Luka 13

Kufutatila zinyonyono kuti utafwi

1Ciindi eeco kwakali bamwi bantu bakaambila Jesu kaambo kabantu bamwi baku Galilii aabo mweendelezi Pilato mbaakajaya akuvwelaanya bulowa azipaizyo zyabo kuli Leza. 2Pele Jesu wakabaingula kuti, “Sena nywebo muyeeya kuti bantu aabo bakali basizinyonyoono kwiinda bantu boonse bakucisi ca Galilii ncibakajaigwa boobo? 3Peepe! Ndamwaambila kuti mwateempa akufutatila nzila zyanu zibi muyoofwa nyoonse. 4Ino kayi bantu baya baku Siloamu bali kkumi alusele bakafwa ciindi ŋanda yamujulu niyakabawida? Sena muyeeya kuti bakali kubisya kwiinda bantu boonse bakali kukkala mu Jelusalemu? 5Peepe! Ndamwaambila kuti mwateempa akufutatila nzila zyanu zibi muyoofwa anywebo mbubonya buyo.”

Cikozyanyo camukuyu uutazyali micelo

6Alimwi Jesu wakabaambila cikozyanyo eeci wakati, “Umwi muntu wakajisi mukuyu wakasyangidwe mumuunda wakwe. Bumwi buzuba wakainka kuti akalange nkuyu, pele taakwe naakazijana. 7Eelyo wakaambila mulimi wamuunda wakwe kuti, ‘Langa, lino yaba myaka yotatwe nkeboola kuyandaula nkuyu kumukuyu ooyu, pele nsizijani. Ugonke, nkaambo nzi nuutinoondisampwida bulongo bwamuunda?’ 8Pele mulimi wakamuvuwa kuti, ‘Omwami kouleka kwamwaka uuno, ndisole kuusidila-sidila mumbali, ndamana ndibikke mbolezi, alimwi nduulimine kabotu. 9Kuti naa ukazyale micelo mwakali inga cabota, pele kuti utakazyali, ati uyoougonka buyo.’”

Jesu mbwaakaponya mukaintu mulema

10Lino Jesu wakali kwiisya mucikombelo mu Buzuba bumwi bwa Kulyookezya butegwa Sabata. 11Mucikombelo oomo mwakali mukaintu, wakali kupenzegwa muuya mubi kwamyaka iili kkumi alusele. Mukaintu ooyo wakoongomene musana, taakali kukonzya kunuka kabotu pe. 12Jesu naakamubona wakamwaambila kuti, “Baama, waangununwa kubulwazi bwako!” 13Wakabikka maanza aakwe alinguwe. Ndilyonya buyo musana wamukaintu ooyo wakoololoka. Nkaako mukaintu ooyo wakalumbaizya Leza.

14Pele mupati wacikombelo wakanyema nkaambo Jesu wakaponya muntu mubuzuba oobo. Wakati kubantu, “Kuli mazuba aali cisambomwe ngotweelede kuti tubeleke milimo. Kamuboola mumazuba aayo kuti kamuponyezegwa, pele mutabooli mu Buzuba bwa Sabata pe!”

15Mpoonya Mwami wakamuvuwa kuti, “Nywebo nobasikuupaupa ameso! Ani nguni wanu uutajulili musune naa mbongolo kuzwa mucimpati, akuzitola kukucela akuyoozinywisya maanzi mubuzuba oobu? 16Sena ooyu mukaintu mwana wa Abulahamu wakaangidwe a Saatani myaka iili kkumi alusele teelede kuti aangununwe mubuzuba oobu?” 17Jesu naakamba eeci, boonse basinkondonyina bakausa kapati, pele bantu bakabotelwa kapati kuzintu zyoonse nzyaakacita.

Cikozyanyo cakaseke kamasitadi

(Mateyo 13.31-32; Maako 4.30-32)

18Lino Jesu wakaamba kuti, “Ino bwami bwa Leza buli mbuli nzi? Alimwi inga ndabukozyanya aanzi? 19Bulikozyenye akaseke kamasitadi kalo kali nkaniini nkaakabweza muntu akusyanga mumuunda wakwe, kakakomena akuba cisyango cipati, mane bayuni bakaboola akuyaka ziteente mumitabi yaco.”

Cikozyanyo camimena

(Mateyo 13.33)

20Alimwi Jesu wakati, “Ino bwami bwa Leza ndabukozyanya aanzi? 21Buli mbuli mimena mukaintu njaakavwela muzisuwo zyotatwe zyabusu bwamaila akwiisisa, mane kusikila mulwi woonse wafufumuka.”

Mulyango uusyanikide

(Mateyo 7.13-14, 21-23)

22Jesu wakabweza lweendo lwakuya ku Jelusalemu. Wakainda muminzi mipati aminiini, kaya bwiisya. 23Umwi muntu wakamubuzya kuti, “Omwami, sena aabo bayoofutulwa banooli bace buyo?”

Mpoonya Jesu wakati kulimbabo, 24“Amukakatisye kunjila mumulyango uusyanikide, nkaambo ndamwaambila kuti bantu banji bayooyandisya kuti banjile, pele tabakooyookonzya pe. 25Mukamwini ŋanda aakunyamuka akujala mulyango nomutikatalike kwiima aanze akukonkomona kumulyango kamuti, ‘Mwami, tujulile!’ Pele walo uyoomwiingula kuti, ‘Nsizi nkomwazwida.’ 26Mpoonya aawo muyootalika kwaamba kuti, ‘Swebo twakali kulya akunywa antoomwe anduwe, alimwi wakali kwiisya muminzi yesu!’ 27Pele alimwi uyoomwiingula kuti, ‘Nsizi nkomwazwida pe. Amuzwe aawa nywebo nyoonse nobasimucita zibi.’ 28Eelyo muyoolila akuluma ntwino mukuusa mwaakubona Abulahamu, Izaka, Jakobo abasinsimi boonse kabali mubwami bwa Leza, pele nywebo kamutandidwe anze! 29Bantu bayooboola kuzwa kujwe akumbo, akuzwa kunyika akumusanza, akukkala akulya mubwami bwa Leza. 30Lino ncobeni nkobali aabo basyaalizi bayooba bataanzi, abataanzi bayooba basyaalizi.”

Jesu mbwaakali kuyandisya munzi wa Jelusalemu

(Mateyo 23.37-39)

31Ciindi eeco nciconya bamwi Bafalisi bakasika kuli Jesu akuti kulinguwe, “Kozwa kuno uye kulubazu lumbi, nkaambo mwami Helodi uyanda kuti akujaye.”

32Pele Jesu wakabaingula kuti, “Kamuya mukamwaambile mwaaba ooyo kuti ‘Mebo ndicigwisya myuuya mibi mubantu alimwi ndiciponya sunu ajuunza, pele mubuzuba bwatatu ndiyoomanizya mulimo wangu.’ 33Nikuba boobo ndileelede kubweza lweendo lwangu lwasunu ajuunza alimwi azona, nkaambo tacikonzeki kuti musinsimi akajailwe kumbi kutali ku Jelusalemu.

34“Akaka Jelusalemu, Jelusalemu, oojaya basinsimi akubauma mabwe aabo Leza mbatuma kulinduwe! Kanji-kanji ndalikuyanda kubunganya bantu bako antoomwe mbubonya, mbuli nkuku mbwiifukatila bana bayo mumababa, pele yebo wakakaka! 35Bona ŋanda njokombela Leza lyaba tongo. Alimwi ndakwaambila kuti taakwe notikandibone limbi mane cikasike ciindi eeco ncotikaambe kuti, ‘Ulilelekedwe uuboola muzina lya Mwami Leza.’”

Currently Selected:

Luka 13: Tonga96

Highlight

Copy