Luka 21
21
Sadaka ya mujane masikini
(Mk 12.41-44)
1Yesu alipoinua macho, akawaona watajiri wakitia sadaka ndani ya sanduku ya sadaka za hekalu. 2Akaona vilevile mujane mumoja masikini akitia ndani ya ile sanduku vikoroti viwili vidogo sana. 3Basi akasema: “Kweli ninawaambia kwamba mujane huyu masikini ametoa mingi zaidi kuliko watu wote wengine. 4Kwa maana hawa wengine wote walitoa sehemu ya mali wasiyokuwa nayo lazima. Lakini yeye ametoa kwa umasikini wake mali yote aliyokuwa nayo kwa kuishi.”
Yesu anatangaza uharibifu wa hekalu
(Mat 24.1-2; Mk 13.1-2)
5Wamoja kati ya wanafunzi wa Yesu walikuwa wakizungumuza juu ya hekalu, wakisema juu ya majengo yake mazuri ya mawe na juu ya vitu vingine vizuri watu walivyovitoa sadaka kwa Mungu. Lakini Yesu akasema: 6“Kutakuwa siku vitu hivi munavyoona vitabomolewa, wala hakutabaki hata jiwe moja juu ya lingine.”
Mateso yatakayokuwa mbele ya wakati wa mwisho
(Mat 24.3-14; Mk 13.3-13)
7Halafu wakamwuliza: “Mwalimu, mambo hayo unayotoka kusema yatakuwa wakati gani? Na ni kitambulisho gani kitakachoonyesha kwamba yanataka kutimia?”
8Yesu akawajibu: “Muangalie vizuri, musidanganywe. Watu wengi watakuja wakijiita kwa jina langu, wakisema kwamba wao ndio Kristo, nao wakati umetimia. Ingawa vile, musiwafuate. 9Musiogope wakati mutakaposikia habari za vita na za mapinduzi. Sherti mambo hayo yatukie kwanza, lakini haionyeshi kwamba mwisho wa dunia unatimia palepale.”
10Kisha Yesu akaongeza kusema: “Taifa litapigana na taifa, nao ufalme utapigana na ufalme. 11Kutakuwa tetemeko kubwa la inchi. Vilevile kutakuwa njaa na magonjwa makali kwenye nafasi mbalimbali. Zaidi ya ile kutakuwa mambo ya kuogopesha na vitambulisho vya ajabu toka mbinguni. 12Lakini mbele mambo hayo yote yatokee, mutakamatwa na kuteswa. Watawapeleka kwenda kuhukumiwa katika nyumba za kuabudia na kuwatia katika vifungo. Vilevile mutapelekwa mbele ya wafalme na ya wakubwa kwa ajili ya jina langu, 13kusudi mutoe ushuhuda wangu mbele yao. 14Basi mukusudie ndani ya moyo kwamba hamutajihangaisha mbele ya wakati kwa kutafuta kujua namna mutakavyojitetea. 15Kwa maana mimi mwenyewe nitawapa masemi na hekima hata waadui zenu hawataweza kuyapinga wala kuyakataa. 16Mutatolewa hata na wazazi wenu, wandugu zenu, na watu wa jamaa zenu pamoja na warafiki zenu. Nao watawaua wamoja kati yenu. 17Watu wote watawachukia kwa ajili ya jina langu. 18Lakini hata unywele mumoja wa kichwa chenu hautapotea. 19Lakini muendelee kuvumilia, maana kwa njia ile mutaokoa uzima wenu.”
Yesu anajulisha habari za uharibifu wa Yerusalema
(Mat 24.15-21; Mk 13.14-19)
20“Wakati mutakapoona muji wa Yerusalema umezungukwa na waaskari, mujue kwamba uharibifu wake unakaribia. 21Basi wale watakaokuwa Yudea, wakimbilie kwa milima, na wale watakaokuwa Yerusalema watoke ndani yake, nao wale watakaokutiwa katika mashamba wasiingie ndani ya muji. 22Kwa maana siku zile zitakuwa siku za azabu ya Mungu, kusudi mambo yote yaliyoandikwa katika Maandiko Matakatifu yatimie. 23Wanawake wenye mimba na wenye kunyonyesha watapata hasara katika siku zile! Kwa maana kutakuwa taabu kubwa katika inchi, na Mungu ataonyesha kasirani yake juu ya watu wa taifa hili. 24Wamoja watauawa kwa vita na watapelekwa kuwa wafungwa katika inchi za mataifa yote. Vilevile mataifa mengine yatautawala Yerusalema mpaka nyakati zao za kuutawala zitakapokwisha.”
Kuja kwa Mwana wa Mutu
(Mat 24.29-31; Mk 13.24-27)
25“Vitambulisho vitaonekana katika jua, mwezi na nyota. Na hapa katika dunia mataifa yatakuwa na uchungu, na kushikwa na wasiwasi kwa ajili ya mungurumo na musukosuko wa bahari. 26Watu watazimia kwa ajili ya hofu, wakingojea mambo yatakayotokea katika dunia, kwa maana vyote vyenye nguvu katika mbingu vitatikiswa. 27Halafu wakati ule Mwana wa Mutu ataonekana akikuja katikati ya mawingu, kwa uwezo mwingi na kwa utukufu. 28Mambo hayo yatakapoanza kutokea, muinue kichwa na kusimama na nguvu, kwa sababu wakati wa kukombolewa kwenu umekaribia.”
Mafundisho toka muti wa tini
(Mat 24.32-35; Mk 13.28-31)
29Kisha Yesu akawaambia wanafunzi wake mufano huu: “Muchunguze vizuri muti wa tini na miti yote mingine. 30Munapoona kwamba majani yao yanaanza kuchipuka, munatambua wenyewe kwamba wakati wa jua kali unakaribia. 31Vilevile wakati mutakapoona mambo hayo niliyotoka kutaja yanatokea, mujue kwamba Ufalme wa Mungu unakaribia.
32“Kweli ninawaambia: hiki kizazi hakitapita mbele ya kutimia kwa mambo yote. 33Mbingu na dunia vitatoweka, lakini maneno yangu hayatabadilika hata kidogo.
Kukesha
34“Mujilinde vizuri, kusudi musilemewe na kutafuta kula ulafi, kulewa na kusumbukia maisha. Kama si vile, Siku ile ya kurudia kwa Kristo itawafikia kwa rafla 35sawa mutego. Kwa maana Siku ile itawafikia watu wote wa dunia. 36Basi mukeshe na kuomba kila wakati, kusudi mupate nguvu ya kuepuka mambo hayo yote yatakayotokea, nanyi mupate kuweza kusimama mbele ya Mwana wa Mutu.”
37Yesu alikuwa akipitisha muchana katika hekalu akihubiri, na usiku alikuwa akienda kulala kwenye mulima wa Mizeituni. 38Watu wote walikuwa wakimufikia asubui mapema katika hekalu, kusudi wamusikilize.
Currently Selected:
Luka 21: SWC02
Highlight
Share
Copy
Want to have your highlights saved across all your devices? Sign up or sign in
Bible in Swahili Congo © Bible Society of the Democratic Republic of Congo (DRC), 2002.
