Matalikilo 21

Kuzyalwa kwa Izaka

1Nicakasika ciindi ceelede, Mwami Leza wakacita mbubonya mbwaakasyomezya. 2Sala wakamita akuzyalila Abulahamu mwana mulombe kali mudaala. Mwana ooyu wakazyalwa aciindi nciconya Mwami Leza ncaakaambide kuti natikazyalwe. 3Abulahamu wakaulika mwana ooyo kuti Izaka. 4Mwana naakaba aamazuba aali lusele, Abulahamu wakamupalula mbubonya mbuli mbwaakamulailila Leza. 5Abulahamu wakajisi myaka iili mwaanda ciindi Izaka naakazyalwa. 6Sala wakaamba kuti, “Leza wandisesya ncobeni. Kufumbwa muntu uutikamvwe makani aaya uyooseka andime.” 7Alimwi Sala wakayungizya akuti, “Nguni wakali kukonzya kuziba kuti Abulahamu inga uyoozyala bana a Sala? Pele ndamuzyalila mwana mulombe kali mudaala.”

Hagaa a Isyimayeli mbubakatandwa

8Lino Izaka wakakomena akulesegwa, nkabela mubuzuba mbwaakalesegwa Abulahamu wakacita pobwe pati.

9Bumwi buzuba Sala wakabona Isyimayeli, mwana mulombe ooyo Hagaa waku Ijipiti ngwaakazyala Abulahamu, kaseka Izaka mwanaakwe. 10Sala naakabona boobo, wakati kuli Abulahamu, “Mutande ooyu mukaintu muzike amwanaakwe, nkaambo mwana wamukaintu ooyu muzike teelede kukona kapaanzi nokaceya kalubono lwako oolo luyookona mwanaangu Izaka.” 11Lino Abulahamu wakapenga akaambo ka Isyimayeli mwanaakwe. 12Pele Leza wakaambila Abulahamu kuti, “Utapengi akaambo kamulombe akamuzike wako Hagaa. Kocita buyo coonse ncaakwaambila Sala, nkaambo muli Izaka uyoojana lunyungu oolo ndundakakusyomezya. 13Kwaamba zya mwana ooyu wamuzike, ndiyoomupa bana banji, cakuti mane bayooba musyobo mupati, nkaambo kayi awalo mwanaako.”

14Nibwakaca cifumo-fumo, Abulahamu wakapa Hagaa cinkwa ankomo iizwide maanzi. Amane wakamupa mwanaakwe, akumwaambila kuti ainke. Mpawo Hagaa wakainka uya bwiingaila munkanda ya Biiyasyiba. 15Lino maanzi naakamumanina, Hagaa wakatula mwanaakwe akumusiya munsi aciteyo. 16Wakasosoloka alaale kuzwa kumwana, kasinzo kalampa ntaamo zili mwaanda. Wakalyaambauzya wati, “Mbuti mbwenga ndalangilila mwanaangu kafwa?” Lino kakkede aawo, wakalila cakutila moyo.

17Nkabela Leza wakamuvwa naakali kulila, mungelo wa Leza wakaambila Hagaa kuzwa kujulu, wati, “Ino ninzi cakupenzya, Hagaa? Utayoowi. Leza wakumvwa kulila kwamwana. 18Nyamuka uunke ukamubweze mwana, umuumbulizye. Nkaambo lunyungu lwakwe ndiyoolucita musyobo mupati.” 19Mpawo Leza wakacita kuti Hagaa abone mukalo wamaanzi. Mpoonya Hagaa wakainka ooko akuyoozuzya nkomo yakwe maanzi, alimwi wakanywisya amwana. 20Leza wakali aamwana ooyo kusikila wakomena, walo wakakkala munkanda ya Palani akuba muvwimi uucibwene kapati. 21Banyina bakaakumukwatila mukaintu waku Ijipiti.

Cizuminano ca Abulahamu a Abimeleki

22Ciindi eeco Abimeleki a Fikoli, mupati walumamba lwakwe, bakainka kuli Abulahamu kuyoomwaambila kuti, “Tulizi kuti Leza uli aayebo muli zyoonse nzyocita. 23Aboobo lino konkezya aano kumbele lya Leza kuti tokooyoondicenga pe, nikuba kucenga bana bangu, noluba lunyungu lwangu. Mebo ndilasyomeka kulinduwe, kosyomezya kuti ayebo unoosyomeka kulindime munyika eeyi njookkala.” 24Eelyo Abulahamu wakaamba kuti, “Ndakonkezya.”

25Lino Abulahamu wakatongookela Abimeleki akaambo kamukalo wamaanzi ngubakatola babelesi bakwe. 26Pele Abimeleki wakaingula kuti, “Peepe, mebo tandeezi makani aaya. Taakwe ncookandaambila. Eeci nceciindi cakusaanguna kwaamvwa.” 27Mpoonya Abulahamu wakapa Abimeleki mbelele aŋombe, aawo aaba bobilo bakapanga cizuminano. 28Abulahamu wakasala bana bambelele bali ciloba, wakabasala kuzwa mubutanga bwakwe. 29Nkabela Abimeleki wakamubuzya kuti, “Ino wacitila nzi oobu?” 30Abulahamu wakaingula kuti, “Batambule bana bambelele aaba bali ciloba, nkaambo ocita boobo ulatondezya kuti wazumina kuti ndime ndakuusya mukalo ooyu.” 31Nkaako busena oobo bwakaitwa kuti Biiyasyiba, nkaambo nkonkukooko aaba bobilo nkobakakonkezyanya.

32Nibakamana kupanga cizuminano eeco ku Biiyasyiba, Abimeleki a Fikoli, mupati walumamba lwakwe, bakabweeda kunyika ya Bafilisiti. 33Abulahamu wakasyanga mubanga mu Biiyasyiba, wakakomba Mwami Leza, nguwe Leza walyoonse. 34Abulahamu wakakkala munyika ya Bafilisiti kwaciindi cilamfu.

Currently Selected:

Matalikilo 21: Tonga96

Highlight

Copy