Kulonga 28

Zisani zyabapaizi

(Kulonga 39.1-7)

1“Umwiite mwanookwanu Aloni abana bakwe balombe ba Nadabu, Abihu, Eliyazaa, a Itamaa. Bazandulwe kuzwa mubantu Baisilayeli, kuti bazoondibelekele mumulimo wabupaizi. 2Aloni mwanookwanu umusumine zisani zibotu zyabulemu. 3Ubalailile boonse baalumi bauya amaanza aabo mbendakapa busongo bwakucita zintu, kuti basumine Aloni zyakusama, kuti abe muntu uusalidwe kundibelekela mumulimo wabupaizi. 4Nzeezi zisani nzyobatisume, kabaki kaacamba, kabaki kabupaizi, jansi, cibaki cimwi cicekawidwe, cingundu, alimwi alutambo lwamucibuno. Aloni mwanookwanu bamusumine zisani zyabulemu, alimwi abana bakwe mbubonya buyo, kutegwa bakonzye kundibelekela mumulimo wabupaizi. 5Basikusuma baleelede kubelesya ntali zyangolida, amilembo yacijulu-julu yacisombo, aisalala pyu, atutali twandeketela toosedwe kabotu.

6“Kabaki kabupaizi bakakasumye angolida, amasani aacijulu-julu, aacisombo, abutonje busalala pyu, amasani aandeketela aakacekaulwa kabotu. 7Kakajisi mikosi yobilo yaa makuko iisumidwe kumabazu aako obilo, eeyi mikosi inooli njeyakukaanzya kusama. 8Lutambo lusumidwe mbubonya oobo lunoojisini ankako kutegwa kaluli lomwe ankako. 9Ukatole mabwe obilo aamakwalala aacibize akusimba mazina aabana balombe Baisilayeli mulingawo, 10mazina aabo aali cisambomwe akasimbidwe abbwe lyomwe, alimwi aali cisambomwe akasimbwe abbwe limwi, kweendelana ambuli mbobakali kuzyalwa bana balombe aaba. 11Mufuzi musongo akasimbe amabwe aayo obilo mazina aabana balombe ba Isilayeli akwaabikka mabwe aayo obilo mazina aabana balombe Baisilayeli akwaabikka mabwe aaya acikkazikilo cangolida. 12Aaya mabwe obilo ukaabikke amikosi yakabaki kabupaizi kuti akabe ciibalusyo cabana balombe Baisilayeli. Munzila eeyi Aloni unoonga kayumwide mazina aabo amakuko aakwe kutegwa Mwami Leza akabayeeye. 13Alimwi ukabambe atukazikilo tobilo twangolida 14atuwenge tobilo twangolida ooto ukatunamatike kutukkazikilo ootu.

Kabaki kaacamba

(Kulonga 39.8-21)

15“Ukaluke kabaki kaacamba kakusinsimya, kalukidwe kabotu, mbubonya mbuli kabaki kabupaizi. Ukakasumye atutali twangolida, twaciju-julu, twacisombo, alimwi atusalala pyu, atutali twandeketela toosedwe kabotu. 16Kakayooelene mumabazu aako oonse one, alimwi kakaimpwe ziindi zyobilo, kakalampe bwaasa bwajanza lyomwe, amwalo mubwamba kakabe bwaasa bomwe. 17Ukabikke mizila yone yamabwe meebesi alinkako. Mumuzila wakusaanguna ukabikke bbwe lyadowa-lowa, limwi lyacisuku, limwi lyacisila. 18Mumuzila wabili ukabikke bbwe lyamweemvwe, limwi lyacijulu-julu, alimwi lituba buu. 19Mumuzila watatu ukabikke bbwe lyacikambwe, limwi lyamakwalala aazingulukide, alimwi lyacisombo. 20Mumuzila wane ukabikke bbwe lyanyanzabili, limwi lyamakwalala aacibize limwi lyantuntula. 21Kuyooba mabwe meebesi aali kkumi aabili akasimbwa mazina aabana balombe Baisilayeli. Mazina aaya ngakwiiminina misyobo iili kkumi aibili ya Baisilayeli. 22Kabaki kaacamba ukakacitile tuwenge twangolida toosedwe mbuli lutambo, 23alimwi ukapange tuninga tobilo twangolida akutunamatika kuziswi zyakabaki kaatala. 24Nkabela ukaange tuwenge twangolida kutuninga tobilo kuziswi zyakabaki kaatala. 25Lino mpela zimwi zyatuwenge ukazyaangilile kuzikkazikilo zyobilo eezyo. Munzila eeyi uyootwaangilila kumbele kumikosi yaaciwezo yakabaki kabupaizi. 26Lino ukapange tuninga twangolida tobilo akutwaangilila kuziswi zyobilo zyaansi zyakabaki aako, atala akabaki kubupaizi. 27Ukapange tuninga tobilo twangolida, ukatuswaanganye atutambo twakabaki kabupaizi mpokagumana alutambo lulukidwe kabotu. 28Tuninga ooto twakabaki kaacamba bakatwaangilile kuli twakabaki kabupaizi alutambo lwacijulu-julu kutegwa kabaki kaacamba kakagumine atala lyalutambo kakatatebunuki pe. 29Aloni anoonjila mubusena busalala unoojisi amazina aa Baisilayeli akabaki kakwe kakusinsimya kutegwa Mwami Leza kabayeeya lyoonse. 30Lino akabaki aaka mukabikke Ulimu a Tumimu kutegwa kazili acamba ca Aloni ciindi naya ku Mwami Leza. Lino aawo nali ku Mwami Leza lyoonse unoonga kasamide acamba cakwe kabaki kakusinsimya ku Baisilayeli.”

Kabaki kabupaizi

(Kulonga 39.22-31)

31“Lino Jansi eelyo lisamwa atala akabaki kabupaizi ukalisumye abutonje bwaciju-julu bwalo. 32Nkabela mpolili akati kuyoosiigwa nsingo yakunjilila mutwe. Eeyi nsingo iyoogongelwa amoombe uusumidwe kabotu coonse kucizinguluka, mbuli busumwa nsingo yajansi lyacikutu, kutegwa kalitazapuki pe. 33Kumoombe walyo wakunsi ukasuminizye amicelo yapomegileneti yacijulu-julu, cisombo, alimwi abutonje busalala pyu atutali twandeketela toosedwe kabotu kuuzingulusya woonse, kakuli abulangu-langu bwangolida iini-ini akati kanjiyo. 34Aboobo mapomegileneti abulangu-langu bwangolida zikazinguluke moombe woonse wakunsi. 35Aloni unoosama jansi eeli kuciindi nali mumulimo wabupaizi. Kuciindi nanjila mubusena busalala, oomo muli Mwami Leza naa kuciindi naazwa mubusena busalala, kulila kwabulangu-langu kuyoolimvwisya, nkabela takooyoojaigwa pe.

36“Wamana ukacite mpande yangolida iisalala, akwiisimba kuti, ‘Ulipedwe ku Mwami Leza.’ 37Ukayaangilile kucingundu akatambo kacijulu-julu. 38Lino Aloni unooisama mpande eeyo ankumo, nkabela munzila eeyi inoogwisigwa milandu iicita Baisilayeli nobapa zituuzyo ku Mwami Leza. Aloni unooisama lyoonse ankumo kutegwa Mwami Leza kabotelwa lyoonse azituuzyo eezyo.

39“Cibaki ukacisumye asani lyandeketela licekawidwe, alimwi ukacite cingundu kuzwa kusani lili mbubonya mbuli ndilyo, ukaluke alutambo lucekawidwe.

40“Abalo bana ba Aloni ukabacitile zibaki, matambo, azingundu zibotu zyabulemu. 41Yebo ukamusamike zisani eezi mwanookwanu Aloni abana bakwe. Mpoonya ukabananike, ukabanjizye mumulimo wabupaizi, ukabape kuli ndime nde Leza kuti bakandibelekele mulimo wabupaizi. 42Ukabacitile zibbudula zilampa kuzwida mucibuno akuyoosika muzibelo, kuti kabatabonyi cinswe cabo. 43Aloni abana bakwe baleelede kunoozisama lyoonse nibanjila mutente lyakuswaanganina naa nibaswena kucipaililo kuzoocita mulimo wabupaizi mubusena busalala, kutegwa batalitondezyi zinswe akujaigwa. Ooyu ube mulawo walyoonse kuli Aloni akubana bakwe.”

Currently Selected:

Kulonga 28: Tonga96

Highlight

Compare

Copy