KISAH 20
20
Paulus ya bidem hanjop Makedonia kin Yunani
1Niabiati mpia mbum-bra ei minu ndig Efesus hanyen tu lene Paulus nduk yo di ingon jo kep nya kwei biwin kep ingonti. Njap poi bu lene noni pigo yok bikes yok leu api mbut buug ei hanjop Makedonia. 2Noni ya bidem minu dima hagom bipingok yo di ingon jo kep Yesus ingonti bibiwin kep ingonti cem. Lene noni kwei ei hanjop Akhaya. 3Paulus bong ei hanjop dima mem bed ningai. Tirigi noni tin ei bingkwei hanyen ug ei minu Siria lene hi mbot kep binoni bipia mben Yahudi igyok ingon gom mem gima ihwen noni. Gima rino noni kos tut bipia kriau ug ei hanjop Makedonia. 4Noni hei sut ibou poi nok Sopater leu minu ndig Berea di Pirus nipmot kin Aristarkhus kin Sekundus leu minu ndig Tesalonika kin Gayus leu minu ndig Derbe kin Timotius kin Tikhikus kin Trofimus leu hanjop Asia. 5Yo dima ibie nyeni noho bigwam mem nye ei minu ndig Troas. 6Niabiati Njap Ndig Midut Roti Dwoi Bi tun tu lene nibri kibar minyei ei minu ndig Filipi ba, nibitot minyei ngwa dip. Njap muhwi bu lene nikwei um yok ei minu ndig Troas leu api nibong ari nitindur gom ei minu ndig dima.
Paulus cem kep yo di ingon jo kep nya ei minu ndig Troas
7Nahagom nidem yam mem mben Yahudi ide njap nigwam kep ninghuisi mem mmun leu binhyepo niyem njita bit yam. Paulus tri nihyet biyok buhuk nihyet kikau mmun mau lewo noni kos tut bipia kes yok bimbut leu yok ei njap di hyep bu. 8Nahagom ningwig ei nghim nsi di jo anai ei ig di iwin bigwam yam dip ba, yo dima itin mini mang bibor binjeng eisi. 9Pinjoi pilei di ninyeng Eutikhus cem no rima bigwam ei kendera mihyeti lo, tti-top lewo Paulus huk nihyet bijo ninno. Tti-top nyen bibong mai leu api tti bicut leu anai biborti ug ei dihyeisi. Tirigi yo dima ikon noni kui lene ingat lo, ninnei kimbas tu. 10Noro Paulus juk bingat noni lene ba nibiau bicom mpia binggriou nimai bipai biyok “Dwai, no niyaijo yo.” 11Leu api noni kui hanyen ug ei nghim nsi dima lene ki roti biyem njita bit yok. Noni mbrap bit yok kikau bipek gwam ntuisi leu api kes yok bimbut leu yok. 12Lene yo dima iba ingon nggan-triot kei bibuwak pinjoi pilei di niyaijo hanyen dima ug ei nide ig bei.
Paulus jo leu minu ndig Troas buug ei minu ndig Miletus
13Nibri kibar minyei binibitot minyei ngwa dip ug ei minu mien Asos leu binhyepo nuug um Paulus ei sirima. Apo noni cuk nye nok lewo noni kos tut bipia mbut nimig kak puig mam. 14Niabiati nikwei um Paulus ei minu mien Asos tu lene noni bri kibar bit nye leu api niba kibar bitot minyei ngwa dip ug ei minu ndig Metilene. 15Niba kibar bitot minyei ei minu ndig dima ba, njap di hyep bu kibar piar nyahan ei muk nuhuisi gom ei Mios Khios. Njap di hyep bu lene kibar kwei kwau Mios Samos leu api njap di hyep bu kibar kwei krau minu ndig Miletus. 16Paulus kos tut bipia kriau minu ndig Efesus leu binhyepo nimbutti yem nijam di jei ei hanjop Asia bi. Lewo noni bipbur buug ei minu ndig Yerusalem nipou leu api Njap Ndig Pentakosta nicunti dem.
Paulus mbrap bit nibou mbusyamei minu ndig Efesus nya ningwigsi
17Nikwei krau minu ndig Miletus lene Paulus sok nihyet bak nibou mbusyamei nya ei minu ndig Efesus leu binhyepo ikwei ngat noni. 18Tirigi ikwei su lene Paulus pai biyok “Jikan tut diyai munti nya kin ditde midyai ei nimbie him tirigi dihwou ngat je ei hanjop Asia kikau kwei bipek njap di dimbut leu je pima. 19Mbro nok gino mben Yahudi igyok ingon gom mem gima ihwen bit da lo, diba dingon di jei sut danti bi kin diyai nggwei di kibor nyen-nyen biyai kep midyai noyam kin Tuhan de awaga. 20Jikan tut bipia dingon tak kep nihyet gom di biwin kep jingonti leu je tirigi ditri tut nihyet bi ba, dingginau je brei ei ig mbusyameisi kin jide ig bei nya cem. 21Disok kep mben Yahudi kin ngkiai nya ngkiem leu binhyepo ittin ser ide sisar bikiek bak Allah ba, ingon jo kep Tuhan Yesus cem. 22Nogindini dibit leu Allah Ninnei nicuk dati ba, duug ei minu ndig Yerusalem lo, dikan tut mun di micut igkep da ei minu ndig dima bi. 23Noro dikan tut bipia tirigi diya bidem minu ndig nya ne Allah Ninnei sok kep da ngkiem bipia midisima ei ig bui nsi ba, ninghuisi wei micut igkep da cem. 24#2Tim. 4:7 Noro dinyohou diyaisi bi lewo diyaisi bon ninyeng mem da bi. Noro diyai kep midyai di Tuhan Yesus ba ningon com da tut nya biput lene gima bon ninyeng mem da gino diba dingon gom bitri tut Nihyet Di Kei tut Allah di singat tut nye kikau ug bipek diyaijo ningwig honti.
25Disut bat jen, dikwei sut nihyet tut Allah ninyeng tak kepti ei jahagom jikieti tu. Noro dikan bipia mijingat diimaisi bou jiyai him bu bi sren. 26Gima rino njap di ammani dipai mun di bon ninyeng bije bipia gino jigom sar lo, tug hon da bi. 27Lewo dingon tak kep Allah nihyet tut ningon kanti gom leu je bi sren. 28Ma jinyohou jenti kin jide domba nya di Allah Ninnei ba ningon com je tut cem yahagom. Ma jinyohou jide mbusyamei nya noyam kin gembala di nyohou domba nya lewo Allah bindei ba, Nonti nok niceu mem mbusyamei nya tug hon Nipmot nimaisi.#20:28: Nipas kep Nipmot nimaisi cem kei lene nipas kep Nonti nimaisi cem kei. 29Dikan tut bipia tirigi dikes je ei bidimbut leu je lene nsien di niten-pos nya mikwei srig jikieti bibon yonti tereu nok domba nya ba, yaham domba di jinyohou yok dima nok ide mun di igyem ug ri. 30Lene gima he bi lewo ibou poi leu jikieti mitri tut nihyet nitrowai bibindei ba, yo di ingon jo kep nya itti kin yok bisrawir ug ri. 31Gima rino ma jiya ser jenti! Ma jiyok ngon kep bipia diba diyai nggwei di kibor bingginau bibikwop jahagom bikwop mmun-njap kikau mem ari bingwam ningai. Dikes dinda tut midyai dime bi sren.
32Nogindini dikes je ei Allah nindati leu binhyepo Noni kin nihyet tut Allah nisingat tut jeti nyohou je. Allah sindem mem gima sindem tut je leu binhyepo jiba je kep mun di kei di Noni bet ei mem Nide limwa nya yahagom. 33Dingon pri kep yo di hiter ide mitiei kin sinsun di inyeng tut nya bi sren. 34Jikan tut bipia ditri mun di dibon bou dinda him ba, dibipek mitiei leu binhyepo dibahati tut danti kin yo di igya kui da. 35Lewo dindo bindo bije tug hon nisinati hagom tu leu binhyepo jijoi bibor ba, jita jibou ei midyaiti leu binhyepo jibingondut yo di isindem bi nya. Lewo suar jiyok ngon kep Tuhan Yesus Nonti nihyet di pai ‘Tungwatu nya igyai nillei tug hon ide ningondut tungwatu nyati leu gima igyai mun di yo di hiter ibingondut yok a.’ ”
36Tirigi Paulus kes nihyet hon lene noni ba nibiau bicom mpia bit yo dima leu api ngat nadi. 37Yo dima yahagom igyai nggwei kibor ba, inggriou noni bindun ninda him cem drek dip ingon di ngguk bibor. Lene ipigo “Acem ambut o!” 38Ningat ne ingon ngguk bibor tut Paulus nihyet di pai biyok “Mijingat diimaisi bou jiyai him bu bi sren.” Lene ibuwak noni hanyen ug ei kibar nsi.
Currently Selected:
KISAH 20: HAD
Highlight
Share
Copy
Want to have your highlights saved across all your devices? Sign up or sign in
