Milimo 24

Paulu mbwaakatamikizigwa a Bajuda

1Nikwakamana mazuba osanwe, mupaizi mupati Ananiyasi wakainka ku Sizaliya, wakaya abapati alimwi asimulawo umwi uutegwa Teetulasi. Bakaakulibonya kumweendelezi Filikisi, akulungulula makani aamulandu ngobakali kupa Paulu. 2Paulu naakaitwa, Teetulasi wakapa kaambo kakwe munzila eeyi,

“Nomulemekwa! Busololi bwanu bwabusongo bwakatuletela ciindi caluumuno cilamfu, alimwi zintu zinji zibotu zyeelede zilacitwa mukusumpula akuleta bubotu mucisi cesu. 3Eezi zintu zili boobu zilatambulika kulindiswe koonse-koonse muziindi zyoonse. Aboobo tulilumbide kapati kulindinywe. 4Pele kwalo nsiyandi kumumanina ciindi canu pe, ndamukumbila kuti mundiswiilile ndipe matongoosi eesu mafwiifwi. 5Twajana kuti muntu ooyu ngusiŋunzuunzu. Utalika lupyopyongano akati ka Bajuda munyika yoonse, alimwi mmusololi wankamu iitegwa Banazaleti. 6Naakasola kusofwaazya ŋanda ya Leza, twakumujata. [Twakakanzide kumubeteka kwiindila mumulawo wesu, 7pele mweendelezi Lisiyasi wakasika akumutola canguzu. 8Amane wakalailila kuti aabo basikumupa twaambo baboole kumbele lyanu.] Kuti naa mwamubuzya ooyu, inga ndinywena lwanu mwalimvwida kuzwa kulinguwe ootu twaambo toonse ntotumwaambila.” 9Abalo Bajuda bakazumina akwaamba kuti toonse twaambo ootu tuli kasimpe.

Paulu mbwaakalikazizya kumbele lya Filikisi

10Lino mweendelezi wakoobola Paulu kuti awalo aambe. Eelyo Paulu wakati,

“Ndilizi kuti muli babetesi bacisi cino kwaciindi cilamfu, aboobo ndiliboteledwe kulikazizya kumbele lyanu. 11Mulakonzya kuziba nobeni kuti, kwainda buyo mazuba aali kkumi aabili kuzwa nindakasika ku Jelusalemu kuzookomba. 12Bajuda taakwe nibakandijana kandikazyanya amuntu muŋanda ya Leza, nikuba kundijana kandipyopyonganya bantu pe, nimuba muzikombelo zyabo nikuba kubusena bumwi buyo mumunzi. 13Tabakonzyi kutondezya kuti zintu eezi nzyobanditamikizya mpozili. 14Ncendizumina buyo kulindinywe nceeci, ndikomba Leza wabasikale besu kwiindila mukutobela Nzila eeyo njobati njabuzangi. Alimwi ndilazisyoma zintu zyoonse zilembedwe mu Milawo ya Mozesi amumabbuku aabasinsimi. 15Ndijisi lulangilo lomwe muli Leza mbuli oolo ndobajisi aaba bali waawa lwabo beni lulangilo oolo ndwakuti boonse bantu, baluleme abataluleme, bayoobusigwa kuzwa kubafu. 16Aboobo lyoonse ndasoleka mbuli mbwendikonzya, kuti kandilaamoyo uusalala kumbele lya Leza abantu.

17“Lino mukuti ndakali kumbi kwamyaka minji ndakainka ku Jelusalemu kutola mali kubantu bokwesu bacete alimwi akuti ndikape zipaizyo. 18Nindakali kucita mulimo ooyu, bakandijana muŋanda ya Leza, kandili ndalisalazya kale. Kwakanyina nkamu yabantu njindakali aayo pe, alimwi kwakanyina lupyopyongano. 19Pele kwakali bamwi Bajuda bazwa kucisi ca Asiya, abalo lwabo beni baleelede kuboola akuzoopa kaambo kabo kulindinywe, kuti ambweni inga bajisi mulandu umwi ngobandipede. 20Nibaba baaba bamwaambile naa bakandijanina mulandu nzi nindakali kubetekwa ankuta yabo. 21Kuli buyo cintu comwe ncindakaamba nindakaimvwi kumbele lyabo. Ndakati, ‘Ndabetekwa andinywe sunu akaambo kakusyoma mukubuka kwabafu!’”

22Lino Filikisi, mbwaakazi kabotu makani aa Nzila ya Mwami, wakajala amajwi aakuti, “Ndizooukosola mulandu wanu asika mweendelezi Lisiyasi.” 23Nkabela wakalailila silumamba wakali kulanga Paulu kuti kamubamba, pele amupe lwaangunuko lwakulikkalila kabotu akuzumizya beenzinyina kuti kabamugwasya kumupa zintu nzyabula.

Paulu kumbele lya Filikisi a Dulusila

24Lino naakainda mazuba mace, Filikisi wakaboola amukaintu wakwe Dulusila, Mujuda. Filikisi wakatumina kuti Paulu aletwe kulinguwe, eelyo wakazoomuswiilila kaamba zyalusyomo lwamuli Kilisito Jesu. 25Pele Paulu kacaamba makani aabululami, aakulijata mubuumi, alimwi aabuzuba bwalubeta buboola, Filikisi wakayoowa. Eelyo wakaambila Paulu kuti, “Pe mbubo, koya calino buyo, ndakwiita alimwi ndajana ciindi cibotu.” 26Namupilusya boobo wakali kulangila kuti antela Paulu inga ulamupa mali, ncaakali kumwiita-ita boobo akwaambaula anguwe.

27Lino niyakamana myaka yobilo, Poosiyosi Fesitosi wakasika akutola busena bwa Filikisi bwabweendelezi bwacisi. Lino Filikisi mbwaakali kuyanda kubotezya Bajuda, wakasiya Paulu kacili muntolongo.

Currently Selected:

Milimo 24: Tonga96

Highlight

Copy