Bapaizi 24
24
Kubamba malambe
(Kulonga 27.20-21)
1Lino Mwami Leza wakaambila Mozesi kuti, 2“Lailila Baisilayeli kuti bakuletele mungwimba mubotu waoliva wamumalambe mutente oomo Leza mwaswaanganina abantu bakwe, kutegwa kaayaka lyoonse. 3Ciindi coonse camangolezya Aloni unooadomeka kaayaka mane buce, kubusena busalalisya ooko kumbele lya Mwami Leza anze lyamasani aacisitilizyo cili kumbele lyabbokesi lyacizuminano. Malailile aaya aleelede kubambwa kumazyalani oonse aaciza. 4Aloni ngunoobamba malambe aacikkazikilo cawo cangolida iini-ini, abone kuti alayaka lyoonse kumbele lya Mwami Leza.
Cinkwa cipegwa ku Mwami Leza
5“Amutole busu bunante, mupange zinkwa zili kkumi azibili, nsangwa zyobilo kucinkwa comwe-comwe. 6Lino zinkwa eezyo amuzibikke mumilongo yobilo, mulongo omwe zili cisambomwe atebule lizilulwidwe ngolida iini-ini lili kumbele lya Mwami Leza. 7Kumulongo omwe-omwe ubikke tununkilizyo kuti cibe ciibalusyo cakutenta ku Mwami Leza. 8Sabata a Sabata cinkwa ceelede kubikkwa kumbele lya Mwami Leza. Ooyu unooli mulimo wa Baisilayeli lyoonse. 9Cinkwa eeco ciyooba ca Aloni abana bakwe balombe. Bayoocilida mubusena busalala, nkaambo kakuti cilyo eeci ncipaanzi cisalala cipegwa ku Mwami Leza kuti cibe cabapaizi.”
Zyakubeteka buluzi
10Kwakali muntu wakajisi banyina Baisilayeli, wisi wakali Muijipiti. Ooyu wakalwana a Muisilayelinyina muzivuka. 11Kabalwana wakatalika kusampaula zina lya Mwami Leza akusinganya. Nkabela bakamuleta kuli Mozesi. Banyina bakali kwiitwa kuti Syelomiti, bakali mwanaa Dibuli waciinga ca Dani. 12Bakamwaanga kuti Leza azoobaambile cakucita.
13Lino Mwami Leza wakaambila Mozesi kuti, 14“Mugwisye musampauzi ooyo kunze lyazivuka. Aabo boonse bakamumvwa kasinganya baleelede kumubikka maanza aabo amutwe wakwe, kutondezya kuti uli aamulandu, nkabela bantu boonse bamumunzi bamuume mabwe, afwe. 15Kwamana waambile Baisilayeli kuti kufumbwa muntu uusampaula Mwami Leza wakwe ulasubulwa bweelede, ulajaigwa. 16Ncobeni kufumbwa Muisilayeli naba wamasi uukkala mucisi ca Isilayeli, uusampaula zina lya Mwami Leza uyooumwa mabwe ababuleya, kusikila afwe.
17“Awalo uujaya muntunyina uleelede kujaigwa. 18Alimwi kufumbwa uujaya munyama wamuntu uumbi, uleelede kumujosezya uumbi. Cipati ncakuti buumi bubbadelwa buuminyina.
19“Kuti naa muntu umwi wacisa muntu, awalo acisigwe mbubonya. Naa wamukula lino awalo akulwe. Eeco ncaacita mweenzinyina nceceelede kucitwa akulinguwe. 20Naa wamutyola, awalo atyolwe. Naa wamugwisya liso, awalo agwisigwe. 21Uujaya munyama apilusizye, pele uujaya muntu, awalo ajaigwe. 22Ooyu mulawo nguwanu Nobaisilayeli antoomwe abamasi mbomukkala limwi. Ndime Mwami Leza wanu.”
23Mozesi mbwaakamanina buyo kwaamba, bakamugwisya anze muntu ooyo wakasinganya akumuuma mabwe, wafwa. Mbombuboobu Baisilayeli mbubakacita cakaamba Mwami Leza kuli Mozesi.
Currently Selected:
Bapaizi 24: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.