Milimo 13

Banabasi a Saulu mbobakasalwa akutumwa

1Mumbungano yaku Antiyoki kwakali bakambausi abamayi aaba, Banabasi a Simiyoni (uutegwa Muntu Uusiya), Lusiyasi (uuzwa kumunzi wa Sailini), Manayeni (wakakomenena muŋanda yamweendelezi Helodi), a Saulu. 2Cimwi ciindi bacikombelo kabaliimide kulya bakali kabakomba, Muuya Uusalala wakabaambila kuti, “Amundizandwide Banabasi a Saulu bakandicitile mulimo ngundakabaitila.” 3Nibakamana kukomba, bakababikka maanza akubatumizya.

Mbobakacita mu Saipulasi

4Banabasi a Saulu nibakatumwa a Muuya Uusalala, bakaya kumunzi wa Selusiya. Kuzwa ooko bakainka abbwato pati kunsumbu ya Saipulasi. 5Nibakasika mumunzi wa Salamisi bakakambauka makani aa Leza muzikombelo zya Bajuda. Bakatolelezya Joni Maako kuti akabagwasye.

6Bakaandulula nsumbu yoonse mane bakaakusika kumunzi wa Pafosi. Ooko bakajana simabibo uutegwa Baajesu, Mujuda ooyu wakali kulyaamba kuti mmusinsimi wa Leza, pele wakali kubeja. 7Wakali mulongwe wamuleli wansumbu, Seejaiyasi Paulusi, mwaalumi musongo. Lino mweendelezi wakaita Banabasi a Saulu, nkaambo wakali kuyanda kumvwa majwi aa Leza. 8Pele Elimasi simabibo uulya (nkaambo mbolyaamba izina lyakwe oobo), wakatisole kukasya mweendelezi kuti atasyomi majwi aakali kwaamba ba Saulu. 9Lino Saulu, ooyo wakali kutegwa Paulu, wakazula Muuya Uusalala, eelyo wakalangisisya simabibo ooyo 10wati, “Yebo omwanaaa Saatani uuzonda ziluleme zyoonse, ulaamaanu aabumpelenge aalucengo, lyoonse usola kunyonganya zyakasimpe zya Mwami! 11Lino kuboko kwa Mwami kulakuuma. Ndilyonya buyo ono uloofwaala kotaboni kwaciindi cili mbocili.”

Mpoonya-mpoonya Elimasi wakaba aagubiubi, wabaya. Wakatalika kuswabaila aawo, kwaampaampa muntu uuti mujatilile kuboko akumweenzya. 12Lino mweendelezi naakabona cakacitika wakasyoma. Wakagambwa kapati naakamvwa kwiisya kwamajwi aa Mwami.

Mbobakacita mu Antiyoki wamucisi ca Pisidiya

13Lino Paulu ambaakali aabo bakazwa ku Pafosi akuya kumunzi wa Pelega uuli mucisi ca Pamfiliya. Kabali kooko Joni Maako wakabaloboka, wapiluka ku Jelusalemu. 14Nibakazwa ku Pelega, bakaya ku Antiyoki uuli mucisi ca Pisidiya. Mu Buzuba bwa kulyookezya butegwa Sabata bakaakunjila mucikombelo ca Bajuda akukkala. 15Nkabela naakamana kubalwa mabbuku aa Mulawo wa Mozesi aabasinsimi, bapati bacikombelo bakati kulimbabo, “Bakwesu, kuti naa mujisi makani aakuyumya bantu amwaambe.” 16Paulu wakanyamuka akutambika janza wakati,

“No Baisilayelima, anyoonse nomukomba Leza, amundiswiilile! 17Leza wa Baisilayeli wakasala basikale besu, alimwi wakabayumya nibakali mucisi ca Ijipiti. Bweende-bweende Leza wakabagwisya anguzu mpati kuzwa mu Ijipiti, 18wakababamba kwamyaka iili makumi one. 19Leza wakanyonyoona misyobo yakali ciloba yamucisi ca Kenani akucita bantu bakwe kuti batole nyika eeyo. 20Eezi zyakatola myaka yakatisike ku myaanda yone amakumi osanwe.

“Kuzwa waawo Leza, wakapa bantu bakwe bavuni kusikila ciindi camusinsimi Samuyele. 21Bantu nibakakumbila mwami, Leza wakabapa Saulu, mwanaa Kisyi, uuzwa kumusyobo wa Benjamini. Wakabalela kwamyaka iili makumi one. 22Naakamugwisya mubwami, wakabapa Devedi kuti abe ngomwami wabo. Mboobu Leza mbwaamba akaambo ka Devedi,

‘Ndajana kuti Devedi, mwanaa Jese ngomuntu ngwenjandisya,

uunga ulacita nzyeyanda kuti acite.’

23Kuzwa mulunyungu lwa Devedi, Leza wakatuma Jesu kuti abe Mufutuli wa Baisilayeli mbubonya mbuli mbwaakasyomezya kaindi. 24Lino Jesu katanatalika mulimo wakwe, Joni wakakambaukila Baisilayeli boonse kuti baleelede kweempa akubbapatizigwa. 25Joni kali aafwiifwi kumanizya mulimo ooyu, wakabuzya bantu kuti, ‘Ino muyeeya kuti mebo ndime ni? Nsili yooyo ngomulindila pe, pele walo ulaza musule lyangu. Ooyo ngweteelede kusamununa ndyasyo.’

26“Nywebo nobakwesu, nobalunyungu lwa Abulahamu, anyoonse nomukomba Leza, ndiswe twakatuminwa mulumbe walufutuko ooyu! 27Bantu bakkala mu Jelusalemu antoomwe abeendelezi babo taakwe nibakaziba kuti Jesu ngo Mufutuli. Taakwe nibakaamvwisisya majwi aabasinsimi aabalwa Sabata a Sabata. Pele nibakapa Jesu mulandu walufu bakacita mbubonya mbuli basinsimi mbubakaamba. 28Alimwi nikuba kuti taakwe nibakamujanina kaambo keelede lufu, bakakumbila Pilato kuti amujaye. 29Nibakamana kucita zyoonse malembe nzyaamba a Jesu, baccilili bakwe bakamwaangula kuzwa aciingano baakumuzikka mucuumbwe. 30Lino Leza wakamubusya kuzwa kubafu, 31Mazuba manji wakabonwa abantu mbaakali kweenda aabo kuzwa ku Galilii kuya ku Jelusalemu. Aaba sunu mbabakamboni bakwe kubantu ba Isilayeli. 32Aboobo swebo twaboola kuno kumuletela mulumbe mubotu wakuti, eeco Leza ncaakasyomezya kuli basikale besu, 33watucitila swebo tolunyungu lwabo kwiindila mukubusya Jesu. Mbubonya mbokulembedwe mu Ntembauzyo yabili kuti,

‘Yebo uli mwanaangu,

sunu ndaba Uso.’

34Lino kwaamba zyamakani aakumubusya kuzwa kubafu akuti taakwe natikabole, Leza ulati,

‘Ndiyookupa zileleko zini-zini zisalala,

nzindakasyomezya kuli Devedi.’

35Mbubonya mbokulembedwe mucibalo cimwi kuti,

‘Tokooyoozumizya mubelesi wako uusalala kuti abole.’

36Devedi mumazuba aabuumi bwakwe wakabelekela bantu bakwe mukucita ziyanda Leza, amane wakafwa akuzikkwa antoomwe abamawisi, mubili wakwe wakabola. 37Pele walo ooyo Leza ngwaakabusya kuzwa kubafu, taakwe naakabola pe. 38Lino nywebo nyoonse nobakwesu muleelede kuziba kapati kuti tumukambaukila kuti, nkaambo ka Jesu, Leza wamulekelela zinyonyoono zyanu. 39Aboobo muleelede kuziba kuti kufumbwa uusyoma Jesu ulaangununwa kuzwa kuzinyonyoono zyoonse oomo Mulawo wa Mozesi muwatali kukonzya kumugwisya. 40Nkaako, amucenjele kuti eeco ncobakaamba basinsimi citakacitiki kulindinywe,

41‘Masimpe, nywebo nobasikasampu-sampu!

Muyookankamana akufwidilila.

Nkaambo mulimo ooyo ngweticite mumazuba aanu,

ncintu cimwi ncomutakonzyi kuzumina,

nikuba kuti muntu amupandulwide buti!’”

42Lino Paulu a Banabasi nibakazwa mucikombelo, bantu bakabatamba kuti bakaboole alimwi mubuzuba bwa Sabata buza kuti kabacizoobaambila makani aaya. 43Bantu nibakamwaika, Bajuda banji abamasi bakali kutobela lukondo lwa Bajuda bakaccilila Paula a Banabasi. Nkabela bakabaambila makani aakubayumya-yumya kuti bakkalilile muluse lwa Leza.

44Mubuzuba bwa Sabata bwakatobela bantu boonse bamumunzi bakatimaninine kuunka kucikombelo kuyooswiilila majwi aa Mwami. 45Pele Bajuda bamwi nibakabona bunji bwabantu, bakaba amunyono akutalika kukazya zyakali kwaamba Paulu, akumutukila. 46Nikubaboobo ba Paulu a Banabasi bakaambisya cakutayoowa bakati, “Kweelede kuti majwi aa Leza akambaukwe kulindinywe kusaanguna. Pele nkaambo kakuti mwaakaka, nobeni mwalitondezya kuti tamweelede buumi butamani, lino tulamusiya tuye kuli bamasi. 47Nkaambo ngamalailile Mwami ngaakapa naakati,

‘Ndakubikka kuti ube mumuni kuli bamasi

uuleta lufutuko kunyika yoonse.’”

48Bamasi nibakaamvwa eezi, bakakondwa kapati akulumbaizya majwi aa Mwami. Lino aabo Leza mbaakasalide kuti babe abuumi butamani bakasyoma.

49Majwi aa Mwami akamwaika koonse-koonse mucisi eeco. 50Pele Bajuda bakakopanya balupati-pati bamunzi abakaintu bamasi bakazibidwe bakali bakombi ba Leza. Bakatalika kupenzya Paulu a Banabasi, bakabatanda kuzwa mucisi cabo. 51Aboobo batumwa bakakunkumuna lusuko kumatende aabo, kutegwa cibe cicenjezyo kubantu baya, bamane bakaya kumunzi wa Ikoniyumu. 52Pele basyomi bamu Antiyoki bakazula Muuya Uusalala akukondwa.

Currently Selected:

Milimo 13: Tonga96

Highlight

Copy