Kulonga 8
8
Baijipiti mbubakapenzegwa abacula
1Lino Mwami Leza wakati kuli Mozesi, “Koya kuli Falo ukamwaabile kuti, ‘Mboobu mbwaamba Mwami Leza. Baleke bantu bangu bainke kutegwa bakandikombe. 2Pele kuti naa ubakasye bantu bangu kuunka, ndiyoosubula cisi cako coonse abacula. 3Mulonga uyoozula bacula balo bayoosika muŋanda yako yabwami, akuzyuli nkolala, aabulo, amumaanda abalupati-pati bako, amumaoveni aako, amumpoto zyako. 4Mane bazookunamatila amubili wako, aamibili yabantu bako, aali balupati-pati bako boonse.’”
5Kumane Mwami Leza wakati kuli Mozesi alimwi, “Mwaambile Aloni kuti, ‘Tandabika musako wako atala lyamilonga, tunkolola amaziba, ucite bacula kuti baze anyika ya Ijipiti.’” 6Nkaako Aloni wakatandabika janza lyakwe atala lyamaanzi oonse, nkabela kwakazwa bacula bakazuzya nyika ya Ijipiti. 7Pele abalo basimabibo mumabibo aabo bakapanga bacula, bakazwa mumulonga baza anyika ya Ijipiti. 8Lino Falo wakaita Mozesi a Aloni wakati, “Amukombe ku Mwami Leza kuti abagwisye bacula kuzwa kulindime akubantu bangu, eelyo ndiyoobaleka bantu bakwe kuti bainke bakape zipaizyo ku Mwami Leza.”
9Mozesi wakati kuli Falo, “Mbubo, ndipa ciindi nentikakukombele abalupati-pati bako, abantu bako kuti bacula bazwe akusiya maanda aanu, kabajanika buyo mumulonga.” 10Falo wakaingula kuti, “Juunza mabala.” Mpoonya Mozesi wakati, “Ciyoocitika mbuli mbooamba, kutegwa ukazibe kuti taakwe uumbi uuli mbuli Mwami Leza wesu. 11Bacula bayoozwa kukusiya yebo, amaanda aako, abalupati-pati bako, abantu bako, banoojanika mumulonga buyo.” 12Mpoonya Mozesi a Aloni bakasiya Falo. Eelyo Mozesi wakakomba ku Mwami Leza amakani aabacula, mbubonya mbubuli mbobakazuminana a Falo. 13Eelyo Mwami Leza wakacita mbubonya mbuli mbwaakakumbila Mozesi, bacula bakali mumaanda, amubbuwa, amumyuunda bakamana kufwa. 14Aboobo Baijipiti bakalundika milwi-milwi yabacula, mane nyika yoonse yakanunka nsu. 15Pele Falo naakabona kuti zintu zyeenda kabotu, wakaba sicinguni alimwi, taakwe naakaswiilila ba Mozesi a Aloni mbubonya mbuli bwakaambide Mwami Leza.
Baijipiti mbubakapenzegwa abususuli
16Lino Mwami Leza wakaambila Mozesi kuti, “Mwaambile Aloni kuti, ‘Uma nyika amusako wako, eelyo lusuko lulasanduka bususuli mu Ijipiti yoonse.’” 17Aloni wakacita oobo. Wakatandabika janza lijisi musako wakwe akuuma nyika, mpoonya bwakasika bususuli akati kabantu aakati kabanyama. Loonse lusuko lwamu Ijipiti lwakasanduka lwakaba bususuli. 18Abalo basimabibo bakasola amabibo aabo munzila eeyi njiyonya kuti balete bususuli, pele bakakacilwa. Nkaako kwakali bususuli kubantu akubanyama. 19Lino basimabibo bakaambila Falo kuti, “Ooyu mmunwe wa Leza wacita ceeci.” Pele Falo wakacili sicinguni, wakakaka kuswiilila Mozesi a Aloni, mbubonya mbuli bwakaambide Mwami Leza.
Baijipiti mbubakapenzegwa anzinini
20Lino Mwami Leza wakaambila Mozesi kuti, “Ubuke cifumo-fumo, ukalindilile Falo ciindi naya kumulonga. Ukamwaambile kuti, mboobu mbwaamba Mwami Leza, ‘Leka bantu bangu bainke kuti bakandikombe. 21Kuti naa utabaleki kuti bainke, ndiyootumina makata-makata aanzinini alinduwe abalupati-pati bako amumaanda aako, zizoozula mumaanda aako, aansi mpobeendela ziyooba nzinini zyalo.’ 22Pele nikuba boobo ndiyoocita kuti nzinini zitakasiki ku Gosyeni ooko kukkede bantu bangu, kutegwa ukazibe kuti mebo nde Mwami Leza, ndime eendi munyika eeyi. 23Oobo mbweyooandaanya bantu bangu abantu bako. Aaya maleele ayoocitika juunza.” 24Mwami Leza wakacita eeci, aboobo makata-makata aanzinini akasika muŋanda ya Falo, amumaanda aabalupati-pati bakwe, amunyika yoonse ya Ijipiti. Nyika yakapenga kapati kunzinini.
25Mpoonya Falo wakaita Mozesi a Aloni akubaambila kuti, “Kamuya mukape zipaizyo kuli Leza wanu mumonya muno munyika.” 26Pele Mozesi wakati, “Tacili cibotu kucita oobo pe, nkaambo ciyoobijila Baijipiti akaambo kabanyama mbotupaizya ku Mwami Leza wesu. Kuti naa twapaizya antangalala banyama mbobatayandi, inga cilabanyemya nkabela balatuuma mabwe. 27Tweelede kutola lweendo lwamazuba otatwe munkanda kuti tukape zipaizyo ku Mwami Leza wesu, mbubonya mbuli mbwaakatulailila walo.”
28Falo wakati, “Ndilamuleka kuti mukapaile ku Mwami Leza wanu munkanda, kuti naa mutakainki kule. Amebo mukandikombele.”
29Eelyo Mozesi wakaamba kuti, “Mbwetuunke buyo, ndiyookomba ku Mwami Leza kuti juunza mabala zizoozwe nzinini kulinduwe akuli balupati-pati bako, alimwi akubantu bako. Pele toelede kuti utucenge alimwi, kuti ukasye bantu kuunka kukupaizya ku Mwami Leza.”
30Mpawo Mozesi wakazwa, wasiya Falo, waakukomba ku Mwami Leza 31awalo Mwami Leza wakacita mbubonya mbuli bwakakumbila Mozesi. Makata-makata aanzinini akazwa akusiya Falo, abalupati-pati bakwe, abantu bakwe. Taakwe ayomwe nzinini yakasyaala pe. 32Nikuba kuciindi eeci, Falo wakacili sicinguni alimwi, wakakasya bantu kuunka.
Currently Selected:
Kulonga 8: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
