Myeelwe 3
3
Bana ba Aloni
1Ngaaya mazyalani aa Aloni a Mozesi kusikila ciindi Mwami Leza naakaambaula a Mozesi acilundu ca Sinai. 2Aloni wakalijisi bana bone aaba: Nadabu ngowakusaanguna umwi ngu Abihu, Eliyazaa, a Itamaa. 3Bakananikwa akubikkwa mubupaizi, 4pele Nadabu a Abihu bakafwa nibakapaizya mulilo uutatambuliki ku Mwami Leza munkanda ya Sinai. Bakanyina bana balombe pe. Nkaambo kaako Eliyazaa a Itamaa balikke mbibakabeleka mubupaizi Aloni wisi kacipona.
Mulimo wa Balevi
5Lino Mwami Leza wakaambila Mozesi kuti, 6“Leta bamukowa wa Levi kuli Aloni mupaizi kuti bamubelekele milimo. 7Baleelede kumumanina milimo walo ambungano yoonse kutente lyakuswaanganina, babe bakutausi ooko. 8Mbabanoolanga zibelesyo zyoonse zyatente lyakuswaanganina akucita milimo yoonse yalyo mukubelekela Baisilayeli. 9Balevi babelekele Aloni abana bakwe bapaizi. Mu Baisilayeli aaba mbaabayoopegwa kucita milimo eeyi. 10Aloni abana bakwe balo kabacita milimo yabupaizi buyo. Naa uumbi muntu waswena aafwiifwi kubusena busalala uleelede kujaigwa.”
11Lino Mwami Leza wakaambila Mozesi kuti, 12“Ndasala Balevi kuzwa mu Baisilayeli mubusena bwakuti mbweze bana balombe bakusaanguna kuti babe bangu. Balevi mbibangu 13nkaambo kakuti bana balombe bakusaanguna boonse mbibangu. Ciindi nindakajaya bana bakusaanguna Baijipiti ndakasalazya bana bataanzi ba Baisilayeli kuzwa kumukwasyi umwi aumwi nikuba banyama boonse bakusomona mbibangu. Ndime Mwami Leza.”
Kubalwa kwa Balevi
14Lino munkanda ya Sinai Mwami Leza wakalailila Mozesi kuti, 15“Bala Balevi mumikowa amikwasyi yabo. Bala balombe boonse bali aamwezi omwe aiindilila.” 16Nkaako Mozesi wakababala mbubonya mbuli Mwami Leza mbwaakamulailila. 17Levi wakalijisi bana botatwe mbaaba: Gesyoni, Kohati a Melali. 18Mbaaba baciinga ca Gesyoni, Libini a Syimeyi. 19Bakohati mbaaba: Amulamu, Izihaa, Hebuloni, a Uziyeli. 20Bamelali mbaaba: Mali a Musyi. Aaba mbabaciinga ca Levi.
21Lino ziinga zyobilo zyakazwa kumukowa wa Gesyoni nzeezi: Balibini a Basyimeyi. 22Mweelwe wabana balombe bamwezi omwe naa kwiindilila wakali zyuulu zili ciloba amyaanda yosanwe. 23Aaba bakayakide zivuka kumbo kusule aatente. 24Eliyasafu mwanaa Layeli nguwakali mupati wamukowa ooyu. 25Bagesyoni mbebakali kulanga tente lyakuswaanganina, cibumbilizyo camukati acaanze, azisitilizyo zyamulyango, 26zisitilizyo zyabbuwa azyacipaililo azyaanzyo zyalyo zyoonse.
27Lino ziinga zya Kohati nzeezi: Baamulamu, Baiza, Hebuloni, a Bauziyeli. 28Mweelwe wabana balombe bamwezi omwe naa kwiindila wakali zyuulu zili lusele amyaanda iili cisambomwe. Bakohati mbabakali kulanga busena busalala. 29Aaba bakayakide zivuka zyabo kumusanza watente lyakuswaanganina. 30Nkabela Elizafani mwana wa Uziyeli wakali ngomupati wamukowa wa Kohati. 31Bakohati mbebakali kulanga bbokesi lyacizuminano, tebule, cikkazikilo calambe, zipaililo, zibelesyo zyabupaizi, zisitilizyo, azimwi zili boobo.
32Lino Eliyazaa mwana wa Aloni mupaizi wakali ngomupati wa Balevi. Nguwakali kulanga bakali kubamba busena busalala.
33Lino ziinga zya Melali nzeezi, Bamali a Bamusyi. 34Mweelwe wabana balombe bamwezi omwe naa kwiindilila wakali zyuulu zili cisambomwe amyaanda yobilo. 35Buliyeli mwana wa Abiheli wakali ngomupati wa Bamelali. Aaba bakayakide zivuka zyabo kunyika lyatente lyakuswaanganina. 36Bamelali bakapedwe mulimo wakulanga zibeela zyatente aminkulu yalyo, zicinda zyalyo, azikkazikilo zyalo azibelesyo zyalyo zyoonse, 37antoomwe azicinda zizingulukide bbuwa azikkazikilo zyazyo, atumanzyo azyaanzyo.
38Lino Mozesi a Aloni abana bakwe bakakkalile kumbele lyatente lyakuswaanganina kulubazu lwakujwe. Aabo mbabacita milimo yakubamba busena busalala mukubelekela Baisilayeli boonse. Muntu uumbi uuswena aafwiifwi uleelede kujaigwa. 39Mweelwe wa Balevi boonse muziinga amikwasyi yabo nibakabalwa kweendelana akulailila kwa Mwami Leza, bakali zyuulu zili makumi obilo azibili. Aaba mbana bamwezi omwe akwiindilila kubikkilizya abaalumi boonse.
Kubalwa kwabana bakusaanguna
40Lino Mwami Leza wakaambila Mozesi kuti, “Bala bana ba Baisilayeli boonse bakusaanguna mumikwasyi yabo, aabo bali amwezi omwe akwiindilila, ulembe mazina aabo. 41Ndime Mwami Leza! Undipe Balevi mubusena bwabana bakusaanguna ba Baisilayeli bamwi alimwi abana bazivubwa zya Balevi bakusaanguna mubusena bwazeezyo zya Baisilayeli. Ndime Mwami Leza.”
42Mpawo Mozesi wakabala bana bakusaanguna boonse ba Baisilayeli mbubonya mbuli Mwami Leza mbwaakamulailila. 43Wakalemba mazina aabana bamwezi omwe akwiindilila. Mweelwe wabo wakali zyuulu zili makumi obilo azibili amyaanda yobilo amakumi aali ciloba abatatu.
44Lino Mwami Leza wakaambila Mozesi kuti, 45“Balevi bakkale mubusena bwabana bakusaanguna ba Baisilayeli, alimwi azivubwa zya Balevi zikkale mubusena bwazya Baisilayeli. Mukowa wa Levi nguwangu. Ndime Mwami Leza. 46Lino mukuyanda kunununa bana bakusaanguna bali myaanda yobilo amakumi aali ciloba abatatu baindilila baalumi Balevi, 47weelede kutambula mali amasyekeli aansiliva osanwe kuzwa kumuntu omwe-omwe. Mali aayo aendelane amweelwe wakuŋanda ya Leza ooko syekeli lyomwe nkolili magela aali makumi obilo. 48Mali aayo waape Aloni abana bakwe. 49Mpawo Mozesi wakatambula mali aalununuzyo lwabaabo bakaindilila mweelwe wabaabo bakanununwa a Balevi. 50Mali aayo akali kusika kucuulu comwe amyaanda yotatwe amakumi aali cisambomwe aasanu. 51Nkabela Mozesi wakaapa mali kuli Aloni abana bakwe, mbubonya mbuli mbwaakalaililwa a Mwami Leza.”
Currently Selected:
Myeelwe 3: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.