Kulonga 5
5
Mozesi a Aloni kuli Falo
1Lino Mozesi alimwi a Aloni bakainka kuli Falo akuyooti, “Mboobu mbwaamba Mwami Leza wa Baisilayeli wati, ‘Kobaleka bantu bangu bainke kuti bakandicitile pobwe lyakukomba munkanda.’” 2Pele wakaingula kuti, “Ino nguni Mwami Leza? Nkaambo nzi ncendeelede kumuswiilila akuleka Baisilayeli kuti bainke? Nsimuzi Mwami Leza ooyo, masimpe nsikoobaleka Baisilayeli kuti bainke.” 3Balo bakati, “Leza wa Bahibulu wakaswaangana andiswe. Lino kaka, tuzumizye kuti tutole lweendo lwamazuba otatwe munkanda kuti tukape zipaizyo ku Mwami Leza wesu. Kuti naa tatuciti oobo inga ulatujaya acuumo noliba panga.” 4Lino mwami wa Ijipiti wakati kuli Mozesi a Aloni, “Ino nywebo ncinzi ncomuyanda kulesya bantu kubeleka milimo yabo? Amubweede kumilimo yanu.” 5Alimwi Falo wakayungizya akuti, “Aaba bantu bavulisya kwiinda basicisi lino muyanda kuti baleke akubeleka!”
6Mubuzuba oobo mbubonya wakalailila basikubelesya akudyaminina Baisilayeli kuti, 7“Tamuceelede kunoopa bantu bwizu bwakuumya zitina mbuli mbumwakali kucita lyoonse. Amubaleke kabalyeetela lwabo beni. 8Pele muleelede kubona kuti kabacuuma mweelwe wazitina uuli mbuli ngobauma lyoonse, mutaucesyi pe. Mbatolo, ncenciceeco ncobalilila kuti, ‘Amutuleke tuunke tukape cipaizyo kuli Leza wesu.’ 9Amubacite kuti bantu aaba babeleke anguzu kwiinda, mubone kuti kabuujisi mulimo ooyo lyoonse, mutagami kuswiilila kubeja kwabo.”
10Mpoonya aabo basikubabelesya akubadyaminina bakainka akuyooti kulimbabo, “Nceeci caaamba Falo, ‘Nsicimupi bwizu pe. 11Mweelede kuunka akuyoolyeetela nobeni kufumbwa ooko nkomuyoobujana, pele muleelede kuuma mweelwe wazitina mbubonya mbuli lyoonse.’” 12Aboobo Baisilayeli bakamwaikizyanya mucisi coonse ca Ijipiti kuyooleta bwizu. 13Abalo basikudyaminina bakabajibilizya akuti, “Mweelede kuuma mweelwe wazitina abuzuba uuli mbuli ngumwakali kuuma ciindi nimwakali kupegwa bwizu.” 14Lino basikubelesya Baisilayeli bakasalidwe bakaumwa abasikudyaminina ba Falo, akubuzigwa kuti, “Nkaambo nzi sunu ncimwatauma mweelwe wazitina uuli mbuli ngumwakali kuuma ciindi?”
15Mpoonya basikubelesya Baisilayeli bakaya kuli Falo akuyootongooka kuti, “Ino nkaambo nzi ncootucita boobu omwami? 16Tatupegwi bwizu pe, nikuba boobo twaambilwa kuti tuume zitina! Bona lino, omwami, twaumwa. Bantu bako mbabalubizizye.” 17Pele walo Falo wakati, “Mbutolo oobo! Mwatokwaalisya ma! Ncenciceeco ncomwiide kuti, ‘Amutuleke tuunke tukapaizye ku Mwami Leza.’
18“Amukabeleke, taakwe bwizu mbomutipegwe pe, pele muleelede kuuma mweelwe wazitina ooyo uuyandika ngoonya.”
19Aboobo basikubelesya Baisilayeli bakabona kuti banjila mumapenzi, nibakaambilwa kuti, “Mweelede kuuma mweelwe wazitina abuzuba ngoonya ngumwakali kuuma ciindi.” 20Buce buyo bakalindilila Mozesi a Aloni kuti babonane a mbabo. 21Mpawo bantu aabo bakati kulimbabo, “Mwami amubone nkaambo mwacita kuti Falo abasimilimo bakwe batusulaike. Mwabikka panga mumaanza aabo kuti batujaye.”
Mozesi mbwaakakomba
22Mpoonya Mozesi wakapiluka ku Mwami Leza akuyooti, “O Mwami Leza, nkaambo nzi ncobapenzya bantu aaba? Sena ncookanditumina eeci? 23Kuzwa ciindi ncendakasika kuli Falo kuzooamba muzina lyako, Falo wapenzya bantu bako, alimwi yebo toobavuna bantu bako pe!”
Currently Selected:
Kulonga 5: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
