MARIKO 14
14
Liloshitsa liu Khwiira Yesu
(Mat 26:1-5; Luka 22:1-2; Yoh 11:45-53)
1Kali nikarikale matukhu kavili khutukha khu Mulukha kwa Pasaka nende Mulukha Kukhulia Mukati kwalombwa vuchila Mamela. Vasalisi vakali nende veechitsi va Malako vakhavanga khuli vanyala khukumila Yesu muvwivisi nu khumwiira. 2Vavoola, “Khuvuli khukhola khulitukhu liu Mulukha kwa Pasaka; inoho vandu vanyala khukhola shileeche.”
Yesu Yavekhwa Makura Betsania
(Mat 26:6-13; Yoh 12:1-8)
3Lwa Yesu yali nali mu litaala lia Betsania, mu inzu ya Simoni, wali niyalwala vuchele, niyikhale hamesa naliitsanga shiukhulia; mukhali wundi yinjilamu. Yali nachinji ichupa ya alabasita ya makura ku vukuuli vululu kalombwa khu inaridi. Yaraana shikhunikho shiu khu ichupa yeneyo, natsukha makura kenako khu murwi kwa Yesu. 4Valala khu vandu vali nivaliho vali nu vurima nivareevana vene khuvene, “Shichila shina yononyinyi makura ku khwivekha yaka? 5Kakhakuulitswi himbi tsidinari tsimia tsivaka, ma tsisenti tsiheelwi vamanani!” Khulwa yako, vakondeshela mukhali mwenoyo vululu muno.
6Navutswa Yesu yavavoolela, “Muleshi ave! Shichila shina mumunyashitsanga? Ukholele shikholwa shilahi muno. 7Matukhu koosi muvetsanga na vandu vamanani; khandi munyala khuvakhonya isaa yosi yamwenyi. Navutswa muliitsa khuvula khuvetsanga ninzi shia khase khosi. 8Uchelitsi khukhola kanyala, shichila uveshi mmbili kwanje makura khukulomba kwirecheshe nu kushili khuyeveelwa mu shilindwa. 9Muvoolelanga kilikali ndi shia havundu hosi ha valiitsa khuva nivilwatsanga Ivanjeli mu shivala, shikholwa shiu mukhali uyu akholi shilitsa khuvoolwa, khulu khwitsushitsa mukhali uyu.”
Yuda Yahuchilila Khutsama Yesu
(Mat 26:14-16; Luka 22:3-6)
10Mulala khu veechi likhomi na vavili walaangwangwa Yuda Isikarioti yasimukha natsia khutsama Yesu khu vasalisi vakali. 11Vali nu vuyaanzi vunyishi khuhulila ka yenyanga khuvoola, nivalaka khumuha tsisenti. Yuda yaraanga khukhava vwiyangu vulahi vu khutsama Yesu.
Yesu Yalia Shiukhulia shia Pasaka na Veechi Veve
(Mat 26:17-25; Luka 22:7-14,21-23; Yoh 13:21-30)
12Khulitukhu liu khuraanga liu Mulukha Kukhulia Mikati Chialombwa Vuchila Mamela, litukhu lia makondi ki shiukhulia shiu Mulukha kwa Pasaka kasinzwangwa, Veechi va Yesu vareeva Yesu, “Ni hena ha wenyanga khutsi khukhulombele wa khunyala khulia shiukhulia shiu Mulukha kwa Pasaka?”
13Nalwo lwa Yesu yaruma veechi vavili khu veechi veve na mivaalo yaka: “Simushi mutsi mu litaala likali, khandi muliitsa khwakana nu mundu nachinji matsi mushivuyi. Mumulonde 14khutukha mu inzu yayinjila, mamuvoolele mwene inzu, ‘Mwechitsi areevanga, Ni hena ha inzu ya inzi nende veechi vaanje khulia shiukhulia shiu Mulukha kwa Pasaka?’ 15Naye aliitsa khumumanyinya inzu ingali yikolofa yu vwiyangu, yalombwa vulahi khandi yasiaywa, ha muliitsa khunyola nivakhulombele vindu viosi.”
16Veechi varulaho nivatsia mu litaala likali, nivanyola shia shindu shiosi khuli Yesu yali navavoolele; nivalomba shiukhulia shiu Mulukha kwa Pasaka.
17Lwa khulukolovo khwali nu khwakhatukha, Yesu yatukhaho na veechi veve likhomi na vavili. 18Lwa vali nivikhale hamesa, nivaliitsanga shiukhulia, Yesu yavoola, “Muvoolelanga kilikali ndi mulala khu munyi, nali woyo uliitsanga shiukhulia ninzi, aliitsa khunzama.”
19Veechi veve vali nilivelela mu mwoyo, nivaraanga khumureeva, shia mulala, “Anyala khuva ninzi toto?”
20Yesu yavachipa, “Nu mulala khu munyi likhomi na vavili, nali woyo winikhanga mukati kwekwe mu ibakuli ninzi. 21Mwana wu Mundu khutukha aliitsa khukhutsa khuli Mahandiko Matakatifu kavoolanga aliitsa khukhutsa; navutswa mundu uliitsa khumutsama aliitsa khuva khu vutiinyu muno! Vwakhavele vulahi muno niiva mundu mwenoyo shiyakhavele niyivulwa tawe!”
Shiukhulia shiu Mwami Shiukhumalilikha
(Mat 26:26-30; Luka 22:14-20; 1 Vakor 11:23-25)
22Lwa vali nivaliitsanga shiukhulia, Yesu yavukula shitonye shiu mukati, nasanditsa, natong'olanyinya, naha veechi veve. Yavoola, “Vukuli, yuku nakwo mmbili kwanje.”
23Yesu yavukula khandi shikombe shilimu ni idivai. Lwa yali niyakhasanditsa, yavaha; khandi nivang'wamu. 24Yesu yavoola, “Yaka ni masahi kaanje, kasuundulwa shichila vanyishi; masahi kaanje kahambanyinyanga lilakano lia Nyasaye nende vandu veve. 25Muvoolelanga kilikali ndi niitsa khuvula khung'wakhu khandi idivai yiyi nishili khung'wakhu idivai impia mu Vwami vwa Nyasaye.”
26Khulwa yako, vimba lwimbo nivasimukha nivatsia khu Shikulu shia Misayituni.
Yesu Yavoola Kushili Khuli Petro Amwambakhana
(Mat 26:31-35; Luka 22:31-34; Yoh 13:36-38)
27Yesu yavoolela veechi veve, “Munyi voosi muliitsa khwilukha munzivale, shichila Mahandiko Matakatifu kavoolanga, ‘Nyasaye aliitsa khwiira mwayi, khandi makondi koosi nikasalane.’ 28Navutswa lwa mba nimali khwisimushitswa khurula mu likhutsa, natsia mu lusomo lwa Galilaya imbeli wenyu.”
29Petro yavoolela Yesu, “Khali niiva voosi valiitsa khukhwivala, inzi shinyala khukhwivala tawe!”
30Yesu yavoolela Petro, “Khuvoolelanga kilikali ndi itaywa nishili khulakula hali khavili vutukhu vunu, uliitsa khuvoola hali khavaka wangorwa.”
31Petro yakalushila khumuvoolela, “Khali niiva nyala khukhutsa nivi, shinyala khukhwambakhana tawe!”
Veechi vandi voosi vavoola makhuva malala mele.
Yesu Yasaala mu Getsesemani
(Mat 26:36-46; Luka 22:39-46)
32Yesu nende Veechi veve vasimukha nivatsia havundu halaangwangwa Getsesemani. Yesu navavoolela, “Mwikhale hanu, nishitsia khusaala.” 33Yesu yavukula Petro, Yakobo nende Yohana halala naye. Yaraanga khunyakhana naheenda mwoyo, 34navavoolela, “Mwoyo kwanje kuvelele muno, khali nakhava himbi khukhutsa. Mwikhale hanu, mutsililile khuheenza.”
35Lwa Yesu yisuundakhu hambeli hatititi, yasikama hasi, nasaala ndi niiva kanyala khunyalikha avuli khunyakhana isaa yeneyo. 36Yesu yasaala “Aba, Tata wanje! Shia shindu shiosi shinyala khwikholekha shichila yivi. Rulitsa shikombe shi linyakhana yishi khwinzi. Liakhava lienya lianje tawe, navutswa lienya liolio likholeshe.”
37Yesu yakalukha, nanyola veechi vavaka venavo nivakonanga tsindolo. Yareeva Petro, “Simoni, ukoni tsindolo? Shiuvele waheenzakhu khali khu isaa indala yonyene tawe?” 38Yesu yavavoolela, “Mutsililile khuheenza, khandi musaale ndi mulivula khukwa mu machelitso. Roho yenyanga, navutswa mmbili kuteteshele.”
39Yesu yasimukha khandi natsia, navoola makhuva malala mele. 40Khulwa yako, yakalukha khu veechi veve, nanyola vashikonanga; shivali vanyala khuteminya tawe. Vakorwa shia vanyala khumuvoolela.
41Lwa Yesu yakalukha lwa khavaka khu veechi veve, yavareeva, “Mushitsililila khukona tsindolo numuhulukha? Luvwele! Isaa yakhatukha! Loli, Mwana wu Mundu ahaanwangwa nunundi khu vandu vooni. 42Sinjili, chendi khutsi. Loli, mundu unzamanga ali hanu uyu!”
Yesu Yakumilwa
(Mat 26:47-56; Luka 22:47-53; Yoh 18:3-12)
43Yesu yali nashilomolomanga, lwa Yuda, mulala khu veechi likhomi na vavili yatukhaho. Yuda yali ni shituma shia vandu niviyavaale vivavi nende vikong'o, va vasalisi vakali, veechitsi va Malako nende vasakhulu vali nivarumi. 44Yuda yali usimi shituma shia vandu khandi uvavoolele: “Mundu wanzunzunakhu neye wa mwenyanga. Mukumili khandi mumurulitsiho nu vulindi vukali.”
45Lwa Yuda yatukhaho vwangu, yasimukha natsia vulunji khu Yesu navoola, “Mwechitsi!” Manamutsunzuna. 46Khulwa yako, vakumila Yesu ni vahaanda khuye ni tsingulu. 47Navutswa mulala khu vandu vali nivasinjileho yasomola shivavi shieshie nareema shiroyi shiu murukwa wu Mukali wa vasalisi voosi. 48Yesu yareeva shituma shia vandu, “Shikenyeshenje mwitsi ni vivavi nende vikong'o khungumila, khuli mundu munuuli tawe? 49Shia litukhu namwechitsanga mu Litempeli, numuvula khungumila. Navutswa Mahandiko Matakatifu khutukha karweshitswi.”
50Navutswa veechi veve voosi vamulekha, nivilukha.
51Musatsa wundi muvukha, wali niyivohi luvaala lwonyene, yalonda Yesu. Vachelitsa khumukumila, 52navutswa yilukha shekenye, nalekha inguvu inyuma.
Yesu Yahilwa Imbeli wi Shikhaalo
(Mat 26:57-68; Luka 22:54-55,63-71; Yoh 18:13-14,19-24)
53Vahila Yesu mu inzu yu Mukali wa vasalisi voosi, mwa Vasalisi vakali vandi, vasakhulu nende veechitsi va Malako vali nivakanile halala. 54Petro yavalonda munyuma, niyinjila mu lwanyi lwi inzu yu Mukali wa vasalisi voosi. Yikhalaho niyora mulilu na vasikali valindaho. 55Vasalisi vakali nende vandu vi Shikhaalo shiosi vachelitsa khukhava vushiahidi khulondokhana khu Yesu khu vamwiiri, navutswa shivavunyola tawe. 56Vashiahidi vanyishi vakaatila Yesu, navutswa makhuva kavo ka vavoolanga shikatsianakana tawe.
57Vandu valala vasinjila nivakaata Yesu nivavoola, 58“Khwahulila navoolanga, ‘Niitsa khupomolanyinya Litempeli lia vandu vumbakha, khandi matukhu kavaka nikakhavira, niitsa khumbakha Litempeli lindi lia vandu vakhanyala khumbakha tawe?’ ” 59Khali ndio, makhuva kavo ka vavoola shikatsianakana tawe.
60Mukali wa vasalisi voosi yasinjila imbeli wi Shikhaalo shiosi, nareeva Yesu, “Uvulakhu lichipu liosi liu nyala khuvaha khulondokhana khu ka vavoola khu yivi? Ni vindu shina vichilanga vandu yava nivakhuyaala?”
61Navutswa Yesu yahonjela vuchila khuvoolakhu shindu shiosi. Mukali wa vasalisi voosi yamureeva khandi, “Nivi Masiha, Mwana wa Nyasaye wu Vukhumi?”
62Yesu yachipa, “Ninzi ye; khandi muliitsa khulola Mwana wu Mundu niyikhale khuluveka lu mukhono musatsa kwa Nyasaye, niyitsanga khuvirila khu malesi.”
63Mukali wa vasalisi voosi yarandula ikaanzu yeye navoola, “Shichila shina khutsililile khwenya vashiahidi vandi vanyishi! 64Mumali khuhulila khuli anyekanga Nyasaye. Ni shina shia muviritsanga khumukhola?” Voosi vaviritsa nivavoola ndi khutukha yiirwi.
65Valala khuvo varaanga khusutsila Yesu maree, nivamuvoha mu tsimoni khandi nivamutuuya nivavoola, “Khuprofetele mundu ukhutuuyi!” Khali valindi valindaho vamuvukula, nivamusamula tsikhovi.
Petro Yavoola Shiamanyikhu Yesu Tawe
(Mat 26:69-75; Luka 22:56-62; Yoh 18:15-18,25-27)
66Petro yali nashikhale ilwanyi mu lwanyi, lwa mulala khu varumishi vi shikhana vu Mukali wa vasalisi voosi yatukhaho. 67Lwa yalola Petro niyoranga mulilu, yamuheenza vululu; namuvoolela, “Khali yivi uvele na Yesu wa Nazareti.”
68Navutswa Petro yambakhana navoola, “Shimanyikhu ka ulomolomanga khulondokhanakhu, khali shimbulilanga tawe.” Petro yarula natsia mu shilivwa. Ma hene yaho, itaywa nilakula.#14:68 Mahandiko Matakatifu malala kakhale kavula “Ma hene yaho itaywa nilakula.”
69Murumishi wi shikhana mwenoyo yalola khandi Petro, naraanga khuvoolela khandi vandu vali nivasinjileho, “Mundu uyu nu mulala khuvo!” 70Navutswa Petro yambakhana khandi.
Hari hatititi, vandu vali nivasinjileho vavoolela Petro, “Ni kilikali, uli mulala khuvo, shichila uli Mugalilaya.”
71Khulwa yako, Petro yavoola, “Nzisuuhanga mbolanga kilikali! Nyasaye asalilitse niiva ngatanga! Nakorwa mundu wamulomolomanga khulondokhanakhu woyo!”
72Ma hene yaho, itaywa yalakula lwa khavili, ma Petro niyitsushitsa khuli Yesu yali namuvoolele, “Itaywa nishili khulakula hali khavili, uliitsa khuvoola hali khavaka wangorwa.” Nalwo lwa Petro yaraanga khulila.
Currently Selected:
MARIKO 14: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
MARIKO 14
14
Liloshitsa liu Khwiira Yesu
(Mat 26:1-5; Luka 22:1-2; Yoh 11:45-53)
1Kali nikarikale matukhu kavili khutukha khu Mulukha kwa Pasaka nende Mulukha Kukhulia Mukati kwalombwa vuchila Mamela. Vasalisi vakali nende veechitsi va Malako vakhavanga khuli vanyala khukumila Yesu muvwivisi nu khumwiira. 2Vavoola, “Khuvuli khukhola khulitukhu liu Mulukha kwa Pasaka; inoho vandu vanyala khukhola shileeche.”
Yesu Yavekhwa Makura Betsania
(Mat 26:6-13; Yoh 12:1-8)
3Lwa Yesu yali nali mu litaala lia Betsania, mu inzu ya Simoni, wali niyalwala vuchele, niyikhale hamesa naliitsanga shiukhulia; mukhali wundi yinjilamu. Yali nachinji ichupa ya alabasita ya makura ku vukuuli vululu kalombwa khu inaridi. Yaraana shikhunikho shiu khu ichupa yeneyo, natsukha makura kenako khu murwi kwa Yesu. 4Valala khu vandu vali nivaliho vali nu vurima nivareevana vene khuvene, “Shichila shina yononyinyi makura ku khwivekha yaka? 5Kakhakuulitswi himbi tsidinari tsimia tsivaka, ma tsisenti tsiheelwi vamanani!” Khulwa yako, vakondeshela mukhali mwenoyo vululu muno.
6Navutswa Yesu yavavoolela, “Muleshi ave! Shichila shina mumunyashitsanga? Ukholele shikholwa shilahi muno. 7Matukhu koosi muvetsanga na vandu vamanani; khandi munyala khuvakhonya isaa yosi yamwenyi. Navutswa muliitsa khuvula khuvetsanga ninzi shia khase khosi. 8Uchelitsi khukhola kanyala, shichila uveshi mmbili kwanje makura khukulomba kwirecheshe nu kushili khuyeveelwa mu shilindwa. 9Muvoolelanga kilikali ndi shia havundu hosi ha valiitsa khuva nivilwatsanga Ivanjeli mu shivala, shikholwa shiu mukhali uyu akholi shilitsa khuvoolwa, khulu khwitsushitsa mukhali uyu.”
Yuda Yahuchilila Khutsama Yesu
(Mat 26:14-16; Luka 22:3-6)
10Mulala khu veechi likhomi na vavili walaangwangwa Yuda Isikarioti yasimukha natsia khutsama Yesu khu vasalisi vakali. 11Vali nu vuyaanzi vunyishi khuhulila ka yenyanga khuvoola, nivalaka khumuha tsisenti. Yuda yaraanga khukhava vwiyangu vulahi vu khutsama Yesu.
Yesu Yalia Shiukhulia shia Pasaka na Veechi Veve
(Mat 26:17-25; Luka 22:7-14,21-23; Yoh 13:21-30)
12Khulitukhu liu khuraanga liu Mulukha Kukhulia Mikati Chialombwa Vuchila Mamela, litukhu lia makondi ki shiukhulia shiu Mulukha kwa Pasaka kasinzwangwa, Veechi va Yesu vareeva Yesu, “Ni hena ha wenyanga khutsi khukhulombele wa khunyala khulia shiukhulia shiu Mulukha kwa Pasaka?”
13Nalwo lwa Yesu yaruma veechi vavili khu veechi veve na mivaalo yaka: “Simushi mutsi mu litaala likali, khandi muliitsa khwakana nu mundu nachinji matsi mushivuyi. Mumulonde 14khutukha mu inzu yayinjila, mamuvoolele mwene inzu, ‘Mwechitsi areevanga, Ni hena ha inzu ya inzi nende veechi vaanje khulia shiukhulia shiu Mulukha kwa Pasaka?’ 15Naye aliitsa khumumanyinya inzu ingali yikolofa yu vwiyangu, yalombwa vulahi khandi yasiaywa, ha muliitsa khunyola nivakhulombele vindu viosi.”
16Veechi varulaho nivatsia mu litaala likali, nivanyola shia shindu shiosi khuli Yesu yali navavoolele; nivalomba shiukhulia shiu Mulukha kwa Pasaka.
17Lwa khulukolovo khwali nu khwakhatukha, Yesu yatukhaho na veechi veve likhomi na vavili. 18Lwa vali nivikhale hamesa, nivaliitsanga shiukhulia, Yesu yavoola, “Muvoolelanga kilikali ndi mulala khu munyi, nali woyo uliitsanga shiukhulia ninzi, aliitsa khunzama.”
19Veechi veve vali nilivelela mu mwoyo, nivaraanga khumureeva, shia mulala, “Anyala khuva ninzi toto?”
20Yesu yavachipa, “Nu mulala khu munyi likhomi na vavili, nali woyo winikhanga mukati kwekwe mu ibakuli ninzi. 21Mwana wu Mundu khutukha aliitsa khukhutsa khuli Mahandiko Matakatifu kavoolanga aliitsa khukhutsa; navutswa mundu uliitsa khumutsama aliitsa khuva khu vutiinyu muno! Vwakhavele vulahi muno niiva mundu mwenoyo shiyakhavele niyivulwa tawe!”
Shiukhulia shiu Mwami Shiukhumalilikha
(Mat 26:26-30; Luka 22:14-20; 1 Vakor 11:23-25)
22Lwa vali nivaliitsanga shiukhulia, Yesu yavukula shitonye shiu mukati, nasanditsa, natong'olanyinya, naha veechi veve. Yavoola, “Vukuli, yuku nakwo mmbili kwanje.”
23Yesu yavukula khandi shikombe shilimu ni idivai. Lwa yali niyakhasanditsa, yavaha; khandi nivang'wamu. 24Yesu yavoola, “Yaka ni masahi kaanje, kasuundulwa shichila vanyishi; masahi kaanje kahambanyinyanga lilakano lia Nyasaye nende vandu veve. 25Muvoolelanga kilikali ndi niitsa khuvula khung'wakhu khandi idivai yiyi nishili khung'wakhu idivai impia mu Vwami vwa Nyasaye.”
26Khulwa yako, vimba lwimbo nivasimukha nivatsia khu Shikulu shia Misayituni.
Yesu Yavoola Kushili Khuli Petro Amwambakhana
(Mat 26:31-35; Luka 22:31-34; Yoh 13:36-38)
27Yesu yavoolela veechi veve, “Munyi voosi muliitsa khwilukha munzivale, shichila Mahandiko Matakatifu kavoolanga, ‘Nyasaye aliitsa khwiira mwayi, khandi makondi koosi nikasalane.’ 28Navutswa lwa mba nimali khwisimushitswa khurula mu likhutsa, natsia mu lusomo lwa Galilaya imbeli wenyu.”
29Petro yavoolela Yesu, “Khali niiva voosi valiitsa khukhwivala, inzi shinyala khukhwivala tawe!”
30Yesu yavoolela Petro, “Khuvoolelanga kilikali ndi itaywa nishili khulakula hali khavili vutukhu vunu, uliitsa khuvoola hali khavaka wangorwa.”
31Petro yakalushila khumuvoolela, “Khali niiva nyala khukhutsa nivi, shinyala khukhwambakhana tawe!”
Veechi vandi voosi vavoola makhuva malala mele.
Yesu Yasaala mu Getsesemani
(Mat 26:36-46; Luka 22:39-46)
32Yesu nende Veechi veve vasimukha nivatsia havundu halaangwangwa Getsesemani. Yesu navavoolela, “Mwikhale hanu, nishitsia khusaala.” 33Yesu yavukula Petro, Yakobo nende Yohana halala naye. Yaraanga khunyakhana naheenda mwoyo, 34navavoolela, “Mwoyo kwanje kuvelele muno, khali nakhava himbi khukhutsa. Mwikhale hanu, mutsililile khuheenza.”
35Lwa Yesu yisuundakhu hambeli hatititi, yasikama hasi, nasaala ndi niiva kanyala khunyalikha avuli khunyakhana isaa yeneyo. 36Yesu yasaala “Aba, Tata wanje! Shia shindu shiosi shinyala khwikholekha shichila yivi. Rulitsa shikombe shi linyakhana yishi khwinzi. Liakhava lienya lianje tawe, navutswa lienya liolio likholeshe.”
37Yesu yakalukha, nanyola veechi vavaka venavo nivakonanga tsindolo. Yareeva Petro, “Simoni, ukoni tsindolo? Shiuvele waheenzakhu khali khu isaa indala yonyene tawe?” 38Yesu yavavoolela, “Mutsililile khuheenza, khandi musaale ndi mulivula khukwa mu machelitso. Roho yenyanga, navutswa mmbili kuteteshele.”
39Yesu yasimukha khandi natsia, navoola makhuva malala mele. 40Khulwa yako, yakalukha khu veechi veve, nanyola vashikonanga; shivali vanyala khuteminya tawe. Vakorwa shia vanyala khumuvoolela.
41Lwa Yesu yakalukha lwa khavaka khu veechi veve, yavareeva, “Mushitsililila khukona tsindolo numuhulukha? Luvwele! Isaa yakhatukha! Loli, Mwana wu Mundu ahaanwangwa nunundi khu vandu vooni. 42Sinjili, chendi khutsi. Loli, mundu unzamanga ali hanu uyu!”
Yesu Yakumilwa
(Mat 26:47-56; Luka 22:47-53; Yoh 18:3-12)
43Yesu yali nashilomolomanga, lwa Yuda, mulala khu veechi likhomi na vavili yatukhaho. Yuda yali ni shituma shia vandu niviyavaale vivavi nende vikong'o, va vasalisi vakali, veechitsi va Malako nende vasakhulu vali nivarumi. 44Yuda yali usimi shituma shia vandu khandi uvavoolele: “Mundu wanzunzunakhu neye wa mwenyanga. Mukumili khandi mumurulitsiho nu vulindi vukali.”
45Lwa Yuda yatukhaho vwangu, yasimukha natsia vulunji khu Yesu navoola, “Mwechitsi!” Manamutsunzuna. 46Khulwa yako, vakumila Yesu ni vahaanda khuye ni tsingulu. 47Navutswa mulala khu vandu vali nivasinjileho yasomola shivavi shieshie nareema shiroyi shiu murukwa wu Mukali wa vasalisi voosi. 48Yesu yareeva shituma shia vandu, “Shikenyeshenje mwitsi ni vivavi nende vikong'o khungumila, khuli mundu munuuli tawe? 49Shia litukhu namwechitsanga mu Litempeli, numuvula khungumila. Navutswa Mahandiko Matakatifu khutukha karweshitswi.”
50Navutswa veechi veve voosi vamulekha, nivilukha.
51Musatsa wundi muvukha, wali niyivohi luvaala lwonyene, yalonda Yesu. Vachelitsa khumukumila, 52navutswa yilukha shekenye, nalekha inguvu inyuma.
Yesu Yahilwa Imbeli wi Shikhaalo
(Mat 26:57-68; Luka 22:54-55,63-71; Yoh 18:13-14,19-24)
53Vahila Yesu mu inzu yu Mukali wa vasalisi voosi, mwa Vasalisi vakali vandi, vasakhulu nende veechitsi va Malako vali nivakanile halala. 54Petro yavalonda munyuma, niyinjila mu lwanyi lwi inzu yu Mukali wa vasalisi voosi. Yikhalaho niyora mulilu na vasikali valindaho. 55Vasalisi vakali nende vandu vi Shikhaalo shiosi vachelitsa khukhava vushiahidi khulondokhana khu Yesu khu vamwiiri, navutswa shivavunyola tawe. 56Vashiahidi vanyishi vakaatila Yesu, navutswa makhuva kavo ka vavoolanga shikatsianakana tawe.
57Vandu valala vasinjila nivakaata Yesu nivavoola, 58“Khwahulila navoolanga, ‘Niitsa khupomolanyinya Litempeli lia vandu vumbakha, khandi matukhu kavaka nikakhavira, niitsa khumbakha Litempeli lindi lia vandu vakhanyala khumbakha tawe?’ ” 59Khali ndio, makhuva kavo ka vavoola shikatsianakana tawe.
60Mukali wa vasalisi voosi yasinjila imbeli wi Shikhaalo shiosi, nareeva Yesu, “Uvulakhu lichipu liosi liu nyala khuvaha khulondokhana khu ka vavoola khu yivi? Ni vindu shina vichilanga vandu yava nivakhuyaala?”
61Navutswa Yesu yahonjela vuchila khuvoolakhu shindu shiosi. Mukali wa vasalisi voosi yamureeva khandi, “Nivi Masiha, Mwana wa Nyasaye wu Vukhumi?”
62Yesu yachipa, “Ninzi ye; khandi muliitsa khulola Mwana wu Mundu niyikhale khuluveka lu mukhono musatsa kwa Nyasaye, niyitsanga khuvirila khu malesi.”
63Mukali wa vasalisi voosi yarandula ikaanzu yeye navoola, “Shichila shina khutsililile khwenya vashiahidi vandi vanyishi! 64Mumali khuhulila khuli anyekanga Nyasaye. Ni shina shia muviritsanga khumukhola?” Voosi vaviritsa nivavoola ndi khutukha yiirwi.
65Valala khuvo varaanga khusutsila Yesu maree, nivamuvoha mu tsimoni khandi nivamutuuya nivavoola, “Khuprofetele mundu ukhutuuyi!” Khali valindi valindaho vamuvukula, nivamusamula tsikhovi.
Petro Yavoola Shiamanyikhu Yesu Tawe
(Mat 26:69-75; Luka 22:56-62; Yoh 18:15-18,25-27)
66Petro yali nashikhale ilwanyi mu lwanyi, lwa mulala khu varumishi vi shikhana vu Mukali wa vasalisi voosi yatukhaho. 67Lwa yalola Petro niyoranga mulilu, yamuheenza vululu; namuvoolela, “Khali yivi uvele na Yesu wa Nazareti.”
68Navutswa Petro yambakhana navoola, “Shimanyikhu ka ulomolomanga khulondokhanakhu, khali shimbulilanga tawe.” Petro yarula natsia mu shilivwa. Ma hene yaho, itaywa nilakula.#14:68 Mahandiko Matakatifu malala kakhale kavula “Ma hene yaho itaywa nilakula.”
69Murumishi wi shikhana mwenoyo yalola khandi Petro, naraanga khuvoolela khandi vandu vali nivasinjileho, “Mundu uyu nu mulala khuvo!” 70Navutswa Petro yambakhana khandi.
Hari hatititi, vandu vali nivasinjileho vavoolela Petro, “Ni kilikali, uli mulala khuvo, shichila uli Mugalilaya.”
71Khulwa yako, Petro yavoola, “Nzisuuhanga mbolanga kilikali! Nyasaye asalilitse niiva ngatanga! Nakorwa mundu wamulomolomanga khulondokhanakhu woyo!”
72Ma hene yaho, itaywa yalakula lwa khavili, ma Petro niyitsushitsa khuli Yesu yali namuvoolele, “Itaywa nishili khulakula hali khavili, uliitsa khuvoola hali khavaka wangorwa.” Nalwo lwa Petro yaraanga khulila.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013