KISAH 18
18
Paulus ug ei minu ndig Korintus
1Gima ngwig leu lene Paulus jo leu minu ndig Atena buug ei minu ndig Korintus bu. 2#Rm. 16:3 Noni um Akwila di mben Yahudi di nitimieisi leu hanjop Pontus ei minu ndig dima. Akwila kin nitnem Priskila sindi ijo leu minu Italia bikwei krau minu ndig Korintus drek dip Kaisar Klaudius di jji mben Yahudi yahagom leu minu ndig Roma. Paulus ug cem kep yok, 3#Kis. 20:34; 1Kor. 4:12 bibong bit yok. Ninda jo kep midyai bit yok lewo noni kin yoni ne ninap prak meng kan nya di itri bibipek mitiei mem gima ibahati tut yonti ri. 4Noro Paulus ba no bikum mben Yahudi kin timiei minu Yunani nya ei ide ig mbusyamei bikwop ide Njap Nigwam Kep Ninghuisi. Noni simbot kep tut Yesus bit yok bibrim ningkek kep yok leu binhyepo ingon jo kep.
5Niabiati Silas kin Timotius ikwei leu hanjop Makedonia tu lene Paulus ta nibou ei nitri tut Allah nihyetti bikwop njap ngwa hagom. Noni tri tut bak mben Yahudi bipia Yesus ne Nibou Ndig di teu tungwatu biyai niyaijo nijep biyok di Allah preu ei mem yok ri. 6Noro isrep tut bipai noni kinei. Gima rino noni kit nide sinsun tut dihyei ndung di dimbos leu nok mun di bindo di bipingok yok tut igyai munti di kinei dima leu lene pai biyok “Gino jenti jibindei jenti bijisar ne gima tug hon jenti lene tug hon dani bi. Hon kep ammani kui ne midipwoi Nihyet Di Kei biduug sut ndam ngkiai nya.” 7Lene noni kes yok ei buug ei ig di jo simiak mben Yahudi ide ig mbusyamei. Ig dima ne Titus-Yustus nide ba, noni ne ngkiai di kuk no bak Allah ri. 8Noro Krispus di nibou mbusyamei Yahudi bitut nide bat nya yahagom cem ingon jo kep Tuhan Yesus. Timiei minu ndig Korintus nindigsi cem imang bibor imiap kep nihyet di Paulus tri tut biyok lene ingon jo kep Yesus leu api itur yok ei minyeiti.
9Mpe di gom ne Paulus ngat-hi-ngat mem mmun bingat lo, Tuhan pai binoni “Ma adigit tut tungwatu nya au. Ma atri tut nihyet kikau lene ma akes ahyet hon au. 10Lewo Dingat rin bit na. Bit bon tungwatu imbuk tut na kan bi. Lewo dinyeng tak kep timiei minu ndig dini imang bibor.” 11Gima rino Paulus bong ei minu ndig Korintus mem ari bingwam gom biniken. Noni ba Allah nihyet bingginau yo dima.
12Tirigi Galio yai ninyeng nibou hanjop Akhaya lene mben Yahudi ikes ingon mem yam ba, ikat Paulus bibuwak noni ug ei nikei noho bei. 13Ipai kep Paulus bak nikei dima bipia “No dini hum tungwatu nya insi leu binhyepo iba nisinati di noyam kin Puig Yahudi nicukti bi bibikuk yok bak Allah!”
14Nipou tirigi Paulus hap niji bibirop ighyet bigyo ne Galio pai biyok “Je di mben Yahudi e, gino jilua sok tut no di pigau hanjop kin no di bon mun di mbuk bibor ne doom dingon tut je. 15Noro jikon jihyet kep yam drek dip jihyet kin tungwatu inyeng nya kin jide niggai serti nya! Gima rino ma jenti jimbus yam ngonti tut gima yok hagom hak ug. Dimbus jingonti tut mun dima yok bi!” 16Lene noni jji yok leu nide kintrorti hak ug. 17Leu api yo di ikes ingon mem yam pima ikat Sostenes di nibou mbusyamei Yahudi bimbas noni ei nikei Galio de bilen hui. Noro ningon pri tut bi.
Paulus ngkwei hanyen ug ei minu ndig Antiokhia ei hanjop Siria
18 #
Bil. 6:18
Gima ngwig lene Paulus bong ei minu ndig Korintus mem bed poi. Leu api noni kes yo di ingon jo kep nya leu lene bri kibar minyei bit Priskila kin Akwila nya biba kibar bitot minyei ngwa dip bingkwei hanyen ug ei hanjop Siria. Noro nipou tirigi noni bri kibar minyei ei minu mien Kengkrea bigyo lene noni kak nibou nta di bet bijei drek dip nipreu mun ei mem Allahti.#18:18: Nipas kep nipreu ei mem Allahti: Bit leu nok mben Yahudi igyai kepti ne nikak nibou nta leu dima ndo tut bipia nipreu ei mem Allahti ug bipek nipekti tu. 19Tirigi ikwei krau minu ndig Efesus lene Paulus kes Priskila kin Akwila leu lene coi ug ei mben Yahudi ide ig mbusyamei leu api noni kin mben Yahudi isimbot kep biyam. 20Yo dima ijoi sut noni bong bit yok ninno noro noni ce tut bi. 21Mbro nok gima lo, tirigi noni kes yok bimbut leu yok bigyo lene noni pai biyok “Gino Allah sindui sut da ne midikwei ngat je hanyen bu.” Pai nok lene noni bri kibar minyei bijo leu minu ndig Efesus.
22Niabiati noni kinyon leu kibar ei minu ndig Kaisaria lene mbut kikau ug ei minu ndig Yerusalem bipigo yo di inggre kin mbusyamei. Lene noni mbut kikau ug ei minu ndig Antiokhia. 23Niabiati noni bong ei sirima mem bed poi leu api noni mbut hanyen buug cem kep yo di ingon jo kep nya ei hanjop Galatia kin Frigia ba, biwin kep ingonti.
Apolos tri nihyet ei minu ndig Efesus kin Korintus
24Mpe dima lene Apolos di mben Yahudi di nitimieisi leu minu ndig Aleksandria kwei ei minu ndig Efesus. No dini niji nghai ba, kan bidem tut Allah nihyet hagom. 25Apolos pikor tut Yesus ningginausi ba, ta nibou ei nitri nihyetti lene ngginau tungwatu nya mungkun tut Yesus cem. Mbro nok gima lo, noni kan tut nitur tungwatu ei minyeiti di Yohanes de he yo. 26Noni kindi tri nihyet bibrim ningkek kep tungwatu nya ei mben Yahudi ide ig mbusyamei. Tirigi Priskila Akwila nya imiap Apolos ningginau tungwatuti lene ibuwak noni kwei ei ide ig bei leu api ipingok ningonti igbit tut Allah ningon kanti dima teu tungwatu biyai niyaijo nijep biyok tug hon Yesus. 27Jei bi lene Apolos kos tut bipia mbut ug ei hanjop Akhaya. Gima rino yo di ingon jo kep Yesus ei ninu ndig Efesus impu noni bipas srat bak isut bat yo di ingon jo kep nya ei hanjop Akhaya leu binhyepo igya um Apolos. Tirigi noni ug krau hanjop Akhaya lene noni mpu yo di ingon jo kep Yesus tug hon Allah nisingat tut yokti dima nindig bibor. 28Lewo noni ba niji di nghai bibrim ningkek kep mben Yahudi di iba ighyet bidahat noni. Apolos bindei ba, icut bak noni bou tungwatu igyai him. Noni kwop srat bokti leu Allah nihyet nok mun di bindo tut Yesus di nok Nibou Ndig di teu tungwatu biyai niyaijo nijep biyok di Allah preu ei mem yok pima.
Currently Selected:
KISAH 18: HAD
Highlight
Share
Copy

Want to have your highlights saved across all your devices? Sign up or sign in