Kulonga 1

Mbobakapenzegwa Baisilayeli mu Ijipiti

1Ngaaya mazina aabana ba Isilayeli aabo bakainka kunyika ya Ijipiti a Jakobo, umwi aumwi wabo amukwasyi wakwe. 2Lubeni, Simiyoni, Levi, Juda, 3Isakaa, Zebuloni, Benjamini, 4Dani, Nafutali, Gadi, a Asya. 5Mweelwe wabantu bakazwa mulunyungu lwa Jakobo bakali makumi aali ciloba. Walo Josefa wakali kale mu Ijipiti. 6Josefa abana bokwabo, antoomwe abamusela wakwe boonse, bakamana kufwa. 7Pele Baisilayeli bakazyalana kapati akuba basinguzu. Bakavula cakuti cisi coonse cakazula mbabo.

8Lino kwakanjila mwami mupya wakalela nyika ya Ijipiti, ooyo watakazi Josefa pe. 9Nkabela wakaambila bantu bakwe kuti, “Amulange aaba bantu Baisilayeli bavula alimwi mbaasinguzu kapati. 10Lino amuteelele, tuleelede kubacenjelela kuti batavuli kwiindilila. Nkaambo kuti kwabuka nkondo, inga balaba nobayanzana abasinkondoma akuswaangana ambabo kuti batulwane, bamana batije akuzwa mucisi.” 11Mpoonya bakabikka bantu bakubalanga mukuti bababelesye kapati kutegwa lyoonse kabakatede. Aboobo Baisilayeli bakayakila Falo minzi mipati yiitwa kuti Pitomu a Lamesisi. Eeyi minzi yakali yakuyobweda zilyo. 12Pele Baisilayeli nikuba kuti bakali kubafundilizya boobo amilimo miyumu, bakaindilila kuzula cisi coonse. Nkaako Baijipiti bakayoowa Baisilayeli. 13Bakababelesya caluciso 14akucitya kuti buumi bwabo buyume amilimo yakubumba zitina, ayakumuunda. Bakabasungilizya kucita yoonse milimo miyumu.

15Lino mwami wa Ijipiti Falo wakaambila bakaintu bakali kutumbusya Bahibulu, aaba bakaintu umwi ngu Syifula umwi ngu Puwa. 16Falo wakati kulimbabo, “Mwanootumbusya Bahibulu aaba, kuti naa mwabona kuti ooyo mwana watumbukwa mmulombe muleelede kumujaya, pele kuti mmusimbi, mumuleke buyo, mutamujayi pe.” 17Pele aabo bakaintu basikutumbusya bakali kuyoowa Leza, aboobo taakwe nibakaswiilila malailile aamwami. Bakalikubaleka bana balombe kabatabajayi. 18Lino mwami wa Ijipiti wakaita basikutumbusya akubabuzya kuti, “Ino mwakacitila nzi eeci, muleka bana balombe kuti kabapona?”

19Lino balo bakaingula kuti, “Bakaintu Bahibulu tabali mbuli Baijipiti, balo tabakatazigwi kutumbuka pe, inga swebo twaakusika twajana mwana watumbukwa kale.” 20Lino Leza wakabacitila kabotu basikutumbusya aabo, nkabela Baisilayeli bakacili kuya buvula akuba basinguzu. 21Akaambo kakuti basikutumbusya aaba bakali kuyoowa Leza, awalo Mwami Leza wakavuzya bana babo. 22Mpawo Falo wakalailila bantu boonse kuti, “Kamubasowela mumulonga boonse bana balombe bazyalwa a Bahibulu, pele bana basimbi kamubaleka kabapona.”

Currently Selected:

Kulonga 1: Tonga96

Highlight

Compare

Copy