Mako 5
5
Kubukwa kwa mwina Ngalasene wanonkelwe ku bademona
(Mateo 8:28-34; Luka 8:26-39)
1Kabiji bafikile ku bushiya bwa kizhiba, mu ntanda ya Ngalasene. 2Byo afumine mu bwato ponkapotu kwamusambakene muntu wafumine ku bilende wajinga na mupashi wabiipa 3ao muntu waikelenga ku bilende kabiji kafwako wakonsheshe kumukasa nangwa na munyololo ne; 4mambo bamukashile javula na mashimbi a ku maulu ne minyololo, aya minyololo wiichibawilenga, ne mashimbi a ku maulu wiamokawilenga. Kabiji kafwako muntu wajinga na ngovu ya kumufwomona ne. 5Bufuku ne mute wapitang'ananga mu bilende ne mu mitumba kasa abijika ne kwichibaula na mabwe.
6Byo a mumwene Yesu kasa aji kwalepa, wamunyemejile ne kumupopwela, 7ne kubijika na jiwi jikatampe amba, “Lelo nanchi, ikika kyo musaka kwi amiwa, Yesu Mwana Lesa Mwine Wakila? Nemulomba kwi Lesa namba kummanyika amiwa ne.” 8Wa ambile byo byo mambo Yesu wa ambile amba, “Fuma mu muntu, obewa mupashi wabiipa!”
9Ne Yesu wamwipwizhe amba, “Jizhina jobe wi ng'anyi?”
Kumvwa aye amba, “Jizhina jami ne nzhita#5:9 Nzhita: ke jizhina jalumbulula nambala ikatampe bingi mwayila kigiliki jitelwa amba “legion.” Legion ke nambala yakonsha kufika ku 5,000-6,000 ya bashilikale ba bena Loma, mambo twavula!” 10Kabiji wamusashijile javula amba kechi mwitupange muno mu ntanda ne.
11Bino ku mutumba kwajinga ne jitanga jikatampe ja bankumba kasa baja. 12Ponkapo bamusashijile amba, mwitutume tukatwele mu bankumba. 13Ne Yesu waswile, ne abo bapashi babipa bafuminemo, bakatwelele mu bankumba. Ne jitanga jonse, jaji pepi biumbi bibiji, jakunkulukile mukolo lubilo, ne kuloba mu kalunga.
14Ne bajishishenga bankumba banyemene bakabulang'ene mu muzhi ne mu majimi. Ne bantu baishile na kumona akya kyamwekele. 15Kabiji baishile kwi Yesu ne kumona awa muntu wanonkelwe kala na nzhita ya bademona. Kasa aikala konka kasa avwala, ne muchima wanji kasa alubuluka bulongo, kabiji abo baubile moyo. 16Ne abo bekimwene bebabujile byaubiwe kuyewa muntu wanonkelwe na bademona, ne mambo a ba nkumba.
17Kabiji batatwile kumusashijila amba afume mu ntanda yabo.
18Ne Yesu byo asakile kukanjila mu bwato, ne muntu wajinga na bademona, wamusashijile amba, “Ngyenga nenu!”
19Pakuba Yesu kechi waswile ne wamwambijile amba, “Yanga kwenu ku balongo bobe, ukebabule abya bintu bikatampe byo a kuubila Nkambo, ne byo a kuubila lusa.”
20Ponkapo wayile ne kutatula kutaya mbila mu Ndekapolisa abya bintu bikatampe byo amubijile Yesu, ne bonse bakuminye.
Mwana Yelusa ne kubukwa kwa mwanamukazhi wakwachile ku kivwalo kya Yesu
(Mateo 9:18-26; Luka 8:40-56)
21Kabiji Yesu wa abukijile jibiji ku bushiya na bwato. Ne bantu bavula bamupwijile sa aji kwipi na kizhiba. 22Ponkapo kwaishile ne umo mukulumpe wa shinagoga, jizhina janji Yelusa, ne aye pa kumumona Yesu waponene panshi ku maulu anji, 23ne kumusashijila bingi amba, “kaana kami kakazhi kaji pepi na kufwa, mwiye mwikabike maboko enu kapuluke kamone bumi!”
24Ne aye wayile nanji. Ne jibumba jikatampe ja mulondejilenga kasa ja mubumba.
25Kabiji kwajinga mwanamukazhi wajinga na kikola kya kupita mashi myaka jikumi na ibiji, 26kabiji wamwene bya malwa byavula kufuma ku bashayuka ba michi bavula, aye watayile bintu byanji byonse byo ajinga nabyo, bino kikola kyanji kyaijilengakotu palutwe. 27Byo aumvwine nkuwa ya Yesu, waishile kunyuma yanji mu jibumba ne kukwata ku kivwalo kya Yesu. 28Mambo wa ambile amba, “Inge nakwatatu nangwa ku kivwalo kyanji nsa kubukwa.”
29Kabiji ponkapotu ne mashi alekele kupita, kabiji waumvwine mu mubiji wanji amba wabukiwa ku kikola kyanji. 30Ponkapo Yesu wayukile amba bulume bwandupuka, onkao mambo waalulukile mu jibumba ne kwipuzha amba, “Ng'anyi wakwata ku bivwalo byami?”
31Kabiji baana banji babwanga bamukumbwile amba, “Mwamona bantu byo bemubumba, mambo ka kyo mwaipwizha amba wimukwata ng'anyi?”
32Bino Yesu watajile konse konse amba amone wikyuba kino kintu. 33Pakuba mwanamukazhi waubile moyo ne kuzakama pakuyuka akya kyamubilwa, waishile ne kupona panshi mu kyenyi kyanji, ne kumubula byonse bya kine. 34Ne aye wamwambijile amba, “Mwanami lwitabilo lobe lwa kupulusha. Yanga mu mutende, ne kubukiwa ku kikola kyobe.”
35Bino Yesu byo akyambilenga bino, kwaishile bafumine ku nzubo ya mukulumpe wa shinagoga, amba “Mwanenu wafwa. Mambo ka kumukatazha Mufunjishi ne pano?”
36Kabiji Yesu pakumvwa byo ba ambile, wamwambijile mukulumpe wa shinagoga amba, “Kuuba moyo ne, itabilaitu.” 37Kabiji kechi waswishishe nangwa umo kumulondela ne, posotu Petelo ne Yakoba ne Yoano mulongo wanji. 38Bafikile ku nzubo ya mukulumpe wa shinagoga, wataine kiwowo, bantu kasa bajila mabingo ne kuwowakana. 39Byo atwelele wibambijile amba, “Mambo ka kyo mubena kuwowakena na kujila? Mwana kechi wafwa ne walaalatu mutulo.”
40Ponkapo abo bamusekelenga ne kumwendeleka. Pakuba aye wibalupwile bonse pangye wasendelekotu shanja mwana ne inanji ne bo ajinga naabo ne kutwela mwajinga mwana. 41Ne pa kumukwata pa kuboko wamwambijile amba, “Talifa kumi!” Kyalumbulula amba, “Kashimbi, na kwambila namba, buuka.”
42Ponkapotu kashimbi wabuukile ne kwenda kaende (myaka yanji yajinga jikumi jimo ne ibiji). Kabiji ponkapotu bakuminye bingi na kukumya kukatampe. 43Bino aye wibakainye pakatampe amba, “Kafwako wafwainwa kwikiyuka kino ne.” Ne aye wibambijile amba, “Mupai kajo aje.”
Currently Selected:
Mako 5: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
Mako 5
5
Kubukwa kwa mwina Ngalasene wanonkelwe ku bademona
(Mateo 8:28-34; Luka 8:26-39)
1Kabiji bafikile ku bushiya bwa kizhiba, mu ntanda ya Ngalasene. 2Byo afumine mu bwato ponkapotu kwamusambakene muntu wafumine ku bilende wajinga na mupashi wabiipa 3ao muntu waikelenga ku bilende kabiji kafwako wakonsheshe kumukasa nangwa na munyololo ne; 4mambo bamukashile javula na mashimbi a ku maulu ne minyololo, aya minyololo wiichibawilenga, ne mashimbi a ku maulu wiamokawilenga. Kabiji kafwako muntu wajinga na ngovu ya kumufwomona ne. 5Bufuku ne mute wapitang'ananga mu bilende ne mu mitumba kasa abijika ne kwichibaula na mabwe.
6Byo a mumwene Yesu kasa aji kwalepa, wamunyemejile ne kumupopwela, 7ne kubijika na jiwi jikatampe amba, “Lelo nanchi, ikika kyo musaka kwi amiwa, Yesu Mwana Lesa Mwine Wakila? Nemulomba kwi Lesa namba kummanyika amiwa ne.” 8Wa ambile byo byo mambo Yesu wa ambile amba, “Fuma mu muntu, obewa mupashi wabiipa!”
9Ne Yesu wamwipwizhe amba, “Jizhina jobe wi ng'anyi?”
Kumvwa aye amba, “Jizhina jami ne nzhita#5:9 Nzhita: ke jizhina jalumbulula nambala ikatampe bingi mwayila kigiliki jitelwa amba “legion.” Legion ke nambala yakonsha kufika ku 5,000-6,000 ya bashilikale ba bena Loma, mambo twavula!” 10Kabiji wamusashijile javula amba kechi mwitupange muno mu ntanda ne.
11Bino ku mutumba kwajinga ne jitanga jikatampe ja bankumba kasa baja. 12Ponkapo bamusashijile amba, mwitutume tukatwele mu bankumba. 13Ne Yesu waswile, ne abo bapashi babipa bafuminemo, bakatwelele mu bankumba. Ne jitanga jonse, jaji pepi biumbi bibiji, jakunkulukile mukolo lubilo, ne kuloba mu kalunga.
14Ne bajishishenga bankumba banyemene bakabulang'ene mu muzhi ne mu majimi. Ne bantu baishile na kumona akya kyamwekele. 15Kabiji baishile kwi Yesu ne kumona awa muntu wanonkelwe kala na nzhita ya bademona. Kasa aikala konka kasa avwala, ne muchima wanji kasa alubuluka bulongo, kabiji abo baubile moyo. 16Ne abo bekimwene bebabujile byaubiwe kuyewa muntu wanonkelwe na bademona, ne mambo a ba nkumba.
17Kabiji batatwile kumusashijila amba afume mu ntanda yabo.
18Ne Yesu byo asakile kukanjila mu bwato, ne muntu wajinga na bademona, wamusashijile amba, “Ngyenga nenu!”
19Pakuba Yesu kechi waswile ne wamwambijile amba, “Yanga kwenu ku balongo bobe, ukebabule abya bintu bikatampe byo a kuubila Nkambo, ne byo a kuubila lusa.”
20Ponkapo wayile ne kutatula kutaya mbila mu Ndekapolisa abya bintu bikatampe byo amubijile Yesu, ne bonse bakuminye.
Mwana Yelusa ne kubukwa kwa mwanamukazhi wakwachile ku kivwalo kya Yesu
(Mateo 9:18-26; Luka 8:40-56)
21Kabiji Yesu wa abukijile jibiji ku bushiya na bwato. Ne bantu bavula bamupwijile sa aji kwipi na kizhiba. 22Ponkapo kwaishile ne umo mukulumpe wa shinagoga, jizhina janji Yelusa, ne aye pa kumumona Yesu waponene panshi ku maulu anji, 23ne kumusashijila bingi amba, “kaana kami kakazhi kaji pepi na kufwa, mwiye mwikabike maboko enu kapuluke kamone bumi!”
24Ne aye wayile nanji. Ne jibumba jikatampe ja mulondejilenga kasa ja mubumba.
25Kabiji kwajinga mwanamukazhi wajinga na kikola kya kupita mashi myaka jikumi na ibiji, 26kabiji wamwene bya malwa byavula kufuma ku bashayuka ba michi bavula, aye watayile bintu byanji byonse byo ajinga nabyo, bino kikola kyanji kyaijilengakotu palutwe. 27Byo aumvwine nkuwa ya Yesu, waishile kunyuma yanji mu jibumba ne kukwata ku kivwalo kya Yesu. 28Mambo wa ambile amba, “Inge nakwatatu nangwa ku kivwalo kyanji nsa kubukwa.”
29Kabiji ponkapotu ne mashi alekele kupita, kabiji waumvwine mu mubiji wanji amba wabukiwa ku kikola kyanji. 30Ponkapo Yesu wayukile amba bulume bwandupuka, onkao mambo waalulukile mu jibumba ne kwipuzha amba, “Ng'anyi wakwata ku bivwalo byami?”
31Kabiji baana banji babwanga bamukumbwile amba, “Mwamona bantu byo bemubumba, mambo ka kyo mwaipwizha amba wimukwata ng'anyi?”
32Bino Yesu watajile konse konse amba amone wikyuba kino kintu. 33Pakuba mwanamukazhi waubile moyo ne kuzakama pakuyuka akya kyamubilwa, waishile ne kupona panshi mu kyenyi kyanji, ne kumubula byonse bya kine. 34Ne aye wamwambijile amba, “Mwanami lwitabilo lobe lwa kupulusha. Yanga mu mutende, ne kubukiwa ku kikola kyobe.”
35Bino Yesu byo akyambilenga bino, kwaishile bafumine ku nzubo ya mukulumpe wa shinagoga, amba “Mwanenu wafwa. Mambo ka kumukatazha Mufunjishi ne pano?”
36Kabiji Yesu pakumvwa byo ba ambile, wamwambijile mukulumpe wa shinagoga amba, “Kuuba moyo ne, itabilaitu.” 37Kabiji kechi waswishishe nangwa umo kumulondela ne, posotu Petelo ne Yakoba ne Yoano mulongo wanji. 38Bafikile ku nzubo ya mukulumpe wa shinagoga, wataine kiwowo, bantu kasa bajila mabingo ne kuwowakana. 39Byo atwelele wibambijile amba, “Mambo ka kyo mubena kuwowakena na kujila? Mwana kechi wafwa ne walaalatu mutulo.”
40Ponkapo abo bamusekelenga ne kumwendeleka. Pakuba aye wibalupwile bonse pangye wasendelekotu shanja mwana ne inanji ne bo ajinga naabo ne kutwela mwajinga mwana. 41Ne pa kumukwata pa kuboko wamwambijile amba, “Talifa kumi!” Kyalumbulula amba, “Kashimbi, na kwambila namba, buuka.”
42Ponkapotu kashimbi wabuukile ne kwenda kaende (myaka yanji yajinga jikumi jimo ne ibiji). Kabiji ponkapotu bakuminye bingi na kukumya kukatampe. 43Bino aye wibakainye pakatampe amba, “Kafwako wafwainwa kwikiyuka kino ne.” Ne aye wibambijile amba, “Mupai kajo aje.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.