Joni 11

Jesu mbwaakabusya Lazalo kubafu

1Kwakali mwaalumi umwi wakali kuciswa, zina wakali Lazalo, wakali kukkala mu Betani. Ooyu ngomunzi waba Maliya a Maata mupati wakwe. ( 2Maliya ooyu ngonguwe wakananika Mwami Jesu amafuta, akupukuta maulu aakwe amasusu. Lazalo wakali kuciswa wakali munyinandumi.) 3Aboobo bacizi bakwe bobilo aaba bakatumya nkkombe kuli Jesu yakuti, “O Mwami, mweenzinyoko ngoyandisya ulaciswa.” 4Pele Jesu naakamvwa majwi aaya wakati, “Kuciswa ooku takuli kwalufu pe. Nkwakuleta bulemu kuli Leza, kutegwa Mwanaa Leza akalemezegwe akaambo kabulwazi oobu.”

5Lino Jesu wakali kumvwana kapati aba Maata amusyoonto wakwe, kubikkilizya a Lazalo. 6Pele naakamvwa kuti Lazalo ulaciswa wakacilikkede kubusena ooko nkwaakabede kwamazuba aambi obilo. 7Naakamana mazuba aaya wakati kuli basikwiiya bakwe, “Atubweede kucisi ca Judiya alimwi.” 8Pele basikwiiya bakati, “O Mwiiyi, lino-lino aawa bantu bakooko bakali kuyanda kukuuma amabwe, sena ubweede alimwi nkukonya?” 9Jesu wakaingula kuti, “Tee buzuba bujisi maoola aali kkumi aabili? Muntu weenda sikati talifumpuli, nkaambo uleenda zuba kalibala. 10Pele ooyo weenda masiku ulalifumpula nkaambo uli mumudima.” 11Naakamana kwaamba boobo wakaambila basikwiiya bakwe kuti, “Lazalo, mweenzuma uloona, ono njakukuti nkamubusye.” 12Basikwiiya bakati kulinguwe, “O Mwami, naa kuti uloona anu ulapona.” 13Lino Jesu wakali kwaamba koona kwalufu, pele balo bakali kuyeeya koona kwaŋonzi. 14Mpoonya Jesu wakakapwaya wati, “Lazalo wafwa. 15Pele nkaambo kandinywe ndakkomana kuti mebo nsiindakaliko naakafwa, ono muyakusyoma. Atweende.” 16Mpoonya aawo Tomasi, uutegwa ngwamayanga, wakaambila basikwiiyanyina kuti, “Atuunke aswebo kutegwa tukafwe aawe.”

17Ciindi Jesu naakasika, wakajana kuti kwakaindide mazuba one Lazalo kazikkidwe kale. 18Ku Betani kwakali afwiifwi aku Jelusalemu, wakali musinzo mufwiifwi buyo. 19Nkabela bantu banji bakalizide kudilwe kuzoolizya ba Maata a Maliya akaambo kalufu lwamunyinandumi. 20Maata naakamvwa kuti Jesu wasika, wakainka kuyoomucingauzya, Maliya wakalikkede muŋanda. 21Mpoonya Maata wakaambila Jesu kuti, “O Mwami, kuti nookaliko, mwanookwesu naatakafwa. 22Kwalo niciba ciindi cino ndizi kuti kufumbwa ncotikumbile kuli Leza, ulakonzya kukupa.” 23Jesu wakati kulinguwe, “Munyinandumaako ulabuka alimwi.” 24Maata wakaingula kuti, “Ndizi kuti uyoobuka alimwi mububuke bwabafu, mubuzuba bwamamanino.” 25Jesu wakati kulinguwe, “Uubusya bafu akubapa buumi ndime. Ooyo uusyoma ndime, nikuba kuti wafwa, inga unooli muumi. 26Awalo uupona akusyoma mulindime, takooyoofwa pe. Sena ulasyoma oobo?” 27Maata wakati, “Iiyi, O Mwami, ndilasyoma kuti nduwe Munanike, Mwanaa Leza, ooyo uuyooboola ansi aano.”

28Naakamana kwaamba boobo, Maata wakainka kuyooita Maliya, muce wakwe, wamuvwiila-vwiila kuti, “Mwiiyi mpali wasika, ulakwiita.” 29Naakamvwa boobo, Maliya wakanyamuka, akufwambaanina kuli Jesu. ( 30Aawo Jesu katanasika mumunzi pe, wakacili kunze aamunzi, kubusena nkwaakamujanina Maata.) 31Lino bantu aabo bakali aa Maliya muŋanda kumulilausya, nibakabona nkwaakanyamuka kuzwida anze, bakamutobela nkaambo bakayeeya kuti uya kucuumbwe kukulila.

32Lino Maliya naakasika kubusena ooko kwakali Jesu, naakamubona, wakaliwaala kumaulu aa Jesu akwaamba kuti, “O Mwami, kuti nookaliko, mwanookwesu naatakafwa pe.” 33Jesu naakamubona ulalila, wakapenga kapati mumoyo, akweetela. 34Mpoonya wakati, “Ino nkuli kucuumbwe nkomumulazikide?” Bakati, “Mwami, koza ubone.” 35Jesu wakalila. 36Aboobo bantu bakati, “Ino bali kumvwana!”

37Pele bamwi babo bakaamba kuti, “Sena ooyu muntu wakabonya moofu mwati naakakonzya kucita kuti ooyu muntu atafwi?” 38Jesu, kapengede mumoyo akweetela, wakasika kucuumbwe, cakali campangala, cakasinkidwe abbwe. 39Jesu wakabaambila kuti, “Muligwisye bbwe.” Eelyo Maata, mucizi wamufu, wakati kuli Jesu, “O Mwami, ecino ciindi ulanunka, nkaambo ono kwiindide mazuba one kazikkidwe.” 40Jesu wakamwiingula kuti, “Tee kayi ndakwaambila kale kuti, kuti naa wandisyoma ulakonzya kubona bulemu bwa Leza?” 41Aboobo bbwe bakaligwisya. Mpoonya Jesu wakalungumana kujulu akuti, “Taata, ndakulumba nkaambo kakuti wandimvwa. 42Kwalo ndilizi kuti lyoonse ulandimvwa, pele ndaamba boobu akaambo kabantu aaba bali waano kutegwa basyome kuti nduwe wakandituma.” 43Naakamana kwaamba boobu, wakapozomoka ajwi pati wakati, “Lazalo, kozwa.” 44Eelyo ooyo wakafwide wakazwa, kaputaidwe, kumaulu akumaboko azisani ziputailwa bafu, akwalo kumeso kaputaidwe acisani. Jesu wakati kulimbabo, “Amumuzambulule aende.”

Mbobakakanza kujaya Jesu

(Mateyo 26.1-5; Maako 14.1-2; Luka 22.1-2)

45Bunji bwa bantu aabo bakasindikilide Maliya mucizi wa Lazalo nibakabona cakacita Jesu, bakamusyoma. 46Pele bamwi babo bakainka kuyooambila Bafalisi ncaakacita. 47Nkabela bapaizi basilutwe a Bafalisi bakabungana muli cabo akwaamba kuti, “Ino tucite buti? Nkaambo muntu ooyu wacita zitondezyo zyanguzu zinji! 48Kuti tumulekele kaciya bucita boobu, bantu boonse balatalika kumusyoma, eelyo Baloma balaboola akuzoomwaya busena oobu busalala alimwi amusyobo wesu.”

49Lino umwi wabo, uutegwa Kayafa, wakali ngomupaizi mupati mwaka ooyo, wakati kulimbabo, “Ani muzi nzi nywebo? 50Tamuzi nikuba kumvwisya kuti ncibotu kuti muntu omwe afwide banamaleya kwiinda kuti musyobo woonse ufwidilile.” 51Eeci ncaakaamba tiicakazwa mulinguwe lwakwe mwini pe, pele mbwaakali ngomupaizi mupati mumwaka ooyo, wakasinsima makani aakuti Jesu uleelede kufwida musyobo wa Bajuda. 52Kutali buyo kufwida musyobo ooyo ulikke, pele kuti ayobolole akubungika antoomwe kulinguwe boonse bana ba Leza bamwaikide munyika mboizulwa.

53Eelyo kuzwa mubuzuba oobo bakakanza kumujaya. 54Akaambo kaako Jesu taakwe naakacili kweenda antangalala mucisi ca Judiya, pele kuzwa ooko wakainka kunyika yakumbali aankanda, kumunzi wa Efulemu. Ooko nkwaakaakukkala abasikwiiya bakwe.

55Lino Pobwe lya Bajuda lya Kwiindilila lyakali aafwiifwi, nkabela bantu banji bazwa mumasi aandeene-andeene bakalibeelezya kuunka ku Jelusalemu kutegwa bakalisalazye kweendelana aciyanza ca Bajuda. 56Bantu bakali kulangaula Jesu ooko, akubuzyanya-buzyanya nibakali kwiimaima muŋanda ya Leza kuti, “Sena muyeeya kuti takoosika kupobwe eeli?” 57Abalo bapaizi basilutwe a Bafalisi bakapede malailile aakuti kufumbwa muntu uuzi nkwabede abazibye kutegwa bamujate.

Currently Selected:

Joni 11: Tonga96

Highlight

Copy