TAUNET 11
11
Teekset ne koi ne bo Babel
1King’alale ng’ony komugul kutit agenge ak ng’alalet agenge. 2Ak ye kita kouuote kong’asis, konyor atebwet eng’ emetab Sinar; ak kimeny oloto. 3King’alaljigei anyun ichegei kole, Ong’eetye keyai matabaruk ak kebeel komie. Kiboisie matabaruk che kita koik, ak kiboisie lamit komale. 4Ak kimwa kole, Obwa keteekyigei nganaset, ak keteech teekset age ne koi ne togostoi barak, ne itei kimonjogunnyi kipsengwetisiek, si keyaige keegu che toogunotin, si mata keyeste eng’ ng’ony komugul. 5Ak kichorgei Jehovah konyo kogeer nganaset ak teekset ne koi ne kitogosta kwo barak, ne kiteech werikab bik. 6Ak kile Jehovah, Ogeero, agenge bichu, ak ko bo tugul kutit agenge; ak kagotoi koyai kiy ne u ni: ak mami kiy ne ranyei ichek si mayai kiy ne machei. 7Ongebe, kechortege anyun, kitoiye kutuswekwak si mata kogasyin ichegei eng’ ng’alalet. 8Eng’ noto anyun, koiyestaat Jehovah ichek koba eng’ oloto agoi ng’ony komugul: ak kimeto teeksetab nganaset. 9Kigiguure nganasanato Babel anyun, amu noto: amu kiitoiye Jehovah oloto kutuswek che bo ng’ony komugul; ak kiiyesta Jehovah ichek koba eng’ oloto, koba ng’ony komugul.
Bik che kibiitu let eng’ oretab Sem agoi Abraham
10Chu ortinwekab Sem. Kitar Sem kenyisiek bogol, si kosichei Arbaksat eng’ kenyit ne bo aeng’ ye kingo kagobata maranet: 11ak kitar Sem kenyisiek bogol mut ye kingo kagosich Arbaksat, ak kisich werik ak tibik.
12Kitar Arbaksat kenyisiek sosom ak mut kosich Sela: 13ak kitar Arbaksat kenyisiek bogol ang’wan ak somok ye kingo kagosich Sela, ak kisich werik ak tibik.
14Kitar Sela kenyisiek sosom, kosich Eber: 15ak kitar Sela kenyisiek bogol ang’wan ak somok ye kingo kagosich Eber, ak kisich werik ak tigik.
16Kitar Eber kenyisiek sosom ak ang’wan, kosich Peleg: 17ak kitar Eber kenyisiek bogol ang’wan ak sosom ye kingo kagosich Peleg, ak kisich werik ak tibik.
18Kitar Peleg kenyisiek sosom, kosich Reu: 19kitar Peleg kenyisiek bogol aeng’ ak sogol ye kingo kagosich Reu, ak kisich werik ak tibik.
20Kitar Reu kenyisiek sosom ak aeng’, kosich Serug: 21kitar Reu kenyisiek bogol aeng’ ak tisab ye kingo kagosich Serug, ak kisich werik ak tibik.
22Kitar Serug kenyisiek sosom, kosich Nahor: 23kitar Serug kenyisiek bogol aeng’ ye kingo kagosich Nahor, ak kisich werik ak tibik.
24Kitar Nahor kenyisiek tiptem ak sogol, kosich Tera: 25kitar Nahor kenyisiek bogol ak taman ak sogol ye kingo kagosich Tera, ak kisich werik ak tibik.
26Kitar Tera kenyisiek tamanwogik tisab, kosich Abram, Nahor, ak Haran.
27Chu ortinwekab Tera. Kisich Tera Abram, Nahor, ak Haran; ak kisich Haran Lot. 28Kime Haran eng’ taitab kwandanyi Tera eng’ emet ne kigisikyin, eng’ Ur ne bo Kaldeik. 29Ak kiitunis Abram ak Nahor: kigiguure osotiotab Abram Sarai; ak kigiguure osotiotab Nahor Milka, cheptab Haran, kwandab Milka ak Iska. 30Kisonen Sarai; kima kotinyei lakwa. 31Ak kiimut Tera werinnyi Abram, ak Lot weritab Haran, weritab werinnyi, ak Sarai osotiotab werinnyi Abram; kiba tugul eng’ emetab Ur ne bo Kaldeik, koba emetab Kanan; kiit Haran, koba komeny oloto. 32Ak betusiekab Tera ko ki kenyisiek bogol aeng’ ak mut: ak kime Tera eng’ Haran.
Currently Selected:
TAUNET 11: BUKUIT
Highlight
Share
Copy
Want to have your highlights saved across all your devices? Sign up or sign in
God's word open for all
©Bible Society of Kenya, 2020
