Maako 13

Jesu mbwaakaamba zyakumwaigwa kwaŋanda ya Leza

(Mateyo 24.1-2; Luka 21.5-6)

1Lino Jesu naakali kuzwa muŋanda ya Leza, umwi wabasikwiiya bakwe wakaamba kuti, “Langa, Mwiiyi Taaliboteli mabwe abuyake bwamaanda eeyi!”

2Jesu wakavwiila kuti, “Tee mwaabona mayake aaya mapati aali boobu? Takukooyoosyaala aawa bbwe atala aalyeenzinyina. Oonse ayookolomonwa.”

Makatazyo amapenzi

(Mateyo 24.3-14; Luka 21.7-19)

3Jesu naakakkede acilundu camisamu ya Oliva cilangene aŋanda ya Leza, Pita, Jemusi, Joni a Andulu bakamubuzya kumbali bakati, 4“Twaambile ino zintu eezi ziyoocitika lili, alimwi ncinzi ciyooba citondezyo caciindi noziyoocitika zintu eezi zyoonse?”

5Mpoonya Jesu wakatalika kubaiisya wakati, “Amucenjele kuti kutabi muntu uumweena. 6Nkaambo mbanji bayooboola muzina lyangu kabati, ‘Ndendime nguwe!’ Nkaako bayoolubizya banji. 7Mutakakatazigwi mwaakumvwa kuti kumwi kuli nkondo, nikuba kumvwa mpuwo yankondo kule. Eezi zileelede kucitika, pele takuli kuti ngamamanino aaciindi. 8Cisi ciyoolwana acisinyina, abwalo bwami abwaminyina. Kuyooba kuzungaana kwanyika mumasena aandeene, alimwi kuyooba nzala. Eezi ngamatalikilo buyo aamapenzi.

9“Nywebo, muleelede kucenjela, nkaambo bantu bamwi bayoomwaanga akumutola kucibetekelo. Bayoomuumina muzikombelo, muyooima kumbele lyababetesi alyabami akaambo kangu, muyoobaambila Makani Mabotu. 10Makani eeni-eni aleelede kusaanguna kukambaukwa kubantu boonse. 11Nibayoomujata akumutola kucibetekelo, mutakalibiliki kuti, ‘Ino tukaambe buti?’ Casika ciindi canu, amwaambe kufumbwa majwi ngomwapegwa mpoonya aawo. Nkaambo majwi ngomuyooamba taali aanu, muyoopegwa a Muuuya Uusalala wa Leza. 12Munyina uyooaba mwanookwabo kuti ajaigwe, abalo bamawisi bayoocita mbubonya buyo kubana babo, bana bayoobukila bazyali babo akubajaya. 13Nywebo muyoosulaikwa abantu boonse akaambo kazina lyangu. Pele ooyo uukakatila mane kumamanino, uyoofutulwa.

Cisesemyo cipati ciyoosya

(Mateyo 24.15-28; Luka 21.20-24)

14“Muyoobona ‘Cisesemyo cibisya’ kaciimvwi mubusena mbociteelede” (Nywebo nomubala, amumvwisisye.) “Nkabela aabo bali mucisi ca Judiya baleelede kuyootijila muzilundu. 15Ooyo uyoojanwa atala aciluli caŋanda atakasowi ciindi kunjila muŋanda kuti agwisye cintu comwe cakutolelela. 16Uyoojanwa kumuunda atakasowi ciindi cakupiluka kuŋanda kuyoobweza cibaki cakwe. 17Maawe! Kuyooba kupenga kupati kuyoosya kumazuba aayo kubakaintu baminsi abaabo banyonsya mumazuba aayo. 18Kamukomba kuli Leza kuti eezi zitakacitiki ciindi camwaka nikutatijiki mbuli muciindi camupeyo. 19Nkaambo mapenzi aaciindi eeco ayooba mapati kwiindilila, taanabede kuzwa ciindi Leza naakalenga nyika kusikila sunu. Alimwi takuyoobi limbi aali mbuli ngawo. 20Leza wakayeeya kwaafwiinsya mazuba aamapenzi aayo, naatakayeeya boobo nikwataakuba muntu naba omwe wali kunoonga uzoofutuka. Pele akaambo kabantu bakwe mbaakasala wakaafwiinsya mazuba aayo.

21“Ciindi eeco, naa umwi akati, ‘Langa, ngooyu Kilisito’ naa ‘Langa, nguulya’ mutakamuzuminini. 22Nkaambo kuyooba balyaamba kuti, ‘Ndime Kilisito’ alimwi kuyooba basinsimi babeji. Bayoocita zitondezyo azintu zigambya kuti bakacenge abaabo bantu Leza mbaakasala. 23Aboobo amucenjele akulibambila. Ndamwaambilila limwi zintu zyoonse ciindi kacitanasika.

Kuboola kwa Mwanaa Muntu

(Mateyo 24.29-31; Luka 21.25-28)

24“Mapenzi aalya aakumana, zuba liyoobola, kuyooba mudima mupati, mwezi uyoobola. 25Nguzu zyakujulu ziyoozungaana, nyenyezi azyalo ziyooloka. 26Eelyo Mwanaa Muntu uyoolibonya kaboola mumakumbi anguzu abulemu. 27Uyootuma bangelo kuti babunganye antoomwe bantu bakwe basale kuzwa kujwe, kumbo, kunyika akumusanza, mane nyika nkwiigolela.

Ciiyo camukuyu

(Mateyo 24.32-35; Luka 21.29-33)

28“Amwiiye ciiyo kuzwa kumukuyu. Mitabi yawo niitalika kuteta, matu mapya naasyuuka inga mwaziba kuti mainza alaafwiifwi. 29Munzila njiyonya eeyo, mwaakuzibona zintu eezi kazicitika, muyooziba kuti ciindi caswena. 30Amuciyeeyesye eeci. Zyoonse eezi ziyoocitika ansi boonse bantu basunu kabatanamaninina kufwa. 31Julu anyika ziyoomana, pele majwi aangu anooliwo akutamani.

Taakwe uuzi buzuba niciba ciindi

(Mateyo 24.36-44)

32“Pele taakwe naba omwe uubuzi buzuba oobo niciba ciindi. Bangelo abalo tabazi, naba Mwanaa Muntu, Taata alikke nguuzi. 33Kamulangisisya, mucenjele, nkaambo tamuzi ciindi eeco niciyoosika. 34Ciyooba mbuli muntu wakasiya babelesi bakwe kuti kabalindila ŋanda yakwe, walo wabweza lweendo lwakuya kule, wasiya wabaabila umwi aumwi mulimo ngweelede kucita akwaambila mulindizi wamulyango kuti kalangila. 35Aboobo anywebo amulangile nkaambo tamuzi ciindi natikaboole mwini ŋanda, antela nkuumangolezya naaba akati kamasiku, naa kubucedo nikuba acipaswido cazuba. 36Aakuboola cakudunuka, atajani muloona pe. 37Eezi nzendaamba kulindinywe ndizyaamba kubantu boonse. Kamucenjela akulangisya.”

Currently Selected:

Maako 13: Tonga96

Highlight

Copy