Bapaizi 17
17
Malailile aamba zyabulowa
1Lino Mwami Leza wakaambila Mozesi kuti, 2“Ambila Aloni abana bakwe alimwi a Baisilayeli malailile aaya. 3Muisilayeli tazumizidwe kupaizya ŋombe niiba mbelele naa mpongo muzivuka naaba anze lyazivuka, 4pele ukonzya buyo kupaizya kumulyango watente lyakuswaanganina, kuti wacita oobo waba aamulandu wabujayi. Nkaambo watila bulowa, aboobo takategwa ngumwi wabantu ba Leza. 5Eeci caamba kuti Baisilayeli balakonzya kuleta zipaizyo ku Mwami Leza nzyobakali kujaila anze. Nkabela banoozileta kubapaizi kumulyango watente lyakuswaanganina nkobayoozijaila kuti zibe zipaizyo zyalumvwano ku Mwami Leza. 6Mupaizi unoosansaila bulowa acipaililo, kumulyango watente lyakuswaanganina, wamana uyootenta mafuta abe bweema bubotelezya ku Mwami Leza. 7Aboobo Baisilayeli batakaipaizizyi limbi mituni njobalisofwaazya. Baleelede kutobela mulawo ooyu kwamazyalani oonse.
8“Kufumbwa Muisilayeli naba wamasi uukkala ambabo uupaizya cipaizyo cakutenta niciba cipaizyo cimbi ku Mwami Leza 9kubusena bumbi kutali kumulyango watente lyakuswaanganina, ooyo tacinooyoobalwi limbi muciinga cabantu ba Leza.
10“Alimwi kuti naa Muisilayeli naba wamasi uukkala ambabo walya bulowa, Leza uyoomunyemena, tacinooyooli wakwe pe. 11Nkaambo kakuti buumi bwacintu buli mubulowa, ncenciceeco Leza ncaakaambila kuti mutuuzye bulowa acipaililo mukugwisya zinyonyoono zyanu, 12nkaambo tee kayi mbulowa bununuzya buumi bwabantu. Nkankakaako Leza ncaakaambila Baisilayeli abamasi bakkala akati kabo kuti taakwe naba umwi wabo weelede kulya nyama iijisi bulowa.
13“Alimwi kuti naa Muisilayeli naba wamasi uukkala ambabo waca munyama naa muyuni uukonzya kuligwa mumulawo, uleelede kutila bulowa ansi akubuvwikkila. 14Nkaambo kakuti buumi bwabanyama buli mubulowa. Aboobo Mwami Leza wakaambila Baisilayeli kuti tabeelede kulya nyama iijisi bulowa pe. Kufumbwa muntu wiilya tacili wa Leza pe.
15“Kufumbwa Muisilayeli naba wamasi uukkala ambabo, walya munyama walifwida naba walumwa, muntu ooyo uleelede kusanzya zisani zyakwe alwakwe mwini, kwamana unoosofweede kusikila kumangolezya. 16Kuti naa taciti oobo, uyooba aamulandu.”
Currently Selected:
Bapaizi 17: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.