Maako 16

Jesu mbwaakabuka kuzwa kubafu

(Mateyo 28.1-8; Luka 24.1-12; Joni 20.1-10)

1Lino Buzuba bwa Kulyookezya butegwa Sabata nibwakamana, Maliya waku Magadala, Salomi, a Maliya banyina Jemusi bakaula tununkilizyo kuti bakananike mutumba wa Jesu. 2Cifumo-fumo kapati mubuzuba butaanzi bwamvwiki, mbulyakapaswida buyo zuba, bakaintu aaba bakainka kucuumbwe. 3Kabacili munzila bakali kubuzyanya kuti, “Ino nguni uuti katukunkulisizye bbwe kuzwa kumulyango wacuumbwe?” 4Bbwe eelyo lyakali pati kapati. Mpoonya nibakalanga kucuumbwe, bakabona kuti bbwe lyakali kunkulisidwe kale. 5Bakanjila mucuumbwe akubona mukubusi uukkede kululyo lwabo, wakalisamide cisani cituba buu. Bakayoowa akugambwa.

6Walo wakabaambila kuti, “Mutayoowi, ndilizi kuti muyandaula Jesu uuzwa kumunzi wa Nazaleta, ooyo wakankamidwe aciingano. Tamo muno, wabuka! Amulange, mpaawa abusena mpobakamulazikide. 7Lino kamuya mukaambile basikwiiya bakwe antoomwe a Pita kuti, ‘Uya kumbele lyanu kuya ku Galilii, nkomuyoomubonena, mbubonya mbuli mbwaakamwaambilide!’”

8Mpoonya bakazwa mucuumbwe akutalika kutija, bakayoowa kapati akugambwa. Taakwe muntu ngobakaambila makani aaya munzila nkaambo bakaliyoowede.

MAMANINO AAMBI AAMAKANI MABOTU

Jesu mbwaakalibonya kuli Maliya Magadala

(Mateyo 28.9-10; Joni 20.11-18)

[ 9Mubuzuba butaanzi bwamvwiki Jesu naakabuka kuzwa kubafu, cifumo-fumo cini-cini wakalibonya kuli Maliya waku Magadala, ooyu ngomukaintu Jesu ngwaakagwisya myuuya mibi iili ciloba. 10Mpoonya Maliya wakainka akuyooambila baabo bakali kukkala aa Jesu. Balo kulila Jesu akweema. 11Pele balo nibakamvwa kuti Jesu wabuka kubafu, alimwi akuti Maliya wamubona kabukide, taakwe nibakaasyoma makani aaya pe.

Jesu mbwaakalibonya kuli basikwiiya bobilo

(Luka 24.13-35)

12Kuzwa aawo Jesu wakalibonya muciimo cimwi kuli basikwiiya bobilo nibakali kuya bweenda munzila iiya kumyuunda. Bakali kweendeenda kunze aa munzi. 13Bakajokela akuyooambila beenzinyina, pele balo beenzinyina tiibakasyoma pe.

Jesu mbwaakalitondezya kuli bali kkumi aumwi

(Mateyo 28.16-20; Luka 24.36-49; Joni 20.19-23; Milimo 1.6-8)

14Kumamanino, Jesu wakalibonya kuli basikwiiya bali kkumi aumwi nibakali kulya. Wakabakalalila nkaambo taakwe nibakajisi lusyomo alimwi bakali basicinguni cakuti tiibakabasyoma aabo bakamubona kali muumi. 15Wakati kulimbabo, “Kamuya munyika yoonse, mukakambauke Makani Mabotu kubantu bamisyobo yoonse. 16Kufumbwa uusyoma akubbapatizigwa uzoofutulwa, pele ooyo uutasyomi uyoozulwa. 17Basyoma bayootondezya zitondezyo eezi, bayoogwisya myuuya mibi muzina lyangu, alimwi bayookonzya kwaamba misyobo yandeene-andeene, 18kuti naa babweza nzoka, nikuba kunywa ncefu, tiikooyoobajaya, bayoobikka maanza abalwazi akubaponya.”

Jesu mbwaakatolwa kujulu

(Luka 24.50-53; Milimo 1.9-11)

19Mwami Jesu kaambaula ambabo wakatolwa kujulu akuyookkala kululyo lwa Leza. 20Basikwiiya bakainka buya bukambauka koonse-koonse, awalo Leza wakebeleka kutondezya kuti kukambauka kwabo kwakali kwakasimpe kwiindila mukubapa zitondezyo zyanguzu zipati.]

MAMANINO AAMBI AACIINDI

9 Bakaintu bakainka kuli Pita akubeenzinyina baakubalwiida makani oonse ngobakaambilwa. 10 Musule akooku Jesu wakatuma basikwiiya bakwe kuti bakatole mulumbe uusalala walufutuko lutamani kubantu bamunyika yoonse.]

Currently Selected:

Maako 16: Tonga96

Highlight

Copy