Myeelwe 10
10
Myeembo yansiliva
1Lino Mwami Leza wakaambila Mozesi kuti, 2“Panga myeembo yobilo yansiliva yoondedwe, ibe yakwiita bantu kuti babungane alimwi akubazibya kuti balonge. 3Ciindi myeembo yoonse yobilo yasibwa, bantu boonse baleelede kubunganina kumulyango watente. 4Pele kwasibwa buyo omwe, basololi baziinga zya Isilayeli mbebayooswaangana balikke. 5Alimwi naa yasibwa buyo asyoonto, misyobo iiyakide kujwe njiielede kulonga. 6Kuti naa yasibwa asyoonto lwabili, misyobo iili kumusanza njiielede kulonga. Aboobo myeembo yasibwa asyoonto njakulonga. 7Pele kwayandika mbungano yoonse, myeembo isibisigwe kapati. 8Myeembo isibwe buyo abana ba Aloni, mupaizi. Eeci mucitobele kwamazyalani oonse aaciboola.
9“Kuti mwalwanwa munyika yanu, mukuti mulivune kuli basinkondonyoko, muleelede kusiba myeembo eeyi. Ndendilyo mebo nde Mwami Leza wanu, nenjoomuvuna kuli basinkondonyoko. 10Alimwi amuziindi zyakusekelela, mbuli pobwe lyamwezi mupya amapobwe amwi, baleelede kusiba myeembo nomupa zipaizyo zyakutenta azyalumvwano. Zinooli ciibalusyo kuli Leza wanu. Ndime Mwami Leza wanu.”
Baisilayeli mbubakalonga
11Lino mubuzuba bwamakumi obilo mumwezi wabili mumwaka wabili ciindi bantu kabazwide kale mu Ijipiti, kkumbi lyakavumbide atente lyacizuminano lyakeenda. 12Mpoonya Baisilayeli bakatalika kulonga kuzwa munkanda ya Sinai. Kkumbi lyakazooimina munkanda ya Palani.
13Lino bakeenda ciindi eeci cakusaanguna mbubonya mbuli Mwami Leza mbwaakalailila Mozesi. 14Bantu ba Juda mbibakasaanguna kweenda andembela yabo muzibunga-zibunga, nkabela mupati wa mbunga yabo wakali Nasyoni mwana wa Aminadabu. 15Netaneli mwana wa Zuwaa ngowakali mupati wamusyobo wa Isakaa. 16Eliyabu mwanaa Heloni ngowakali mupati wamusyobo wa Zebuluni.
17Lino tente lyakukombela nilyakali kumwaigwa, bamukowa wa Gesyoni a Melali mbibakali kulibweza. 18Bakabatobela mbamusyobo wa Lubeni andembela zyabo muzibunga-zibunga, nkabela mupati wa mbunga yabo wakali Elizuu mwanaa Syedeyuu. 19Syelumiyeli mwanaa Zulisyadayi ngowakali mupati wamusyobo wa Simiyoni. 20Eliyasafu mwanaa Deyuweli ngowakali mupati wamusyobo wa Gadi.
21Mpoonya kwakatobela bamukowa wa Kohati bakabwezede zibelesyo zisalala. Nkabela tente lyakukombela lyakaimikwa Bakohati kabatanasika. 22Kuzwa mbabo kwakaza bamusyobo wa Efulemu andembela zyabo muzibunga-zibunga, nkabela mupati wa mbunga yabo wakali Elisyama mwana wa Amihudi. 23Gamaliyeli mwanaa Pedazuu ngowakali mupati wamusyobo wa Manase. 24Abidani mwanaa Gideyoni ngowakali mupati wamusyobo wa Benjamini.
25Kumamanino kwakaza bamukowa wa Dani andembela zyabo muzibunga-zibunga. Bakali kucingilila bantu musule, nkabela mupati wabo wakali Ahiyeza mwana wa Amisyadayi. 26Pagiyeli mwana wa Okulani ngowakali mupati wamusyobo wa Asya. 27Ahila mwana wa Enani ngowakali mupati wamusyobo wa Nafutali. 28Mbombuboobu mbunga zya Baisilayeli mbuzyakali kweenda ciindi cakulonga.
29Lino Mozesi wakaambila Hobabu mwanaa Luweli wisizyala Mozesi Mumidiyani kuti, “Tuya kubusena Mwami Leza mbwaakati ndiyoomupa. Wakasyomezya Baisilayeli kuti bayoosumpuka. Aboobo atweende ayebo kuti tukaabane lusumpuko ooko.”
30Pele walo wakaingula kuti, “Peepe, mebo ndilabweeda kucisi cangu kumukowa wangu.”
31Mozesi wakati, “Akaka, utapiluki. Ulizi nkotukonzya kuyooyakila munkanda. Uli mbuli meso eesu. 32Kuti tweende limwi, tuyooabana anduwe zibotu zyoonse Mwami Leza nzyayootupa.”
33Lino Baisilayeli bakalonga kuzwa kucilundu ca Mwami Leza, bakeenda kwamazuba otatwe. Bbokesi lyacizuminano ca Mwami Leza lyakali kumbele lyabo, bakeenda andilyo kwamazuba otatwe kuti bakajane busena bwakulyookezezya. 34Nibakalonga, kkumbi lya Mwami Leza lyakali amutwe wabo ciindi casikati.
35Ciindi coonse bbokesi lyacizuminano ca Mwami Leza nilyakali kulonzegwa, Mozesi wakali kwaamba kuti,
“Nyamuka, O Mwami Leza, umwaye basinkondonyoko! Batije bakusulide!”
36Alimwi ciindi nilyakakkazikwa, Mozesi wakali kwaamba kuti,
“Koboola O Mwami Leza, uleleke zyuulu-zyuulu zya Baisilayeli.”
Currently Selected:
Myeelwe 10: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.