Matalikilo 30

1Lino Lacelo naakabona kuti tazyali, wakamufwida munyono mupati wakwe, eelyo wakaambila Jakobo kuti, “Kondipa bana kuti naa utandipi, ndilafwa.”

2Pele Jakobo wakakalalila Lacelo wati, “Sena mebo ndili mubusena bwa Leza wakukasya kuzyala?” 3Lacelo wakati, “Ngooyu muzike wangu Biliha. Ino mbuti kuti wanjila kulinguwe kutegwa andizyalile mwana, eelyo munzila eeyi ndakonzya kujana mwana kwiindila mulinguwe.” 4Aboobo wakapa muzike wakwe Biliha kumulumaakwe, mpawo Jakobo wakatalika kusandukila mumuzike ooyo. 5Nkabela Biliha wakamita akuzyala mwana mulombe. 6Mpoonya Lacelo wakaamba kuti, “Leza wandifwida luzyalo akumvwa kukomba kwangu, wandipa mwana mulombe.” Nkaako wakamuulika kuti Dani. 7Bweende-bweende Biliha muzike wa Lacelo wakamita alimwi akuzyala mwana mulombe wabili. 8Mpoonya Lacelo wakaamba kuti, “Ndakazundana kapati amupati wangu, pele ndazwidilila.” Nkaako mwana wakamuulika kuti Nafutali.

9Lino Leya naakabona kuti waima, wakapa muzike wakwe Zilipa kuli Jakobo kuti kamusandukila awalo. 10Nkabela Zilipa wakazyala mwana mulombe. 11Abone boobo Leya wakati, “Ndaba aacoolwe.” Nkaako wakamuulika kuti Gadi. 12Bweende-bweende Zilipa, muzike wa Leya wakazyala mwana mulombe wabili. 13Abone boobo Leya wakati, “Ndabotelwa kapati! Bakaintuma banooti sikubotelwa.” Nkaako wakamuulika kuti Asya.

14Ciindi cakutebula maila, Lubeni naakaya kumyuunda wakaakujana musamu waluzyalo, nkabela wakuuleta kuli banyina. Abone boobo Lacelo wakaambila Leya kuti, “Akaka, kondipa umwi mucelo wamwanaako.” 15Pele Leya wakaingula kuti, “Ino uciyanda nzi, tee wakandinyanga mulumaangu? Lino alimwi utole amucelo wamwanaangu!” Lacelo wakamwaambila kuti, “Kuti naa wandipa mucelo wamwanaako, mulumi ulakusandukila sunu masiku.”

16Lino Jakobo naakaboola kuzwa kumyuunda ciindi camangolezya, Leya wakamucingauzya kati, “Sunu weelede koona kwangu masiku, kayi ndakubbadela kale amucelo wamwanaangu.” Aboobo masiku aayo Jakobo wakoona mwa Leya. 17Nkabela Leza wakamvwa kukomba kwa Leya, aboobo wakamita akuzyala mwana mulombe wasanu. 18Eelyo wakati, “Leza wandilumbula nkaambo ndakapa muzike wangu kumulumaangu.” Aboobo mwana ooyo wakamuulika kuti Isakaa. 19Bweende-bweende Leya wakamita alimwi akuzyala mwana mulombe wacisambomwe. 20Eelyo wakati, “Leza wandipa cipego cibotu kapati. Lino mulumaangu ulandilemeka nkaambo ndamuzyalila bana balombe bali cisambomwe.” Nkaako wakamuulika kuti Zebuloni. 21Bweende-bweende Leya wakazyala mwana musimbi ngwaakaulika kuti Daina.

22Lino Leza wakayeeya Lacelo, wakamvwa kukomba kwakwe, wazumina kuti abe abana. 23Aboobo Lacelo wakamita akuzyala mwana mulombe. Eelyo wakati, “Leza wandigwisya masampu aakutazyala. 24Akaka, Mwami Leza naandipa alimwi aumbi mwana mulombe.” Nkaako mwana ooyo wakamuulika kuti Josefa.

Jakobo a Labani mbobakapanga cizuminano calubono

25Musule aakuzyalwa kwa Josefa, Jakobo wakati kuli Labani, “Kondizumizya lino kuti ndibweede kulindiswe kunyika yokwesu. 26Ndipa bakaintu bangu aabo mbendakabelekela kulinduwe, undipe abana bangu ngunke. Ulizi mbuli mbondakakubelekela kabotu.” 27Pele Labani wakati kulinguwe, “Ndiswiilile ambebo, ndizi ncobeni kuti Mwami Leza wakandileleka akaambo kako. 28Kondaambila buyo ncetikuvozye, ndamana mebo ndakupa.” 29Jakobo wakaingula kuti, “Ulizi mbondakakubelekela, alimwi abutanga bwako mbubwakomena akaambo kakuti mbweembela kabotu. 30Nketanasika wakajisi katanga kaniini buyo, pele sunu lyabatanga liyoosya, nkokuti Mwami Leza wakuleleka ncobeni akaambo kangu. Lino ambebo ndileelede kulibonena twangu ma!”

31Eelyo Labani wakabuzya alimwi kuti, “Ani ncinzi ncoyanda kuti ndikubbadele.” Jakobo wakaingula kuti, “Nsiyandi kuvola mali pe, ndilakweembelela kufumbwa buyo kuti uzumine eeci. 32Sunu ndanjila mumatanga aako akuzandula twana twambelele tusiya atwana twampongo twamabala-mabala toonse. Nkokuvola nkwenjanda ooku. 33Eelyo yebo uyooziba kabotu naa ndilasyomeka. Nkaambo waakuboola kuzoozula zyakuvola zyangu, kuti uzoojane tubelele tusiya nituba tupongo tutakwe mabala-mabala, uyooziba kuti ntwakubba.” 34Aawo Labani wakaingula kuti, “Ncibotu. Tulacita mbubonya mbuli mbooamba.” 35Pele buzuba mbubonya oobo Labani wakasala akugwisya basijembwe bampongo boonse bakali amabala-mabala, ampongo nzyazi zyoonse zyamabala-mabala zyakajisi myeengwe, azyalo mbelele zisiya wakazigwisya. Wakazipa kubana bakwe kuti bazibambe. 36Mbombuboobu mbwaakazandula butanga bwakwe kuzwa kuli bwa Jakobo akubutola kubusena bwakali kulaale, bwakali kweendwa mazuba otatwe. Pele Jakobo wakasyaala keembela butanga bwa Labani.

37Lino Jakobo wakatola tusako tutete twazisamu zyaandeene-andeene wakatunyemba kwiindila mukutuyupa makwa amwi, aboobo twakaba amabala-mabala. 38Lino tusako ooto wakatubikka kumbele lyazinywido zyabutanga, nkaambo zyakali kutantana ciindi nizyakali kunywa maanzi. 39Aboobo impongo zyakali kumita kumbele lyatusako ooto, zyakali kuzyala bana babusasaasa, myeengwe-myeengwe, amabala-mabala. 40Nkabela Jakobo wakazandula mbelele zyakwe akuzibikka kulubazu lwazyo zilikke, kazilanzya kuleezyo zyamabala-mabala azisiya mubutanga bwa Labani. Munzila eeyi butanga bwakwe bwakavula, alimwi zyakwe taakali kuzisanganya azya Labani pe. 41Lino kufumbwa ciindi mbelele zyakajisi mibili yanguzu nizyakali kumita, Jakobo wakali kubikka tusako kumbele lyazinywido, kutegwa mbelele zimitile kumbele lyatusamu ooto. 42Pele tubelele twakanyanide taakali kutubikkila tusako pe. Aboobo zyoonse zyakanyanide zyakaba zya Labani, pele zyoonse zyakajisi mibili miyumu yanguzu zyakaba zya Jakobo. 43Nkaako wakavuba kufwambaana. Wakalijisi mbelele zinji, ababelesi bakaintu abaalumi, ankamela ambongolo.

Currently Selected:

Matalikilo 30: Tonga96

Highlight

Copy