ตัวแทน 11
11
เปโตร ไล เลือง ครำ กรอก ซอ อน ตัก คริซจัก เยรูซาเล็ม
1ทาเน ปึง ตัวแทน เยซู เคิบ ปึง ควน นไจ ตัก จังวัด ยูเดีย อัห ก็ เม็จ คาว เค็ย ครำ กรอก ซอ เจือ ปัง แญง เอาซาง เมือนนอย วัล 2ทาเน เปโตร ก็ เริล เมือง เยรูซาเล็ม ทึห โตะ ตัก เมือง เยรูซาเล็ม แลว อัห ตี เจือ เยซู ตัก ทือ แบบ ยิว เน็ด นัน อัห ก็ ลด โป เปโตร 3“มัห ก็อห เจิง ครำ กรอก ซอ อังวะ บ็อห อัห ไอ มี แอง พิที ซุนัด ดุห มัห จบ ป็อง จะ เลิม เคิบ อัห อังวะ” อัห อัง
4ทาเน เปโตร ก็ ลด ไท เลามุน อน อัห ปัง เลาะๆ เจ็น เกา คือเน 5“งิ นาน ญาม เอิญ อุ ตัก เมือง ยาฟา เอิญ กำลัง ครอ วอน เอาซาง อุ ทาเน เอาซาง ก็ ระ เอิญ เม็จ ซะ แปลก มี มบลึ อี อังกัด มบอด จูล เล็ห เจ็น วาง ตัก ทึห มี ทาล ท็อก อุ มด ตึง ซี แจง เย็ห มพลิห โตะ ติๆ เคิง ตี เอิญ อุ นัน 6เอิญ ก็ ที ดอม ซะ ตัก มบอด นัน เอิญ ก็ เม็จ มี ซัด จู มบลึ อุ ตัก นัน ซัด เลียง ซัด นโจ เป็น เซ็ม เป็น แลน ก็ มี อุ ควังใน มบอด นัน มด 7ทาเน เอิญ ก็ เม็จ แญง นะ ไล เอิญ ฮุนเน ‘เปโตร เฮย มัห มเบิล ป็อง ซะ ตี อุ ใน มบอด นัน ดาย’ แญง นะ อัง
8เอิญ ก็ เค็ย ‘ไอ เตาะ งกีจ็อง เฮย ซะ นัน อิห กำ ดาย ซะ ตัก ไอ มี เลาะ นัน เอิญ ไอ มี เกย ป็อง ซัก มี ลบ ตัน’ เอิญ อัง
9แต แญง นะ ก็ ไล เอิญ คือเน วัล ‘กัน เอาซาง เค็ย เลาะ ก็ อำ มัห เค็ย ไอ มี เลาะ วัล ดาย’ แญง นะ อัง 10เอิญ เม็จ ซะ แปลก นัน ตวด ตึง แพะ ลบ ลด งาล แอ็ม เญ็น ตัก วาง นทึห เคิบ มัด เคิบ มุห เอิญ
11ญาม นัน ก็ พวม โตะ ครำ เจ็น เมือง ซีซารียา แพะ ล็อง อัห โตะ และ เอิญ เคิด เจิง ตี เอิญ พัก อุ นัน 12ซีมาล เอาซาง ก็ ไล เอิญ บำ เริล เคิบ อัห ติกๆ ‘อำ มัห ซงไซ ซีวะ เตาะ’ ซีมาล เอาซาง ไล เอิญ จังเน เอิญ ก็ เอิด ปึง ควน นไจ ฮก ล็อง เนๆ เริล เลิม เคิบ เอิญ ตัก เมือง ซีซารียา อิห เริล เจิง โคเนลีอัด โตะ เคิด เจิง โคเนลีอัด แลว อิห ก็ กุด ควังใน เจิง นำ 13โคเนลีอัด ก็ เลามุน อน อิห ปัง นำ เค็ย เม็จ เทวาดา ญ็อง อุ ควังใน เจิง ออ เทวาดา ไล นำ ไล ลูกนอง ออ เริล และ เอิญ ตัก เมือง ยาฟา 14นำ เค็ย เทวาดา ไล ออ ปัง แญง เอิญ นำ เค็ย เทวาดา ระ เอิญ ไล แญง เลาะ อน ตัก นำ ระ นำ มด ตึง ครอบครัว กุญ ปน แอ็ม เจ็น โทด คอง เอาซาง เทวาดา ไล นำ ฮุนนัน ซีเละ
15แลว เอิญ ปัง แญง โคเนลีอัด แลว เอิญ ก็ และ จ็อก เคิบ อัห ก็ พด โตะ ซีมาล เอาซาง อุ เคิบ อัห มอก โตะ อุ เคิบ แอ ลบ แรก กำนา นัน 16เอิญ ก็ พุล ลุห นโทล อัง แญง งกีจ็อง ตี นำ เกย ไล แอ แลว นัน นำ เค็ย ‘ยอน จุบ แป ตัก นอก แต บัดนะ แป ต็อง จุบ ตัก ซีมาล เอาซาง ฮัก’ งกีจ็อง ไล จังนะ แลว ตัวแทน 1:5
17ทาเน เอาซาง ก็ กิว อน ซีมาล ออ ตัก ครำ กรอก ซอ ซีเละ มอก นำ อน ตัก แอ นัน กำนา นำ อน ตัก แอ ตี เจือ เยซู คริด งกีจ็อง นัน นอ กัน เอาซาง อน ซีมาล ออ ตัก อัห มอก นำ อน ตัก แอ นัน เอิญ ก็ ไอ มี จางรู เกิ๊ด รวง เอาซาง เตาะ ดาย แอ ตอนฮับ อัห เป็น ควน เป็น นไจ ก็ เลาะ”#ค 17 ตี เอาซาง อน ซีมาล ออ ตัก อัห ก็ ระ แอ เม็จจึด เค็ย เอาซาง เอิด ครำ จู กรอก ซีเละ เจ็นนัน ครำ ยิว ตี เจือ เยซู ต็อง ตอนฮับ ครำ กรอก ซอ ตี เจือ เยซู เป็น ครำ เอาซาง เปโตร ไล อัห ฮุนนะ
18ปึง ยิว เม็จ แญง เปโตร ไล ออ คือนะ แลว อัห ก็ ไอ มี โป ซีวะ วัล เตาะ อัห ก็ ลือ เอาซาง คือเน “โอ เอาซาง มัห ระ ครำ กรอก ซอ เอิด ใจ แมะ กุญ มัห ก็ ระ อัห กุญ รีด ฮุน อิห เน วัล” อัห อัง
ครำ ทือ เยซู ตัก เมือง อันทิโอก
19กำนา ญาม ครำ ยิว มเบิล ซะเทเฟน นัน อัห ก็ คมเฮง ครำ ทือ เยซู ครำ ตี ทือ เยซู แกด ล็อง อัห ก็ ปัด เริล มี ติด มี ตี มบรัห ก็ ปัด เริล งคม ตัก จังวัด ฟีนีเซีย มบรัห ก็ ปัด เริล เกาะ ไซปรัด มบรัห ก็ ปัด เริล เมือง อันทิโอก อัห เริล พานเดย อัห ก็ ไล เลือง เยซู อน อัห ติกๆ แต อัห ไล อน จุม ครำ ยิว ฮัก 20ทาเน ครำ ตี ปัด ออ นัน มี มบรัห ก็ เป็น ครำ เกาะ ไซปรัด เคิบ ครำ เมือง ไซรีน อัห ปัด อุ เมือง อันทิโอก เล็ห อันทิโอก แลว อัห ก็ ไล คาว เลาะ เลือง เยซู อน ครำ กรีก ปัง วัล อัห เค็ย เยซู เป็น งกีจ็อง คอง ครำ แอ เน มด จู ล็อง 21งกีจ็อง ก็ อุ เลิม เคิบ อัห จวย อัห ลด มี ดก ครำ เจือ อัห วัล อัห ก็ ลด เปียน ใจ เจือ งกีจ็อง ดก ซีเละ ตัวแทน 8:1-4
22ทาเน คริซจัก เมือง เยรูซาเล็ม เม็จ คาว เค็ย ครำ อันทิโอก ทือ เยซู อัห ก็ ลด ไล บานาบัด เริล ดอม อ็อญ อัห ตัก เมือง อันทิโอก นัน 23ญาม บานาบัด เล็ห ตัก เมือง นัน แลว นำ ก็ เม็จจึด เค็ย เอาซาง แอง เลาะ ซิห อัห ซีเละ นำ ก็ เลาะใจ นำ ก็ ลด ไล อัห แอง เลาะ แอง ซือ ฮัก นำ ก็ อน กำลัง ใจ ตัก อัห ระ อัห เฮง แก็นใจ เจือ งกีจ็อง เลาะๆ ฮัก 24บานาบัด เน นำ เป็น ครำ เลาะ นำ มี ซีมาล เอาซาง อุ เลิม นำ เจือ เอาซาง เลาะ ซีเละ นำ ก็ ซับรวง อัห ดก ล็อง โตะ เจือ งกีจ็อง
25บานาบัด เม็จ ดก ครำ เจือ เยซู แลว นำ ก็ เริล และ เซาโล ตัก เมือง ทาซัด 26นำ เม็จ เซาโล แลว นำ ก็ มพอล เซาโล โตะ อุ เคิบ ออ ตัก เมือง อันทิโอก เลิม นัน ปาม ก็ อุ เคิง นัน มี วาง ปาม ก็ ไล แญง เอาซาง อน ตัก อัห ดก ล็อง ทาเน ครำ อันทิโอก แทก ครำ ตี เจือ เยซู นัน ตัก คริซเตียน เน ก็ เป็น ลบ แรก ตี อัห แทก ครำ เจือ เยซู ตัก คริซเตียน
27ทาเน ก็ มี ปึง ลาม เอาซาง โตะ เจ็น เมือง เยรูซาเล็ม งคม อัห เริล ตัก อันทิโอก นเซอะ 28-30ตัก ปึง ลาม นัน ก็ มี ลาม มี ล็อง ซือ ตัก อากาบัด ซีมาล เอาซาง ก็ อน กำกึด ตัก นำ นำ ร็อห ญ็อง ไล อัห คือเน “เจ็นเน นโดน ก็ แร็ง เกิ๊ด ซีอ็อจ ทัว มด ดาย” นำ อัง ตัวแทน 21:10
ทาเน ญาม ครำ ตี เจือ เยซู เม็จ เลือง นัน แลว อัห ก็ ตกลง นอย จวย ควน นไจ ตัก จังวัด ยูเดีย ซีเอ มี มอก นเดย ก็ อน มอก นัน แลว แต ความ ซามาด เอา นเดย เอา นัน ฮัก เจ็นนัน อัห ก็ เอิด เงิน นัน มอบ อน ตัก บานาบัด เคิบ เซาโล ระ ปาม ซับ ซง อน ตัก ปึง อัหแกะ ตี ซับรวง คริซจัก ตัก เมือง เยรูซาเล็ม เลือง เน กิว เกิด เล็ห ญาม คาวดีอัด เป็น พะเจายูฮัว โรม นัน
Currently Selected:
ตัวแทน 11: Prai
Highlight
Share
Copy
Want to have your highlights saved across all your devices? Sign up or sign in
Global Partners
