Bapaizi 3
3
Zipaizyo zyalumvwano
1“Lino kuti muntu wapa cipaizyo calumvwano ku Mwami Leza, cipaizyo cakwe cibe campwizi naa poho, cibe citakwe kampenda. 2Muntu ooyo abikke janza lyakwe amutwe waŋombe eeyo, wamana aijaile amulyango watente lyakuswaanganina. Eelyo bana ba Aloni bapaizi bakasansaile bulowa kumabazu oonse one aacipaililo. 3Baleelede kupa ku Mwami Leza zipaizyo zyakutenta eezi, mafuta oonse aavumbilide zyamukati, 4ansa amafuta aazyo amafuta oonse aali amuni. 5Eelyo bana ba Aloni bapaizi bakazitente zyoonse acipaililo antoomwe azipaizyo zimwi zyakutenta. Zibe zipaizyo zyabwema bubotelezya ku Mwami Leza.
6“Alimwi kuti naa mbelele niiba mpongo yabelesegwa kucipaizyo calumvwano, ilakonzya kuba sijembwe naa mpwizi, pele ileelede kuba iitakwe kampenda. 7Kuti muntu wapa mbelele, mbuli cipaizyo ailete kumbele lya Mwami Leza, 8akabikke janza lyakwe amutwe wayo, wamana aijaile kumbele lyatente lyakuswaanganina. Lino bana ba Aloni bapaizi bakasansaile bulowa kumabazu oonse one aacipaililo. 9Baleelede kupa ku Mwami Leza zipaizyo zyakutenta eezi, mafuta, amafuta aamucila watendwa kuzwa kubukome, alimwi amafuta oonse aali muli zyamukati, 10insa amafuta aazyo, amafuta oonse aali amuni. 11Eelyo mupaizi uyoozitenta acipaililo kuti cibe cipaizyo cacakulya ku Mwami Leza.
12“Kuti naa muntu wapa mpongo, 13akabikke janza lyakwe amutwe wayo akwiijaila kumbele lyatente lyakuswaanganina, wamana bapaizi bakasansaile bulowa bwayo kumabazu oonse one aacipaililo. 14Baleelede kupa ku Mwami Leza zipaizyo zyakutenta eezi, mafuta oonse aazyamukati, 15ansa amafuta aazyo, amafuta oonse aali amuni. 16Mupaizi akazitente zyoonse acipaililo kuti cibe cipaizyo cacakulya cibotelezya. Iiyi mafuta oonse ngaa Leza. 17Taakwe Muisilayeli weelede kulya mafuta nibuba bulowa, ooyu ngomulawo weelede kubambwa lyoonse kwamazyalani oonse kufumbwa nkobayookkala.”
Currently Selected:
Bapaizi 3: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.