Luke 15
15
Iitassak Kalinilu
(Matthew 18.12-14)
1Tewin nà wei yattai tukkan kon pùlayatta pili'nài nan molopai àli ku'nài nan uyàpùppù màlà Jesus uselupa yetase. 2Pharisee yamùk molopai Law pàk enupannan tawonnan wessa'molùkappù màlà tùusàulàma kon pàk, “Pùsàlà mùkkàlà kàyik àli ku'nài nan yanùnnài molopai tùuta'lettàsen tok pokonpe!” tukaik.
3Màlàpàk Jesus uya sàlà panton yekamappù màlà tok pàk. 4“Tukke 100 pe kalinilu yamùk yesappe àtonpa kon wechi. Molopai tewin nà tok tonpa utassak yau, yà'là ku'nài ken mùkkàlà? 99 pan kon nànnài ku lola wanak yau molopai tùutàsen iitassak lùppù kalinilu iwase yepolo tùuya ponalà. 5Yeposak tùuya yau, tùutauchinpasen mùkkàlà màlà yattai kalinilu nonkanài tùmota pona. 6Yemeikkanài mùkkàlà ipatassek yak, molopai tùwechi yakon non molopai takontalù yamùk kà'manài mùkkàlà. ‘Atauchinpatàk kon upokon pe, masapùla uyùkùn iitassak lùppù kalinilu yeposak uya man!’ te ya tok pàk. 7Màlà kasa làma màlà eke pe utauchinpantok wechi màlà Epùn po, tewin nà tùmakuyi yawon welattàsak àli kuttok tùuya winàpai yau, 99 pan kon ikasa kulu tùwessan kappon yamùk pàk utauchinpan yentai, tukaik tekamayaik àpàkù'nokon,” teppù Jesus uya.
Yenu'masak Lùppù Pùlayatta Pun
8“Wapùla nossan wechi là 10 pe chilùpa pun yamùk yesappe. Molopai tewin nà yenu'masak tùuya yau, yà'là ku'nài ken mùkkàlà? Tùlanppuyi pottànài kutà, tùwùk yakolokanài là, molopai wakù pe iwanài i'nailàlà yepolo tùuya ponalà. 9Yeposak tùuya yau, tùwechi yakon non molopai takontalù yamùk kà'manài mùkkàlà, ‘Atauchinpatàk kon upokon pe, masapùla pùlayatta pun unenu'mappù lùppù yeposak uya man!’ tawon mùkkàlà tok pàk. 10Màlà kasa làma inchelù yamùk mùkyamlo tùutauchinpasan tewin nan nà àli ku'nài kappon welattàsak àli kuttok tùuya winàpai yau,” teppù Jesus uya.
Iwe'lachimasak Lùppù Umoine Pantomù
11Jesus wechippù tùuselupa pàk lùppù molopai wateppù ya, “Kàyik wechippù màlà asa'lon kon walawotichi imunkà. 12Imu yakon uya tùkàipùnù pàk, ‘Ukàipùnù, uponalok uchi mamin ke kùlepakà,’ teppù. Màlàpàk tok kàipùnù uya mamin pantakappù tok yemyak. 13Tukke kulu wei tùpo pùla imu yakon uya tamù'nawàlà tùponalok pilipùppù molopai iitàppù meyon pata yak, molo tùpùlayattayi yu'makappù ya àli pe tùwemattok yau. 14Tamù'nawàlà itesak pe tùwettok yu'makappù ya tùse eke pe iwan wechippù màlà pata yawàlà, molopai iwà'nànsak wechippù màlà yà'làlà pùla. 15Màlà yattai iitàppù màlà e'wotokomase, pata yawon kon tonpa piyak, mùkkàlà uya yeunokoppù tù'mà yak tùkùn non puluku yamùk mainanpa toppe ya. 16Ata'lettàpai iwechippù màlà kumata pippà puluku yamùk nùnapù pàk. Molopai ànù'là uya ilepappù pen iteipa ke. 17Màlàyau wakù pe iichenumenkatok uya yepoloppù, ‘Tamù'nawolon kon nà ukàipùnù ponaloppe tùwe'wotokomasan wechi eke pe iteipa tok uya inapù yentai tùse talà wessaik wapàkkapù pàk te,’ teppù ya. 18‘Wessalattà màlà molopai utà ukàipùnù piyak molopai wate uya ipàk, “Ukàipùnù, wemakuimasak man epùn winàkàik molopai ewinàkàik. 19Àmu pe làma yesatù yeselùkek pùla wessaik tùse àponalok pe tùwe'wotokomasan tonpa pe kùmakà teuya,” teppù ya.’ 20Màlàyau iwe'wuluukappù molopai iitàppù tùkàipùnù piyak.
“Mei lùppù iwechi tùse ikàipùnù uya yeneppù. Ichentupappù kulu màlà ipàk molopai aitun pe yepose iitàppù. Temekun tùlùppù ya i'mù woi molopai kismappù ya. 21Màlàyau imu uya wateppù ipàk ‘Ukàipùnù, wemakuimasak man epùn winàkàik molopai ewinàkàik. Màlàpàk àmu pe làma yesatù yeselùkek pùla wessaik,’ teppù umoine uya. 22Tùse ikàipùnù uya tapyoto yamùk pàk, ‘Asse'ne, wakù kulu pon inettàk kon molopai ipontàtàk kon. Lin itùtàk kon itemyatù pàk molopai sapattu itùtàk kon itta pàk,’ teppù. 23‘Molopai kaiwan kulu paka mule inettàk kon molopai iwànàtàk kon. Uta'lettànpai'nokon man molopai utauchinpanpai'nokon. 24Masapùla pùsàlà umu welichak wechippù màlà, tùse nen uchi sàlà pe pàli'yau man. Iitassak wechippù màlà tùse iwesseposak man!’ teppù ikàipùnù uya. Màlà yau nen uchi tok wessa'molùkappù màlà tùuta'lettà kon pàk.
25“Màlà yattai wapiyalok imu wechippù màlà umà yau. Tùuyàssak molopai mei pùla tùwenasak tapùi piyak yau, wai tàwù molopai manùnnà yetappù ya màlà. 26Apyoto tonpa kà'mappù ya màlà molopai yekamappoppù ya, ‘Yà'là ken nekkussan molo?’ tukaik. 27‘Ayakon wemeichak man, molopai àkàipùnù uya kaiwan kulu paka mule wàsa'man, masapùla pàli'yau, molopai e'neppe là pùla iwennaposak pàk,’ tukaik apyoto uya yeikuppù. 28Wapiyalok imu we'naikasak wechippù màlà. Màlàyau iwewomù pùla iwechippù tapùi tak. Màlàpàk ikàipùnù wepakkappù molopai ipawanattàppù ya iwewontoppe. 29‘Masa yenkà, tàwàlà là tukke kilichimochi we'wotokomasak man àponalok pe apyoto kasa, molopai tewin itekkwa là amaimu yawàlà pùla wessak pùla man. Tuse kapala mule ke lùkkwà là ulepasak auya pùla man utonpa yamùk pokonpe uta'lettà toppe,’ tukaik tùkàipùnù maimu yeikuppù ya. 30‘Tùse pùsàlà àmu uya eyemamin mattanùpùppù man kàyik yamùk yemyak tùwechilanmasan nossan yamùk pona, molopai lù'nen uchi iwennapposak yau, kaiwan kulu paka mule wàsak auya iponalok pe!’ teppù ya. 31‘Umu, upyawon àmàlà tàwàlà là molopai tamù'nawolon itesak pe wettok màlà àponalok. 32Tùse uta'lettàn uchi sàlà molopai utauchinpan. Masapùla ayakon welichak wechippù màlà, tùse nen uchi sàlà pe pàli'yau man. Iitassak wechippù màlà tùse sàlà pe iwesseposak man,’ teppù ya,” teppù Jesus uya.
Currently Selected:
Luke 15: PNTR
Highlight
Share
Copy
Want to have your highlights saved across all your devices? Sign up or sign in
Patamuna New Testament Revised © United Bible Societies, 1973, 2019.
