लूका 3

यूहन्ना बपतिस्मा देणु आल़ै रा संदेश

1तिबिरियुस महाराज़ै रै राज्य रै पँध्रुऐ बौर्षा न ज़ैबै पुन्तियुस पिलातुस यहूदिया देशा रा राज़पाल ती। तेई बौगता न हेरोदेस तेसा रियासता रै च़ार इलाकै मौंझ़ै अनतिपास, गलील ज़िलै रा राजा ती। हेरोदेसा रा भाई फिलिप्पुस, इतुरैया होर त्रखोनितिस इन्हां दुई इलाकै रा राजा ती। लिसानियास अबिलेनै इलाकै रा राजा ती। 2ज़ैबै हन्ना होर कैफा यरूश्लेम शैहरा न माहापुजारी ती, तेई बौगतै परमेश्वर रा सन्देश सुनसान ज़ैगा न जकर्याह रै बेटै यूहन्ना हागै पुजू। 3तैबै यूहन्ना यरदन नौइ रै औरलै-पौरलै सारै इलाकै न ज़ाइआ पापै री माफी री तैंईंयैं मन बदलावा रै बपतिस्मा रा प्रचार केरदा लागा। 4ऐ भविष्यवक्तै यशायाह आपणी कताबा न यूहन्नै रै बारै न ऐ लिखू सा:

“सुनसान ज़ैगा न एक पुकारनू आल़ै री आवाज़ शुणिदी लागी सा,

प्रभु री तैंईंयैं बौत त्यार केरात्, तेइरी सड़का सीधी बणात।

5हरेक घाटी भौरूई लोड़ी,

होर सैभै ढौग ता धारा निशटी केरिनी,

होर ज़ो डैंगा सा सौ सिधा केरिना होर

ज़ो उथड़ा-निष्टा सा सौ

बराबर केरुआ लोड़ी।

6हर ज़ैगा लोका हेरना कि परमेश्वर लोका बै कैण्ढै बच़ा सा।”

7ज़ो लोकै री भीड़ यूहन्ना हागै बपतिस्मै लेंदी एज़ा ती, तिन्हां बै सौ बोला ती, “तुसै ज़हरीलै कीड़ै रै शोहरु सांही सी, तुसाबै कौसियै नी दसु कि एक रोज़ परमेश्वरा तुसा रै पापा री तैंईंयैं तुसाबै सज़ा देणी। ऐण्ढा मता सोच़दै कि तुसा बची ज़ाणा? 8सबूत देआ कि तुसै सच़ीऐ पापा न पश्चाताप केरू सा। होर आपणै-आपणै मना न ऐ मता सोच़ा, कि आसरा बापू अब्राहम सा; किबैकि हांऊँ तुसा न सच़ बोला सा परमेश्वर इन्हां पात्थरा न अब्राहमा री तैंईंयैं औलाद पैदा केरी सका सा। 9परमेश्वर तुसाबै सज़ा देणै री तैंईंयैं त्यार बेशु सा, ज़ैण्ढै एक मांहणु फ़ौल़ नी देणै आल़ै बूटै रै जलाड़ै बै काटा सा, तैण्ढाऐ परमेश्वरै ते लोका बी आँगी केरिया औगी न पाणै ज़ो शोभलै कोम नी केरा सी।” 10तैबै लोकै यूहन्ना न पुछ़ू, “परमेश्वरै री सज़ा न बच़णै री तैंईंयैं आसा कि केरना?” 11यूहन्नै तिन्हां बै बोलू, “ज़ुणी हागै दुई कुरतै सी ता एक सौ तेई मांहणु बै देला ज़ुणी हागै नी ऑथि होर ज़ुणी हागै खाँणै बै सा सौ तिन्हां सैंघै बौंडला ज़ुणी हागै नी ऑथि।” 12किछ़ च़ुँगी लेणु आल़ै भी बपतिस्मा लेन्दै आऐ, होर तिन्हैं यूहन्ना न पुछ़ू, “ओ गुरू जी, आसा कि केरना?” 13यूहन्नै तिन्हां बै बोलू, “ज़ेतरी च़ुँगी सरकारै ठहराई दी सा तेथा न ज़ादा मता लेंदै।” 14तैबै किछ़ सपाई भी बोलदै लागै, “आसै कि केरना?” यूहन्नै तिन्हां बै बोलू, “तुसै कौसी सैंघै ढैबुऐ देणै री तैंईंयैं ज़बरदस्ती मता केरदै, होर कौसी पैंधै झूठा दोष मता लांदै, आपणी कमाई न खुश रौहात्।” 15ज़ैबै सैभै लोका मसीह री आश लाइया बेठैंदै ती होर सैभै आपणै-आपणै मना न यूहन्नै रै बारै न विचार केरदै लागैदै ती कि ऐ मसीह ता नी। 16तैबै यूहन्नै तिन्हां सैभी बै बोलू, “हांऊँ ता तुसाबै पाणियै लाइया बपतिस्मा देआ सा पर सौ छ़ेकै ऐणु आल़ा सा ज़ो मूँ न शक्तिशाली सा। हांऊँ ता एस लायक बी नी ऑथि कि तेइरै बूटै रै तस्मै खोलनू। तेई तुसाबै पवित्र आत्मा होर औगी सैंघै बपतिस्मा देणा। 17तेइरा शूप तेइरै हौथा न सा। तेई आपणा खौल़ शोभली तैरहै साफ केरना। तेई गेहूँ भूज़ा न आँगी केरिया आपणी कोठड़ी न डाहणै होर भूज़ नैंई हिशणु आई औगी न फुकणा।” 18यूहन्ना ऐण्ढै तैरहै बोहू सारी शिक्षा देईया लोका बै खुशी रा समाद शुणादा रौहू।

हेरोदेस द्वारा यूहन्ना बै कैदखानै न पाणा

19पर ज़ैबै यूहन्नै हेरोदेस राज़ै बै तेइरै भाई फिलिप्पुसै री लाड़ी हेरोदियासा सैंघलै बुरै कोमै रै बारै न झ़िड़कू, 20ता हेरोदेसै राज़ै यूहन्ना बै जेला न पाईआ ऐथा न बी बुरा कोम केरू।

यूहन्ना प्रभु यीशु बै बपतिस्मा देआ सा

21पर यूहन्नै रै जेल होंणै न पैहलै एक रोज़ ज़ैबै बोहू लोकै बपतिस्मा लेऊ, ता यीशुऐ बी बपतिस्मा लेऊ। ज़ैबै यीशु प्रार्थना केरदा लागा तैबै स्वर्ग खुलू। 22तैबै न बाद पवित्र आत्मा कबूतरै रै रूपा न आत्मा आपु पैंधै उतरी होर स्वर्गा न एक आवाज़ हुई “तू मेरा प्यारा बेटा सा, हांऊँ तौ न खुश सा।”

यीशु री वँशावली

23ज़ैबै यीशुऐ लोका मौंझ़ै आपणी सेवा केरनी शुरू केरी, तैबै ते लगभग तीह बौर्षै रै ती। लोका यीशु बै यूसुफा रा बेटा समझा ती। यूसुफ एली रा बेटा ती, 24एली मताता रा बेटा ती। मतात लेवी रा बेटा ती, लेवी मलकी रा बेटा ती, मलकी यन्ना रा बेटा ती, होर यन्ना यूसुफा रा बेटा ती, 25यूसुफ मतित्याह रा बेटा ती। मतित्याह आमोसा रा बेटा, आमोस नहूमा रा बेटा ती। नहूम असल्याह रा बेटा होर असल्याह नग्‍गई रा बेटा ती, 26नोगहा माता रा बेटा ती, मात मत्तित्याह रा बेटा ती, मत्तित्याह शिमी रा बेटा, शिमि योसेखा रा बेटा होर योसेख योदाह रा बेटा ती, 27योदाह यूहन्ना रा बेटा ती, योना रेसा रा बेटा, रेसा जरूब्बाबिला रा बेटा ती। जरूब्बाबिल शालतियेला रा बेटा होर शालतिएल नेरी रा बेटा ती, 28नेरी मलकी रा बेटा ती। मलकी अद्दी रा बेटा ती, अद्दी कोसामा रा बेटा ती। कोसाम इलमोदामा रा बेटा होर इलमोदामा रा होर सौ एरा रा बेटा ती, 29ऐ यहोशू रा बेटा ती। यहोशू इलाज़ारा रा बेटा, इलाज़ार योरीमा रा बेटा ती। योरीम मताता रा बेटा होर मतात लेवी रा बेटा ती, 30लेवी शमौना रा बेटा ती। शमौन यहूदा रा बेटा, यहूदा यूसुफा रा बेटा ती। युसूफ योनाना रा बेटा होर योनान इलयाकीम रा बेटा ती, 31इलयाकीम मलेआह रा बेटा ती। मलेआह मिन्नाह रा बेटा, मिन्नाह मतता रा बेटा ती। मतता, नातान रा बेटा होर नातान दाऊदा रा बेटा ती, 32दाऊद यिशै रा बेटा ती। यिशै ओबैदा रा बेटा, ओबैद बोआज़ा रा बेटा ती। बोआज़ सलमोना रा होर सलमोन नहशोन रा बेटा ती। 33नहशोन अम्मीनादाबा रा बेटा ती। अम्मीनादाब आदमीना रा बेटा, होर आदमीन अरनी रा, अरनी हेस्रोन रा बेटा ती, हिस्रोन फिरिया रा बेटा होर पेरेस यहूदा रा बेटा ती, 34यहूदा याकूबा रा बेटा ती। याकूब इसहाका रा बेटा ती, इसहाक अब्राहमा रा बेटा ती। अब्राहम तिरह रा बेटा ती होर तिरह नाहोरा रा बेटा ती, 35नाहोर सरूगा रा बेटा ती। सरूग रऊ रा बेटा, रऊ फिलिगा रा बेटा ती, फिलिग एबिरा रा बेटा ती होर एबिर शिलह रा बेटा ती, 36शिलह केनाना रा बेटा ती। केनान अरफक्षदा रा बेटा ती, अरफक्षद शेम रा बेटा ती। शेम नूहा रा बेटा होर नूह लिमिक रा बेटा ती। 37लिमिक मथूशिलह रा बेटा ती। मथूशिलह हनोका रा बेटा ती, हनोक यिरिदा रा बेटा ती, यिरिद महललेला रा बेटा होर महललेल केनाना रा बेटा ती, 38होर सौ एनोशा रा बेटा ती। एनोश शेता रा बेटा ती, शेतै आदमा रा बेटा होर आदम परमेश्वरै बणाऊ ती।

Currently Selected:

लूका 3: KFX-NT

Highlight

Copy