Joni 18

Jesu mbwaakajatwa

(Mateyo 26.47-56; Maako 14.43-50; Luka 22.47-53)

1Naakamana kukomba ooku, Jesu wakainka abasikwiiya bakwe, wazubuka kalonga ka Kidiloni. Ooko kwakali muunda, nkabela Jesu abasikwiiya bakwe bakanjila mumuunda ooyo. 2Lino awalo Judasi wakamwaaba, wakalibuzi busena oobo nkaambo Jesu lyoonse nkwaakali kubunganina abasikwiiya bakwe. 3Aboobo Judasi wakasika kubusena oobo kajisi ampi yabasilumamba abalindizi mbaakapegwa kuzwa kubapaizi basilutwe a Bafalisi. Bakalijisi malambe, minzenge, azilwanyo. 4Lino Jesu wakalizi cakeelede kumusikila, aboobo wakainka akuyoobabuzya kuti, “Ino nguni ngomuyandaula?” 5Bakati, “Tuyanda Jesu waku Nazaleta.” Wakati kulimbabo, “Ndime.” Awalo Judasi ooyo wakamwaaba wakaliimvwi antoomwe ambabo. 6Nkabela Jesu naakabaambila kuti, “Ndime,” bakaswena musule buniini, mpoonya bakawida ansi. 7Jesu wakababuzya alwabili kuti, “Ino nguni ngomuyandaula?” Alimwi bakaingula kuti, “Ngu Jesu waku Nazaleta.” 8Jesu wakati, “Ndamwaambila kale kuti ndime. Ono naa muyanda ndime amuleke aaba balaandime bazwe kusaanguna.” 9Eeci ncakaamba cakeendelana a Malembe aati, “Taakwe naba omwe wabaabo mbookandipa ngundakasweekelwa pe.”

10Mpoonya aawo Saimoni Pita mbwaakajisi panga, wakalisomona akukwezula kutwi kwalulyo kwamuzike wamupaizi mupati. Muzike ooyo wakali Malikusi. 11Mpawo Jesu wakakalalila Pita kuti, “Kobweedezya panga lyako mumukutu walyo. Sena uyeeya kuti nsyeelede kunywida munkomeki yamapenzi eeyi njaandipa Taata?”

Jesu mbwaakabetekwa a Anasi

12Aboobo basilumamba aabo amupati wabo, alimwi abalindizi bakatumwa abapati, bakajata Jesu akumwaanga. 13Bakasaanguna kumutola kuli Anasi, mukwe wa Kayafa wakali ngomupaizi mupati mumwaka ooyo. 14Kayafa ngonguwe ooyo wakaambilide beenzinyina kuti kuleelede kuti muntu omwe afwide banamaleya.

Pita mbwaakatama Jesu

(Mateyo 26.69-70; Maako 14.66-68; Luka 22.55-57)

15Saimoni Pita alimwi aumwi sikwiiya bakali kutobela ooko nkubakamutola Jesu. Nkabela umwi sikwiiya ooyo wakaakunjililizya antoomwe a Jesu muŋanda yamupaizi mupati nkaambo wakalizizilwe kumupaizi mupati. 16Pele Pita wakacaala anze uliimvwi kumanjililo. Mpoonya sikwiiya wakazizilwe kumupaizi mupati wakainka akuyookumbila musimbi wakali kulindila mulyango kuti azumizye Pita kunjila mukati, eelyo wakamuzumizya. 17Nikuba boobo musimbi ooyo wakabuzya Pita kuti, “Mwati yebo toli umwi wabasikwiiya bamuntu ooyu?” Pita wakati, “Peepe, tandili umwi wabo.” 18Lino bazike abamwi balupati-pati bakakutwide mulilo wakuyota, nkaambo kwakali mpeyo. Awalo Pita wakaliimvwi ambabo.

Jesu mbwaakabetekwa amupaizi mupati

(Mateyo 26.59-66; Maako 14.55-64; Luka 22.66-71)

19Kuŋanda ooko mupaizi mupati wakatalika kubuzya-buzya Jesu zyabasikwiiya bakwe azyanjiisyo zyakwe. 20Jesu wakamwiingula kuti, “Ndakali kwiisya bantu antangalala. Lyoonse ndakali kwiisya muzikombelo amuŋanda ya Leza oomo mobabunganina bantu. Taakwe ncindakali kwaambila kumbali pe. 21Ino undibuzizya nzi? Kobuzya aabo bakali kundimvwa mbuli mbundakali kwaamba kulimbabo, nkaambo balo balizi nzindakali kwiisya.” 22Naakamana kwaamba boobu, umwi wabasilumamba wakauma Jesu lubayi, akwaamba kuti, “Sena oobo yebo mboelede kwiingula mupaizi mupati?” 23Jesu wakati, “Anooli ndabisya, kobwaamba bubi bwangu, pele kuti ndaamba ciluzi, ino unduumina nzi?”

24Mpawo Anasi wakatumina Jesu kaangidwe kuli Kayafa, mupaizi mupati.

Pita mbwaakatama Jesu alimwi

(Mateyo 26.71-75; Maako 14.69-72; Luka 22.58-62)

25Lino Pita wakaciliimvwi amulilo kayota. Bakati kulinguwe, “Sena yebo toli uumwi wabasikwiiya bakwe?” Walo wakatama akuti, “Peepe, nsili uumwi wabo pe.” 26Umwi wabazike bamupaizi mupati, wakali musazinyina amuntu ooyo ngwaakakoswede kutwi Pita, wakamubuzya kuti, “Sena yebo nsiindakubwene sunu okuya kumuunda koli antoomwe amuntu uulya?” 27Alimwi Pita wakatama. Mpoonya-mpoonya aawo mukombwe wakalila.

Jesu mbwaakabetekwa a Pilato

(Mateyo 27.1-2, 11-14; Maako 15.1-5; Luka 23.1-5)

28Kuzwa kuli Kayafa Jesu bakamutola kuŋanda ya Pilato, mweendelezi wakazwa ku Loma. Cakali cifumo-fumo, aboobo bapati ba Bajuda tiibakayanda kunjila muŋanda yabbetekelo nkaambo kakuyoowa kuti balalisofwaazya lwabo beni banjila. Nkaambo bakali kuyanda kulya Pobwe lya Kwiindilila. 29Eelyo Pilato wakazwida anze akubuzya kuti, “Ino mulandu nzi ngumwapa muntu ooyu?” 30Bakamwiingula kuti, “Muntu ooyu naatali mucita zibi, nitwatamweeta kulinduwe.” 31Pilato wakati kulimbabo, “Amumutole nywebo nobeni mukamubeteke kweendelana a Milawo yanu.” Bajuda bakati, “Tatuzumizigwi a Milawo yesu kuti tukosole mulandu walufu lwamuntu.” 32Zyakacitika oobo kweendelana amajwi ngaakaamba Jesu aazyalufu lwakwe.

33Pilato wakanjila alimwi muŋanda yabbetekelo, wakaita Jesu akumubuzya kuti, “Sena nduwe Mwami wa Bajuda?” 34Jesu wakamwiingula kuti, “Sena makani aaya nduwe oolyaambila naa kuli bakwaambila boobo akaambo kangu?” 35Pilato wakati, “Inga ndaba Mujuda na? Bantu bamusyobo wako antoomwe abapaizi basilutwe mbabakuleta kulindime, ino wakacita nzi?” 36Jesu wakati, “Bwami bwangu tabuli bwaansi aano. Kuti bwamwi bwangu nibwali bwaansi, batwanga bangu nibalwana kutegwa nditaabwi kubapati ba Bajuda. Pele lino bwami bwangu tabuli bwaansi aano pe.” 37Mpoonya Pilato wakati, “Eena ani uli mwami?” Jesu wakati, “Uliluzi kundaamba kuti ndimwami. Nkankakaako ncendakazida ansi aano alimwi ncendakazyalilwa, kutegwa ndizoolungulule zyabwini, aboobo kufumbwa muntu uuzi zyabwini ulandiswiilila.” 38Pilato wakabuzya kuti, “Ino bwini oobo mboamba ninzi?”

Jesu mbwaakapegwa mulandu walufu

(Mateyo 27.15-31; Maako 15.6-20; Luka 23.13-25)

Naakamana kwaamba boobu, wakazwida anze alimwi akuyooambila bapati ba Bajuda kuti, “Tajisi mulandu muntu ooyu pe. 39Pele mujisi cilengwa cakuti ndeelede kumwaangunwida mwaange omwe ciindi ca Pobwe lya Kwiindilila. Sena mulayanda kuti ndimwaangunwide ooyu Mwami wa Bajuda?” 40Pele bantu bakavutuka bati, “Kotwaangunwida Balabbasi, kutali muntu ooyu pe!” Balabbasi ooyo wakali mubbi.

Currently Selected:

Joni 18: Tonga96

Highlight

Copy