NAPPIYAREEGERAK 7
7
Tepanut nen yoragagerak wone
1At Ala unde inowe endagembogut nogo nen Tepanut yoge logonet, ”Aap wone yagaarak ti, kat abet aret yagandak ilik?”
Yoge mbareegi, 2at Tepanut nogo nen, ”Nogobamini nen, noreewi nen, kinaruk logonip,” yorage nagagirik, ”Ninombo Abarakam o Karan naga'lek logonet, awo o Metopotamiya wonage me, at Ala mondok tiyanak menggerak nogo kawak nduk wage nagagirik, Abarakam yoge logonet, 3An nen o alik kat logorak ambi wokkirigin me, kat menggenom inom, kowe-kawot inom, teppiinok, nak o, yoge mbareegi, 4at nogo aap o Katarim iname nogome mbo punuk, o Karan puk ari wagagerak. Puk ari wagagerak wonage me, ogoba kambeegerak. Kangge mbareegi, yogondak nit wonogwe me yime Ala nen aret nappi wagagerak. 5Nappi wagagerak wonage me, at Ala nen Abarakam unde logowak nduk nggween ambi mbanege, we mbuuluk ambi yoge, eerulik aret kwe, at apurilogwe lek kagak yoge logonet, Nggween yi kat inom, kat ndaganabemenggendak kombowologwe inom, unde logomunggup o, yinuk, abok mban yoreegerak kwe, 6Kat kombowologwe nogo, o aakumi inambik iname time namenggaarak me, it inayeloman negen eeppiinok, inookak mban eekwi iigak, 400 tahun arigin o. 7Ndi, it aakumi kat kombowologwe inayeloman negen eeginabemenggaarak nogo, an nen maluk eeginake neenok, kombowologwe nogo teppiigo mbaremengga, wundi wogo logomenggaarik, o yime logonet, an alut ee'nako logogun o, yinuk, Ala nen Abarakam yoreegerak. 8Yoge nagagirik, Abarakam Ala imbirak wone abu nggaruk togon mbaneegwaarak wone aberak logowak nduk, agabolo mbanggo logorak wone nogo yoreegerak. Yoreegerak paga Itak aret nda'nage mbareegi, nogo 7 paga yippunuk, agabolo mbaneegerak. Itak nen Yakup ndareegerak. Ndi at Yakup nen nit ninombomini 12 paga ndaganabeegerak.
9Nit ninombomini nen inawuluk Yutup nogo ineebi-ineeba eeppogo nogogwaarik, it Metit mendek inayeloman aruwak nduk, onggo nggerenggo mbareegwa, ogoba Ala imbirak o Metit nagagerak wonage me, 10aaninggin-paaninggin kage nagagerak nogo Ala nen lek eerogo pege, ndi, at Yutup nogo aap o Metit endagembogut Pirawun eyabu ake eeke kagak, Pirawun nen, Wulaga yi iniki warak lombok o, yinuk, ale'nggen mbaruwak nduk, yeenggooge, eeke kenok, at Pirawun inom menggaarak inom, it aap Metit mendek inom, abok aret inowe endagembogut oone konenggo logowak nduk, Pirawun nen Yutup aret mippereegerak. 11Mippereegerak wonage me, o Metit yi awi ndi awi time inom, o Kaanan inom, mbi noogelo nen ineebenuwak ko eerogo piinet nage mbareegi, it aap ninombomini nogo nen mbi kwaareegwaarak mendek, abu lek mbareegi, 12at Yakup nogo nen o Metit gandum parum wonage aruk konembege nagagirik, at apuri ninombomini nogo nappiyareegerak. 13Ti'nuk, peebi ne ambi paga nappiyareegerak nogo mbareegwa, Yutup nogo nen, Kinawot nogo an aret o, yinuk, owewologwe ineenu eeppiige mbareegi, Pirawun nogo kunduk, At Yutup yi, it yi mendek aret wagagerak kagi, mbareegerak. 14Ineenu eeppiige nagagirik, at ogoba Yakup inom, akwe apuri inom, abok ineebe 75 aret, Waganabi nanip o, yinuk, nappiya wagagerak. 15Nappiya wagagerak nogo wogo nogogwaarik, at Yakup apuri inom o Metit wogoren nogogwarak. Wogoren nogogwaarak time logonet, at inom, ninombomini inom, kambit nogogwaarak. 16Kambit nogogwaarak nogo inuwak wonok, aap Tikem mendek ambi endage Kemot apuri nen ndo nenaareegwaarak me, Abarakam onggo pereegim nogome mambi wogogwaarak.
17Mambi wogogwaarak nogome logonet, ti'nuk, Ala nen Abarakam abok yoreegerak nogo eeriyak koorok panggo yi wage kagak, nit ninombomini nogo o Metit time logonet, ambik wigannogogwaarak. 18Wigannarit nogwe iigak, inowe endagembogut alik ambi Yutup eeke nagagerak nogo eenggo'lek kagak, mi'nagagerak. 19Mi'nage nagagirik, ninombomini inambokan lagangge logonet, ale-pale eeginake, Elege nda'nogwe iinok, kambuwak nduk endekem mbo piyanu o, yinuk, yorage, eeginake nagagerak. 20Nogo, eerit nage eyom paga Muta nda'nage mbareegi, wulaga nogo abu amuni mbanak ndarak kogo nogogwaarik, oome kere'nage kagak tut kenagan penembunuk, 21endekem kumaappi nogogwaarak me, kwe ndugum Pirawun apuluk nogo nen kwaakkage nagagirik, An naagaluk aret eekkola o, yinuk, ame pi nage nagagirik, tawe eekkolagagerak o. 22Wulaga nogo tawe age logonet, it Metit iniki warak logonet eeko menggaarak abok aret mamuneegerak me, oone inom, eeke inom, omaawi mban eerit nage nagagerak.
23At nda'nagagerak kagak, 40 tahun kuli eeppege nagagirik, Nowenawot Iterali nenegen iya naakit o, mba'nuk, 24iya nage nagagirik, time wonage logonet, aap Metit mendek nen at awot ambi we ugun wake kage nagagirik, ili wagangge logonet, at Metit mendek nogo mondok wareegerak. 25At iniki nen mbake logonet, At Ala nen noreewi inagap ndariyak nduk nappani wagaarak nombarugun ilik? mbareegerak kwe, togop mbaka'lek aret wonogogwaarak. 26Nogo ambi yippunuk ko'lu nen, at awuri mbere yawi pugwi enegen iige nagagirik, ogoorinake logonet, Nawuri o. Kit kimbirak nore-kore aret kwe, nano nduk yawi wat-wat yogo ogotik o? yinuk, yorage mbareegi, 27it yawi pugwi nogo ambi nen at Muta pelenogo nappunuk, yoge logonet, Nit eekwi amburu mbangge logorak, ta nen mippagagerak me, ari agandik o? 28ari nagagirik, Kat kobit aap Metit mendek wakendak nogo kokwak, an noorikit nduk wage nagandik, ari agandik a? 29Yoge nogo aruk konengge nagagirik, o Metit mbo punuk, o Miriyan kole nagagerak. Time logonet, apuri mbere ndaganabeegerak.
30Nogome logonet, 40 tahun aret eereegerak. Eeke nagagirik, ne ambi paga karume put Tinayi nogome wonage me, mbogut paga yonggo nugu menggaarak melaikat mendek ambi nen eyoongga alokwi paga kani moonuk negen wunuk ari me, enegen neyaawak nduk nikka wagagerak. 31At Muta nen kani nogo kage nagagirik, Iya! yinuk, Nano nen eeke kaamun? yinuk, pekkaakit nduk panggo yi nage mbareegi, Ala oone ari logonet, 32Kat kombomini Abarakam inom, Itak inom, Yakup inom, inogoba Ala nogo an aret o, yoge at Muta nogo aruk konengge nagagirik, agabiti nen aganak nuk ari logonet, enegen pekkoorak agabiti nen puk agagerak. 33Puk age mbareegi, at Ala nen, Kat wonage me taati nggween magome, kiyogogut keele piinogo pu o. 34An napuri o Metit wonogwe nogo inoorit nogwe nenegen iige, yagan warit nugwi naruk konengge, eeke minggirak me, inagap ndarikit nduk wambi wagi o. Kat o Metit nappagakit nduk ya'i omok o, yinuk, yoreegerak o.
35Nit eekwi amburu mbangge logorak, ta nen mippagarak o? yinuk, Nineebi, yogo nogogwaarak nogo ti, at Muta aret. At inowe endagembogut a'nuk, inagap ndaruwak nduk it yonggo mbogut paga melaikat mendek ambi eyoongga alokwi paga kani wunuk ari me yoreegerak paga Ala nen nappi wagagerak nogo, at Muta aret o. 36At nogo, ninombomini o Metit nogome nen wogoren wundi nage logonet, o Metit nen, yi Merah yenggenak ambet paga nen, karume time nen eerubok mendek eeke, inagabiti warak mendek eeke, eeke kagak, 40 tahun agagerak. 37At Ala nen aap kit mendek ambi Ala wone yokkirage logorak nduk an kwak mippigin, yinuk, it Iterali mendek yoragagerak nogo ti Muta mban aret o. 38At mbogut paga yonggo nege menggerak melaikat put Tinayi nogome yoreegerak nogo inom, it aap ninombomini inom, o karume kuwak ari wogogwaarak me inom wonagagerak nogo ti, at Muta aret. Nit yo'nirage logowak nduk Ala wone mondok logorak wone waganeegerak nogo at mban aret o.
39Wone waganeegerak kwe, ninombomini nogo nen, Woorak nineebi o, yinuk, taganogo punuk, iniyok paga o Metit noorak iniki aberak mban logonet, 40at Karun yogo logonet, at Muta o Metit nen wo'niren wagaarak nogo, nggeeme nagaarak nineenggo'lek me, nit wo'niren nege logowak nduk, kat kuguwak ambi amili kunniret o, yoreegwaarak. 41Yogo mbareegwa, sapi wam aagaluk ngguunok kwak ogut ogobakkigirogo punuk, aanggo wako logonet, it ogobakkigireegwaarak nogo mban ale'nggen eereegwaarak. 42Ale'nggen eeko mbareegwa, at Ala iniki koonogo punuk, oonegen inom, tut inom, laaluguragan inom mbogut paga menggerak mendek inik-inik eeko logowak nduk teppiyareegerak. It Ala wone yorogo nogogwaarak nabi-nabi nen yogo logonet,
Napuri Iterali mendek yi wae.
40 tahun eeke kagak, kit karume nugu logonet,
wam wappunuk mbanogo pogo nogogutak nogo ti,
an nake mbanogo pogo nogogutak mbakop?
Mondok lek o.
43Kit kugi Molok awi wurik inom,
kugi Erepan laaluguragan ogut ogobakkigirik nogo inom,
inik-inik eeko logowok nduk wonok nogogutak me,
an o Mbabin ambokan time munogo nappinagagin o,
yinuk, liiru mbaneegwaarak nogo ndak-ndak aret munogo nappiyareegwaarak.
44Ala ninom wonage mbako logowak nduk, Ala awi ooliya wuruwak nduk Ala nen ogut wakkagak kenegen kegandak nogo ndak-ndak wu'nu o, yoreegerak nogo ndak-ndak wuppunuk, ninombomini o karume wonok nugu logonet, ya wukak nda wukak eerit nugu nogogwaarak. 45Inogobamini kanggwi iigak, inapuri o wurik nogo ambi unde agak eeko nogogwaarak me, nit ninombomini o wurik nogo unde ogo nogogwaarik, aap Yotuwa inom Ala nen it endekem mendek mugogo wumbiyareegim nogome tebenggo'net unggwi nogo logonet, wonok nugu nogogwaarak. Awo wonok nugwi paga, Ndawut aret mippereegwaarak. 46Mippogo mbareegwa, at Ndawut nen ari logonet, An eerit nage paga Ala ale'nggen nombake kagi, yinuk, Yakop ogoba endagembogut Ala logowam o kwaarikit nduk yoreegerak kwe, 47at Talomo nen aret Ala awi wureegerak.
48Ala awi wureegerak aret kwe, at mondok tiyanak menggerak nogo, aakumi inawi wurik me wonageelik o. At Ala wone yorage nagagerak nabi nogo nen ari logonet,
49Ninogoba Ala nen,
Mbogut paga ti, an noone lengganogo yorage minggim o.
Ndi, nggween paga ti, nabu'me piige minggim aret o.
An nawi nonggop negen wuriyak nduk yogo ogotik o?
An namborowak koongge logorak, nggeeme o?
50Yi mendek ndi mendek ogobakkigirik yi ti,
an nen mban ogobakkigireegirak nogo lek a?
yinuk, togop yereegerak me, aakumi inawi wurik me wonageelik o.
51Kit kinogogumbuk kiniki omaawi logonet, Ala wone konengga'lek, kit aret o. Kinombomini Ala oone taganggo nogogwaarak kwak, Aberiniki oone taganggwi, kit aret o. 52Kit kinombomini nen Ala wone yorogo nogogwaarak nogo piyak-payak eeginake logolik ambi ta mbakop? It aa'nduk lombok Ala wone yorogo nogogwaarak nogo nen, At maluk eekeelik obeelom mban eeke menggerak woraagin o, yinuk, abok paganogo yorogo nogogwaarak nogo inooko nogogwaarak. Ndi, yogondak kit nen mban aret at eebe onggo nggerembunuk wakotak o! 53Ala wone lengganak it mbogut paga yonggo nugu menggaarak melaikat nen yokkira wogogwaarak waganeegutak kwe, eeka'lek monggotak kit aret o,” yinuk, yoragagerak.
Tepanut yugum paga wareegwaarak wone
54Yoragagerak it wone amburu mbangga nogo inaruk konembogo nogogwaarik, inanini wu agan nage logonet, inambe mam kambumbunuk wonogwe iigak, 55at Tepanut nogo Aberiniki inikime lik ari mbareegi, ena mbogut paga ni'nage nagagirik, Ala tiyanak menggerak Yetut imbirak wonogwe iige nagagirik, 56yorage logonet, ”Kinigen nigiyaanip o. Mbogut keyaakerak enggela'me aap aret nda'nagagerak Ala eenggi abee'nggan mi'ndak wonage kagi o,” yoragagerak.
57Yorage mbareegi, it nogo nen inoone nggwok aret ya-mba yogo logonet, inaruk nakko'nok, abok aret kok piga nogo nogogwaarik, 58endekem o tinime nigogo wumbunuk, yugum paga toguurit wareegwaarak. It inoone at oba lenggeneegwaarak nogo nen inambogoyum endekem mendek nggoorogo aap tawe endage Tawulut nogo wogogo nogogwaarik, 59yugum paga toguurit-tagaarit warit unggwogwe iigak, at Tepanut nogo nen, ”Nogoba Yetut o. An niniki wamen o,” 60yinuk, endobanggun yindumbunuk logonet, ”It maluk eekwi yi, inoba lenggenogo piyaagun o. Teppiyet o, nogoba!” yinuk, oone nggwok paga yoge nagagirik, kambeegerak.
Currently Selected:
NAPPIYAREEGERAK 7: WNO
Highlight
Share
Copy
Want to have your highlights saved across all your devices? Sign up or sign in
NAPPIYAREEGERAK 7
7
Tepanut nen yoragagerak wone
1At Ala unde inowe endagembogut nogo nen Tepanut yoge logonet, ”Aap wone yagaarak ti, kat abet aret yagandak ilik?”
Yoge mbareegi, 2at Tepanut nogo nen, ”Nogobamini nen, noreewi nen, kinaruk logonip,” yorage nagagirik, ”Ninombo Abarakam o Karan naga'lek logonet, awo o Metopotamiya wonage me, at Ala mondok tiyanak menggerak nogo kawak nduk wage nagagirik, Abarakam yoge logonet, 3An nen o alik kat logorak ambi wokkirigin me, kat menggenom inom, kowe-kawot inom, teppiinok, nak o, yoge mbareegi, 4at nogo aap o Katarim iname nogome mbo punuk, o Karan puk ari wagagerak. Puk ari wagagerak wonage me, ogoba kambeegerak. Kangge mbareegi, yogondak nit wonogwe me yime Ala nen aret nappi wagagerak. 5Nappi wagagerak wonage me, at Ala nen Abarakam unde logowak nduk nggween ambi mbanege, we mbuuluk ambi yoge, eerulik aret kwe, at apurilogwe lek kagak yoge logonet, Nggween yi kat inom, kat ndaganabemenggendak kombowologwe inom, unde logomunggup o, yinuk, abok mban yoreegerak kwe, 6Kat kombowologwe nogo, o aakumi inambik iname time namenggaarak me, it inayeloman negen eeppiinok, inookak mban eekwi iigak, 400 tahun arigin o. 7Ndi, it aakumi kat kombowologwe inayeloman negen eeginabemenggaarak nogo, an nen maluk eeginake neenok, kombowologwe nogo teppiigo mbaremengga, wundi wogo logomenggaarik, o yime logonet, an alut ee'nako logogun o, yinuk, Ala nen Abarakam yoreegerak. 8Yoge nagagirik, Abarakam Ala imbirak wone abu nggaruk togon mbaneegwaarak wone aberak logowak nduk, agabolo mbanggo logorak wone nogo yoreegerak. Yoreegerak paga Itak aret nda'nage mbareegi, nogo 7 paga yippunuk, agabolo mbaneegerak. Itak nen Yakup ndareegerak. Ndi at Yakup nen nit ninombomini 12 paga ndaganabeegerak.
9Nit ninombomini nen inawuluk Yutup nogo ineebi-ineeba eeppogo nogogwaarik, it Metit mendek inayeloman aruwak nduk, onggo nggerenggo mbareegwa, ogoba Ala imbirak o Metit nagagerak wonage me, 10aaninggin-paaninggin kage nagagerak nogo Ala nen lek eerogo pege, ndi, at Yutup nogo aap o Metit endagembogut Pirawun eyabu ake eeke kagak, Pirawun nen, Wulaga yi iniki warak lombok o, yinuk, ale'nggen mbaruwak nduk, yeenggooge, eeke kenok, at Pirawun inom menggaarak inom, it aap Metit mendek inom, abok aret inowe endagembogut oone konenggo logowak nduk, Pirawun nen Yutup aret mippereegerak. 11Mippereegerak wonage me, o Metit yi awi ndi awi time inom, o Kaanan inom, mbi noogelo nen ineebenuwak ko eerogo piinet nage mbareegi, it aap ninombomini nogo nen mbi kwaareegwaarak mendek, abu lek mbareegi, 12at Yakup nogo nen o Metit gandum parum wonage aruk konembege nagagirik, at apuri ninombomini nogo nappiyareegerak. 13Ti'nuk, peebi ne ambi paga nappiyareegerak nogo mbareegwa, Yutup nogo nen, Kinawot nogo an aret o, yinuk, owewologwe ineenu eeppiige mbareegi, Pirawun nogo kunduk, At Yutup yi, it yi mendek aret wagagerak kagi, mbareegerak. 14Ineenu eeppiige nagagirik, at ogoba Yakup inom, akwe apuri inom, abok ineebe 75 aret, Waganabi nanip o, yinuk, nappiya wagagerak. 15Nappiya wagagerak nogo wogo nogogwaarik, at Yakup apuri inom o Metit wogoren nogogwarak. Wogoren nogogwaarak time logonet, at inom, ninombomini inom, kambit nogogwaarak. 16Kambit nogogwaarak nogo inuwak wonok, aap Tikem mendek ambi endage Kemot apuri nen ndo nenaareegwaarak me, Abarakam onggo pereegim nogome mambi wogogwaarak.
17Mambi wogogwaarak nogome logonet, ti'nuk, Ala nen Abarakam abok yoreegerak nogo eeriyak koorok panggo yi wage kagak, nit ninombomini nogo o Metit time logonet, ambik wigannogogwaarak. 18Wigannarit nogwe iigak, inowe endagembogut alik ambi Yutup eeke nagagerak nogo eenggo'lek kagak, mi'nagagerak. 19Mi'nage nagagirik, ninombomini inambokan lagangge logonet, ale-pale eeginake, Elege nda'nogwe iinok, kambuwak nduk endekem mbo piyanu o, yinuk, yorage, eeginake nagagerak. 20Nogo, eerit nage eyom paga Muta nda'nage mbareegi, wulaga nogo abu amuni mbanak ndarak kogo nogogwaarik, oome kere'nage kagak tut kenagan penembunuk, 21endekem kumaappi nogogwaarak me, kwe ndugum Pirawun apuluk nogo nen kwaakkage nagagirik, An naagaluk aret eekkola o, yinuk, ame pi nage nagagirik, tawe eekkolagagerak o. 22Wulaga nogo tawe age logonet, it Metit iniki warak logonet eeko menggaarak abok aret mamuneegerak me, oone inom, eeke inom, omaawi mban eerit nage nagagerak.
23At nda'nagagerak kagak, 40 tahun kuli eeppege nagagirik, Nowenawot Iterali nenegen iya naakit o, mba'nuk, 24iya nage nagagirik, time wonage logonet, aap Metit mendek nen at awot ambi we ugun wake kage nagagirik, ili wagangge logonet, at Metit mendek nogo mondok wareegerak. 25At iniki nen mbake logonet, At Ala nen noreewi inagap ndariyak nduk nappani wagaarak nombarugun ilik? mbareegerak kwe, togop mbaka'lek aret wonogogwaarak. 26Nogo ambi yippunuk ko'lu nen, at awuri mbere yawi pugwi enegen iige nagagirik, ogoorinake logonet, Nawuri o. Kit kimbirak nore-kore aret kwe, nano nduk yawi wat-wat yogo ogotik o? yinuk, yorage mbareegi, 27it yawi pugwi nogo ambi nen at Muta pelenogo nappunuk, yoge logonet, Nit eekwi amburu mbangge logorak, ta nen mippagagerak me, ari agandik o? 28ari nagagirik, Kat kobit aap Metit mendek wakendak nogo kokwak, an noorikit nduk wage nagandik, ari agandik a? 29Yoge nogo aruk konengge nagagirik, o Metit mbo punuk, o Miriyan kole nagagerak. Time logonet, apuri mbere ndaganabeegerak.
30Nogome logonet, 40 tahun aret eereegerak. Eeke nagagirik, ne ambi paga karume put Tinayi nogome wonage me, mbogut paga yonggo nugu menggaarak melaikat mendek ambi nen eyoongga alokwi paga kani moonuk negen wunuk ari me, enegen neyaawak nduk nikka wagagerak. 31At Muta nen kani nogo kage nagagirik, Iya! yinuk, Nano nen eeke kaamun? yinuk, pekkaakit nduk panggo yi nage mbareegi, Ala oone ari logonet, 32Kat kombomini Abarakam inom, Itak inom, Yakup inom, inogoba Ala nogo an aret o, yoge at Muta nogo aruk konengge nagagirik, agabiti nen aganak nuk ari logonet, enegen pekkoorak agabiti nen puk agagerak. 33Puk age mbareegi, at Ala nen, Kat wonage me taati nggween magome, kiyogogut keele piinogo pu o. 34An napuri o Metit wonogwe nogo inoorit nogwe nenegen iige, yagan warit nugwi naruk konengge, eeke minggirak me, inagap ndarikit nduk wambi wagi o. Kat o Metit nappagakit nduk ya'i omok o, yinuk, yoreegerak o.
35Nit eekwi amburu mbangge logorak, ta nen mippagarak o? yinuk, Nineebi, yogo nogogwaarak nogo ti, at Muta aret. At inowe endagembogut a'nuk, inagap ndaruwak nduk it yonggo mbogut paga melaikat mendek ambi eyoongga alokwi paga kani wunuk ari me yoreegerak paga Ala nen nappi wagagerak nogo, at Muta aret o. 36At nogo, ninombomini o Metit nogome nen wogoren wundi nage logonet, o Metit nen, yi Merah yenggenak ambet paga nen, karume time nen eerubok mendek eeke, inagabiti warak mendek eeke, eeke kagak, 40 tahun agagerak. 37At Ala nen aap kit mendek ambi Ala wone yokkirage logorak nduk an kwak mippigin, yinuk, it Iterali mendek yoragagerak nogo ti Muta mban aret o. 38At mbogut paga yonggo nege menggerak melaikat put Tinayi nogome yoreegerak nogo inom, it aap ninombomini inom, o karume kuwak ari wogogwaarak me inom wonagagerak nogo ti, at Muta aret. Nit yo'nirage logowak nduk Ala wone mondok logorak wone waganeegerak nogo at mban aret o.
39Wone waganeegerak kwe, ninombomini nogo nen, Woorak nineebi o, yinuk, taganogo punuk, iniyok paga o Metit noorak iniki aberak mban logonet, 40at Karun yogo logonet, at Muta o Metit nen wo'niren wagaarak nogo, nggeeme nagaarak nineenggo'lek me, nit wo'niren nege logowak nduk, kat kuguwak ambi amili kunniret o, yoreegwaarak. 41Yogo mbareegwa, sapi wam aagaluk ngguunok kwak ogut ogobakkigirogo punuk, aanggo wako logonet, it ogobakkigireegwaarak nogo mban ale'nggen eereegwaarak. 42Ale'nggen eeko mbareegwa, at Ala iniki koonogo punuk, oonegen inom, tut inom, laaluguragan inom mbogut paga menggerak mendek inik-inik eeko logowak nduk teppiyareegerak. It Ala wone yorogo nogogwaarak nabi-nabi nen yogo logonet,
Napuri Iterali mendek yi wae.
40 tahun eeke kagak, kit karume nugu logonet,
wam wappunuk mbanogo pogo nogogutak nogo ti,
an nake mbanogo pogo nogogutak mbakop?
Mondok lek o.
43Kit kugi Molok awi wurik inom,
kugi Erepan laaluguragan ogut ogobakkigirik nogo inom,
inik-inik eeko logowok nduk wonok nogogutak me,
an o Mbabin ambokan time munogo nappinagagin o,
yinuk, liiru mbaneegwaarak nogo ndak-ndak aret munogo nappiyareegwaarak.
44Ala ninom wonage mbako logowak nduk, Ala awi ooliya wuruwak nduk Ala nen ogut wakkagak kenegen kegandak nogo ndak-ndak wu'nu o, yoreegerak nogo ndak-ndak wuppunuk, ninombomini o karume wonok nugu logonet, ya wukak nda wukak eerit nugu nogogwaarak. 45Inogobamini kanggwi iigak, inapuri o wurik nogo ambi unde agak eeko nogogwaarak me, nit ninombomini o wurik nogo unde ogo nogogwaarik, aap Yotuwa inom Ala nen it endekem mendek mugogo wumbiyareegim nogome tebenggo'net unggwi nogo logonet, wonok nugu nogogwaarak. Awo wonok nugwi paga, Ndawut aret mippereegwaarak. 46Mippogo mbareegwa, at Ndawut nen ari logonet, An eerit nage paga Ala ale'nggen nombake kagi, yinuk, Yakop ogoba endagembogut Ala logowam o kwaarikit nduk yoreegerak kwe, 47at Talomo nen aret Ala awi wureegerak.
48Ala awi wureegerak aret kwe, at mondok tiyanak menggerak nogo, aakumi inawi wurik me wonageelik o. At Ala wone yorage nagagerak nabi nogo nen ari logonet,
49Ninogoba Ala nen,
Mbogut paga ti, an noone lengganogo yorage minggim o.
Ndi, nggween paga ti, nabu'me piige minggim aret o.
An nawi nonggop negen wuriyak nduk yogo ogotik o?
An namborowak koongge logorak, nggeeme o?
50Yi mendek ndi mendek ogobakkigirik yi ti,
an nen mban ogobakkigireegirak nogo lek a?
yinuk, togop yereegerak me, aakumi inawi wurik me wonageelik o.
51Kit kinogogumbuk kiniki omaawi logonet, Ala wone konengga'lek, kit aret o. Kinombomini Ala oone taganggo nogogwaarak kwak, Aberiniki oone taganggwi, kit aret o. 52Kit kinombomini nen Ala wone yorogo nogogwaarak nogo piyak-payak eeginake logolik ambi ta mbakop? It aa'nduk lombok Ala wone yorogo nogogwaarak nogo nen, At maluk eekeelik obeelom mban eeke menggerak woraagin o, yinuk, abok paganogo yorogo nogogwaarak nogo inooko nogogwaarak. Ndi, yogondak kit nen mban aret at eebe onggo nggerembunuk wakotak o! 53Ala wone lengganak it mbogut paga yonggo nugu menggaarak melaikat nen yokkira wogogwaarak waganeegutak kwe, eeka'lek monggotak kit aret o,” yinuk, yoragagerak.
Tepanut yugum paga wareegwaarak wone
54Yoragagerak it wone amburu mbangga nogo inaruk konembogo nogogwaarik, inanini wu agan nage logonet, inambe mam kambumbunuk wonogwe iigak, 55at Tepanut nogo Aberiniki inikime lik ari mbareegi, ena mbogut paga ni'nage nagagirik, Ala tiyanak menggerak Yetut imbirak wonogwe iige nagagirik, 56yorage logonet, ”Kinigen nigiyaanip o. Mbogut keyaakerak enggela'me aap aret nda'nagagerak Ala eenggi abee'nggan mi'ndak wonage kagi o,” yoragagerak.
57Yorage mbareegi, it nogo nen inoone nggwok aret ya-mba yogo logonet, inaruk nakko'nok, abok aret kok piga nogo nogogwaarik, 58endekem o tinime nigogo wumbunuk, yugum paga toguurit wareegwaarak. It inoone at oba lenggeneegwaarak nogo nen inambogoyum endekem mendek nggoorogo aap tawe endage Tawulut nogo wogogo nogogwaarik, 59yugum paga toguurit-tagaarit warit unggwogwe iigak, at Tepanut nogo nen, ”Nogoba Yetut o. An niniki wamen o,” 60yinuk, endobanggun yindumbunuk logonet, ”It maluk eekwi yi, inoba lenggenogo piyaagun o. Teppiyet o, nogoba!” yinuk, oone nggwok paga yoge nagagirik, kambeegerak.
Currently Selected:
:
Highlight
Share
Copy
Want to have your highlights saved across all your devices? Sign up or sign in