Kulonga 32
32
Moombe wangolida
(Ciibalusyo 9.6-29)
1Lino bantu nibakabona kuti Mozesi wakkala ciindi cilamfu kucilundu akuti taakwe naakapiluka, bakabungana kuzinguluka Aloni, bakati kulinguwe, “Yebo tubumbile baleza batusolwede. Nkaambo tatuzi cacitika kuli Mozesi ooyu wakatugwisya munyika ya Ijipiti.” 2Aloni wakati kulimbabo, “Amugwisye tunkwinta-nkwinta twangolida tusamide bakaintu banu, mundipe.” 3Nkaako boonse bakagwisya tunkwinta-nkwinta ooto twangolida akututola kuli Aloni. 4Aloni wakatutambula akutweenzemuna, amane watila ngolida eeyo mucibumbilo, mbombubo oobu mbwaakabumba moombe. Mpoonya bantu bakaamba kuti, “Nobaisilayeli, ngooyu leza wesu wakatugwisya mu Ijipiti.” 5Naakamvwa boobo Aloni wakayaka cipaililo kumbele lyamoombe. Mpoonya wakaambilizya kuti, “Ijunza kuzooba pobwe lyakulemya Mwami Leza.” 6Nibwakaca cifumo-fumo bakapaizya zipaizyo zyakutenta alimwi bakaleta zituuzyo zya lumvwano. Eelyo bantu bakali kulya akunywa, bamane bakatalika kucita zisofweede.
7Lino Mwami Leza wakaambila Mozesi kuti, “Fwambaana, useluke ubweede nkaambo bantu bako mbookagwisya mu Ijipiti batalika kulisofwaazya lwabo beni. 8Basiya kale nzila njendakabalailila kuti baitobele. Babumba moombe wangolida, bamukomba akupaizya kulinguwo. Baamba kuti, ‘Nobaisilayeli, ngooyu Leza wesu wakatugwisya mu Ijipiti.’” 9Amane Mwami Leza wakati kuli Mozesi, “Ndilizi kuti bantu aaba mbaasicinguni ncobeni. 10Leka nkabanyonyoone mubukali bwangu bupya. Ndamana njookucita kuti ube musyobo mupati.”
11Pele Mozesi wakakombelezya Mwami Leza wakwe akuti, “O Mwami Leza, nkaambo nzi ncoonyemena bantu bako boobu mbookagwisya kuzwa mu Ijipiti anguzu mpati? 12Nkaambo nzi notilekelele Baijipiti kuti bakonzye kwaamba kuti, ‘Wakabagwisya kuzwa mu Ijipiti amuyeeyo mubi wakuyoobajaila mumalundu akubanyonyoonena limwi?’ Akaka utanyemi boobu, beengelele bantu bako. Utabaleteli mapenzi aaya. 13Yeeya babelesi bako ba Abulahamu, Izaka, a Isilayeli, alimwi ambuli mbookakonkezya muzina lyako kulimbabo, kuti ‘Ndiyoomupa bana banji bali mbuli nyenyezi zyakujulu. Bana banu njoobapa nyika eeyi yoonse njendakasyomezya, aboobo iyooba yabo akutamani.’” 14Aboobo Mwami Leza wakabeengelela, taakwe naakaletela bantu bakwe mapenzi aayo ngaakaambide.
15Mpoonya Mozesi wakapiluka kuzwa mucilundu kayumwide zilembelo zyamabwe obilo aamilawo, aakalembedwe kumabazu aawo obilo oonse. 16Mwami Leza lwakwe mwini nguwakapanga mabwe aayo akulemba alingawo.
17Lino Josyuwa naakamvwa bantu kabayobeka, wakati kuli Mozesi, “Kuli muzunzumina wankondo kuzivuka.” 18Pele Mozesi wakati, “Ooko takuli kuyobeka kwakuzunda, nikuba kwalwiimbo lwakulila kwakuzundwa pe. Ooko nkuyobeka kwakwiimba.” 19Nkabela Mozesi naakaswena aafwiifwi azivuka, akubona moombe abantu kabazyana, wakanyema kapati. Wakawaala ansi mabwe obilo aaya ngaakayumwide akwaapwaya munsi acilundu. 20Wakabweza moombe ooyo ngobakabumba, wamutenta, wamusila bwaba busu, wakabusansaila mumaanzi, mpoonya wakacita Baisilayeli kuti banywe maanzi aayo. 21Wakaambila Aloni kuti, “Ino bantu aaba bakakucita buti, kuti ubanjizye mucinyonyoono cipati cili boobu?” 22Walo Aloni wakaingula kuti, “Utandinyemeni mebo, simalelo wangu. Ulizi kuti bantu aaba mbasungu mukucita cibi. 23Bakaamba kuti kulindime, ‘Tupangile Leza atusolwede, nkaambo tatuzi cakacitika kuli Mozesi ooyo wakatugwisya mu Ijipiti.’ 24Eelyo ndakababuzya kuti, ‘Ino mbaani bajisi ngolida?’ Nkabela aabo bakajisi zyakulisakatizya zyangolida bakazisamununa akuzileta kulindime. Kumane mebo ndakazibikka mumulilo, ngomoombe ooyu.”
25Lino Mozesi wakabona kuti Aloni wakabaleka bantu kuti bacite zyuusya nsoni zyalikunooyoomvwa basinkondonyina. 26Eelyo wakaakwiima kumanjililo aazivuka akupozomoka kuti, “Aabo bayanda Mwami Leza abaze kulindime.” Eelyo boonse Balevi bakazoobungana kulinguwe. 27Mpawo wakati kulimbabo, “Mboobu mbwaamba Mwami Leza wa Isilayeli, ‘Umwi aumwi wanu asekke panga lyakwe akunjila muzivuka kuzwida okuno kumulyango ooyu akuyoosika kumulyango uuli okuya. Mubajaye banabokwanu ambomubambene aabo, abeenzinyoko.’” 28Eelyo Balevi bakacita mbubonya mbwaakabaambila Mozesi, nkabela mubuzuba oobo kwakajaigwa baalumi bakatisike kuzyuulu zyotatwe. 29Mpoonya Mozesi wakaambila Balevi kuti, “Sunu buno buzuba nywebo mwalisalazya lwanu akulibikka mumulimo wa Mwami Leza kuba bapaizi bakwe kwiindila mukujaya bana banu abanabokwanu. Aboobo Mwami Leza wamuleleka sunu.”
30Nibwakaca Mozesi wakaambila bantu kuti, “Mwakacita cinyonyoono cipati ciyoosya. Pele ndilabweeda mucilundu ku Mwami Leza. Ambweni inga ndaakumukombelezezya mulandu wanu.” 31Mozesi wakabweeda ku Mwami Leza akuyooti, “Cakomenesya cinyonyoono ncobakacita bantu aaba. Bakabumba mutuni wangolida. 32Pele lino akaka, balekelele cinyonyoono cabo. Kuti naa utabalekeleli, koligwisya zina lyangu kuzwa mubbuku ndyookalemba.”
33Mpoonya Mwami Leza wakati kuli Mozesi, “Ooyo uundibisizya alikke ngwenjozimaanya zina kuzwa mubbuku lyangu. 34Koya, ukasolwede bantu kubusena oobo mbwendakakwaambila. Koyeeya kuti mungelo wangu uyookusolweda, pele ciindi ciyoosika, neyoobasubula akaambo kacinyonyoono cabo.”
35Nkaako Mwami Leza wakatumina cuumo kubantu akaambo kakusungilizya Aloni kubumba moombe.
Currently Selected:
Kulonga 32: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
