Kulonga 30
30
Cipaililo catununkilizyo
(Kulonga 37.25-28)
1“Ukayake cipaililo cakutentela tununkilizyo. Ukaciyasye amapulanga aamulombe. 2Ceelede kuti kaceelene mubulamfu bwamabazu aaco oonse one. Mubulamfu kacilampa kakokola komwe amwalo mubwamba kacilampa kakokola komwe, bulamfu bwakuya mujulu bukabe tukokola tobilo. Meja aaco aleelede kunoojisini aamwi acinyina. 3Ukacizilulule mpocili atala amumabazu aaco oonse akumeja angolida iini-ini, alimwi ukazilulule moombe waco angolida mbubonya. 4Ukanamatike tuninga twangolida munsi lyamoombe kumabazu obilo twakuyoosekka tukulisyo. 5Ukabambe tukulisyo, twamulombe eelyo ukatuzilulule angolida. 6Eeci cipaililo ukacibikke kumbele lyasani lyacisitilizyo eelyo lilenga kumbele lyabbokesi lyacizuminano kalinooyovunikidwe acivunisyo calyo. Oobu mbusena mpetinooswaanganina anduwe. 7Aloni uleelede kunootenta tununkilizyo alincico lyoonse cifumo-fumo anoobamba malambe. 8Alimwi uleelede kutenta tununkilizyo kulubundu-bundu ciindi namunika malambe. Kutenta tununkilizyo boobu kuleelede kunoocitwa lyoonse kwamazyalani oonse kakunyina akuleka. 9Toelede kutenta alincico tununkilizyo tubi, nikuba kupaizya munyama, nikuba kutuuzya maila, nikuba kutila cipaizyo cacakunywa. 10Ciindi comwe buyo mumwaka Aloni uyoocita cilengwa eeco cakulamba bulowa kumeja aacipaililo bwamunyama wakapaizigwa mukukombelezezya zinyonyoono. Eeci cileelede kunooyoocitwa kwamazyalani oonse aaboola. Cileelede kuba cipaililo cisalalisya cipedwe kumulimo wa Mwami Leza alikke.”
Mutelo waŋanda ya Leza
11Lino Mwami Leza wakati kuli Mozesi, 12“Ciindi nobala Baisilayeli, muntu umwi aumwi uyoobbadela ku Mwami Leza muulo wabuumi bwakwe, kutegwa kutabi cuumo cimusikila ciindi nobacibalwa. 13Woonse muntu wabalwa uleelede kubbadela cisela casyekeli cili ngomweelwe uubikkidwe kuŋanda ya Leza, syekeli ileelene amagela aali makumi obilo, cisela eeci mmulumbo ku Mwami Leza. 14Umwi aumwi wabalwa, nkokuti, woonse muntu uuli amyaka iili makumi obilo naa kwiinda waawa, uleelede kubbadela mali aaya, ku Mwami Leza. 15Muntu muvubi teelede kubbadela mali aaindilila pe, awalo muntu mucete takooyoobbadela mali mace kwiinda bamwi pe ciindi nomubbadela mali aaya aabuumi bwanu ku Mwami Leza. 16Uyootambula mali aacinunuzyo aaya kuzwa kubantu Baisilayeli akwaabelesya mumilimo yamutente lyakuswaanganina. Mali aayo ngaayooibalusya Mwami Leza mbuyakamanwa milandu ya Baisilayeli.”
Mutiba wakusambila
17Mwami Leza wakati kuli Mozesi, 18“Ukabumbe mutiba wakusambila, wamukuba, kaujisi tako lyamukuba, Ukaubikke akati katente lyakuswaanganina acipaililo. Ukabikke maanzi mulinguwo. 19Nkabela Aloni abana bakwe banoosamba maanzi aayo kumaulu akumaanza. 20Ciindi nibanjila mutente lyakuswaanganina naa nibasika kucipaililo mukucita milimo yabo yabupaizi, kupa cipaizyo citentwa ku Mwami Leza, 21basambe mumaanzi aayo, kutegwa batafwi. Ooyu mulawo ngobeelede kubamba kukabe kutamani, balo alimwi alunyungu lwabo.”
Mafuta aakunana
22Alimwi Mwami Leza wakati kuli Mozesi, 23“Utole tununkilizyo tubotu kapati tuzwa mungwimba wamaala tulema masyekeli aali myaanda yosanwe alimwi atwasinamoni tulema masyekeli aali myaanda yobilo amakumi osanwe atwamindale tulema mbubonya, 24atwakasiya tulema masyekeli aali myaanda yosanwe, kweendelana amweelwe wakuŋanda ya Leza alimwi amafuta aaoliva aazula cipempa. 25Azintu eezi ukapange mafuta aasalala aakunana, ukaavwele mbubweenga simafuta. 26Amafuta aaya ukananike tente lyakuswaanganina, abbokesi lyamabwe aaciibalusyo, 27tebule azibelesegwa alindilyo zyoonse, acikkalilo calambe, acipaililo cakuumpila tununkilizyo, 28acipaililo cazipaizyo zyakutenta, azibelesyo zyaco zyoonse, amutiba wakusambila atako lyawo. 29Munzila eeyi uyoozisalazya zintu eezi, eelyo ziyoosalala ncobeni, aboobo kufumbwa uyooziguma uyoonyonyoonwa abusalali bwazyo. 30Mbombubo oobu mboyoonanika Aloni abana bakwe akubasalazya kuti bandibelekele mulimo wabupaizi. 31Lino mboobu mboyoobaambila Baisilayeli, ‘Aaya mafuta abe aalibedelede aakunana mumulimo wangu kwamazyalani aanu oonse. 32Alimwi muntu buyo, atatilwi mafuta aayo pe. Mutabi nimuvwelanya tununkilizyo kuti mupange aali mbubo pe. Alasalala, aboobo anywebo kamwaayeeya mbubonya. 33Kufumbwa muntu uuti kapange amwi aakozyenye angawo, nikuba kwaabelesya aaya mafuta kumuntu buyo uutali mupaizi, ooyo uyoogwisigwa akati kabantu bokwabo.’”
Tununkilizyo tumwi
34Eelyo Mwami Leza wakaambila Mozesi kuti, “Bweza cipaanzi ceelene catununkilizyo twamisyobo eeyi, sitakite, onika, galibbanumu, afulankisensi. 35Usanganye upange cinunkilizyo cabweema bubotu. Ucibikke munyo kuti cilondoke cisalalisye. 36Cimwi cipaanzi caco cisilwe cibe busu buti kasansailwe kumbele lyabbokesi lijisi mabwe aaciibalusyo lili mutente lyakuswaanganina, busena oobo mwendinoomuswaanganina abantu. Eeci cinunkilizyo uleelede kuciyeeya kuti cilasalala kapati. 37Toelede kuti ukabelesye zintu mbuli zyakabelesegwa kucipanga mukuti ayebo ukalipangile mafuta aako pe. Pele koyeeya kuti ncinunkilizyo cisalala cipedwe ku Mwami Leza. 38Kuti naa muntu wapanga cili mbuli ncico kuti akabelesye walo, ncobeni ooyo muntu uyoogwisigwa kubantu bokwabo.”
Currently Selected:
Kulonga 30: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
