Luke 24

Jesus We'wuluukatok

(Matthew 28.1-10; Mark 16.1-8; John 20.1-10)

1Ko'làma kulu, Suntayaka yattai, nossan yamùk utàppù uluwaik pona apoi'nan tùnkonekappù kon yalàppù tok uya. 2Tùutàsak kon yau tàk yamasak uluwaik mùlatta poi yepoloppù tok uya màlà. 3Tok wewomùppù màlà yak, tùse tok uya Itepulu Jesus yàkàppù yepoloppù pen màlà. 4Tok wechippù màlà satippe tùusenumenka kon pàk ipàk, màlà yattai asa'lon kon kàyik yamùk usenpoikappù tok piyak, akkwa pe tok pon wechippù. 5Tùusenalippaik kulu nossan yamùk wepeimappù non pona, màlàyau kàyik yamùk uya tok pàk, “Yà'là peichi iwechi pàk iwelichak kon kùlottau pàli'yawon nà iwa auya'nokon màlà?” teppù. 6‘Ipla man talà, iwe'wuluukappù man. Ittutàk kon wa teppù ya lùppù àpàkù'nokon Galilee po tùwechi yau. 7‘Kàyik Mumu tùlù màlà àli ton kappon yamùk yemyak, ipukapàttoppe pulusuk pona molopai iwuluuka toppe icholùwano wei yattai,’ teppù asa'lon kon kàyik yamùk uya. 8Màlàyau nen uchi nossan yamùk uya Jesus maimuppù ittuppù màlà. 9Tok wennapoppù uluwaik poi, tok uya màlà yekamappù 11 pan kon ya'lon kon nùssan pàk molopai tamù'nawolon kon tok tonpa yamùk pàk. 10Pùsamlo nossan yamùk wechippù màlà Mary Magdalene, Joanna, molopai Mary, James yan, tawonnan. Mùkyamlo molopai tùulon kon nàlà nossan yamùk uya sàlà yamùk yekamappù màlà yeunossak kon nùssan pàk. 11Tùse yeunossak kon nùssan uya nossan yamùk usennaka pe yekamappù màlà, molopai ailon teppù tok uya pen tok pàk. 12Tùse Peter we'wuluukappù molopai aitunpe iitàppù uluwaik pona, iwepeimappù màlà uluwaik yak yense màlàyau yassan nùssan neken linen yeneppù ya màlà molopai yà'là là pùla. Màlàyau iwemeikuppù tùusenumenka pe ipàk.

Emmaus Pona Utàntok

(Mark 16.12-13)

13Màlà wei yattai là asa'lon kon kappon yamùk utàppù màlà pata lùkkwà Emmaus itesek yak, mei lùkkwà là Jerusalem poi. 14Tok uselupappù màlà tamù'nawolon iwekkussak lùssan pàk. 15Tok uselupa màlà yamùk pàk tùse, Jesus uya tok yepoloppù molopai iitàppù tok ya'là. 16Tok uya yeneppù, tùse ànùk pe là tok uya ittuppù pen. 17Jesus uya tok pàk, “Yà'là pàk euselupa kon màlà tùuseippàsse là, àutài'ma'nokon?” teppù. Molopai tok weleutappù peten satippe ichewankono'masak pe'ne itenpata. 18Tewinan nà tok tonpa Cleopas itesek uya yekamappoppù, “Àmàlà neken na' mùkkàlà kàyik Jerusalem po tùwemassen ko'manyakù'ne iwekkussak lùppù ittunài pen?” tukaik. 19“Yà'là yamùk uchi?” tukaik, tok yekamappoppù ya. “Màlà yamùk uchi Jesus Nazareth pon pàk iwekkussak lùppù,” tukaik tok uya yeikuppù. “Pùsàlà kàyik wechippù màlà Katù Maimu yenpoikanài pe. Katù nùttu, molopai kappon yamùk nùttu, meluntà pe imaimu yau molopai iwotokoyi yau. 20Eke ton paatele yamùk molopai ennài nan uya itùlùppù màlà iwàtoppe molopai tok uya ipukapàtùppù pulusuk pona. 21Molopai mùkkàlà uya Israel pùikattà pe yekamasakù'nokon tùse! Sàlà màlà icholùwano wei nai'nùk iwekkupùppù motapai. 22-23Nossan yamùk ina kùlottawon kon ina usenumenkatok ke ina lepai, tok nùtài ko'làma pata utakkwaka pe uluwaik pona, tùse tok uya Jesus yàkàppù yepoloppù pùla nechii. Tùwennapposak kon yau we'nepà'nà kasa Inchelù yamùk yenei ina nùkai tok, mùkyamlo uya Pàli'yau iwechi yekamappù nechii tok pàk. 24“Màlàpàk ina tonpa yamùk nùtài uluwaik pona, màlà yau tok uya yepoloppù nechii nossan yamùk uya yekamappù kasa, tùse tok uya mùkkàlà yeneppù pen,” teppù tok uya.

25Màlàyau Jesus uya tok pàk, “Pakko pe messatàik, asse'ne ailon tawonn pe pùla messatìk Katù Maimu yenpoikannan nekamappù pàk! 26Yà'là woton pe pùla ken na' uchi màlà, mùkkàlà Christ wettalumattàtok wechippù, molopai nàlà iitàtok tapulàtok yak?” teppù. 27Molopai Jesus uya tok pàk tamù'nawàlà Katù Maimu uselupasak tùpàk lùppù yekamappù màlà tok pàk, iweppyattàppù màlà Moses kaletayi yamùk motapai molopai tamù'nawàlà Katù Maimu yenpoikannan nùmenukappù pùkkù yak. 28Tok uyàpùppù màlà mei pùla lùiwa nen uchi pata tùutàtok kon yak winàkàik molopai miya lùiwa tùutà pe tukaik Jesus utàppù. 29Tùse tok wechippù iità iche pùla, màlàyau tok uya, “Talà ina piyau we'nàpai, pata uko'mansak man molopai ewalupà pe nenayan,” teppù. Màlàyau iwewomùppù, tok piyau esse. 30Iweleutappù màlà kùyali yapon piyau tok pokonpe, pùlomù pusak yanùmùppù ya, ipùlemappùya. Màlà tùpo ipilipàtùppùya, tok yemyak nen uchi itùpàtùppù ya. 31Tok yenu utakkokappù nen uchi màlà molopai tok uya ittuppù ipe, tùse iwaliwomùppù màlà tok piyapai. 32Tok uya tùyiwalà'nokon, “Wakù peichi kùyewan kon yauchinpaya pùn, asantau kùyelupakon ya Katù Maimu pàk yau?” teppù.

33Tok we'wuluukappù màlà asse'ne molopai tok wennapoppù Jerusalem pona, molo 11 pan kon Jesus ya'lon kon nùssan wepilichak tamùkke tùulon kon pokonpe yepoloppù tok uya, 34molopai tok uya, “Itepulu we'wuluukasak lù'man! Simon uya yeneppù man!” teppù. 35Asa'lon kon kappon yamùk uya nen uchi iwekkussak lùppù asantau molopai Itepulu Jesus ittuppù tùuya'nokon pùlomù pusak pilipàtù ya yau yekamappù tok pàk.

Jesus Usenpoika Ta'lon Kon Nùssan Piyak

(Matthew 28.16-20; Mark 16.14-18; John 20.19-23; Yeunossak kon Wotokoyi 1.6-8)

36Sàlà yekama pàk tok wechi tok pàk tùse, asse'ne kulu Itepulu Jesus usenpoikappù tok kùlottak satippe molopai tok pàk, “Echitonpa pe we'nàtok wechi àkklottau'nokon màlà,” teppù ya. 37Tok usenalippasak wechippù kulu màlà, wolo'yan yene tùuya'nokon pe tok uya yekamappù. 38Tùse tok pàk “Yà'là peichi iwechi pàk autaimelunpa kon màlà, molopai eusenumenkatok kon yau ailon tetok ma'le ewechi kon? 39Masa uyemyatù yamùk, molopai utta yamùk yentàkkon molopai Iulà pe iwechi ittukon pa. Kùyappàttàk kon molopai yene auya'nokon màlà, wolo'yan mùkkàlà ipun pùn molopai yàppù pùn, itesak pe wechi menyatàik,” teppù ya. 40Temyatù molopai tùtta tawon yenpoikappù ya màlà tùuselupai'ma. 41Ailon te tok uya pùla lùppù là tùse tok utauchinpasak kulu wechippù màlà molopai tok usenumenkasak. Màlàpàk tok yekamappoppù ya, “Yà'làlà na' talà tùnassen molo nai apyau'nokon?” tukaik. 42Tok uya molok pusak pilikasak ke ilepappù. 43Yekkwatùppù ya màlà molopai yanùppù ya tok yemloto po.

44Màlàyau tok pàk, “Sàlà yamùk uchi màlà àpàkù'nokon unekamappù apyau'nokon nùppù wechi yattai, tamù'nawolon imenukasak lùppù upàk Law Moses winàpaino yawon, molopai Katù Maimu yenpoikannan nùmenukappù yawon, molopai Psalms kaletayi yawon tawonnan wekkupùppù màlà ailon pe,” teppù Jesus uya. 45Màlàyau tok usenumenkatok yakkokappù ya Katù Maimu ittutoppe tok uya. 46Molopai tok pàk, “Sàlàichi màlà imenukasak lùppù mùkkàlà Christ wettalumattà màlà molopai iwe'wuluuka tùwelikù tùpo icholùwano wei yattai, tawon. 47Molopai itesek yau àli kuttok winàpai welattàntok Katù winàkàik, molopai àli kuttok pàk usentuppantok yekale yekama màlà tamù'nawàlà pata yamùk yawàlà, Jerusalem poi tùpyattàse. 48Amyamloichi mùkyamlo sàlà yamùk yekaman nan. 49Molopai Ukàipùnù uya itùlù uya màlà teppù lùppù yeunoko uya màlà àpona'nokon Iulà pe. Mùmàmuttàik uchi Jerusalem po meluntà uttà àpona'nokon ponalà,” teppù ya.

Jesus Yanùmù Epùn Pona

(Mark 16.19-20; Yeunossak kon Wotokoyi 1.9-11)

50Màlàyau tok yalàppù ya pata yapai, Bethany pona, molo temyatù yanùmùppù ya molopai tok pùlemappù ya. 51Tok pùlema ya tùse tok nàmàppù ya, yanùmùppù màlà Epùn pona. 52Tok uya yapulàppù molopai tok wennapoppù Jerusalem pona, eke pe tùutauchinpaik. 53Molopai tàwàlàlà tok weppàtùppù màlà Katù yùwùk tau tenki te pàk ipàk.

Currently Selected:

Luke 24: PNTR

Highlight

Copy