Matalikilo 4

Makani aa Kaini a Abela

1Lino Adamu wakaswaangana amukaintu wakwe Eva, aboobo mukaintu wakamita. Kumane wakazyala mwana mulombe, aawo wakati, “Ndajana mwana mulombe, mukugwasya kwa Mwami Leza. Wakamuulika kuti Kaini.” 2Musule aakooku wakazyala uumbi ngwaakaulika kuti Abela. Abela wakali mweembezi, pele Kaini walo wakali mulimi. 3Bumwi buzuba, Kaini wakaletela Mwami Leza cituulo camicelo yakumuunda njaakatebula. 4Walo Abela wakaleta banyama bataanzi kuzyalwa kuzwa kumatanga aambelele aakwe, wakabajaya akupaizya ku Mwami Leza zituli zibotu kwiinda amafuta. Lino Mwami Leza wakakondwa a Abela, aboobo wakatambula cipaizyo cakwe. 5Pele taakwe naakakondwa a Kaini, nkaako taakatambula cipaizyo cakwe. Abone boobo Kaini wakanyema kapati, busyu bwakwe bwakasyulungana abukali. 6Ndendilyo Mwami Leza naakabuzya Kaini kuti, “Ino unyemena nzi? Usyulunganina nzi? 7Kuti noocita cibotu, nindatambula cipaizyo cako. Pele akaambo kakuti wacita citaluleme, cinyonyoono cilikukkalilide amulyango mbuli munyama wabutambo. Ciyanda kuti cikuvwaampile, pele uleelede kuti yebo uzunde cinyonyoono eeco.”

8Lino Kaini wakaambila musyoonto wakwe Abela kuti, “Atukeendeende.” Nibakaakusika musokwe, Kaini wakabukila musyoonto wakwe wamujaya.

9Lino Mwami Leza wakabuzya Kaini kuti, “Uli kuli musyoonto wako, Abela?” Kaini naakaingula wakati, “Nsizi nkwabede. Sena ndime eeembela musyoonto wangu?” 10Eelyo Mwami Leza wakati, “Wacitila nzi cintu eeci? Ijwi lyabulowa bwamusyoonto wako lilandililila kuzwa munyika. 11Nkaako yebo wasinganyizigwa, alimwi ulatandwa kuzwa mucisi eeci, nkaambo canywa bulowa bwamusyoonto wako mbootila. 12Waakulima zisyango, bulongo tabukakupi pe. Uyooba simutuntuli buyo munyika, tokooyookkalilila abusena bomwe.” 13Amvwe boobo Kaini wakaingula Mwami Leza kuti, “Cisubulo eeci candilemena kapati. 14Lino wanditanda kuzwa mucisi eeci akuzwa kulinduwe, ndiyooba muntu uutakwe munzi, alimwi ndinooingaila buyo. Nkokuti kufumbwa muntu uyoondijana uyoondijaya.” 15Pele Mwami Leza wakaingula wati, “Peepe. Kufumbwa muntu uyookujaya, uyoopegwa cisubulo cipati ziindi zili ciloba kwiinda cisubulo cako.” Aboobo Mwami Leza wakabikka citondezyo ali Kaini cakuzibya kufumbwa uyooswaangana anguwe kuti atamujayi. 16Nkabela Kaini wakazwa kumbele lya Mwami Leza, wakaakukkala kucisi ca Nodi, nkokuti “Bwiingaizi” cili kujwe aamuunda wa Edeni.

Lunyungu lwa Kaini

17Lino Kaini wakaswaangana amukaintu wakwe, aboobo wakazyala mwana mulombe ngwaakaulika kuti Enoki. Kaini wakayaka munzi mupati ngwaakaulika kuti Enoki, mukweendelana azina lya mwanaakwe. 18Enoki wakazyala mwana mulombe wakali kutegwa Iladi, ooyo ngowisi wa Mehujayeli, wisi wa Metusyayeli, wisi wa Lameki. 19Lino Lameki wakakwata bakaintu bobilo, umwi wakali kutegwa Ada, mukazinyina wakali Zila. 20Ada wakazyala Jabali, wakali mweembezi waŋombe, wakasaanguna kukkala mumatente. 21Musyoonto wakwe wakali Jubali, wakasaanguna kuuma kalumbu akulizya nyeele. 22Zila wakazyala Tubalikaini, nguwakasaanguna kufula zibelesyo ziindene-indene zyamukuba alubulo. Mucizi wa Tubalikaini wakali Naama. 23Lino Lameki wakaambila bakaintu bakwe kuti,

“Ada ayebo Zila, nobakaintu bangu, amundiswiilile.

Ndakajaya mwaalumi nkaambo wakanduuma,

mukubusi ooyo ndakamujaya nkaambo wakandicisa.

24Kufumbwa ooyo uyoojaya Kaini

uyoosubulwa ziindi zili ciloba.

Ono ooyo uyoondijaya mebo

uyoosubulwa ziindi zili makumi aali ciloba azili ciloba.”

Balunyungu lwa Seti

25Bweende-bweende Adamu wakaswaangana amukaintu wakwe Eva, wakazyala mwana mulombe. Eelyo Eva wakati, “Leza wandipa mwana mulombe uutitole busena bwa Abela ooyo Kaini ngwaakajaya.” Aboobo wakamuulika kuti Seti. 26Seti wakazyala mwana mulombe ngwaakaulika kuti Enosyi. Eeci nceciindi bantu nibakatalika kwiita zina lya Mwami Leza mukukomba kwabo.

Currently Selected:

Matalikilo 4: Tonga96

Highlight

Copy