Matalikilo 26

Izaka mbwaakalongela ku Gelaa aku Biiyasyiba

1Lino kwakaba aimbi nzala munyika, kunze lyayeeyo yakali mumazuba aa Abulahamu. Aboobo Izaka wakaya kuli Abimeleki, mwami wa Bafilisiti, mucisi ca Gelaa. 2Lino Mwami Leza wakasika kuli Izaka akumwaambila kuti. “Utainki kucisi ca Ijipiti pe, ukkale buyo mucisi eeco ncetikwaambile kuti ukkale. 3Ukkale omuno mucisi kwaciindi ceelede, mebo ndiyooba ayebo alimwi ndiyookuleleka. Manyika aaya ndiyookupa kuti abe aako alunyungu lwako. Alimwi ndiyoobamba cisyomezyo ncendakacita auso Abulahamu. 4Ndiyooleleka bana balunyungu lwako bakabe mbuli nyenyezi zyakujulu, alimwi bana bako njoobapa manyika aaya oonse. Misyobo yoonse yamunyika ndiyooileleka nkaambo kako mbubonya mbuli mbwenjooleleka lunyungu lwako. 5Ndiyookuleleka akaambo ka Abulahamu ooyo wakaswiilila majwi aangu, wakabamba malailile amilawo yangu yoonse.”

6Aboobo Izaka wakakkala mu Gelaa. 7Lino basicisi nibakamubuzya amakani amukaintu wakwe, wakabaambila kuti, “Mmucizi wangu.” Wakali kuyoowa kwaamba kuti “Mmukaintu wangu,” mukuyeeya kuti baalumi bakubusena oobo inga balamujaya, nkaambo Labeka wakali mubotu ncobeni. 8Eelyo Izaka naakakkala-kkala ooko kwaciindi ceelede, Abimeleki mwami wa Bafilisiti wakalanga ampulungwido yaŋanda yakwe, wakabona Izaka kakumbete Labeka mukaintu wakwe. 9Eelyo Abimeleki wakatuma kuyooita Izaka, mpoonya wakati, “Masimpe uulya mukaintu wako. Ino nkaambo nzi ncookati mmucizi wako?” Izaka wakaingula kuti, “Ndakayoowa kuti antela inga bantu balandijaya ndaamba kuti mmukaintu wangu.” 10Eelyo Abimeleki wakaamba kuti, “Ino wacitila nzi cintu cili boobu kulindiswe? Sena tozi kuti nikwali kunga umwi wesu wacita bumambe amukaintu wako katazi kuti nguwako, nkabela nootunjizya mumulandu mubi?” 11Mpoonya Abimeleki wakalailila bantu boonse kuti, “Kutabi muntu naba omwe uutipenzye muntu ooyu naba mukaintu wakwe. Kufumbwa uutibapenzye uuyoojaigwa.”

12Lino Izaka wakalima akusyanga munyika eeyo, nkabela mumwaka ooyo wakajana butebuzi bunji buyungizidwe ziindi zili mwaanda kwiinda mbuto njaakasyangide, nkaambo Mwami Leza wakamuleleka. 13Wakacili kuya buvuba lyoonse, cakuti wakaba muvubi kapati. 14Eelyo Bafilisiti bakatalika kumunyonokela nkaambo wakalijisi matanga aambelele, aŋombe manji, alimwi ababelesi banji. 15Aboobo bakatalika kuvwikila mikalo yoonse njibakaside babelesi ba Abulahamu wisi naakacili kupona.

16Lino Abimeleki wakaambila Izaka kuti, “Kozwa, uunke kumbi, nkaambo yebo ulaanguzu kwiinda ndiswe.” 17Aboobo Izaka wakalonga kuzwa nkuko waakuyaka zivuka zyakwe mukkuti lya Gelaa, mwaakaakukkala. 18Ooko Izaka wakaakutalika kufumbulula alimwi mikalo njaakaside Abulahamu wisi ciindi naakacili kupona, eeyo Bafilisiti njibakavwikkilide musule alufu lwa Abulahamu. Izaka wakaita mikalo eeyi mazina ngoonya ngaakayuulikide wisi.

19Lino babelesi ba Izaka bakasya aumwi mukalo mukkuti oomo mubakadonkola kasena kamaanzi manji. 20Mpawo beembezi baku Gelaa bakatalika kuzwangana abeembezi ba Izaka, bakaamba kuti, “Aaya maanzi ngeesu.” Aboobo mukalo ooyo Izaka wakuuita kuti, “Eseki” nkokuti “Mazwanga” nkaambo bakazwangana anguwe. 21Alimwi babelesi ba Izaka bakasya aumwi mukalo alimwi kwakaba kuzwangana alinguwo. Lino ooyo wakuuulika kuti, “Sita” nkokuti “Businkondonyina.” 22Eelyo wakalonga kuzwa mubusena oobo kuya kumbi. Ooko wakaakusya aumbi mukalo. Lino taakwe nikwakaba kuzwanganina yooyo pe, aboobo wakuuulika kuti, “Lehoboti” nkokuti “Lwaangunuko.” Wakati, “Lino Mwami Leza watupa lwaangunuko munyika, alimwi tuyooba bantu basumpukide, bavubi okuno.”

23Amane Izaka wakazwa ooko akuya ku Biiyasyiba. 24Masiku aayo Mwami Leza wakasika kulinguwe akwaamba kuti,

“Ndime Leza wa Abulahamu uso. Utayoowi pe, ndili aayebo.

Ndiyookuleleka akukupa lunyungu lunji, akaambo kamubelesi wangu Abulahamu.”

25Mpawo Izaka wakayaka cipaililo ooko akukomba Mwami Leza. Eelyo wakasimpa tente lyakwe abusena oobo, alimwi bazike bakwe bakasya mukalo ooko.

Cizuminano ca Izaka a Abimeleki

26Lino Abimeleki wakaza kuzoobona Izaka, kuzwida kumunzi wa Gelaa. Wakali antoomwe a Ahuzati, mulailili wakwe, a Fikoli mupati wabasilumamba bakwe. 27Izaka wakababuzya kuti, “Ino mwazida nzi kulindime, kakuli kuti kusaanguna mwakali ndisulaikide, cakuti mwakandisungilizya kuti ndilonge kuzwa mucisi canu?” 28Balo bakaingula kuti, “Lino twaziba kuti Mwami Leza uli aayebo, alimwi tuyeeya kuti kweelede kuba cizuminano ciyumu akati kesu anduwe. Tuyanda kuti utusyomezye 29kuti taakwe notikatweetele mapenzi aakutucisa pe, mbubonya aswebo mbutwatakakucisa yebo. Twakali alubomba kulinduwe akukucita kuti usiye cisi cesu muluumuno. Lino twabona kuti yebo ulilelekedwe a Mwami Leza.” 30Eelyo Izaka wakabacitila pobwe, bakalya akunywa. 31Nkabela nibwakaca bakafuma kukonkezyanya umwi aumwi. Kuzwa aawo, Izaka wakabalaya, eelyo bakanyamuka akubweeda kulimbabo bakaandaana muluumuno.

32Mubuzuba mbubonya oobo babelesi ba Izaka bakaza akumwaambila zyamukalo ngobakasya, bakati, “Twajana maanzi.” 33Eelyo mukalo wakuuulika kuti, “Syiba” nkokuti “Cikonke.” Ncenciceeco munzi ncuuitwa kuti Biiyasyiba asunu, nkokuti “Mukalo wacikonke.”

Isau mbwaakakwata bakaintu Bahiti

34Lino Isau wakajisi myaka iili makumi one naakakwata Judisi, mwanaa Biili, Muhiti. Alimwi wakakwata Basemati, mwanaa wa Eloni, awalo Muhiti. 35Aaba bakaintu bakakatazya Izaka a Labeka.

Currently Selected:

Matalikilo 26: Tonga96

Highlight

Copy