Kulonga 40

Mbulyakasimpwa tente lya Leza

1Lino Mwami Leza wakati kuli Mozesi, 2“Mubuzuba bwakusaanguna bwamwezi mutaanzi, ukasimpe tente lyakuswaanganina. 3Mukati ukabikke bbokesi eelyo lijisi mabwe aaciibalusyo alimwi ukalivumbe bbokesi eelyo amulembo wakusitilizya. 4Ukabikke zibelesyo zyalyo atebule. Wamana ukanjizye acikkalilo camalambe akuyoobikka malambe alincico. 5Mpoonya ukabikke kumbele lyabbokesi eelyo cipaililo cangolida cakutentela tununkilizyo, wamana ukabikke cisitilizyo amulyango watente lya Leza. 6Acalo cipaililo cakutentela zipaizyo ukacibikke kumbele lyatente lyakuswaanganina. 7Walo mutiba wakusambila ukuubikke akati-kati katente lyakuswaanganina acipaililo, alimwi ukabikke amaanzi mulinguwo. 8Ukwakwabule tente akulisimpa, utakalubi kubikka mulembo wakusitilizya amulyango.

9“Lino ukabweze mafuta aakunana, ukananike tente lya Leza, ukananike azintu zyoonse zili mulindilyo. Mbombubo oobu mbotikasalazye tente eelyo akusalazya zyoonse zili mulindilyo, nkabela munzila eeyo tente liyoosalala ncobeni. 10Mpoonya ukananike cipaililo cakutentela zipaizyo azibelesyo zyaco zyoonse. Ukacisalazye munzila iili boobu, eelyo ciyoosalala ncobeni. 11Awalo mutiba wakusambila ukuunanike, acikkalilo cawo mbubonya.

12“Lino Aloni abana bakwe ubalete amulyango watente lyakuswaanganina, ubasanzye aamaanzi. 13Aloni umusamike zisani zyabupaizi akumunanika, nkabela munzila iili boobu ulamusalazya kuti akandibelekele mumulimo wabupaizi. 14Ubalete bana bakwe akubasamika zisani zyabupaizi. 15Wamana ubananike abalo mbubonya mbuli mboonanika wisi, kuti bandibelekele mumulimo wabupaizi. Kunanikwa kwabo ooku nkokuyoobacita kuti bakabe bapaizi balyoonse alyoonse.”

16Nkabela Mozesi wakacita zyoonse mbubonya mbuli Mwami Leza mbwaakamulailila kuti acite. 17Aboobo mubuzuba bwakusaanguna bwamwezi mutaanzi mumwaka wabili tente lya Leza lyakasimpwa. 18Mozesi naakasimpa tente eelyo, wakalikazikizya azikkalilo zyalyo, akusimpa zicinda zyalyo, akunamatika tukulisyo twalyo akwiimika misemo yalyo. 19Amane wakabikka civumbilizyo atala atente lya Leza akubikka civumbilizyonyina, mbubonya mbuli Mwami Leza mbwaakalailila. 20Mpoonya wakabweza mabwe aaciibalusyo akwaabikka mubbokesi. Wakasekka tukulisyo mutuninga twabbokesi akulivunika civunisyo calyo. 21Mpoonya wakabikka bbokesi mutente lya Leza, akwaanzika mulembo wakusitilizya. Lino munzila eeyi wakakwabilila bbokesi lijisi mabwe aaciibalusyo mbubonya mbuli Mwami Leza mbwaakamulailila.

22Lino Mozesi wakabikka tebule mutente lyakuswaanganina, kulubazu lwakunyika, anze lyamulembo wakusitilizya. 23Nkabela alindilyo wakabikka cinkwa cakutuula kuli Leza, mbubonya mbuli Leza mbwaakamulailila. 24Mpawo wakabikka cikkalilo calambe mutente lyakuswaanganina, kulangana atebule, kulubazu lwakumusanza. 25Oomo wakabikka malambe kumbele lya Mwami Leza, mbubonya mbuli Mwami Leza mbwaakamulailila. 26Lino wakabikka cipaililo cangolida mutente lyakuswaanganina, kumbele lyamulembo wakusitilizya. 27Aawo acipaililo wakatenta tununkilizyo, mbubonya mbuli Mwami Leza mbwaakamulailila. 28Amane wakaanzika mulembo wakusitilizya amulyango watente. 29Wakabikka cipaililo cakutentela zipaizyo amulyango watente lyakuswaanganina. Lino acipaililo eeci wakapaizya cipaizyo eeco cakali kutentwa kumaninina, alimwi acituuzyo cazyakulya, mbubonya mbuli Mwami Leza mbwaakamulailila. 30Mpoonya mutiba wakusambila wakuubikka akati katente lyakuswaanganina acipaililo, akubikka maanzi aakusamba mulinguwo. 31Nkabela Mozesi, Aloni, abana bakwe bakali kusamba kumaanza akumaulu aabo. 32Nibakali kunjila mutente lyakuswaanganina, naa kuunka kucipaililo, bakali kusamba mbubonya mbuli Mwami Leza mbwaakalailila Mozesi. 33Wakabamba bbuwa lyakazingulukide tente lya Leza alimwi acipaililo, nkabela wakaanzika mulembo wakusitilizya amulyango wabbuwa. Mbombuboobu Mozesi mbwaakuumanizya mulimo woonse.

Kkumbi atala lyatente lyakuswaanganina

(Myeelwe 9.15-23)

34Lino kkumbi lyakavumba tente lyakuswaanganina abulemu bwa Leza bwakazuzya tente lyoonse, 35cakuti naba Mozesi taakali kukonzya kunjila mutente eelyo akaambo kakuti kkumbi lyakali mpawo, abulemu bwa Mwami Leza bwakazuzizye tente. 36Lyoonse Baisilayeli nibakali kulonga-longa kuzwa kucilawo cimwi akuya kuli cimwi, banoonga tabasiyi busena oobo mbobayanda kulonga ccita mane kkumbi eelyo linyamuke kuzwa atente lya Leza. 37Kuti naa kkumbi talinyamuki abalo banoonga nkukkede. Bakali kulindila mane buzuba mbulyanyamuka. 38Aboobo lyoonse munyendo zyabo kkumbi lya Leza lyakali atente eelyo sikati, masiku lyakali kuyaka mulilo, eelyo Baisilayeli boonse bakali kuubona.

Currently Selected:

Kulonga 40: Tonga96

Highlight

Compare

Copy