Matalikilo 38

Makani aa Juda a Tamaa

1Ciindi eeco Juda wakasiya banabokwabo, wakaya kuyookkala a Hila, mwaalumi wakali kuzwa kumunzi wa Adulamu. 2Ooko Juda wakaakubona musimbi mwanaa Syuwa, Mukenani, eelyo wakamukwata. 3Mukaintu ooyo wakamita akuzyala mwana mulombe ooyo Juda ngwakaulika kuti Ela. 4Wakamita alimwi akuzyala mwana mulombe, ngwaakaulika kuti Onani. 5Alimwi wakazyala aumbi mwana mulombe ngwaakaulika kuti Syela. Ciindi Syela naakazyalwa, Juda wakali kukkala ku Kezibu.

6Lino Juda wakakwatila mwanaakwe wakusaanguna, Ela, kuli Tamaa. 7Pele Ela mwanaa Juda wakusaanguna wakali mubi ku Mwami Leza, aboobo Mwami Leza wakakosola buumi bwakwe. 8Juda wakaambila Onani kuti, “Konjila muŋanda yamupati wako, ube aabana muzina lyakwe.” 9Pele Onani wakalizi kuti bana tabakooyooba bakwe, aboobo wanoonga lyoonse naswaangana amukamufu, ulagwisya akusowela ansi lunyungu kutegwa mupati wakwe atajani bana pe. 10Eeci cakali kucita Onani cakabijila Mwami Leza, nkaako wakamujaya awalo. 11Mpoonya Juda wakaambila Tamaa, mukamwana kuti, “Kobweeda kuŋanda yauso koli mukamufu kusikila Syela akomene.” Ncaakaambila oobo nkaambo wakayoowa kuti awalo mwanaakwe Syela inga ulafwa mbuli bwakafwa bapati bakwe. Mbombuboobu Tamaa mbwaakabweeda akuyookkala kwabo.

12Nikwakainda ciindi cili mbocibede mukaintu wa Juda, mwanaa Syuwa, wakafwa. Lino ciindi cakamana dilwe, Juda amweenzinyina Hila Muadulamu bakaya kumunzi wa Timuna, ooko babelesi nkobakali kugela mbelele zya Juda. 13Nkabela umwi muntu wakaambila Tamaa kuti, “Usozyala uya buya ku Timuna kukugela mbelele zyakwe.” 14Amvwe boobo wakasamununa zisani zyabumukamufu, wakasama zimbi akulivumba cisani kumutwe akubusyu, ngooyo waakukkala amanjililo aamunzi wa Enaimu, wakali munzila iiya ku Timuna. Wakalizi kuti lino Syela wakakomena, pele taakwe naakategwa amukwate.

15Lino Juda naakabona mukaintu ooyo, wakayeeya kuti mmwaamu, nkaambo wakalilivumbide kubusyu. 16Mpoonya wakaleya kumbali lyamugwagwa waya kulinguwe. Asike wamwiita wati, “Koza njanda kuti tubonane.” Taakazi kuti ngumukamwana. Mukaintu ooyo wakati “Ino ulandipa nzi?” 17Juda wakati, “Ndiyookutumina kapongo kuzwa kubutanga bwangu.” Mukaintu wakati, “Ncibotu, pele usaangune kundipa cisyomezyo cimwi kotanatumina kapongo.” 18Juda wakabuzya kuti, “Ino ndakupa cisyomezyo nzi?” Mukaintu wakaingula kuti, “Ndipe nweenwe akatambo kayo alimwi amusako wako.” Nkabela wakamupa zintu eezyo. Eelyo bakaswaangana, mpoonya mukaintu wakamita.

19Mpoonya Tamaa wakainka, wakaligwisya cisani ncaakalivumbide kubusyu akusama zisani zyakwe zyabumukamufu.

20Lino Juda wakaakutuma mweenzinyina kuzwa ku Adulamu kuleta kapongo kutegwa azootambule zisyomezyo zyakwe kuzwa kumukaintu, pele mweenzinyina ooyo taakwe naakazoomujana pe. 21Wakabuzya-buzya kubaalumi mbaakajana ooko, wakati, “Ino uli kuli mukaintu uulya wakali kumbali aamugwagwa ku Enaimu?” Pele bakaingula kuti, “Taakwe mukaintu mwaamu wakali kukkala aalya pe.” 22Lino wakainka kuli Juda, waakwaamba kuti, “Taakwe mukaintu mwaamu ngundajana, alimwi baalumi bakooko bati, ‘Taakwe mukaintu mwaamu wakali kukkala nkuko pe.’” 23Mpoonya Juda wakaingula kuti, “Komuleka buyo azitolele limwi zintu ziya nzindakamusiila, nkaambo inga bantu batuseka. Kayi twali mutuminide kapongo aaka, pele toomujana pe.”

24Lino nikwakainda myezi yotatwe, umwi muntu wakaambila Juda kuti, “Mukamwanaako Tamaa wakalalikwa, alimwi uliminsi.” Eelyo Juda wakalailila kuti, “Amukamweete kuno, mukamutente mane afwe.” 25Eelyo nibakali kuya bumuleta, Tamaa wakatuma ijwi kuli wisizyala wati, “Mebo ndakaminsigwa amuntu mukamwini zintu eezyo. Amuzilange mubone naa nzizyani, nweenwe akatambo kayo alimwi amusako ooyo.” 26Lino Juda wakaziziba zintu eezyo, nkabela wakaamba kuti, “Makani aaya ngaaamba mukaintu ooyu ngabwini. Walo uliluleme kwiinda ndime. Ime ndime ndabisya, ndakali kweelede kumukwatya kumwanaangu Syela.” Alimwi taakwe naakoona anguwe pe.

27Lino ciindi cakwe nicakasika kwakajanika kuti wakaminsi bana bamaanga. 28Mukaintu naakali kuminingana kuti atumbuke, umwi mwana wakagwisya kuboko anze, aawo sikutumbusya wakakujata kuboko ooko, wakakwaanga katali kasalala, waamba kuti, “Ooyu ngomutaanzi kuzyalwa.” 29Kumane mwana ooyo wakakubweedezya kuboko ooko, nkabela umwi ooyo nguwakazyalwa kusaanguna. Abone boobo sikutumbusya wakaamba kuti, “Amubone, ino wapola buti yebo!” Nkaako wakamuulika kuti Pelezi. 30Musule awalo umwi ooyu wakazyalwa, kaangidwe antali iisalala kukuboko kwakwe. Wakaulikwa kuti ngu Zelaa.

Currently Selected:

Matalikilo 38: Tonga96

Highlight

Copy