Mateyo 26

Bapati ba Bajuda mbubakazuminana kuti Jesu ajaigwe

(Maako 14.1-2; Luka 22.1-2; Joni 11.45-53)

1Lino Jesu naakamana kwaamba makani oonse aaya, wakati kuli basikwiiya bakwe, 2“Mulizi kuti kwainda mazuba obilo kuyooba Pobwe lya Kwiindilila, nkabela Mwanaa Muntu uyooabwa kuti akankaminwe aciingano.”

3Eelyo bapaizi basilutwe abapati ba Bajuda bakabungana kubbuwa lyamupaizi mupati, Kayafa. 4Bakazuminana kuti bajane nzila imwi yakujata Jesu cakusisikizya kuti ajaigwe. 5Pele bakati, “Kutaamba ciindi capobwe, nkaambo inga kulaba lupyopyongano akati kabantu.”

Jesu mbwaakananikwa mafuta

(Maako 14.3-9; Joni 12.1-8)

6Lino Jesu naakali kumunzi wa Betani muŋanda ya Saimoni uutegwa sicinsenda. 7Kwakasika mukaintu umwi kajisi ansazi iizwide mafuta aanunkilila kabotu aadula kapati. Wakaatila amutwe wa Jesu ciindi Jesu naakali kulya. 8Pele basikwiiya nibakabona boobo, bakatongooka bati, “Ino anyonyweedwa nzi mafuta aaya? 9Nkaambo naauzigwa mali manji kaapegwa kubacete.” 10Jesu wakaziba nzibakali kwaamba, eelyo wakati kulimbabo, “Ino mumukatazizya nzi mukaintu ooyu? Wandicitila cintu cibotu. 11Nkaambo lyoonse bacete muli kuli aambabo, pele tamunooli aandime lyoonse pe. 12Eeci cakutila mafuta amubili wangu wacicita kundibambilila kuzikkwa. 13Ncobeni ndamwaambila kuti, koonse ooko nkwaayookambaukwa Makani Mabotu munyika yoonse, mane eeci ncaacita mukaintu ooyu ciyooambwa, kutegwa kabayoomuyeeyela mpawo.”

Judasi mbwaakakanza kumwaaba

(Maako 14.10-11; Luka 22.3-6)

14Nkabela umwi wabali kkumi ababili uutegwa Judasi Isikaliyoti wakainka kubapaizi basilutwe 15akuti kulimbabo, “Ino mulandipa nzi kuti naa ndaaba Jesu kulindinywe?” Bakamupa mali aansiliva aali makumi otatwe. 16Lino kuzwa waawo wakali kuyandaula ciindi cibotu cakumwaaba.

Jesu mbwaakalya pobwe lya kwiindililwa abasikwiiya bakwe

(Maako 14.12-21; Luka 22.7-13, 21-23; Joni 13.21-30)

17Lino mubuzuba butaanzi bwapobwe lya Cinkwa Citakwe Mimena basikwiiya bakasika kuli Jesu bati, “Nkukuli nkoyanda kuti tukakubambile Pobwe lya Kwiindilila kuti ulye?” 18Jesu wakati, “Kamuya mumunzi kulindaba, mukaambe kuti kulinguwe, Mwiiyi wati, ‘Ciindi cangu cili aafwiifwi. Ndiyanda kulya pobwe kuŋanda yako antoomwe abasikwiiya bangu.’” 19Nkabela basikwiiya bakacita mbubonya mbuli Jesu mbwaakabalailila. Bakabamba cilalilo ca Pobwe lya Kwiindilila.

20Nikwakaba kumangolezya Jesu abasikwiiya bakwe bali kkumi ababili bakali kulya. 21Lino kabacilya wakati, “Ncobeni ndamwaambila kuti, umwi wanu ulandaaba.” 22Bamvwe boobo basikwiiya bakausa kapati, eelyo bakatalika kumubuzya omwe omwe kuti, “Sena ndime O Mwami?” 23Walo wakati, “Nguwenya ooyu ngwesunsa aawe mumutiba nguuti ndaabe. 24Mwanaa Muntu uyoofwa mbubonya mbuli mbokulembedwe anguwe. Pele akomena mapenzi ayooba kumuntu ooyo uutaabe Mwanaa Muntu! Nicakabota kuli nguwe naatakazyalwa.” 25Mpawo Judasi ooyo wakamwaaba wakabuzya kuti, “Sena ndime O Mwami?” Walo wakati kulinguwe, “Waamba.”

Mulalilo wa Mwami

(Maako 14.22-26; Luka 22.14-20; 1 Bakolinti 11.23-25)

26Lino nibakacili kulya, Jesu wakabweza cinkwa wakalumba, wacikomona, akucipa kuli basikwiiya bakwe wati, “Mubweze, mulye, nkaambo ooyu ngomubili wangu.” 27Eelyo wakabweza nkomeki, nkabela naakamana kulumba Leza wakiipa mbabo, wati, “Amunywe nyoonse. 28Nkaambo oobu mbulowa bwangu bwacizuminano cipya, bwatililwa banji kuti zinyonyoono zilekelelwe. 29Ndamwaambila kuti, nsiciyoonywi limbi musinza wansaansa mane do kubuzuba mbwentikanywe andinywe mubwami bwa Taata.”

30Eelyo nibakamana kwiimba lwiimbo, bakainka ku Cilundu camisamu ya Oliva.

Jesu mbwaakaamba kuti Pita ulamutama

(Maako 14.27-31; Luka 22.31-34; Joni 13.36-38)

31Mpoonya Jesu wakati kulimbabo, “Nywebo nyoonse mulatyompwa masiku aano akaambo kandime, nkaambo kulilembedwe kuti, ‘Nzoouma mweembezi, nkabela butanga bwa mbelele buyoomwaikizyanya.’ 32Pele ndaakubusigwa njoomusaangunina kuya ku Galilii.” 33Mpawo Pita wakati kulinguwe, “Nikuba kuti boonse bakusiye mebo nsikookusiya pe.” 34Jesu wakati kulinguwe, “Ncobeni ndakwaambila kuti, masiku aaya ngoonya, mukombwe katanalila, ulanditama ziindi zyotatwe.” 35Pita wakati kulinguwe, “Nikuba kuti ndifwe anduwe, nsikookutama.” Mbubonya oobo mbubakaamba basikwiiya bamwi boonse.

Jesu mbwaakakomba mumuunda wa Getesemani

(Maako 14.32-42; Luka 22.39-46)

36Mpawo Jesu wakainka abasikwiiya bakwe kubusena bwiitwa kuti Getesemani, eelyo wakati kuli mbabo, “Amukkale aano, ndaya kuya nkakombe.” 37Jesu wakatolelela Pita abana ba Zebedii bobilo. Mpoonya wakatalika kuusa akukatazigwa. 38Wakati kulimbabo, “Moyo wangu uluuside kapati abuusu bwalufu. Amusyaale aano mulangile andime.” 39Jesu wakaya kumbele buniini wakavuntama, wakomba wati, “Taata, kuti naa kakukonzeka, eeyi nkomeki yamapenzi aiindilile. Nikuba bobo, kutabi mbuli kuyanda kwangu, pele akukabe mbuli kuyanda kwako.” 40Ucimana wakasika kuli basikwiiya bakwe, wajana baloona. Wakati kuli Pita, “Sena nywebo tamukonzyi kulangila andime kwaoola lyomwe buyo? 41Amulangile akukomba kuti mutanjili mumasunko. Moyo ncobeni ulayandisisya, pele mubili wabula nguzu.”

42Jesu wakainka lwabili, waakukomba wati, “Taata, kuti naa nkomeki eeyi itandiindilili, pele njinywe alucitwe luyando lwako.” 43Amane wakasika kuli basikwiiya, wabajana baloona nkaambo bakafwide ŋonzi. 44Aboobo wakabasiya alimwi, wainka akuyookomba lwatatu, kaamba majwi ngoonya buyo. 45Kumane wakainka kuli basikwiiya bakwe akuti kulimbabo, “Sena mucoona akulyookezya? Ciindi casika, Mwanaa Muntu waabwa mumaanza aabasizibi. 46Amunyamuke tweende. Ngooyu sikundaaba ulaafwiifwi.”

Jesu mbwaakajatwa

(Maako 14.43-50; Luka 22.47-53; Joni 18.3-12)

47Jesu kacaambaula, Judasi umwi wabali kkumi ababili wakasika. Wakaza ankamu mpati yabantu kaijisi mapanga ankoli. Eeyi nkamu yakatumwa, yakazwa kubapaizi basilutwe abapati ba Bajuda. 48Lino sikumwaaba wakabapede citondezyo cakuti, “Ooyo ngwenjoomyonta ngonguwe, mukamujate.” 49Eelyo wakasika kuli Jesu wati, “Wabonwa, Mufundisi!” Mpawo wakamumyonta. 50Jesu wakati kulinguwe, “Mweenzuma, cita ncoozida.” Mpawo bakavumpa Jesu bamujata. 51Umwi wabaabo bakali aa Jesu wakasomona panga lyakwe, wakakwezula kutwi kwa muzike wamupaizi mupati. 52Mpoonya Jesu wakati kulinguwe, “Bweedezya panga lyako mumukutu walyo, nkaambo boonse babelesya panga bayoonyonyoonwa apanga. 53Sena uyeeya kuti nsikonzyi kukumbila Taata kuti anditumine ndilyonya ono zyuulu-zyuulu zyabangelo? 54Naa ndacita boobo, ino inga zyacitika buti zilembedwe mu Malembe?” 55Amane Jesu wakati kunkamu yabantu aabo, “Nkaambo nzi mwazikundijata amapanga ankoli mbuli kuti ndimubbi? Buzuba abuzuba ndali kukkala muŋanda ya Leza nkenjiisya, pele taakwe nimwakandijata. 56Pele eezi zyoonse zyacitika kutegwa zibe mbubonya mbobakalemba basinsimi.” Mpoonya boonse basikwiiya bakamumwaika akutija.

Jesu mbwaakatolwa kunkuta

(Maako 14.53-65; Luka 22.54-55; Joni 18.13-14, 19-24)

57Bantu aabo bakajata Jesu bakamutola kuli Kayafa mupaizi mupati, ooko bamayi ba Mulawo abapati ba Bajuda nkobakabungene. 58Pita wakali kutobela aalaale mane kuyoosikila kubbuwa lyamupaizi mupati. Wakanjila mukati, wakkala antoomwe abalindizi kuti abone citicitike. 59Bapaizi basilutwe antoomwe ababetesi bapati boonse bakasola kuyandaula bumboni bwakubejelezya Jesu kutegwa bamujaye. 60Pele taakwe nibakabujana, nikuba kuti bakamboni babeji banji bakasika akumubejelezya. Kumamanino kwakasika bantu bobilo 61bakati, “Ooyu wakali kuti, ‘Mebo ndakonzya kumwaya ŋanda ya Leza akwiiyakulula mumazuba otatwe buyo.’” 62Mupaizi mupati wakanyamuka akwaamba kuti, “Sena unyina cakwaamba kumakani aaya ngobakwaamba?” 63Pele Jesu wakaluumwide wi. Mpawo mupaizi mupati wakati kulinguwe, “Ndakwaambila muzina lya Leza muumi kuti ukonke kuti naa nduwe Munanike, Mwanaa Leza?” 64Mpawo Jesu wakati kulinguwe, “Waamba. Pele ndamwaambila kuti kuzwa lino muyoobona Mwanaa Muntu kakkede kujanza lyalulyo lya Singuzu muyoomubona alimwi kaboola amakumbi aakujulu.” 65Mpoonya mupaizi mupati wakazapaula cisani cakwe akuti, “Usampaula Leza, ino tuciyandila nzi bumboni bumbi? Kayi mwalimvwida mbwaaamba? 66Ino muyeeya buti?” Mpawo bakaingula kuti, “Uleelede kufwa.” 67Eelyo bakamuswida mate kubusyu, bamuuma nkabela bamwi bakamubakula 68bati, “Twaambile yebo O Munanike wa Leza. Ino nguni wakuuma?”

Pita mbwaakatama Jesu

(Maako 14.66-72; Luka 22.56-62; Joni 18.15-18, 25-27)

69Lino Pita wakalikkede anze mulubuwa. Nkabela umwi musimbi wakamusikila akuti kulinguwe, “Ayebo wakali aa Jesu waku Galilii.” 70Pita wakatama kabamvwide boonse wakati, “Nsicizi ancoamba pe.” 71Nkabela kayanda kuti azwide aanze, aumwi musimbi wakamubona, wakati kuli baabo mbaakaimvwi limwi, “Ooyu mwaalumi awalo wakali aa Jesu waku Nazaleta.” 72Alimwi Pita wakatama cakukonka kuti, “Masimpe ooyu muntu nsimwizi.” 73Nikwakainda kaindi kaniini aabo bakaimvwi kooko bakasika akuti kuli Pita, “Ncobeni, ayebo uli umwi wabo, nkaambo mwaambo wako ulakuyubununa.” 74Mpawo wakatalika kukonka akuti, “Ncobeni ooyu muntu nsimwizi pe.” Mponya aawo mukombwe wakalila. 75Nkaako Pita wakaibaluka jwi ndyaakaamba Jesu lyakuti, “Mukombwe katanalila unoonditamide ziindi zyotatwe.” Nkabela Pita wakazwida anze waakulila kapati.

Currently Selected:

Mateyo 26: Tonga96

Highlight

Copy