Kulonga 38

Kupanga cipaililo

(Kulonga 27.1-8)

1Cipaililo wakaciyaka amapulanga aamulombe. Cakajisi mabazu one aajisi bulamfu bweelene bulampa tukokola tosanwe, abwamba buli tukokola tosanwe, bulamfu bwamujulu bwakali tukokola totatwe. 2Mutuswi twaco tone wakabikka meja aakaimvwi aakajisilizi cipaililo. Eelyo coonse wakacizilulula amukuba. 3Wakafula zyakubelesya zyacipaililo zyamukuba, zyakuyolela twe, mafocolo, mbede, ngobyoobyo, ankaye zyamulilo. Zyoonse zibelesyo zyacipaililo wakazipanga amukuba. 4Wakacipangila mbaula yamasuwa aatubulo tupatingene twamukuba. Masuwa aambaula eeyo wakaabikka kunsi lyamubalo wacipaililo kuti kuusika akati-kati kacipaililo nkociya mujulu. 5Nkabela muzyooko zyambaula wakabikka tuninga tone twamukuba twakuyumwida. 6Tukulisyo ootu twakali twamulombe, nkabela wakatuzilulula amukuba. 7Ootu tukulisyo wakatusekka muninga zyacipaililo kumabazu aaco obilo aakuciyumwida. Cipaililo wakacipanga amapulanga mumabali kakutakwe cintu muli ncico.

Mutiba wakusambila

(Kulonga 30.18)

8Wakabumba mutiba wakusambila wamukuba atako lyawo. Wakuubumba kuzwa kuzimboni-mboni zyabakaintu bakali kubeleka amulyango watente lyakuswaanganina.

Bbuwa lyatente lya Mwami Leza

(Kulonga 27.9-19)

9Bamane bakayaka bbuwa lyatente. Kulubazu lwakumusanza masani aakusitilizya aandeketela akasumwa kuzwa kumasani mateteete mabotu aalampa tukokola tuli mwaanda lubazu lomwe. 10Kaajisini kumisemo yamukuba iili makumi obilo iijisi ziimino zyamukuba zili makumi obilo, bakazibikka misemo yamukuba, iijisi ngobyoobyo atusako twansiliva. 11Mbubonya oobo kulubazu lwakunyika kwakali masani aakusitilizya aalampa tukokola tuli mwaanda, aakajisini amisemo yamukuba iili makumi obilo aziimino zyamukuba zili makumi obilo, kwakali ngobyoobyo atusako twansiliva. 12Bwamba bwabbuwa kulubazu lwakumbo bwakajisi masani aakusitilizya aalampa tukokola tuli makumi osanwe, amisemo iili kkumi iijisi ziimino zili kkumi, ngobyoobyo zyazicinda atusako twazyo twansiliva. 13Kulubazu lwakujwe kumanjililo bbuwa lyakajisi bwaamba bulampa tukokola tuli makumi osanwe. 14Eelyo kulubazu lumwi lwamulyango kwakali masani aakusitilizya aalampa tukokola tuli kkumi atusanu, kwakali amisemo aziimino zyotatwe. 15Kulubazu lumwi kwakali masani aakusitilizya aalampa tukokola tuli kkumi atusanu kumbali aakumulyango, akajisi misemo yotatwe aziimino zyotatwe. 16Lino masani aakusitilizya aabbuwa akali atutali twandeketela toosedwe kabotu. 17Ziimino zyamisemo zyakali zyamukuba, pele ngobyoobyo atusako twakali twansiliva, atala zyakazilulwidwe ansiliva, aboobo zyoonse zicinda zyabbuwa zyakajisi tusako twansiliva. 18Pele sani lyaamulyango wabbuwa lyakali lyamusyobo wacijulu-julu, cisombo, liteteete lisumidwe kabotu cakweebeka, alimwi abutonje busalala pyu. Lyakali kulampa tukokola tuli makumi obilo, bulamfu bwakuya mujulu bwakali tukokola tosanwe, mbubonya mbuli bwakali masani amwi aabbuwa. 19Lyakajisilizi kumisemo atusako twansiliva tone twakazilulwidwe ansiliva. 20Nembe zyoonse zyatente lyakukkalila azyabbuwa lyakazingulukide zyakali zyamukuba.

Lubulo lwakabelesegwa mukuyaka tente lya Leza

21Lino ngooyu mweelwe walubulo lwakabelesegwa mukuyaka tente lyakuswaanganina lyakajisi mabwe obilo aaciibalusyo. Mweelwe wazintu eezi wakacitwa mbuli mbwaakalailila Mozesi, basikutambula bakali Balevi. Wakali mweendelezi wamulimo ooyu ngu Itamaa, mwana wa Aloni mupaizi.

22Nkabela Bezaleli mwana wa Uli, mwanaa Hula, wamusyobo wa Juda, nguwakali mupati wakulanga zintu zyoonse eezyo Mwami Leza nzyaakaambila Mozesi kuti acite. 23Sikumugwasya wakali Oholiyabu mwana wa Ahisamaki, wamusyobo wa Dani. Wakali aluzibo lwakunyembaula akubotya zintu, akuluka masani aacijulu-julu aacisombo aasalala pyu alimwi atutali twandeketela toosedwe kabotu.

24Lino ngolida yoonse yakabelesegwa mumulimo watente lya Leza yakali ngolida yakapedwe ku Mwami Leza, yakali kulema matalenta aali makumi obilo afuka amasyekeli aali myaanda iili ciloba amakumi otatwe. Kweendelana amweelwe waŋanda ya Leza. 25Nsiliva yakaleta babuleya yakali kulema matalenta aali mwaanda amasyekeli aali cuulu amyaanda iili ciloba amakumi aali ciloba aasanu kweendelana amweelwe waŋanda ya Leza. 26Muntu omwe-omwe wakali kutela bbeka lyomwe nkokuti cisela casyekeli camweelwe wakuŋanda ya Leza. Bantu bakatela bakali zyuulu zili myaanda iili cisambomwe azitatu amyaanda yosanwe amakumi osanwe. Bantu bakatela mbaabo bakali amyaka iili makumi obilo akwiinda waawa. 27Matalenta aali mwaanda aansiliva akabelesegwa mukupanga zikkalilo zili mwaanda zyazicinda zyatente lya Leza azisitilizyo zyazyo. Nkokuti comwe cikkalilo cakali kutola bulemu bwatalenta lyomwe. 28Kuzwa mumasyekeli aansiliva aali cuulu amyaanda iili ciloba amakumi aali ciloba aasanu, wakazilulula atala aazicinda akupanga ngobyoobyo zyazyo atusako twazyo. 29Mukuba wakapedwe ku Mwami Leza wakali kulema matalenta aasika kumakumi aali ciloba, amasyekeli aali zyuulu zyobilo amyaanda yone. 30Ooyu mukuba ngwaakapanzya zikkalilo zyaamulyango watente lyakuswaanganina, alimwi acipaililo kubikkilizya ambaula zyaco zyamukuba, azibelesyo zyacipaililo, 31azikkalilo zyabbuwa zyakazingulukide tente amulyango walyo alimwi anembe zyoonse zyatente azyabbuwa eelyo.

Currently Selected:

Kulonga 38: Tonga96

Highlight

Compare

Copy