Matalikilo 15
15
Cizuminano ca Leza a Abulamu
1Musule akooku, Abulamu wakabona cilengaano, wakamvwa Mwami Leza kaamba kulinguwe kuti,
“Utayoowi Abulamu.
Ndime bulumbu buyookuvubya.
Ndime ntobo yako yakukukwabilila.”
2Pele Abulamu wakaamba kuti, “O Mwami Leza wangu, tee kayi mebo ndinyina bana. Ino inga uyoondilumbula buti? Uyookona zyangu ngu Eliyaza waku Damasikasi. 3Taakwe nookandipa bana, ncenciceeco umwi wabazike bangu ncayookonena lubono lwangu.”
4Abulamu wakamvwa Mwami Leza kaamba alimwi kulinguwe kuti, “Ooyu muzike wako tali ngonguwe uutikakone lubono lwako pe, mwanaako mwini wakulizyalila nguutikakone lubono lwako.”
5Mpoonya Mwami Leza wakamugwisya anze akumwaambila kuti, “Langa mujulu. Bala nyenyezi naa ulazikonzya. Mbubonya oobu alwalo lunyungu lwako mboluyoovula.”
6Lino Abulamu wakasyoma Mwami Leza, akaambo kakusyoma kwakwe ooku, Mwami Leza wakabala Abulamu mbuli mululami.
7Mpoonya Mwami Leza wakati kuli Abulamu, “Mebo ndime Mwami Leza wakakugwisya mumunzi wa Uli mucisi ca Bakaladiya, kuti ndizookupe nyika eeyi ibe yako.” 8Pele Abulamu wakaingula kuti, “O Mwami Leza wangu, ino inga ndaziba buti kuti nyika eeyi iyooba yangu.” 9Mwami Leza wakamwiingula kuti, “Ndiletela mpwizi yamyaka yotatwe, mpongo yamyaka yotatwe, mugutu wamyaka yotatwe, nziba alimwi ankwilimba.” 10Aboobo Abulamu wakazileta zyoonse eezi kuli Leza, wakabakosola banyama akati umwi aumwi muzipaanzi zyobilo zyeelene. Amane wakabikka zipaanzi zyabo kuzilanganya cimwi acimwi mumizila yobilo. Pele bayuni taakwe naakabakosola pe. 11Basikube nibakali kuza kuti balye nyama eeyo, Abulamu wakali kubasoola.
12Lino acibbililo cazuba, Abulamu wakoona, ooku kumwi kayoowede. 13Mwami Leza wakati kulinguwe, “Bana bako bayooba beenzu munyika imwi iitali yokwabo. Bayooba bazike kubantu banyika eeyo, alimwi bayoolelwa alutuzi lupati kwamyaka iili myaanda yone. 14Pele ndiyoocisubula cisi eeco ciyoobacita boobo, alimwi bana bako bayootolelela alubono lunji lwacisi eeco baakuzwa mulincico. 15Lino kwaamba zyako uyoopona buumi buzwide, alimwi uyoofwida muluumuno, uyoozikkwa koli mudaala. 16Lunyungu lwako luyoozwa mubuzike akuboola alimwi muno munyika muzyalani lyane, nkaambo lino kubisya kwa Baamoli takunasika ampa eeni-eni kuti mbasubule.”
17Zuba kalibbilide, nikwakasiya, kufwambaana kwakalibonya kalongo kamulilo, kakali kusuka busi bunji, alimwi kwakalibonya amumuni uumwekesya, eelyo kalongo aako amumuni zyakainda akati kazituli eezyo. 18Mubuzuba oobo Mwami Leza wakacita cizuminano a Abulamu, wakati, “Ndasyomezya kuti ndiyoopa nyika yoonse eeyi kulunyungu lwako, kuzwida kumulonga uuli mumunyinza wacisi ca Ijipiti kuyoosika mane kumulonga mupati wa Yufuletisi, 19kutolelezya amanyika oonse aa Bakeni, Bakenizi, Bakadimoni, 20Bahiti, Bapelizi, Balefa, 21Baamoli, Bakenani, Bagiigasyi, alimwi a Bajebusi.”
Currently Selected:
Matalikilo 15: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
