อิซราเอล ญาย 4
4
งกีจ็อง ไล โมเซด แอง ซะ แปลก
1ทาเน โมเซด ก็ ซ็วน งกีจ็อง วัล “อัห ไอ มี ปัง แญง เอิญ กา จับ อัห เค็ย เยโฮวา งกีจ็อง ไอ มี กิว มแบละ นัง ออ ตัก เอิญ ดุห กัน อัห เค็ย คือนะ เอิญ ไล อัห จังนัก เลาะ บ็อห” โมเซด อัง
2เยโฮวา ก็ ซ็วน นำ คือเน “ซัง มัห ก็อง ซีวะ อุ นัน” โมเซด ก็ ซวัล เค็ย “งเกราะ” นำ อัง 3งกีจ็อง ก็ ไล นำ พระ งเกราะ นัน “มัห พระ อ็อญ นเซ็บ กา” นำ อัง โมเซด ก็ มเพิล พระ งเกราะ นัน ลด เป็น เล็ห มาล โมเซด ก็ เต็ล ปัด 4เยโฮวา ก็ ลบ ไล โมเซด คือเน วัล “มัห เญ็บ นทัล ลอล มาล นัน กา” โมเซด ก็ ครุบ เญ็บ นทัล ลอล มาล นัน ลด เป็น เล็ห งเกราะ วัล เมือน เครม
5เยโฮวา ก็ ไล นำ คือเน วัล “มัห แอง มอก นัน ซัง อัห เจือ เค็ย เอิญ กิว โตะ มแบละ นัง ออ ตัก มัห แลว เอิญ เป็น งกีจ็อง ตี เอาจ็อง แป ทือ เจ็น ตัก อิง ตัก นา นัน เอิญ เป็น งกีจ็อง คอง อับราฮัม อิซอัก ยาโคบ นัน มัห ไล อัห คือนะ ดาย” เยโฮวา อัง
6ทาเน เยโฮวา ก็ ไล โมเซด คือเน วัล “มัห เอิด ที ซูด ซิห ตัก งก็อห ออ ดาย” โมเซด ก็ ซูด ซิห ที ตัก งก็อห นำ ลบ วัล ทอด ดอม เป็น เล็ห คีคาก มด ดอน คลุก 7งกีจ็อง ก็ ลบ ไล นำ ซูด ซิห ที ตัก งก็อห วัล มี ลบ นำ ก็ ซูด ซิห นำ ลบ วัล ทอด ดอม เลาะ เล็ห เมือน เครม วัล 8งกีจ็อง ก็ ไล นำ ฮุนเน วัล “กัน มัห แอง มี มบลึ เน แลว กัน อัห ไอ มี เจือ มัห มัห ก็ ต็อง แอง มี มบลึ วัล ดาย 9กัน อัห ไอ มี ปัง มัห เปียะ มบลึ เน มัห ก็ ต็อง แอง มี ยาง วัล มัห ต็อง ปัด ออก เจ็น นอก นำไน ทุก ซิห ตัก ซิก ทังๆ ออก นัน ก็ เป็น เล็ห เมียม มด ดาย อัห ก็ ลด ปัง มัห ซีเละ” งกีจ็อง อัง
10ทาเน โมเซด ก็ ซวัล เยโฮวา คือเน “งกีจ็อง เฮย เอิญ จ็อก ไอ มี เก็ง เจ็น อิง จำ มานะ เน มัห จ็อก เคิบ เอิญ เน ก็ ไอ มี แควน เล็ห ซัก มี ติด เอิญ ควะ จ็อก เกิ๊กๆ อุ มอก เครม” โมเซด อัง
11เยโฮวา ก็ ไล โมเซด คือเน วัล “ก็ ซัง อีเอ แอง งกาบ ครำ บ็อห อีเอ แอง ครำ ไบ ครำ เกลิบ นโทล อีเอ แอง ระ ครำ บอด มัด อีเอ แอง ระ ครำ ตาด มัด บ็อห ก็ เอิญ แอง ไอ แมน เออะ เอิญ เป็น เอาซาง ดุห 12มัห เริล อียิบ นทึห เตาะ เอิญ จวย มัห จ็อก ฮัก มัห ไล อัห จังนัก เอิญ ก็ ไล อน ตัก มัห ฮัก” เยโฮวา อัง
13โมเซด ก็ ซวัล งกีจ็อง ฮุนเน วัล “ครอ เคิบ มัห เตาะ ครอ ระ อัหซอ เริล แตน เอิญ ดาย” โมเซด อัง 14โมเซด ไอ มี ซีรอก เริล เยโฮวา ก็ แร็ง อ็อด อัง นำ นำ ก็ ไล โมเซด ฮุนเน วัล “นไจ มัห ตัก อาโรน ตัก เป็น กรอก เลวี นัน เอิญ ก็ เม็จ นำ จ็อก เก็ง ดุห มานะ เน นำ กำลัง โตะ และ มัห กัน นำ เม็จ มัด มัห นำ ก็ เลาะใจ ซีเละ 15มัห จ็อก เคิบ นำ ฮัก ปา ต็อง แอง ซีวะ บัดนะ เอิญ ก็ ไล อน ตัก มัห ฮัก มัห ก็ ตอ ไล อน ตัก อาโรน ระ นำ จ็อก ฮัก 16มัห ก็ ไล อาโรน จ็อก แตน ออ นำ เป็น ครำ จ็อก เคิบ ปึง พซาซน แตน มัห ฮัก มัห ไล นำ จ็อก ซีวะ ก็ มอก เอิญ ไล นำ นัน 17เจ็นเน มัห ก็ ต็อง ก็อง งเกราะ เน เริล ต็อง เอิด งเกราะ เนๆ แอง ซะ แปลก ระ อัห เคาใจ เค็ย เป็น เอิญ เน ฮัก ไล ปา เริล” เยโฮวา อัง
โมเซด วัล ตัก ปะเทด อียิบ
18แลว งกีจ็อง จ็อก เคิบ โมเซด แลว โมเซด ก็ วัล โตะ และ เอาเทา ออ ตัก เยโท นำ ก็ ซ็วน เอาเทา ออ ฮุนเน “เอิญ ครอ วัล และ ควน นไจ ออ ตัก ปะเทด อียิบ ดาย เอิญ ซีรอก แอว ดอม อัห อ็อญ เจือ อัห ควะ รีด อุ ฮุ ไอ มี รีด อุ ฮุ” นำ อัง เอาเทา นำ ก็ เค็ย เลาะ “เริล เลาะๆ ดาย” นำ อัง 19ญาม โมเซด ควะ อุ ตัก ปะเทด มีเดียน นัน เยโฮวา ก็ ลบ วัล ไล นำ คือเน “มัห วัล อียิบ นทึห เตาะ ครำ ตี และ มเบิล มัห นัน ซุด เปิล อัห แลว” เยโฮวา อัง 20โมเซด ก็ ระ ยัห เคิบ ควัน ออ ต็อก ลา เริล ปะเทด อียิบ นำ ก็ เอิด งเกราะ นัน เริล ฮุน งกีจ็อง ไล อน
21เยโฮวา ก็ ลบ ไล โมเซด คือเน วัล “ญาม มัห วัล ตัก ปะเทด อียิบ นัน เอิญ ก็ มอบ อน อำนาด ออ ตัก มัห มัห ก็ แอง ซะ แปลก จู มบลึ ตัก มัด ฟาโร ระ นำ เม็จ ดาย แต เอิญ แอง ระ นำ เป็น ครำ ลืน ไอ มี นำ ญอม ระ แป เริล เตาะ 22มัห ต็อง ไล ฟาโร คือเน ‘เยโฮวา งกีจ็อง เค็ย ครำ อิซราเอล เป็น ควัน เกา คอง ออ 23นำ ไล มัห พระ ควัน เกา คอง ออ ระ อัห โตะ ไว นำ กัน มัห ไอ มี ญอม ระ อัห เริล เจ็นเน นำ ก็ มเบิล แอ็ม ควัน เกา คอง มัห มด’ มัห ต็อง ไล ฟาโร คือเน ดาย” เยโฮวา อัง
24เจ็นนัน โมเซด ก็ เริล ออ แจ็ล แลว นำ ก็ อวย ตัก รวง เยโฮวา ก็ โตะ และ นำ บัก และ มเบิล แอ็ม นำ 25-26ซิบโปรา ก็ เอิด เกียง ซีลาว แอง พิที ซุนัด อน ตัก ควัน ออ นำ ก็ เอิด นทัล ซวัห นัน ปีด ซิห ตัก เจ็ง โมเซด แลว ซิบโปรา แอง ฮุนนัน แลว งกีจ็อง ก็ ไอ มี มเบิล โมเซด เตาะ ซิบโปรา ก็ ไล โมเซด คือเน “เอิญ เอิด เมียม เน ทน เอิด มัห เป็น คล็อง ออ แลว” นำ อัง นำ ไล คล็อง ฮุนนัน ก็ เพาะวา นำ เป็น ครำ แอง พิที ซุนัด อน ควัน ออ เจ็นนัน โมเซด ก็ เริล ตอ วัล
27ญาม เยโฮวา ไล โมเซด ตัก ปะเทด มีเดียน นัน เยโฮวา ก็ ไล อาโรน ตัก ปะเทด อียิบ วัล นำ ไล อาโรน เริล และ โมเซด ตัก ตี แลง นัน อาโรน ก็ เริล และ โมเซด ตัก ญวัง งกีจ็อง มอก เยโฮวา ไล นำ นัน อาโรน เม็จ มัด โมเซด แลว นำ ก็ เกาะ จูบ ซิห โมเซด 28โมเซด ก็ เลามุน เลือง ตี เยโฮวา ไล นำ เริล อียิบ เคิบ เลือง ซะ แปลก ตัก งกีจ็อง ไล นำ แอง นำ ก็ ไล อน มด จู มบลึ ตัก อาโรน
29เจ็นนัน โมเซด เคิบ อาโรน ก็ วัล โตะ ตัก อียิบ ปาม ก็ มพอล ปึง อัหแกะ ครำ อิซราเอล โตะ พซุม นอย 30อาโรน ก็ เลามุน เลือง เยโฮวา ไล โมเซด วาล นัน เยโฮวา ไล นำ จังนัก อาโรน ก็ ไล อน อัห ปัง มด จู มบลึ นำ ก็ แอง ซะ แปลก เคิบ มัด ปึง อัหแกะ ครำ อิซราเอล มด วัล 31อัห ก็ ลด เจือ ปาม ญาม อัห เม็จ คาว เค็ย เยโฮวา เม็จ อัห ตุก ญาก เคิบ อัห เม็จ คาว เค็ย เยโฮวา โตะ จวย ออ อัห ก็ มพอล นอย กราบ ไว เยโฮวา
Currently Selected:
อิซราเอล ญาย 4: Prai
Highlight
Share
Copy
Want to have your highlights saved across all your devices? Sign up or sign in
Global Partners
