Matalikilo 23

Kufwa akuzikkwa kwa Sala

1Lino Sala wakapona myaka iili mwaanda amakumi obilo aciloba, 2nkabela wakafwida ku Hebuloni munyika ya Kenani. Mpawo Abulahamu wakabunga dilwe lyamukaintu wakwe akumulila.

3Lino Abulahamu wakasiya mufu, waya ku Bahiti waakubaambila kuti, 4“Mebo ndili mweenzu muno mucisi, nsikkede pe ndiliindilide, ono ndamukumbila kuti munduuzizye kamwi kabazu kanyika yanu kuti ndicite namaumbwe.” 5Bakaingula kuti, “Akaka mwami, 6tuswiilile, yebo uli mwami wanguzu akati kesu, mmuzikke buyo mufu kufumbwa mucuumbwe ncotujisi cibotu kwiindilila. Taakwe aomwe akati kesu uunga wakukasya kuti uzikke mufu mucuumbwe cakwe.” 7Abulahamu wakaima, wakakotama, 8amane wakati, “Kuti naa kamuyanda kuti ndizikke mufu okuno, ndamukumbila kuti mundaambilile kuli Efuloni, mwanaa Zohaa, 9kuti anduuzizye mpangala ya Makipela iili kumpela amuunda wakwe. Amumukumbile kuti anduuzizye amuulo uuzulide kamulangilila, kuti ndiicite busena bwanamaumbwe.”

10Awalo Efuloni lwakwe wakalikkede antoomwe a Bahitinyina aawo amuswaangano wakacitidwe amulyango mupati wamunzi. Wakaingula bantu boonse bakali waawo kabamvwide, wakati, 11“Peepe, omwaalu wangu, kondiswiilila, ndilakupa muunda woonse ampangala iili mulinguwo. Ndakupa aano basicisima kabamvwide, kazikke mufu.” 12Abulahamu wakakotama alimwi, amane 13wakati kuli Efuloni kabamvwide bantu boonse, “Akaka kondiswiilila, ndiyanda kuula muunda woonse. Nkaako ndaambila buyo muulo wawo, nkabela utambule mali aanguwo, ndendilyo nenoozikka bafu mulinguwo.” 14Lino Efuloni wakaingula kuti, 15“Akaka omwaalu wangu, nyika yuulwa buyo mali ansiliva aali myaanda yone, ani ono inga eeci ncinzi akati kesu? Koya buyo, ukazikke mufu mulinguwo.” 16Lino Abulahamu wakabala mweelwe wamali aayo aakaamba Efuloni Bahiti kababwene, akali myaanda yone. Wakaaeleka kweelana abulemu bwamali bwakali kubelesegwa abasimakwebo bamazuba aayo.

17Mbombuboobu muunda wa Efuloni ku Makipela, kujwe lya Mamule, mbuwakaba wa Abulahamu. Kwakali muunda, ampangala yakali mulinguwo, amisamu yoonse yawo kusikila kumunyinza wamuunda woonse. 18Cakazibwa a Bahiti boonse bakaliwo amuswaangano ooyo kuti muunda lino waba wa Abulahamu. 19Nkabela Abulahamu wakazikka mwinakwe mumpangala eeyi mumuunda wakali wa Makipela, kujwe lya Mamule mucisi ca Kenani. 20Aboobo muunda antoomwe ampangala yakali mulinguwo yakali namaumbwe wa Bahiti, yakaba namaumbwe ya Abulahamu.

Currently Selected:

Matalikilo 23: Tonga96

Highlight

Copy