Matalikilo 35

Leza mbwaakaleleka Jakobo ku Beteli

1Lino Leza wakaambila Jakobo kuti, “Kolibambila uunke ku Beteli ukakkalile nkuko. Ukayakile Mwami Leza wakalitondezya kulinduwe ooko, ciindi nookali kutija mupati wako Isau, cipaililo.” 2Aboobo Jakobo wakaambila bamukwasyi wakwe abaabo mbaakali kukkala aabo wakati, “Amwiisowe mituni njomujisi, amulisalazye lwanu, musame zisani zisalala. 3Tulazwa kuno akuunka ku Beteli ooko nkwetikayakile Mwami Leza cipaililo. Mwami Leza ngonguwe ooyo wakandigwasya ciindi camapenzi, wakali aandime koonse nkondakabede.” 4Mpoonya bakapa Jakobo mituni yoonse njobakajisi, bakamupa atulumba-lumba twakumatwi. Wakazizikka munsi amibanga kufwiifwi amunzi wa Syekemu.

5Lino Jakobo abana bakwe nibakatalika kweenda, bantu baminzi yakali munsi aampibakakkede bakayoowa kapati, taakwe nibakabatobela pe. 6Lino Jakobo abantu bakwe bakaakusika kubusena butegwa Luzi, nkokuti Beteli munyika ya Kenani. 7Ooko wakayaka cipaililo, akuulika busena oobo kuti Beteli, nkaambo ooko Leza nkwaakalitondezezye lwakwe mwini kulinguwe ciindi Jakobo naakali kutija mupati wakwe. 8Ciindi eeci Dibola, wakali sikulela Labeka, wakafwa, nkabela wakazikkwa munsi aamubanga wakali aafwiifwi amunzi wa Beteli. Musamu ooyo wakuuulika kuti, “Alinobakuti,” nkokuti Mubanga wakulila.

9Jakobo naakasika kuzwa kucisi ca Padanalamu, Leza wakalitondezya kulinguwe alimwi akumuleleka. 10Wakati, “Wali Jakobo, pele kuzwa lino unootegwa Isilayeli.” Aboobo wakategwa Isilayeli.

11Nkabela Leza wakamwaambila alimwi kuti, “Ndime Leza singuzu zyoonse. Koba abana banji. Lunyungu lwako luyoovula, alimwi bamwi babo bayooba bami. Lunyungu lwako luyoovula cakuti luyooba misyobo minji. 12Ndiyookupa nyika njindakapede Abulahamu a Izaka, njiyonya ndiyooipa akulunyungu lwako loonse.” 13Amane Leza wakamusiya abusena aawo mpoonya mpaakali kukananina kulinguwe, wabweeda kujulu. 14Mpawo Jakobo wakaimika bbwe lyaciibalusyo abusena aawo. Nkabela wakatila cituuzyo cacakunywa amafuta alindilyo. 15Busena oobo Jakobo wakabuulika kuti Beteli, nkaambo mpampawo aawo Leza mpaakakananina kuli nguwe.

Lacelo mbwaakafwa naakazyala Benjamini

16Bakalonga kuzwa ku Beteli, eelyo kakucisyeede kasinzo buyo kuti basike kubusena butegwa Efulata, Lacelo wakamyongwa, pele kuzyala kwakapenzya kapati. 17Sikutumbusya wakamwaambila kuti, “Utayoowi nkaambo uyanda kuzyala aumwi mwana mulombe.” 18Ciindi eeco Lacelo wakali lemede kale, lino kacipefula wakaulika mwana kuti, “Benoni” pele wisi wakamuulika kuti Benjamini.

19Lacelo naakafwa, wakazikkilwa kumugwagwa uuya ku Efulata, sunu uutegwa Betelehemu. 20Lino Jakobo wakaimika bbwe lyaciibalusyo acuumbwe, eelyo “Bbwe lya Lacelo” nkolicili asunu. 21Nkabela Isilayeli wakalongela kumbele alimwi, akuyooyaka zivuka zyakwe kubbazu limwi lya ŋanda ndamfu ya Edaa.

Jakobo abana bakwe (1 Makani 2:1-2)

22Lino Isilayeli naakacikkede munyika eeyo, umwi mwanaakwe uutegwa Lubeni wakanjila muli Biliha, umwi wabamwanakasuwa bawisi. Nkabela Isilayeli wakaamvwa makani aaya. Ciindi eeci Jakobo wakajisi bana balombe bali kkumi ababili. 23Bana ba Leya mbaa, Lubeni mwana wakusaanguna wa Jakobo, Simiyoni, Levi, Juda, Isakaa a Zebuloni. 24Bana ba Lacelo mbaa: Josefa, a Benjamini. 25Bana ba Biliha muzike wa Lacelo mbaa: Dani a Nafutali. 26Bana ba Zilipa muzike wa Leya mbaa: Gadi, a Asya. Aaba mbabana balombe mbaakajisi Jakobo naakali munyika ya Padanalamu.

Izaka mbwaakafwa

27Lino Jakobo wakasika kuli wisi Izaka kubusena butegwa Mamule, kumwi butegwa Kiliyataaba naa Hebuloni, ooko kwakali kukkala ba Abulahamu a Izaka. 28Izaka wakali aamyaka iili mwaanda amakumi aali lusele. 29Nkabela Izaka wakakosoka, wafwa, aboobo wakazikkwa kacembeede kapati, bana bakwe Isau a Jakobo mbabakamuzikka.

Currently Selected:

Matalikilo 35: Tonga96

Highlight

Copy