เกาตีนา 22
22
เอาซาง ลอง ใจ อับราฮัม
1ทาเน เอาซาง ก็ โตะ ลอง ใจ อับราฮัม ฮุนเน “อับราฮัม เฮย” นำ อัง “ซีวะ เออะ” อับราฮัม อัง
2เอาซาง ก็ ไล นำ ฮุนเน “อับราฮัม มัห เอิด ควัน มี ล็อง เดียว ตัก อิซอัก ตี มัห รัก ดก ทีซุด นัน เริล ตัก เคด โมรียา ดาย มัห ทวาย นำ อน ตัก เอิญ ตัก ญวัง มี ตี นัน เอิญ ก็ ไล อน ญวัง ตัก มัห ฮัก” เอาซาง อัง
3คือ งิ กรัก งกร็อห อับราฮัม ก็ ตุด ร็อห เกด โอด ซำรับ เคิม ซะ อน เอาซาง นัน นำ ก็ เอิด เบาะ ต็อก ซิห ตัก เคา ลา นำ เอิด ควัน บาว เปียะ ล็อง ตัก เป็น ลูกนอง นำ นัน เริล เลิม นำ ก็ เอิด ควัน ออ ตัก อิซอัก นัน เริล เคิง ตี เอาซาง ไล นำ นัน 4อัห เริล แพะ งิ แลว นำ ก็ ง็อห ดอม เม็จ ญวัง นัน ควะ อุ เยอะ ซะ 5นำ ก็ ไล ลูกนอง ออ เปียะ ล็อง นัน ฮุนเน “ปา เพา ลา อุ เน วาล ดาย เอิญ เคิบ ควัน เริล ไว เอาซาง ตัก ญวัง งคม นัน วาล บึด เยอะ ก็ ลบ วัล โตะ และ ปา เคิง เน วัล” อับราฮัม อัง 6อับราฮัม ก็ เอิด นแด็ง เอิด งอง โอด เริล เลิม เคิบ ควัน ออ นำ ก็ ระ อิซอัก ปึห โอด ตี ปาม เอิด เคิม ซะ นัน
7ปาม ก็ นจาง เริล ติกๆ ทาเน อิซอัก ก็ ซ็วน เอา ออ “เอา” นำ อัง อับราฮัม ก็ ซวัล ควัน “ซีวะ เออะ ควัน” นำ อัง “งอง โอด เคิบ โอด ก็ มี แลว แต ควัน แกะ ตัก อา ทวาย อน เอาซาง นัน อุ พานเดย บ็อห” อิซอัก อัง 8อับราฮัม ก็ ซวัล ควัน ฮุนเน “ควัน แกะ ตี อา ทวาย อน เอาซาง นัน เอาซาง ก็ และ อน ออ ฮัก ดาย ควัน” นำ อัง
เจ็นนัน ปาม ก็ เริล ติกๆ 9ปาม เริล จำปอ โตะ ตัก ญวัง ตี เอาซาง ไล อน นัน โตะ ตัก ญวัง นัน แลว อับราฮัม ก็ แอง ตี ทวาย ซะ เคิง นัน นำ เอิด โอด มบรูจ ระ ตัก ตี ทวาย ซะ นัน เจ็นนัน นำ ก็ ท็อก ที ท็อก เจ็ง ควัน ต็อก ซิห เคิง มบรูจ โอด ลัห ทึห นัน 10ทาเน นำ ก็ โรจ เอิด นแด็ง มิด บัก และ ตุด ควัน ออ
11เทวาดา คอง เยโฮวา ก็ งกรอ นำ เจ็น วาง ตัก ทึห “อับราฮัมๆ” นำ อัง “ซีวะ เออะ” อับราฮัม อัง 12เทวาดา ก็ ลด ไล นำ คือเน “อำ มัห มเบิล ควัน ออ เตาะ ดาย เอิญ เม็จจึด ใจ มัห แลว มัห กิว ทือ เอาซาง ซีเละ มัห ญอม ทวาย ควัน ออ อน ตัก เอาซาง” เทวาดา อัง
13ทาเน อับราฮัม ก็ งแก็ล ดอม แทะ ลอล ออ นำ ก็ ปัก เม็จ แกะ นัง เอา มี นัง ซัก จัง อี อุ เคิง เกาลำ ซีทุบ อับราฮัม ก็ เญ็บ เอิด แกะ นัง นัน มเบิล เคิม ทวาย อน เอาซาง แตน ควัน ออ 14อับราฮัม ก็ ลด มพึ เคิง นัน เค็ย “เยโฮวา ยีเร” ซีแล็ม เค็ย “เอาซาง เยโฮวา และ อน ตัก ออ ฮัก” เจ็นนัน อัห ก็ ลด มพึ ซือ ญวัง นัน ตัก “เอาซาง และ อน ตัก ออ ฮัก” อัห อัง เตา มานะ เน
15ทาเน เทวาดา คอง เยโฮวา ก็ ลบ วัล จ็อก เคิบ อับราฮัม เจ็น วาง นทึห ฮุนเน วัล 16“เยโฮวา ไล มัห ฮุนเน ดาย เอิญ เป็น เยโฮวา ฮัก เอิญ ก็ ซันญา เคิบ มัห เลาะๆ ดาย มัห มี ควัน มี ล็อง เดียว มัห ก็ ไอ มี คาง ไอ มี จง ระ อน เป็น คอง ออ แต มัห ญอม ทวาย นำ อน ตัก เอิญ มัห แอง เลาะ ฮุนเน#ค 16-17 ฮีบรู 6:13-14 11:12 17เอิญ ก็ แอง เลาะๆ เคิบ มัห เอิญ แอง ระ ควัน งา มัห ดก เล็ห ติกๆ บัดนะ นโดน นับ ไอ มี แป เตาะ ควัน งา มัห ต็อง ดก เล็ห มอก ซีเม็ญ ตัก วาง นทึห ดก มอก ซาย ตัก เปล นอก ทะเล ควัน งา มัห ต็อง ซะนะ อัง ซะตรู ออ มด 18มัห ปัง แญง เอิญ เลาะ ฮุนเน แลว เอิญ ก็ ระ ครำ กรอก ซอ มด จู กรอก ใน โลก เน กุญ เลาะ ญอน ควัน งา มัห วัล”#ค 18 ตัวแทน เยซู 3:25 เยโฮวา อัง
19เจ็นนัน อับราฮัม ก็ วัล โตะ และ ปา ควัน บาว เปียะ ล็อง นัน นำ ก็ ลด วัล เจิง ตัก งวัล เบเออเซบา นำ ก็ อุ เคิง นัน ลด
เลือง ควัน งา นาโฮ
20แลว เอาซาง ลอง ใจ อับราฮัม แลว แทะ นัน วัล ก็ มี ครำ โตะ และ อับราฮัม อัห โตะ ไล คาว เค็ย มิลคา เคิบ นาโฮ ปาม มี ควัน แลว นาโฮ เป็น ควน อับราฮัม มิลคา เป็น ยัห นาโฮ 21ควัน เกา ปาม ซือ ตัก อูด อูด มี ควน ซือ ตัก บูด เคิบ เคมูเอล เคมูเอล เป็น เอา อารำ#ค 21 “อารำ” มานะ เน ตัก ปะเทด ซีเรีย ควะ มี กรอก อารำ อุ อัห ก็ จ็อก แญง อารำ มอก เครม นัน 22ทัด เคมูเอล ก็ มี เคเซด ฮาโซ ปิลดาด ยิดลาบ เคิบ เบทูเอล 23เบทูเอล เป็น เอา เรเบคา แปด ล็อง เน เป็น ควัน นาโฮ เคิบ มิลคา มด 24นาโฮ เน นำ ก็ มี ยัห มี ล็อง วัล ซือ ตัก เรอูมา นำ ก็ มี ควัน ซือ ตัก เทบา กาฮาม ทาฮาด มาอาคา
Currently Selected:
เกาตีนา 22: Prai
Highlight
Share
Copy
Want to have your highlights saved across all your devices? Sign up or sign in
Global Partners
