nala ma basa hataholi manasama-sama loo nana nae, “Neukose ata la'o teme ia mai fo teu leo Betel teu. Nai ndia, neukose au apadedeik mei tunu-hotuk ba'eneu Manetualain fo manatulu-fali basa au nai tepo lelek au to'a taa ma manamasulu-mahapa basa au nai lelek au leo su'di bee u a. Da'di tu'u-tapaheni dodoki-dudula lamatua daebafak nusa dea fo emi ho'uk-kala; tao feta tao nalalao aoinak-ka ma pake bua-lo'a balisi leona.” 4Boema ala fe basa dodoki-dudula lamatua daebafak nusa dea fo ala ho'uk-kala leo Yakob neu, ma sila lolo'en manai di'idoon-nala boe. Yakob natoi basa bua-lo'as sila-la nai ai manituk huun-na nai deka no Sikhem.
5Nai lelek Yakob no teidale-bobongin-nala la'o boema, Manetualain fe bibii-namata'uk-ka poti na laun manai kota-kota boboa-kaisun-nala, nalosa ala ta usi tunga Yakob no hataholin-nala fa. 6Boema ala losa dae Kanaan-na fo nai kota Betel la fo makahulun-na na'de Lus. 7Nai ndia, Yakob napadedeik mei tunu-hotuk de ana foi mamanak nida na'de “El-Betel”, nanahu Manetualain natu'du aoinan-na neun nai lelek nalai neme ka'an-na mai. 8Nai naa boe Debora, fo inak manamasu'u Ribka nai lelek bei anan-na, maten boema latoin nai ai manituk huun-na fo nai kota ndia boboa konan-na. Hu ndia de, ai ndia nanafoik na'de “Ai Kikii-makaleleuk.”
Manetualain ba'e-pala Yakob nai Betel
9Basa ndia boema Yakob fali leo Mesopotamia neu, de Manetualain natu'du aoinan-na seluk neun de Ana ba'e-palan. 10#Kej. 32:28Manetualain nafa'dan nae, “Neukose ta loke o lae Yakob so'on, tehu Israel.” Leondiak Manetualain foin na'de Israel. 11#Kej. 17:4-8Boema Manetualain boeo nafa'da nae, “Au nde Manetualain Fo Manakoasa. Ela leo been-na o bongi upu-anak makadotok! Neukose o bongi leoinak-kala ma o da'di mane-manek-kala ama kain. 12Nusak fo Au fe basan neu Abraham ma Isak, neukose Au fen neu o ma o tititi-nonosim-mala.” 13Basa ndia boema, Manetualain la'oela Yakob. 14#Kej. 28:18-19Nai mamanak fo Manetualain kokolak no Yakob ndia, anan-napadedeik batu nasa nene'dak esa. Boema Yakob tunu-hotu fe Manetualain angol ma mina setun nai batu ndia lain. 15Ana foi mamanak ndia na'de “Betel.”
Mate Rahel
16Basa ndia boema Yakob ma hataholin-nala la'oela Betel. Lelek ala bei lala dodoana faa neme Efrata mai te, Rahel fai na losa soaneu ana bongi. Tehu ana bongi nakalele'ok. 17Lelek he'di bobongin-na namabela boema, inak fo manamakabobongik-kana nafa'dan nae, “Mamatutua o dale ma, Rahel, te o anam-ma touanak seluk.” 18Tehu Rahel mamaten-na sanga deka so de lelek sanga ketu hahaen-na boema, ana foi ni'iana ndia na'de Ben-Oni tehu aman foin na'de Benyamin.
19Mate Rahel boema, latoin nai enok manaleo Efrata neu a, su'un-na, fo besak ia na'de Betlehem. 20Yakob napadedeik batu nasanene'dak esa nai ndia, de losa besak ia boeo Rahel laten-na bei nanata'duk nenik batu ndia. 21Basa ndia boema, Yakob la'ok nakandoo, boema napadedeik lalaa teman-na nai mamanak esa nai uma puni madema Eder-ra selik. 22#Kej. 49:4Lelek ala bei lai mamanak ndia, Ruben sungu no Bilha, fo ama sao makahatun-na. Yakob namanene dede'ak ndia boema, namanasa nanseli.
Yakob anan-nala
(1Taw. 2:1-2)
Yakob ana toun sanahulu dua. 23Lea anan-nala nde Ruben (Yakob ana ulun-na), Simeon, Lewi, Yehuda, Isakhar, ma Zebulon. 24Rahel anan-nala nde Yusuf ma Benyamin. 25Bilha fo Rahel atan-na, anan-nala nde Dan boema Naftali. 26Zilpa fo Lea atan-na, anan-nala nde Gad ma Asyer. Ni'iana sila-la bongis lai Mesopotamia.
Mate Isak
27 #
Kej. 13:18
Boema Yakob losa aman Isak, fo nai mamana leleon-na nai Mamre deka no Hebron. (Makahulun-na ba'in Abraham, leo neme naa boe). 28-29Nai lelek Isak namalasin-nanseli, fo nde teun 180 boema, maten boema anan-nala fo Yakob ma Esau latoin.
Currently Selected:
KEJADIAN 35: twu
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in