Luka 21

Cipo camukamufu

(Mateyo 12.41-44)

1Jesu naakalanga-langa, wakabona bantu bavubi kababikka mali muciyobwedo. 2Alimwi wakabona mukamfu umwi wakali mucete kapati kabikka tuli tobilo twamukuba. 3Mpoonya wakati, “Ndamulwiida kuti ooyu mukamufu mucete wapa kunji kwiinda boonse babikka aaba. 4Nkaambo bamwi babikka tuniini buyo kuzwa kubuvubi bwabo bunji. Pele walo mukamufu mucete, wamaninizya kupa oonse mali ngaajisi, ngaali kuponena mpawo.”

Jesu mbwaakaamba zyakumwaigwa kwaŋanda ya Leza

(Mateyo 24.1-2; Maako 13.1-2)

5Bamwi bantu bakali kwaambaula makani aaŋanda ya Leza, mbuli mbwiiyakidwe amabwe mabotu aaebeka, azipo zigambya zyakali kupegwa mukulemeka Leza. Jesu wakati, 6“Zyoonse eezi nzyomubwene, ciyoosika ciindi nikuyoobula bbwe niliba lyomwe liyoosyaala atala aabbwenyina litakoyookolomonwa pe.”

Makatazyo amapenzi

(Mateyo 24.3-14; Maako 13.3-13)

7Eelyo bakabuzya Jesu kuti, “Mwiiyi, ino zintu eezi ziyoocitika lili? Alimwi ncinzi ciyooba citondezyo caciindi noziyoocitika zintu eezi zyoonse?”

8Nkabela Jesu wakabaambila kuti, “Amucenjele kuti mutacengwi. Nkaambo bantu banji bayooboola muzina lyangu kabati, ‘Ndendime nguwe!’ akuti ‘Ciindi casika!’ Mutakabatobeli pe. 9Mutakayoowi mwaakumvwa makani aankondo anzwanga munyika. Eezi zintu zileelede kuti zisaangune kucitika, pele tazyaambi kuti mamanino ali aafwiifwi pe.”

10Jesu wakati, “Cisi ciyoolwana acisinyina, abwalo bwami abwaminyina. 11Kuyooba kuzungaana kwanyika amumasena aandeene, alimwi kuyooba nzala amalwazi koonse koonse, kuyooba zintu ziyoosya, azitondezyo zipati kuzwa kujulu. 12Pele zyoonse eezi kazitana ba, muyooangwa akupenzegwa, muyootolwa kukubetekwa muzikombelo akuyoobikkwa muntolongo, muyootolwa kubami akubeendelezi akaambo kangu.

13“Lino eeci ciyooba nceciindi canu cakwaambilizya Makani Mabotu. 14Mutalikatazyi mumiyeeyo kuti ino tukalikwabilile buti? 15Nkaambo ndiyoomupa majwi alimwi abusongo kutegwa kukabule aomwe wabasinkondonyoko uyookonzya kukazya nikuba kutacizumina ncomuyooamba. 16Muyooabwa abazyali banu, bana bokwanu, basazinyoko boonse, beenzinyoko, alimwi bamwi banu bayoojaigwa. 17Muyoosulaikwa abantu boonse akaambo kangu. 18Pele nikubaboobo taakwe nikaba komwe kasusu kayoosweeka kuzwa kumitwe yanu. 19Amujatisisye muzyandamane, nkaambo oobu mbomuyoolivuna nobeni.

Jesu mbwaakaamba kumwaigwa kwa Jelusalemu

(Mateyo 24.15-21; Maako 13.14-19)

20“Mwaakubona kuti munzi wa Jelusalemu wazingulukwa ampi zyabasilumamba, mukazibe kuti ciindi cakumwaigwa kwawo caswena aafwiifwi. 21Nkabela aabo bali mucisi ca Judiya baleelede kutijila kumalundu, abalo bali mumunzi beelede kuusiya, bali mumyuunda batakabweedi kuyoonjila mumunzi. 22Nkaambo aaya ngangawo ‘Mazuba aa Cisubulo,’ kuti cilembedwe mu Malembe cibe masimpe. 23Kuyooba kupenga kapati kuyoosya kubakaintu baminsi abaabo banyonsya kumazuba aayo! Kupenga kuyoosya kuyoosika kunyika eeyi, acalo cisubulo ca Leza ciyoosikila bantu Baisilayeli. 24Bamwi bayooyaswa amapanga akujaigwa, alimwi bamwi bayootolwa mubuzike muzisi zyoonse, Jelusalemu uyoolyataukwa mane kusikila ciindi cabamasi cikamane.

Kuboola kwa Mwanaa Muntu

(Mateyo 24.29-31; Maako 13.24-27)

25“Kuyooba zitondezyo kuzuba, kumwezi, akunyenyezi. Aano ansi kuyooba kulibilika akuyoowa kupati mumasi oonse, kuyooba kuvuuma kwalwizi akwamayuwe. 26Bantu bayoonetuka akaambo kakuyoowa nobanoolindila kubona citikasike munyika yoonse, nguzu zyakujulu ziyoozungaana. 27Eelyo Mwanaa Muntu uyoolibonya kaboola mukkumbi anguzu abulemu bupati. 28Lino zintu eezi zyatalika kucitika, amulange mujulu, nkaambo lwaangunuko lwanu lwaba aafwiifwi.”

Ciiyo camukuyu

(Mateyo 24.32-35; Maako 13.28-31)

29Mpoonya Jesu wakabaambila cikozyanyo eeci wakati, “Amuuyeeye mukuyu amisamu yoonse imwi. 30Ciindi nomwiibona kuti yatalika kusyuuka mulaziba kuti mainza ali aafwiifwi. 31Mbubonya obo, mwaakubona kuti zintu eezi zyacitika amukazibe kuti bwami bwa Leza buli aafwiifwi.

32“Amuyeeye eeci! Zintu eezi zyoonse ziyoocitika bantu basunu kabatanamaninina kufwa. 33Julu anyika ziyoomana, pele majwi aangu taakamani.

Mbobeelede kulangisisya

34“Amukkale kamulibambilide! Mutanoosungwaalili buyo kulya mapobwe, kunywa makoko akuyeeyesya zintu zyaansi, nkaambo ambweni Buzuba oobu bukamujane kamutalibambilide. 35Kusika kwa Buzuba oobo kuyooba mbuli kakole kafwisuka akuca bantu boonse bamunyika. 36Amulangile akukomba lyoonse kutegwa mukakonzye kujana nguzu zintu eezi zyaakucitika. Ndendilyo nomuti kaime kumbele lya Mwanaa Muntu.”

37Mumazuba aayo, Jesu wakali kwiisya muŋanda ya Leza, pele kumangolezya wakali kuunka kucilundu camisamu ya Oliva nkwaakali kukkala masiku oonse. 38Bantu banji bakali kufumina kuŋanda ya Leza kuti bakamuswiilile.

Currently Selected:

Luka 21: Tonga96

Highlight

Copy