ตัวแทน 8
8
เซาโล คมเฮง คริซจัก เยรูซาเล็ม
1ทาเน เซาโล เม็จ อัห มเบิล ซะเทเฟน นัน นำ ก็ เลาะใจ ติกๆ ญาม นัน แร็ง ดุ อัห คมเฮง คริซจัก ตัก เมือง เยรูซาเล็ม ซีเละ ครำ ตี ทือ เยซู ก็ เลอะ ปัด เจ็น เมือง มด อัห ปัด เริล ทัว จังวัด ยูเดีย ทัว จังวัด ซะมาเรีย แต ปึง ตัวแทน เยซู ไอ มี จบ ปัด เตาะ 2ครำ ตี แก็นใจ เจือ เยซู อัห ก็ เอิด ซบ ซะเทเฟน เทิ๊บ แอ็ม อัห เญ็ม ไบ เญ็ม เบอ ญอน แร็ง อัห งอม อัง นำ 3แต เซาโล นัน กวา โละ ทำลาย คริซจัก นำ ก็ กวา โละ กุด เจิง ครำ ตี ทือ เยซู นำ กวา โละ เญ็บ อัห เติล ตัก ลุก อัหคล็อง อัหเม นำ ก็ เญ็บ เติล ลุก มด ตัวแทน 22:4-5, 26:9-11
ฟีลิบ ไล เลือง เยซู อน ตัก ครำ ซะมาเรีย
4เจ็นนัน ครำ ตี ทือ เอาซาง อัห ก็ ปัด เริล มี ติด มี ตี อัห ก็ โละ ไล แญง เอาซาง อน อัหซอ ปัง ติกๆ วัล 5ทาเน ฟีลิบ ก็ เริล มี เมือง วัล เมือง นะ อุ ตัก จังวัด ซะมาเรีย เล็ห นำ ตัก นัน แลว นำ ก็ ไล เลือง เยซู คริด อน อัห ปัง 6ทาเน ครำ ตี ปัง แญง นำ อุ นัน อัห เม็จ นำ แอง ซะ แปลก อัห เม็จ แญง ตี นำ จ็อก นัน อัห ก็ ซนใจ ปัง แญง นำ เลาะ ซีเละ 7มี ครำ ดก ล็อง งาล ปรอง กุด ปึง ปรอง ตี กุด อัห นัน เย็ห ก็ นซาก แร็งๆ ลด ทอก ปัด แอ็ม ครำ แว็ล เคิบ ครำ ตี ไอ มี เป็น ร็อห อัห ก็ งาล โซะ เลาะ เล็ห ดก ล็อง 8ครำ เมือง นัน ก็ เลอะ เลาะใจ เลาะ คอ ซีเละ
9ทาเน ตัก เมือง นัน ก็ มี เอา มอ มี ล็อง ซือ ตัก ซีโมน ซีโมน เน นำ เป็น มอ ปรอง นำ มี คาทา แอง ซะ แปลก ตัก เมือง นัน นำ แอง นเซอะ ครำ ซะมาเรีย แปลกใจ งึด อัง ออ นำ ก็ อวด นัง ออ เค็ย เป็น ครำ พิเซด วัล 10อัห จู ล็อง จู นัง ใน เมือง นัน ก็ ปัง แญง นำ มด อัห เค็ย “เอา เน นำ มี แร็ง คอง งกีจ็อง แตๆ ดาย” อัห อัง 11ปึง อัห ก็ ซนใจ ปัง แญง นำ ติกๆ อัห ซนใจ ก็ ญอน นำ แอง ซะ แปลก ระ อัห งึด อัง ออ อิง แลว 12แต ญาม ฟีลิบ โตะ ไล คาว เลาะ เลือง เอาซาง อน อัห ปัง นัน อัห ก็ เจือ ฟีลิบ ไล อัห เลือง เยซู คริด เคิบ เลือง เอาซาง ปกคอง โลก อัห ก็ เจือ ฟีลิบ อัห ลด ระ ฟีลิบ จุบ ออ ตัก นอก มด ตึง อัหคล็อง ตึง อัหเม 13ซีโมน นัน ก็ เจือ แญง ฟีลิบ วัล นำ ลด แอง พิที จุบ นอก เลิม เคิบ อัห นำ เม็จ ฟีลิบ แอง ซะ แปลก นำ ก็ งึด ซีเละ นำ ก็ อุ เคิบ ฟีลิบ เริล เลิม เคิบ ฟีลิบ ลด
14ทาเน ปึง ตัวแทน เยซู ตัก อุ เมือง เยรูซาเล็ม อัห เม็จ คาว ครำ ซะมาเรีย กุญ ปัง แญง เอาซาง แลว อัห ก็ ไล เปโตร เคิบ ยอน เริล ดอม อัห ปาม ก็ เริล 15โตะ ปาม แลว ปาม ก็ ครอ วอน เคิบ เอาซาง ระ อัห มี ซีมาล เอาซาง ฮัก 16อัห กุญ แอง พิที จุบ นอก ใน ซือ เยซู งกีจ็อง แลว แต อัห ไอ ตัน มี ซีมาล เอาซาง อุ เลิม ซีมาล เอาซาง ไอ มี ตัน จูล โตะ อุ เคิบ อัห ตัน 17ทาเน เปโตร เคิบ ยอน ก็ ต็อก ซิห ที ออ ตัก อัห ซีมาล เอาซาง ก็ ลด อุ เคิบ อัห 18ญาม ซีโมน เม็จ อัห มี ซีมาล เอาซาง ฮุนนัน แลว นำ ก็ ลด อน เงิน ตัก ปา เปโตร นำ ไล ปาม ฮุนเน 19“ครอ ระ เอิญ มี อำนาด ฮุน ปา เน ดาย จับ เอิญ ต็อก ซิห ที ออ ตัก อัห ก็ ครอ ระ อัห มี ซีมาล เอาซาง วัล ดาย” นำ อัง
20เปโตร ก็ ซวัล นำ ฮุนเน “ท็อจ เปิล แอ็ม มัห เคิบ เงิน เน เนอ มัห กึด เค็ย เอิด เงิน เน ทน เอิด อำนาด ตี เอาซาง ปัน อน เน กุญ อัง ฮอน จบ เลาะ กึด คือเน 21-22มัห กึด จังเน มัห ก็ ไอ มี กุญ แองกาน เน เลิม เคิบ อิห เตาะ มัห มี กำกึด ไอ มี แคระ ใจ มัห ไอ มี ซือซัด เคิบ เอาซาง ดุห มัห ต็อง เอิด ใจ แมะ พระ แอ็ม ซะ ตี ไอ มี เลาะ เน มัห ต็อง ครอ เคิบ งกีจ็อง ระ นำ ไอ มี แอง ซีวะ ซิห มัห ระ นำ ญ็อก แอ็ม โทด มัห 23เอิญ เคาใจ แลว แร็ง ดุ มัห คอย อัห แร็ง ลืด มัห แอง ซะ ไอ มี เลาะ” เปโตร อัง 24ซีโมน ก็ ซวัล เปโตร คือเน “ครอ เคิบ มัห เตาะ ครอ ระ มัห ครอ เคิบ งกีจ็อง จวย เอิญ ดาย มัห ครอ เคิบ เอาซาง ไอ มี ระ ซะ ตี มัห จ็อก นัน เล็ห ตัก เอิญ ดาย” ซีโมน อัง
25เจ็นนัน เปโตร เคิบ ยอน ก็ ไล แญง งกีจ็อง อน อัห ติกๆ แลว เปโตร เคิบ ยอน ไล แญง งกีจ็อง อน อัห ปัง ตัก นัน แลว ปาม ก็ วัล ออ ตัก เมือง เยรูซาเล็ม แต ญาม ปาม วัล ออ นัน ปาม ก็ โละ แวด แอว ไล คาว เลาะ นัน อน ตัก ครำ ซะมาเรีย ดก งวัล เจ็นนัน ปาม ก็ วัล ออ ตัก เมือง เยรูซาเล็ม
ฟีลิบ เคิบ เจานาย เอทิโอเปีย
26ทาเน ก็ โตะ เทวาดา คอง งกีจ็อง ไล ฟีลิบ ฮุนเน “มัห เริล นเซอะ ดาย มัห เริล ตาม รวง เริล เมือง กาซา นัน รวง นัน เริล เจ็น เมือง เยรูซาเล็ม พด เล็ห ตัก กาซา นเซ็บ มัห เริล รวง นัน ดาย” เทวาดา อัง 27ฟีลิบ ก็ เริล นำ เริล เล็ห มี คัล รวง แลว นำ ก็ ปัก เม็จ ครำ เอทิโอเปีย มี ล็อง นำ เป็น เจานาย ซำคัน นำ เป็น ฮัวนา ฮับพิดซอบ เงิน คอง พะราซีนี คานดาซี ตัก เป็น พะราซีนี คอง ครำ เอทิโอเปีย นัน เจานาย ล็อง นัน โตะ ไว เอาซาง ตัก เมือง เยรูซาเล็ม นำ ก็ ต็อก ลอ วัล เจิง 28นำ ต็อก ลอ อาน นังซือ เริล นำ อาน นังซือ อิซยา ลาม เอาซาง 29ทาเน ซีมาล เอาซาง ก็ ไล ฟีลิบ คือเน วัล “มัห เริล ติๆ เคิบ ลอ นัน ดาย” ซีมาล อัง 30ฟีลิบ ก็ เล็ง โตะ ติๆ เคิง ลอ นัน นำ ก็ เม็จ นเซิง เอา นัน อาน นังซือ อิซยา เริล ฟีลิบ ก็ ซ็วน นำ “มัห อาน นังซือ นัน มัห เคาใจ เลาะ อัน” ฟีลิบ อัง 31“ก็ ตอ นะ เอิญ จบ เคาใจ จังนัก ไอ มี ซีเอ ไล อน ความมาย ตัก เอิญ ดุห” นำ อัง เอา นัน ก็ ลด มพอล ฟีลิบ ต็อก ลอ เลิม เคิบ ออ 32นังซือ อิซยา ตี นำ อาน นัน ก็ อัง ฮุนเน “อัห เอิด นำ เริล ฮุน อัห ซวร เอิด แกะ เริล มเบิล นัน นำ ก็ งเกิน อุ ฮุน แกะ แย็ด ตี อัห ญับ นโซก นำ ก็ เค็ด อุ มอก แกะ นัน เก็ย มี นำ จ็อก ซัง 33อัห ดูทูก ดูแควน นำ ไอ มี อัห แอง แคระ แอง ซือ ซิห นำ เตาะ ไอ มี อีเอ กุญ จ็อก เลือง ควัน งา นำ เตาะ เพาะวา อัห มเบิล แอ็ม นำ อัห ตัด แอ็ม นำ เจ็น โลก แพนซิก เน แลว” นังซือ อิซยา นัน อัง อิซยา 53:7-8
34เจานาย ล็อง นัน ก็ ซ็วน ฟีลิบ คือเน “ตี ลาม เอาซาง เคียน ระ อน ฮุนเน นำ อัง เค็ย อีเอ บ็อห นอ นำ อัง เค็ย นัง ออ ลู นำ อัง เค็ย อัหซอ ครอ ระ มัห ไล อน ตัก เอิญ วาล ดาย” นำ อัง 35ทาเน ฟีลิบ ก็ เอิด แญง เอาซาง ตี นำ อาน นัน อะทิบาย อน ตัก นำ วาล เจ็นนัน ฟีลิบ ก็ อะทิบาย เลือง เยซู ดก มบลึ อน ตัก นำ ปัง วัล 36ปาม ก็ เริล เลิม ติกๆ พอดี เล็ห ตัก นอก เจานาย ล็อง นัน ก็ ซ็วน ฟีลิบ “ดอม นัน กา ตัก นัน มี นอก นอ เอิญ แอง พิที จุบ นอก ก็ กุญ กา” นำ อัง 37#ค 37 นังซือ เครม ไล ดก ไอ มี คอ เน แกด เล็ม มี อัห เค็ย ฟีลิบ ก็ ซวัล นำ “กัน มัห กิว เจือ เยซู มัห ก็ แอง กุญ” ฟีลิบ อัง เจานาย ล็อง นัน ก็ ซวัล นำ จังเน “เอิญ เจือ เค็ย เยซู คริด เป็น ควัน เอาซาง ซีเละ” นำ อัง
38เจานาย ล็อง นัน ก็ ไล อัห จอด ลอ นำ เคิบ ฟีลิบ ก็ จูล เล็ห ตัก นอก ฟีลิบ ก็ แอง พิที จุบ นอก อน นำ 39-40ท็อบ ปาม ทอก เจ็น นอก แลว ซีมาล คอง งกีจ็อง ก็ ลด ฮับ เอิด ฟีลิบ เริล ตี ซอ เจ็นนัน เจานาย ล็อง นัน ก็ ไอ มี เม็จ มัด ฟีลิบ วัล เตาะ นำ ก็ ลด วัล ออ นำ ก็ เลาะใจ ซีเละ ทาเน ฟีลิบ ก็ พด เล็ห ตัก งวัล อาโซทัด เจ็นนัน นำ ก็ เริล ไล อัห เลือง เยซู ติกๆ เล็ห ตัก งวัล นเดย นำ ก็ ไล คาว เลาะ เลือง เยซู อน อัห ปัง ติกๆ นำ เริล จำปอ โตะ ตัก เมือง ซีซารียา
Currently Selected:
ตัวแทน 8: Prai
Highlight
Share
Copy
Want to have your highlights saved across all your devices? Sign up or sign in
Global Partners
