Kulonga 26

Tente lya Leza

(Kulonga 36.8-38)

1“Lino ukabambe tente amasani aandeketela aali kkumi aalukidwe kabotu, atutali toosedwe twacijulu-julu, acisombo alimwi atusalala pyu. Nkabela masani aaya ukaaluke kabotu akwaabikka zikozyanyo zyobilo zyabakelibu. 2Isani limwi alimwi kalilampa tukokola tuli makumi obilo alusele, akuba abwamba bwatukokola tuli makumi obilo alusele, akuba abwamba bwatukokola tone, oonse buyo mbubonya. 3Osanwe aamasani aaya akasumwe cakwaalumikanya, lino aalo aayo amwi osanwe akasumwe mbubonya oobo. 4Ukasume amikosi yatusani twamusyobo wacijulu-julu kumoombe wasani lyaanze, alimwi akumasani aakalumikizigwa aamwi. 5Kusani lyaatala lyacibeela camasani aakalumikizigwa aamwi ukabikke mikosi yatusani iili makumi osanwe, nkabela kucibeela cabili casani ukabikke mikosi kusani lyeelezya kutegwa mikosi eeyo kiilangene. 6Eelyo ukacite tungobyoobyo twangolida tuli makumi osanwe, tukabe twakuswaanganya zibeela zyamasani zyobilo eezyo, nkaako tente liyooba lyomwe.

7“Alimwi ukaluke masani aaboya bwampongo aali kkumi kuti abe civumbyo caatala aatente eelyo. Masani aali kkumi alimwi ngomweelede kusuma. 8Limwi alimwi sani lyakalikulampa tukokola tuli makumi otatwe, mubwamba lyakali kulampa tukokola tone, oonse akaleelene. 9Osanwe ukaasume cakwaalumikanya kuti akabe cibeela comwe, aalo amwi aali cisambomwe mukaalumikanye aamwi mucibeela comwe. Lino sani lyacisambomwe mukaliimpe mukalivumbe atala nkolili kumbele. 10Alimwi ukasume mikosi iili makumi osanwe kumoombe wasani lyeelezya lyacibeela citaanzi, alimwi bakasuma amikosi iili makumi osanwe kumoombe wamasani aacibeela cimwi. 11Ukavunge tungobyoobyo twamukuba tuli makumi osanwe akutubikka mumikosi kutegwa tukaswaanganye zibeela eezyo zyobilo akuzicita kuti ziyake civunisyo comwe buyo. 12Eelyo cisela casani eeco civumbidwe atala aatente ciyoovumba kacilengelela kusule lyatente lyakuswaanganina. 13Lino cisela cankokola yasani eelyo ciyoolengelela kumwi akumwi kumabazu aatente mubulamfu bwalyo akulivumba.”

14Lino ukapange zyakuvumbya tente zyobilo cimwi camakutu aabagutu aakanyikwa mucisila, alimwi acimwi camakutu aampongo. 15Ukapange zicinda zyamulombe. 16Lino cicinda comwe-comwe kacilampa tukokola tuli kkumi, mubwamba kacili kakokola acisela. 17Cibeela comwe-comwe kaciyooswaangene muziga zyobilo mumbali kutegwa zicinda eezyo kazikonzya kulumikizigwa aamwi. Nkabela zicinda zyatente zileelede kunoojisi ziga eezi zyakulumikizya. 18Lino waakubeza zicinda eezyo, ukabeze zili makumi obilo zyakulubazu lwakumusanza, 19alimwi ukazibikkile ziimino zyobilo-zyobilo zili makumi one zyansiliva, eezi ziimino nzyakujatilizya ziga eezyo zyobilo zyakuswaanganya zicinda. 20Akwalo kulubazu lwakunyika lyatente mukabikke zicinda zili makumi obilo, 21mukabikke ziimino zyansiliva zili makumi one, zikakkale zibili-zibili kunsi aacicinda comwe-comwe. 22Lino tente nkolili kusule, kulubazu lwakumbo mukabeze akubikka zicinda zili cisambomwe, 23akubikka zicinda zyobilo muzyooko, kusule aatente. 24Eezi zicinda zyamuzyooko zikajatane kunsi. Mbombubo oobu mboziyoocitwa zicinda zyobilo eezyo, alimwi zikalumane kuzwida ansi mane kuyoosika kumubalo wakujulu. Zikacitwe boobo eezyo zicinda zyobilo aazibeela eezyo zicita zyooko zyobilo. 25Aboobo kuyooba zibeela zili lusele zinoojisi ziimino zyansiliva zili kkumi acisambomwe, zinookkala zibili-zibili kunsi lyacibeela comwe-comwe.

26“Alimwi ukabambe minkulu yamulombe, ukaiinganye yosanwe ikabe kulubazu lomwe lwatente, 27alimwi yosanwe ikabe kulubazu lumwi, alimwi aimbi yosanwe ikabe kulubazu lweelezya, yosanwe alimwi ikabe kumbo, kusule atente. 28Lino munkulu wiingene akati-kati kazicinda eezyo, ukaingane kuzwida kulubazu lumwi kusikila kuli lumwi. 29Zicinda eezyo uzizilulule angolida akuzibikka tuninga twangolida twakujatilizya minkulu yakwiinganya, ayalo minkulu eeyi ukaizilulule angolida. 30Aboobo tente eelyo uleelede kuti ukalibambe mbubonya mbuli mbwendakakutondezya acilundu.”

31“Ukasume asani lyacisitilizyo ukalisume andeketela yamusyobo wacijulu-julu, wacisombo, alimwi abutonje busalala. Sani eeli lyakacekawidwe azikozyanyo zyabakelibu. 32Ukalibikke azisamu zyamulombe zyone zizilulwidwe angolida, kazijisi angobyoobyo zyangolida kazisimpidwe muziimino zyone zyansiliva zyakujatilizya zicinda eezyo. 33Aaya masani ukaabikke kunsi munsi angobyoobyo zyakulululi, eelyo ukabikke bbokesi lyacizuminano kunze aasani lyacisitilizyo. Sani lyacisitilizyo linooandaanya busena busalala kuzwa kuli busalalisya. 34Ukabikke civunisyo abbokesi lyacizuminano mubusena busalalisya. 35Itebule ukalibikkile anze lyasani lisitilizya, ukabikke cikkalilo calambe kulubazu lwakumusanza lyatente, cikalangane atebule kulubazu lwakunyika. 36Kumulyango watente ukabikke sani lyakusitilizya lyandeketela lyamusyobo wacijulu-julu, cisombo, alimwi ausalala pyu atutali toosedwe kabotu, butonje busalala, asani libotu akucekaulwa kabotu. 37Eeli sani ukalisimpile zisamu zyamulombe zyosanwe, ukazizilulule angolida. Ukazibikke ngobyoobyo zyangolida, alimwi akuzicitila ziimino zyosanwe zyamukuba.”

Currently Selected:

Kulonga 26: Tonga96

Highlight

Compare

Copy